Bɛlɛbɔ Nyamenle Belemgbunlililɛ ne anwo edwɛkpa ne nolo wɔ ewiade amuala kɛ mɔɔ Gyisɛse hanle la. (Mateyu 24:14) Daneɛle buluku ne maa yɛnwu kɛ Belemgbunlililɛ ɛhye le Nyamenle arane. Baebolo buluku zɔhane tile 2 ka alesama tumililɛ anzɛɛ arane titili mɔɔ ɛnee badoɔdoa zo ara, ɔvi tete Babelɔn anwo zo badwu yɛ mekɛ ye la anwo edwɛkɛ. Mɔɔ bɛka mɔɔ ɔnrɛhyɛ na yeazi la anwo edwɛkɛ la, ngyɛnu 44 ne hanle kɛ:

‘Nyamenle bamaa belemgbunlililɛ ko avinde, na ɔbahomo arelemgbunlililɛ zɔhane mɔ anwo zo yeamaa bɛagolo. Belemgbunlililɛ ɛhye badɛnla ɛkɛ ne dahuu, awie ɛnrɛhola ɛnrɛzɛkye ye kenle bie maanle nu, yɛɛ awie mɔ gyɛne ɛnrɛhola ɛnrɛlie belemgbunlililɛ ne ɛnrɛbu.’

Ngapezo ɛhye nee ngapezo ngakyile maa yɛnwu kɛ Nyamenle Belemgbunlililɛ ne barali alesama belemgbunlililɛ ne agyakɛ anu na yeamaa alesama mɔɔ wɔ azɛlɛ ne azo la anzo nu adwo bɛ. Kɛzi asetɛnla bayɛ wɔ Nyamenle Belemgbunlililɛ ne abo ɛ? Ɛwɔkɛ ngakyile mɔɔ yɛ nwanwane mɔɔ ɔnrɛhyɛ ɔbara nu la bie mɔ ɛne.

• BƐNRƐHO BIEKO

  Edwɛndolɛ 46:9: “[Nyamenle] maa bɛgyakyi konle wɔ azɛlɛ ye amuala azo; ɔbubu ɛda nee atwɛ ne mɔ, ɔfa senle ɔyela konle ehwili ne mɔ!”

  Dwenle kɛzi anrɛɛ ewiade ne bayɛ saa bɛfa ezukoa nee nrɛlɛbɛ mɔɔ bɛfa bɛyɛ konle ninyɛne bɛku menli la bɛyɛ ninyɛne gyɛne mɔɔ baboa alesama la a! Wɔ Nyamenle Belemgbunlililɛ ne tumililɛ bo, ɛwɔkɛ ɛhye bara nu.

• ANWODOLƐ BAVI ƐKƐ

  Ayezaya 33:24: “Awie biala mɔɔ wɔ sua ne azo la ɛnrɛha kɛ, ‘Me nwo ɛdo me.’”

  Dwenle mekɛ mɔɔ awie biala ɛnrɛnyia ahonle ewule, kansa, ebunlu anzɛɛ ewule gyɛne biala la. Asopiti nee ayile ɛnlonlɛ bavi ɛkɛ. Menli mɔɔ de azɛlɛ ne azo la banyia kpɔkɛdelɛ mɔɔ di munli.

• ALEƐ BABU

  Edwɛndolɛ 72:16: “Maa aleɛ ɛbu azɛlɛ ne azo; maa abɛlɛ ɛzi agole wɔ awoka ne mɔ azo.”

  Azɛlɛ ne bazo ma dɔɔnwo amaa awie biala anyia bie ali. Ɛhɔne nee aleɛ kpalɛ mɔɔ bɛnnyia ye bɛnli la bavi ɛkɛ.

• NYANE, ƐZUNLƐ NEE EWULE ƐNLE ƐKƐ BIEKO

  Yekile 21:4: ‘Nyamenle bakyikyi bɛ nye anwo monle kɔsɔɔti, na ewule ɛnle ɛkɛ bieko, yɛɛ alɔbɔlɛ nee ɛzunlɛ nee nyane ɛnle ɛkɛ bieko. Alimoa ninyɛne ne ɛpɛ nu.’

   Ɛhye kile kɛ, yɛbali munli na yɛadɛnla aze dahuu wɔ Paladaese azɛlɛ zo! Ɛhye a yɛ Bɔvolɛ ne mɔɔ lɛ ɛlɔlɛ, Gyihova Nyamenle ɛva ɛbɔ yɛ ɛwɔkɛ a.

Ɛnea a, ɔyɛ se kɛ ɛwɔkɛ ɛhye mɔ bara nu ɔ? Menli dɔɔnwo die di kɛ, ɛwɔkɛ mɔɔ bɛha nwolɛ edwɛkɛ wɔ Baebolo ne anu la yɛ anyelielɛ, noko ɔlua tɛnlabelɛ bie mɔ ati, saa bɛte kɛ mekɛ bie bara mɔɔ yɛbadɛnla aze dahuu a, bɛnlie bɛnli. Ɔnyɛ nwanwane ɔluakɛ sonla biala ɛtɛnyianle zɔhane asetɛnla ne bie ɛlɛ na yeaha nwolɛ edwɛkɛ yeahile yɛ.

Alesama ɛhɔ ɛtane nee ewule akɛlɛzonlenlɛ bo, na nyane, amaneɛnwunlɛ yɛɛ esiane nee yɛ ɛdɛnla ɛhyɛ, yemɔti yemaa menli dɔɔnwo ɛde nganeɛ kɛ ɔboka sonla ɛbɛlabɔlɛ nwo. Noko ɛnee tɛ bodane mɔɔ yɛ Bɔvolɛ Gyihova Nyamenle lɛ maa alesama la ɛne.

Amaa yɛalie yɛali bɔkɔɔ kɛ ye ɛwɔkɛ ne mɔ bara nu la, Nyamenle ɛha ye wienyi kɛ: ‘Me edwɛkɛ ɛnrɛzia ɛnrɛra me nwo ɛke mgbane. Ɔbayɛ mɔɔ medwenle nwo kɛ ɔrayɛ la, na yeakpazi mɔɔ menzoanle ye nwolɛ la ɛyɛlɛ nu.’​—Ayezaya 55:11.

Bɛha Gyihova anwo edwɛkɛ wɔ Baebolo ne anu kɛ, “Nyamenle mɔɔ ɔngola ɔmbɔ adalɛ.” (Taetɛse 1:2) Kɛmɔ yeva kenle bie kɛnlɛma ɛhye yebɔ yɛ ɛwɔkɛ la ati, ɔbayɛ kpalɛ kɛ yɛbazuzu kpuya ɛhye mɔ anwo: Asoo amgba alesama badɛnla aze dahuu wɔ Paladaese azɛlɛ zo? Duzu a yɛbayɛ amaa yɛanyia Nyamenle ɛwɔkɛ ɛhye mɔ azo nvasoɛ a? Bɛbua kpuya ɛhye mɔ wɔ edwɛkɛ mɔɔ doa zo la anu.