NEA KƐZI ANYELAZO ƐHYE YƐ AZIBƐNWO A! Yɛ Bɔvolɛ ne ɛbɔ ɛwɔkɛ kɛ ɔbamaa yɛ dahuu ngoane, wɔ azɛlɛ ɛhye azo. Ɔyɛ se kɛ menli dɔɔnwo balie edwɛkɛ ɛhye ali. Bɛka kɛ, ‘awie biala bawu. Bɛvale ewule nee ngoane bɛbokale nwo bɛbɔle yɛ.’ Bie mɔ die di kɛ yɛbahola yɛadɛnla aze dahuu noko tɛ azɛlɛ ɛhye azo ɔ. Bɛka kɛ kyesɛ yɛwu yɛkɔ anwuma na yɛanyia dahuu ngoane. Kɛzi ɛdwenle nwo ɛ?

Kolaa na wɔabua la, nea mɔɔ Baebolo ne ka ye wɔ kpuya nsa ɛhye mɔ anwo la: Kɛzi adenle mɔɔ bɛluale zo bɛbɔle sonla la maa yɛnwu mekɛ tendenle mɔɔ anrɛɛ ɔwɔ kɛ sonla tɛnla ngoane nu la ɛ? Bodane boni a, mɔlebɛbo ne ɛnee Nyamenle lɛ maa azɛlɛ ne yɛɛ menli a? Kɛ ɔyɛle mɔɔ alesama wu ɛ?

Wɔ ninyɛne mɔɔ ngoane wɔ nu mɔɔ Nyamenle ɛbɔ ɛgua azɛlɛ ye azo la amuala anu, sonla le ngakyile. Adenle boni azo? Baebolo ne ka kɛ alesama ala a Nyamenle bɔle bɛ wɔ ye “ɛsaso” zo na ‘bɛzɔho’ ye a. (Mɔlebɛbo 1:26, 27) Ɛhye kile duzu? Ɔkile kɛ Nyamenle maanle alesama ye subane ngakyile ne mɔ le kɛ ɛlɔlɛ nee pɛlepɛlelilɛ ne bie.

Eza ɔmaanle alesama adwenle, debie mɔɔ maa bɛkola bɛsuzu ninyɛne nwo, na ɔmaa bɛkola bɛnwu kpalɛ nee ɛtane yɛɛ ɛhulolɛ mɔɔ bɛlɛ kɛ bɛbanwu Nyamenle na bɛ nee ye anyia abusuabɔlɛ la. Ɛhye ati a yɛkola yɛnwu kɛzi ewiade ne kpole de, kɛzi ye abɔdeɛ yɛ nwanwane, adwinli ninyɛne, edwɛne yɛɛ edwɛkɛdwɛndolɛ na yɛkile nwolɛ anyezɔlɛ la. Mɔɔ tɛla ɛhye la, sonla lɛ ɛhulolɛ kɛ ɔbazonle ye Bɔvolɛ ne. Ninyɛne ɛhye mɔ maa alesama yɛ ngakyile bɔkɔɔ wɔ abɔdeɛ mɔɔ ngoane wɔ nu mɔɔ bɛwɔ azɛlɛ ye azo la anwo.

Yemɔti suzu nwo: Saa Nyamenle kulo kɛ yɛtɛnla aze mekɛ ekyi bie ala a, asoo anrɛɛ ɔbabɔ yɛ wɔ adenle titili ɛhye azo na yeamaa yɛ tumi mɔɔ maa yɛkola yɛyɛ ninyɛne bie mɔ la ɔ? Nɔhalɛ nu, Nyamenle bɔle yɛ wɔ adenle titili ɛhye azo amaa yɛ nye alie wɔ ɛbɛlabɔlɛ nu wɔ azɛlɛ ɛhye azo dahuu.

Bie mɔ ka kɛ, Nyamenle ambɔ sonla kɛ ɔdɛnla aze dahuu wɔ azɛlɛ ye azo. Bɛka kɛ, bɛbɔle azɛlɛ ne kɛ yɛradɛnla zo mekɛ ekyi bie na bɛva bɛzɔ yɛ bɛnlea amaa bɛanwu menli mɔɔ fɛta kɛ bɛkɔ anwuma na bɛ nee Nyamenle kɔtɛnla bɔkɔɔ la. Noko saa ɛhye le nɔhalɛ a, asoo anrɛɛ Nyamenle ɛnli ninyɛndane nee amumuyɛ mɔɔ ɛyi azɛlɛ ye azo la anwo ɛzonle ɔ? Kɛzi Nyamenle de la ati, ɔnrɛyɛ zɔ ɛlɛ.  Baebolo ne ka ye wɔ ɔ nwo kɛ: “Ɔdi pɛlepɛle. Ɔle Nyamenle mɔɔ di nɔhalɛ, ɔnle amumuyɛ, ɔdi pɛlepɛle, ye edwɛkɛ le fɔɔnwo.”​—Mɛla ne 32:4.

Baebolo ne ka bodane mɔɔ mɔlebɛbo ne ɛnee Nyamenle lɛ maa azɛlɛ ne la anwo edwɛkɛ kɛ: “Anwuma lɔ le [Gyihova] ɛdeɛ, yɛɛ yeva azɛlɛ ye yemaa menli.” (Edwɛndolɛ 115:16) Nyamenle bɔle azɛlɛ ne kɛnlɛma kɛ ɔbayɛ ɛleka mɔɔ alesama bɛadɛnla ye dahuu. Eza ɔvale debie biala mɔɔ yɛbahyia nwo amaa yɛ nye alie na yɛadɛnla aze dahuu la ɔbokale nwo ɔmaanle yɛ.​—Mɔlebɛbo 2:8, 9.

‘Anwuma lɔ le Gyihova ɛdeɛ, yɛɛ yeva azɛlɛ ye yemaa menli.’​—Edwɛndolɛ 115:16

Baebolo ne eza ka bodane mɔɔ Nyamenle lɛ maa alesama la anwo edwɛkɛ wienyi. Ɔhanle ɔhilele agyalɛma mɔɔ limoa la kɛ “bɛyi azɛlɛ ye na bɛzie azɛlɛ ye. Eza bɛzie . . . azɛlɛ ye azo abɔdeɛ biala mɔɔ die ɛnwomenle la.” (Mɔlebɛbo 1:28) Nea nwolɛ adenle kpole mɔɔ bɛnyianle kɛ bɛnlea Paladaese azɛlɛ ne azo na bɛbuke nuhua bɛhɔ azɛlɛ ye azo amuala a! Ɔda ali wienyi kɛ anrɛɛ Adam nee Yive nee bɛ mra mɔɔ bara nzinlii la badɛnla ngoane nu wɔ azɛlɛ ye azo dahuu na tɛ anwuma.

Ɛnee duzu ati a yɛwu a? Baebolo ne ka kɛ Nyamenle sunsum nu abɔdeɛ ne mɔ ko yɛle ɔ nwo Seetan Abɔnsam, na ɔbɔle mɔdenle kɛ ɔsɛkye Nyamenle ngyehyɛleɛ mɔɔ ɔyɛle ye wɔ Yidɛn la. Adenle boni azo?

Seetan bɛlɛbɛlale Adam nee Yive, yɛ awovolɛ mɔɔ bɛlimoa la maanle bɛrabokale ɔ nwo na bɛdwazole bɛtiale Nyamenle. Wɔ mekɛ mɔɔ Seetan hanle kɛ Nyamenle ɛlɛfa ninyɛne mgbalɛ azie bɛ la​—debie mɔɔ maa bɛkola bɛsi kpalɛ nee ɛtane nwo kpɔkɛ bɛmaa bɛ nwo la​—bɛlile Seetan anzi na bɛgyakyile Nyamenle anzililɛ. Boni a vile nu rale a? Mekɛ guale nu la bɛwule, kɛmɔ Nyamenle hanle la. Bɛminlinle dahuu ngoane nwo anyelazo mɔɔ anrɛɛ bɛbanyia ye wɔ Paladaese azɛlɛ ne azo la.​—Mɔlebɛbo 2:17; 3:1-6; 5:5.

Adam nee Yive atuadelɛ ne hanle alesama amuala ɔvi zɔhane mekɛ ne badwu ɛnɛ. Nyamenle Edwɛkɛ ne ka kɛ: ‘Ɔlua sonla ko anwo zo ɛtane rale ewiade na ewule luale ɛtane nwo zo rale, yɛɛ ewule dɛlɛle hanle menli kɔsɔɔti a.’ (Wulomuma 5:12) Yɛwu ɔlua ɛtane nee ewule mɔɔ yɛnyianle ye yɛvile yɛ awovolɛ mɔɔ limoa la ɛkɛ la ati na tɛ kɛ Nyamenle ɛhyehyɛ ɛdo ɛkɛ ne ɛmaa yɛ anzɛɛ Ye adwenle bie mɔɔ yɛnde ɔ bo la ati ɔ.

Yidɛn atuadelɛ ne anzɛkye Nyamenle mɔlebɛbo bodane mɔɔ ɛnee ɔlɛ ɔmaa alesama yɛɛ azɛlɛ ne la. Nyamenle ɛlɔlɛ mɔɔ di munli yɛɛ ye pɛlepɛlelilɛ ne hanle ye maanle ɔyɛle nziezielɛ ɔyele yɛ ɔvile ɛtane nee ewule akɛlɛyɛlɛ bo. Ɛzoanvolɛ Pɔɔlo hilehilele nu kɛ: “Ɛtane ahatualɛ a le ewule na ahyɛlɛdeɛ ne mɔɔ Nyamenle fa maa la a le dahuu ngoane wɔ yɛ Awulae Kelaese Gyisɛse ati.” (Wulomuma 6:23) Nyamenle ‘vale ɔ Ra kokye ne maanle, amaa awie biala mɔɔ kɛnyia diedi wɔ ye nu la bɛanzɛkye ye na yeanyia dahuu ngoane.’ (Dwɔn 3:16) Gyisɛse ahonle nu mɔɔ ɔvile ɔvale ɔ nwo ɔmaanle kɛ ɛkpɔnelɛ afɔlebɔlɛ la maanle yɛnyianle debie biala mɔɔ Adam maanle yɛminlinle la. a

Ɔnrɛhyɛ ɛwɔkɛ mɔɔ Nyamenle ɛbɔ kɛ azɛlɛ ne amuala bayɛ Paladaese la bara nu. Ɛ sa bahola aha kenle bie mɔɔ yɛ nwanwane ɛhye la bie saa ɛtie Gyisɛse folɛdulɛ ɛhye a: “Bɛva anlenkɛ ekyi ne anu, ɔluakɛ anlenkɛ kpole ne nee adenle tɛtɛlɛ ne kɔ ɛzɛkyelɛ nu, na menli dɔɔnwo lua nu; noko anlenkɛ ekyi ne nee adenle ɛdenraa ne kɔ ngoane nu, na menli ekyi bie a nwu ye a.” (Mateyu 7:13, 14) Ɛhɛe, kpɔkɛzilɛ ne le wɔ ɛdeɛ. Duzu a ɛbayɛ a?