SAA wɔ kulovolɛ bie ɛwu ɛlɛ a, bie a ɛdawɔ noko ɛdele nganeɛ ngakyile le kɛ alɔbɔlɛlilɛ, anwokoonwuyɛlɛ, ɛyavalɛ, ɛzulolɛ yɛɛ bɛ nwo fɔlɛbualɛ. Anzɛɛ ɛdele nganeɛ kɛ ɛnlɛ moalɛ biala yɛɛ nvasoɛ ɛnle zo bɔbɔ kɛ ɛbadɛnla ngoane nu bieko.

Ɔnle ɛtane kɛ ɛbali alɔbɔlɛ, saa bɔbɔ ɔkyɛ a. Mɔɔ ɔkile la a le kɛ ɛkulo wɔ kulovolɛ ne kpalɛ. Noko akee, asoo ɛbahola wɔanyia anwodɔlɛ ekyi wɔ wɔ nyanelilɛ nu ɔ?

Wɔ mekɛ mɔɔ ɔzɔho kɛ wɔ nyanelilɛ ne ɛnrɛra awieleɛ la, nzuzulɛ ɛhye mɔ bahola akyekye ɛ rɛle:

ƆNLE ƐTANE KƐ ƐBALI NYANE MEKƐ TENDENLE

Asolo kɛzi awie biala di nyane anzɛɛ mekɛ dodo mɔɔ ɔfa ɔdi nyane la. Noko akee, ɛzunlɛ boa maa nyanelilɛ ka aze. Vanessa mɔɔ yɛlimoa yɛha ɔ nwo edwɛkɛ la ka kɛ: “Ɛnee mekulo kɛ me nyanelilɛ ne fi me nu, ɔti ɛnee mesu.” Sofía mɔɔ ɔ diema raalɛ wule arɛlevilɛ nu la ka kɛ: “Saa medwenle mɔɔ ɔdole me la anwo a, ɔyɛ me nyane kpole. Ɔle kɛ wɔdu hanlɛ na bɛlɛmia bamaa wɔ la. Ɔyɛ nyane kpalɛ, noko yemɔ a maa hanlɛ ne kɔ a.”

KA WƆ NZUZULƐ NEE WƆ NGANEƐDELƐ NWO EDWƐKƐ

Ndelebɛbo wɔ nu kɛ ɔyɛ a, ɛkulo kɛ ɔka ɛ ngomekye la. Noko, nyanelilɛ le adesoa kpole mɔɔ ɔnle kɛ  ɛ ngomekye ɛsoa a. Jared mɔɔ ɛli ɛvolɛ bulu nee nsuu mɔɔ ye papa ɛwu la hanle kɛ: “Menganle kɛzi mete nganeɛ la mengilele awie mɔ. Mengola mennwu ye saa bɛdele mɔɔ menganle la abo a, noko ɔle kpalɛ kɛ mengolale menganle la.” Janice, mɔɔ yɛlimoa yɛha ɔ nwo edwɛkɛ la hanle debie fofolɛ mɔɔ boale ye la anwo edwɛkɛ kɛ: “Menli mɔɔ me nee bɛ dendɛle la boale me kpalɛ. Mendele nganeɛ kɛ bɛte me edwɛkɛ bo na yemɔ boale me.”

DIE MOALƐ TO NU

Dɔketa ko hanle kɛ: “Saa menli mɔɔ ɛlɛdi alɔbɔlɛ la maa bɛ gɔnwo mɔ yɛɛ bɛ mbusuafoɔ boa bɛ wɔ mɔlebɛbo ne ala a, ɔmaa bɛkola bɛgyinla nyanelilɛ mɔɔ bara nzinlii la anloa.” Bie a ɛ gɔnwo mɔ bahulo kɛ bɛboa wɔ noko bɛnze mɔɔ ɛhyia nwo a, ɔti maa bɛnwu mɔɔ bɛbahola bɛayɛ bɛaboa wɔ la.​—Mrɛlɛbulɛ 17:17.

BIKYE NYAMENLE

Tina hanle kɛ: “Mekɛ mɔɔ kansa hunle me hu la, ɛnee akee menrɛhola menrɛha me edwɛkɛ menrɛhile ye, yemɔti Nyamenle ala a ɛnee meka me edwɛkɛ mekile ye a. Nwonlomɔ biala mesɛlɛ ye kɛ ɔboa me. Na kɛzi Nyamenle boale me la ɛdeɛ, menrɛhola ye tia.” Tarsha mɔɔ ye mame wule wɔ mekɛ mɔɔ ɛnee yeli ɛvolɛ 22 la hanle kɛ: “Baebolo ɛgengalɛ a kyekyele me rɛle alehyenlɛ biala a. Ɔmaa menyia debie kpalɛ medwenledwenle nwo.”

PƐ EWUDWAZO NE ANWO NVONINLI

Tina doale zo kɛ: “Mɔlebɛbo ne, ewudwazo anyelazo ne ankyekye me rɛle wɔ me hu ewule ne anwo, ɔluakɛ ɛnee me nee me mra ne mɔ hyia ɔ nwo ɛkɛ ne ala. Noko, wɔ ɛvolɛ nna anzi, anyelazo ɛhye ɛboa me ɛmaa megyinla nu na ɔtɛboa me. Mempɛle nwolɛ nvoninli kɛ menwu ye bieko, na yemɔ maanle me anzodwolɛ nee anyelielɛ!”

Bie a ɛnrɛnyia anwodɔlɛ ɛkɛ ne ala wɔ wɔ nyanelilɛ nu ɛdeɛ, noko akee, Vanessa anwubielɛ ne bahola akyekye ɛ rɛle. Ɔka kɛ, “Bie a ɛte nganeɛ kɛ ɛnrɛhola ɔ nloa gyinla fee, noko ngyikyi ngyikyi nyanelilɛ ne baha aze.”

Ɔwɔ nu kɛ ɛ rɛle ɛnrɛvi wɔ kulovolɛ ne, noko nvasoɛ wɔ zo kɛ ɛbadɛnla ngoane nu. Ɔlua Nyamenle moalɛ zo, ɛbahola wɔanyia agɔnwolɛma kpalɛ yɛɛ ɛbɛlabɔlɛ mɔɔ lɛ bodane. Ɔnrɛhyɛ biala Nyamenle badwazo mowuamra. Ɔkulo kɛ ɛyɛ wɔ kulovolɛma atuu bieko. Mekɛ zɔhane, akee nyane mɔɔ wɔ wɔ ahonle nu la bavi ɛkɛ ne bɔkɔɔ!