Bɛwole me wɔ Mulhouse, sua bie mɔɔ bɛdi ehyia mɔɔ bɛlie duma kɛ bɛyɛ basabasa mɔɔ wɔ France sɔlɔ aduduleɛ la azo. Ninyɛne mɔɔ mekakye ye me ngakula nu la a le butule mɔɔ mbusua mɔɔ wɔ ɛkɛ ne di la. Bɛmbu mraalɛ wɔ yɛ abusua ne anu yɛɛ mrenyia ɛmmaa mraalɛ ɛngile bɛ adwenle. Bɛhilehilele me kɛ mraalɛ ɛdeɛ a le egyaade, mrenyia nee ngakula ɛnleanlɛ.

Me ngakula nu ɛnee asetɛnla ne anu yɛ se. Menyianle ɛvolɛ bulu la, nzabolɛ hunle me papa. Ɛvolɛ nnu anzi, me mediema mrenyia mgbanyima ne mɔ anu ko hunle ɔ nwo. Ɛvolɛ ko ne ala anu, menwunle kɛ bɛlɛku me nwo sonla bie ɔlua butule mɔɔ bɛlile wɔ abusua ne anu la ati. Ɛhye maanle me ahonle dule kpole. Me abusua ne anu amra hilele me kɛzi bɛfa dadeɛ nee etu bɛko mekɛ biala la. Kɛmɔ ɛnee ninyɛne ɛlɛgyegye me kɛ kpavolɛ la ati, membɔle ɔ bo kɛ meyɛ tattoo wɔ me anwo amuala na menzukoale nzanlonlɛ.

Mekanyia ɛvolɛ 16 la, ɛnee meno nza adoba 10 mɔɔ kɔ 15 kenle ko biala, na yeangyɛ membɔle ɔ bo kɛ meno nyiletane. Amaa meadua me ninyɛndane ne mɔ anwo kakɛ la, ɛnee metɔne samankolo ninyɛne na menyɛle awule. Mekanyia ɛvolɛ 17 la, ɛnee bɛdo me efiade. Ɛka ɔ muala ɛbɔ nu a, bɛlile me edwɛkɛ fane 18 ɔlua awule nee basabasayɛlɛ ti.

Mɔɔ ɛnee mewɔ me 20 ne anu la, me tɛnlabelɛ ne zɛkyele bɔkɔɔ. Ɛnee meno wee ngoko 20 kenle ko biala nee heroin yɛɛ nyiletane gyɛne. Fane dɔɔnwo ne ala, ɔhale me nee ewule ɔlua nyile mɔɔ menvale memaanle ɔbole zo la ati. Membɔle ɔ bo kɛ medi nyiletane gua, yemɔti ɛnee dadeɛ nee etu wɔ me nwo dahuu. Kenle ko bie, menyɛle kɛ meto nrenyia bie etu, noko ɔ ti yɛle boɛ kɛ bolɛ ne vile etu ne anu dɔle aze la! Menyianle ɛvolɛ 24 la, me mame wule, na menvale ɛya kpole. Me nwo ɛzulolɛ ti saa menli nwu kɛ melua gua ne azo a, ɛnee bɛva ɛleka fofolɛ. Ɔlua konle ti, ɛnee meta medi dapɛne awieleɛ wɔ efiade anzɛɛ asopiti na bɛyɛ me nganlɛ ne mɔ ayile.

Menyianle 28 la yɛɛ mengyale a. Ɛbalie wɔali kɛ, ɛnee membu me ye. Ɛnee mebɔ ye aholoba na mebo ye. Yɛanyɛ debie yɛambɔ nu kɛ agyalɛma la. Ɛnee medwenle kɛ saa mefa awule ndweabane dɔɔnwo mebɛlɛ ye a, ɛnee yewie. Akee edwɛkɛ bie zile arɛlevilɛ nu. Me ye bɔle ɔ bo kɛ ɔ nee Gyihova Alasevolɛ sukoa Baebolo ne. Bɛzukoale debie mɔɔ limoa bɛwiele la, ɔgyakyile sigalɛtenlonlɛ, ɔkpole awule ezukoa biala mɔɔ menvale memaanle ye la na ɔzianenle me ndweabane  ne mɔ. Menvale ɛya kpole. Mendwazole mentiale ye Baebolo ɛzukoalɛ ne na memkpulule sigalɛte esike menguale ɔ nyunlu. Eza mengolole ɔ nwo wɔ yɛ kpalɛ ne azo.

Kenle ko nɔsolɛ bie mɔɔ ɛnee mebo kpole la, mendole senle wɔ yɛ sua ne anu. Me ye liele me nee yɛ ra raalɛ ne mɔɔ ɛnyia ɛvolɛ nnu la vile senle ne anu. Mɔɔ me nye zo tetele me la, me adwenle buale me fɔlɛ. Wɔ me ahonle nu, mendele nganeɛ kɛ Nyamenle ɛnrɛva me ɛtane ɛnrɛhyɛ me ɛlɛ. Mekakye kɛ mekɛ bie ɛnee ɛsɔfo bie ɛlɛka kɛ amumuyɛma bɛahɔ hell. Me dɔketa ne bɔbɔ zele me kɛ: “Yekpa nwo! Bɛdie wɔ ngoane a ɔnyɛ boɛ.”

Wɔ senle ne anzi, yɛhɔdɛnlanle me ye awovolɛ anwo. Mɔɔ Alasevolɛ ne mɔ rakpɔlale me ye la, membizale bɛ kɛ, “Asoo Nyamenle bahola ava me ɛtane kɔsɔɔti ahyɛ me ɔ?” Bɛgengale 1 Kɔlentema 6:9-11 bɛhilele me. Ɔka nyɛleɛ mɔɔ Nyamenle kyi la bie mɔ anwo edwɛkɛ, noko ɔtoa zo kɛ: “Kɛ ɛnee bɛ bie mɔ de la ɛne.” Edwɛkɛ zɔhane maanle me anwosesebɛ kɛ mebahola meahakyi. Akee Alasevolɛ ne mɔ kyekyele me rɛle kɛ Nyamenle kulo me ɔlua 1 Dwɔn 4:8 mɔɔ bɛgengale la azo. Menzele Alasevolɛ ne mɔ kɛ bɛ nee me ɛzukoa Baebolo ne fane nwiɔ dapɛne biala, na membɔle ɔ bo kɛ mekɔ Kilisienema nyianu. Menzɛlɛle Gyihova dahuu.

Siane ko pɛ anu, menzile kpɔkɛ kɛ megyakyi nyiletane ɛnlonlɛ nee nza. Yeangyɛ menwunle kɛ konle bie ɛlɛkɔ zo wɔ me sonlabaka ne anu! Ɛnee meka ɛlalɛ mgbane mgbane, me ti kpakye me, mete nyane yɛɛ ngyegyelɛ ngakyile. Noko, eza menwunle kɛ Gyihova ɛzɔ me sa na ɔlɛmaa me anwosesebɛ. Mendele nganeɛ kɛ ɛzoanvolɛ Pɔɔlo la. Pɔɔlo hanle moalɛ mɔɔ Nyamenle vale maanle ye la anwo edwɛkɛ kɛ: “Ɔlua anwosesebɛ ne mɔɔ [Nyamenle] fa maa me la ati, mekola megyinla ninyɛne muala anloa.” (Felepaema 4:13) Nzinlii, mengolale mengyakyile sigalɛtenlonlɛ.​—2 Kɔlentema 7:1.

Baebolo ne boale me maanle me ɛbɛlabɔlɛ nee me abusua asetɛnla yɛle kpalɛ. Mengyakyile subane ɛtane mɔɔ meda ye ali mekile me ye la. Membɔle ɔ bo kɛ mebu ye kpalɛ na meka “mesɛlɛ wɔ” yɛɛ “meda wɔ ase” mekile ye. Eza membɔle ɔ bo kɛ meyɛ selɛ kpalɛ meamaa yɛ ra raalɛ ne. Yɛzukoale Baebolo ne ɛvolɛ ko la, menlile me ye neazo ne anzi, menyilale me nwo zo memaanle Gyihova na bɛzɔnenle me.

Menwu ye wienyi kɛ Baebolo ngyinlazo ɛlie me ngoane. Me mbusuafoɔ mɔɔ bɛnle Alasevolɛ bɔbɔ la ɛnwu kɛ anrɛɛ nyiletane ɛnlonlɛ anzɛɛ konle bahola ahu me.

Baebolo ngilehilelɛ ɛhakyi me abusua asetɛnla bɔkɔɔ, ɔluakɛ yemaa menwu ɛzonlelilɛ mɔɔ melɛ kɛ kunli nee selɛ la. (Ɛfɛsɛsema 5:25; 6:4) Yɛbɔle ɔ bo kɛ yɛyɛ ninyɛne yɛabɔ nu kɛ abusua. Kɛkala, mefa anyelielɛ meboa me ye memaa ɔka edwɛkpa ne dahuu tɛla kɛ egyaade gyima ala a ɔbayɛ a. Na ɔ nye die kɛ ɔbaboa me yeamaa meayɛ me gyima kɛ asafo nu kpanyinli.

Gyihova Nyamenle ɛlɔlɛ nee ye anwunvɔnezelɛ ne ɛboa me kpalɛ. Melɛ ɛhulolɛ kpole kɛ mebaha ye subane ngɛnlɛma ne mɔ meahile bɛdabɛ mɔɔ bɛbu bɛ kɛ nvasoɛ ɛnle bɛ nwo zo kɛ mɔɔ menli dɔɔnwo bule me la. Meze kɛ Baebolo ne lɛ tumi mɔɔ boa awie biala ɔmaa ye ɛbɛlabɔlɛ nwo te na ɔnyia bodane kpalɛ la. Baebolo ne ɛhilehile me kɛ mengulo awie mɔ na membu mrenyia nee mraalɛ yɛɛ medame mumua ne me nwo.