Saa amaneɛnwunlɛ ɛnvi Nyamenle a, ɛnee duzu a ɛva ɛhɔne kpole, ehyia fufule, konle, ewule nee esiane ɛra a? Nyamenle Edwɛkɛ Baebolo ne maa yɛnwu ninyɛne nsa mɔɔ maa alesama nwu amaneɛ la:

1. Angomedi, Anyebolo, Yɛɛ Ɛkpɔlɛ. “Bie mɔ lɛ tumi ɛlɛsisi bie mɔ bɛamaa bɛanwu amaneɛ.” (Nolobɔvo ne 8:9) Menli nwu amaneɛ ɔlua bɛ sinlidɔlɛ, angomedi anzɛɛ awie mɔ atisesebɛ nyɛleɛ ti.

2. Mekɛ Nee Esiane. Alesama nwu amaneɛ ɔluakɛ “tɛ mekɛ ne amuala a bɛdi ye moavolɛ a.” (Nolobɔvo ne 9:11) Kile kɛ, ɔdwu mekɛ ne bie a menli ati ɛnyɛ boɛ, esiane bie kazi la ɛnee bɛwɔ ɛkɛ, anzɛɛ bɛbu bɛ nye bɛgua ninyɛne zo, anzɛɛ bie nvonleɛ kola kɔwie esiane nu.

3. Ahenle Mɔɔ Ɛlɛdi Ewiade Ne Azo La Ati Yɛ Se. Baebolo ne ka mɔɔ ɛmaa alesama ɛlɛnwu amaneɛ la anwo edwɛkɛ wienyi. Ɔka kɛ: “Ewiade amuala wɔ amumuyɛnli ne tumi bo.” (1 Dwɔn 5:19) Zɔhane “amumuyɛnli” ne a le Seetan Abɔnsam, sunsum nu abɔdeɛ mɔɔ lɛ tumi la. Ɛnee ɔle Nyamenle anwumabɔvolɛ ne mɔ anu ko noko “yeandɛnla nɔhalɛ ne anu.” (Dwɔn 8:44) Kɛmɔ ɛnee sunsum nu abɔdeɛ bie mɔ noko kulo kɛ bɛdi bɛ atiakunluwɔzo nzi la ati, bɛbokale Seetan anwo bɛdele atua bɛtiale Nyamenle. Ɛhye ati, bɛrayɛle sunsum ɛtane. (Mɔlebɛbo 6:1-5) Ɔvi mekɛ mɔɔ Seetan nee ye sunsum ɛtane ne mɔ dele atua la, bɛli ewiade ye azo tumi wɔ atisesebɛ adenle zo. Ɛhye le nɔhalɛ wɔ yɛ mekɛ ye anu. Kɛkala Abɔnsam ɛva ɛya kpole na ‘ɔlɛbɛlɛbɛla azɛlɛ ye azo amra amuala’ na ɛhye ati, bɛyɛ ‘azɛlɛ ne gyakɔ.’ (Yekile 12:9, 12) Seetan le tumivolɛ atisesebɛ. Saa ɔnwu kɛ menli ɛlɛnwu amaneɛ a, ɔ nye die kpole. Ɛhɛe, Seetan ɔ​—tɛ Nyamenle a maa alesama nwu amaneɛ a.

SUZU NWO: Atisesebɛ sonla mɔɔ ɔnlɛ adwenle kpalɛ la ala a bamaa menli mɔɔ ɛnze nwolɛ bie la anwu amaneɛ a. Noko, Baebolo ne ka kɛ: “Nyamenle le ɛlɔlɛ.” (1 Dwɔn 4:8) Ye ɛlɔlɛ ne le kpole. Ɔti, “ɔle bɛkyi kɛ [nɔhalɛ] Nyamenle ne kɛyɛ amumuyɛ, anzɛɛ Tumivolɛ ne kɛyɛ ɛtane.”​—Dwobu 34:10.

Noko bie a ɛbabiza kɛ, ‘Mekɛ tendenle nyɛ a Tumivolɛ Nyamenle ne bamaa Seetan adenle yeamaa yeali alesama anwo zo tumi wɔ atisesebɛ adenle zo a?’ Kɛ mɔɔ yɛnwu ye la, Nyamenle kyi amumuyɛyɛlɛ na saa ɔnwu kɛ yɛlɛnwu amaneɛ a, ɔdi nyane. Bieko, ye Edwɛkɛ ne maa yɛ anwosesebɛ kɛ: “Yɛvuandi yɛ adwenleadwenle muala yɛgua ɔ nwo zo ɔluakɛ ɔdwenle yɛ nwo.” (1 Pita 5:7) Nyamenle kulo yɛ yɛɛ ɔlɛ tumi mɔɔ ɔbava yeaye amaneɛnwunlɛ nee nzisi kɔsɔɔti yeavi ɛkɛ a. Edwɛkɛ mɔɔ doa zo la bahilehile nu. *