ƆYƐLE Doreen azibɛnwo wɔ mekɛ mɔɔ bɛhanle bɛhilele ɔhu Wesley mɔɔ ɛnyia ɛvolɛ 54 la kɛ nyila ɛnwu ye amelɛ nu la. * Dɔketama hanle kɛ ɔbadɛnla aze siane ekyi bie ala. Ɔka kɛ, “Meanlie mɔɔ mendele la meanli. Ɔbole dapɛne kɛyɛ nyɛ ɛnee me nwo tɛgolo me. Ɔyɛle kɛ asɛɛ tɛ yɛdayɛ a edwɛkɛ ɛhye ɛdo yɛ la. Meanzuzu nwo ɛlɛ.”

Ɔyɛ alɔbɔlɛ, noko ɔnyɛ ɛzulolɛ kɛ Doreen dele nganeɛ zɔhane la. Ewule mɔɔ bɛyɛ ye ayile a ɔngɔ la bahola aha yɛ nuhua ko biala wɔ mekɛ biala. Yɛkanvo bɛdabɛ mɔɔ bɛvi bɛ ɛhulolɛ muala anu bɛlɛnea bɛ kulovolɛma mɔɔ ɛnde kpɔkɛ fee la, ɔluakɛ ɔnla aze. Duzu a mbusuafoɔ bahola ayɛ akyekye bɛ rɛle na bɛanlea bɛ a? Kɛ ɔkɛyɛ na menli mɔɔ ɛlɛnea wuliravolɛma la agyinla bɛ nganeɛdelɛ nloa wɔ mekɛ mɔɔ bɛlɛyɛ gyima ɛhye la ɛ? Duzu a bɛbahola bɛanlea ye ade wɔ mekɛ mɔɔ ɔka ekyi na bɛ kulovolɛ ne awu la? Mɔɔ limoa, bɛmaa yɛnlea deɛmɔti kulovolɛ bie mɔɔ ɛnde kpɔkɛ fee la ɛnleanlɛ ɛrayɛ gyima ɛsesebɛ ɛnɛ la.

Ayileyɛlɛ ɛmaa sonla ewule ɛhakyi. Wɔ ɛvoya mɔɔ ɛze la anu, ɛnee sonla ɛngyɛ na yeawu wɔ maanle mɔɔ bɛnyia anyuhɔlɛ bɔbɔ la azo. Ewule nzane nee esiane hunle menli ndɛndɛ. Ɛnee asopiti dɔɔnwo ɛnle ɛkɛ, yemɔti saa awie anwo to ye a, ye mbusuafoɔ nea ye wɔ sua nu too ɔwu.

Noko ɛnɛ, dɔketama ɛnyia anyuhɔlɛ dɔɔnwo mɔɔ maa bɛkola bɛko bɛtia ewule bie, amaa ahenle adɛnla aze ahyɛ. Ewule mɔɔ anrɛɛ ɔwɔ kɛ ɔku awie wɔ mekɛ ekyi bie anu la bahola adɛnla ɔ nwo ɛvolɛ dɔɔnwo. Noko akee ɛhye ɛngile kɛ ɔbade kpɔkɛ. Ɔyɛ a, wuliravolɛ ɛhye mɔ ɛngola ɛnnea bɛ nwo ɔluakɛ bɛnlɛ anwosesebɛ. Bɛ ɛnleanlɛ ɛrayɛ gyima ɛsesebɛ na ɔdie mekɛ nee ɛzukoa.

Ɛnɛ, menli mɔɔ wu wɔ asopiti la anwo ɛlɛso adɛla menli mɔɔ wu sua nu la. Ɔmmaa menli  dɔɔnwo ɛnnwu kɛzi sonla wu la, menli ekyi bie a ɛnwu ye bɛ nye zo kɛ sonla ɛlɛwu a. Ɛhye anwo ɛzulolɛ bɔbɔ bahola amaa awie mɔɔ ɛlɛnea ye busuanli bie mɔɔ ɛnde kpɔkɛ la asa nu ado. Duzu a bahola aboa a?

Kɛ mɔɔ yɛnwunle ye wɔ Doreen edwɛkɛ ne anu la, menli dɔɔnwo yɛ basaa saa bɛte kɛ bɛ kulovolɛ bie ɛnyia ewule ɛzulolɛ bie a. Mekɛ mɔɔ adwenleadwenle, ɛzulolɛ nee alɔbɔlɛ ɛha wɔ la, duzu a baboa wɔ yeamaa wɔaziezie ɛ nwo a? Nyamenle sonvolɛ nɔhavo ko yɛle asɔne kɛ: “Kilehile yɛ maa yɛnwu yɛ mekɛ, amaa yɛazukoa nrɛlɛbɛ.” (Edwɛndolɛ 90:12) Yemɔti sɛlɛ Gyihova kɛ ɔboa wɔ ɔmaa ɛdia ‘wɔ mekɛ’ ne nrɛlɛbɛ nu amaa ɛ nee wɔ kulovolɛ ne adɛnla kɛnlɛma nu wɔ ye ngoane mekɛ mɔɔ ɛha la anu.

Ɛhye hyia ngyehyɛleɛ kpalɛ. Saa wɔ kulovolɛ ne mɔɔ ɛnde kpɔkɛ la kola tendɛ na ɔ nye balie nwo a, nrɛlɛbɛ wɔ nu kɛ ɛbabiza ye awie mɔɔ ɔkulo kɛ ɔsi kpɔkɛ ɔmaa ye wɔ mekɛ mɔɔ ɔngola tendɛ la. Ɔwɔ kɛ bɛ nee wuliravolɛ ne suzu nwo kɛ saa ɔ nloa bɔ a, ɔbahulo kɛ bɛbava anwoma bazie ɔ nwo zo, bɛbalie ye bɛado asopiti anzɛɛ ɔbalie ayileyɛlɛ titili bie yeado nu a. Ɛhye ɛnrɛmaa mgbonde nee adwenle nu fɔlɛbualɛ ɛnrɛdɔ abusua ne avinli na yeayɛ nyanelilɛ wɔ mekɛ mɔɔ ɔwɔ kɛ bɛsi kpɔkɛ bɛmaa ahenle mɔɔ ɛnde kpɔkɛ la. Ɔnyɛ se kɛ mbusuafoɔ ne bava moalɛ mɔɔ wuliravolɛ ne hyia la bɛamaa saa bɛdimoa bɛ nee ye tendɛ mekɛ kpalɛ nu a. Baebolo ne ka kɛ, “Adwenle ngyehyɛlɛ mɔɔ folɛdulɛ ɛnle nwo la kyea.”​—Mrɛlɛbulɛ 15:22.

Awie mɔɔ ɛlɛnea wuliravolɛ la gyima titili a le kɛ ɔbakyekye ɔrɛle. Ɔhyia kɛ bɛmaa awie mɔɔ ɛlɛwu la anwosesebɛ kɛ bɛkulo ye na ɔtɛkale ɔngome. Kɛzi bɛbayɛ ye ɛ? Kenga buluku anzɛɛ to edwɛne fɛlɛko mɔɔ wuliravolɛ ne anye die nwo la maa ye. Bie mɔ wɔ ɛkɛ a, saa ɛsɔ bɛ sa na ɛtendɛ bɛtɛɛ ɛkile bɛ a, bɛ nye die.

Ka ɛyɛvolɛ biala mɔɔ bara ɛkɛ la anwo edwɛkɛ kile ye. Neɛnleanu ko ka kɛ: “Nganeɛdelɛ nnu mɔɔ sonla lɛ la, nuhua ne mɔɔ maa yɛte edwɛkɛ la a li amozi mɔɔ gyakyi gyimayɛlɛ a. Bie a ɔbayɛ yɛ kɛ [wuliravolɛ] ne ɛla noko ɔ nzo yɛ gyima. Yemɔti edwɛkɛ mɔɔ ɔ nye gyi zo a ɛnrɛha la, saa ɔda a, mmaka.”

Saa ɔbayɛ boɛ a, ɛ nee ye ɛbɔ nu ɛyɛ asɔne.  Baebolo ne ka kɛ kenle ko bie ɛzoanvolɛ Pɔɔlo nee ɔ gɔnwo mɔ anwo hyelele bɛ mɔɔ ɛnee yeha bɛ nee ewule. Moalɛ boni a bɛkpondɛle a? Pɔɔlo zɛlɛle ɔ gɔnwo mɔ kɛ: “Mɔɔ bɛdabɛ noko bɛbahola bɛayɛ bɛaboa yɛ la a le kɛ bɛbazɛlɛ bɛamaa yɛ.” (2 Kɔlentema 1:8-11) Asɔneyɛlɛ mɔɔ vi ahonle nu mɔɔ bɛyɛ ye wɔ tɛnlabelɛ ɛsesebɛ nu la anwo hyia.

Adwenle mɔɔ yɛlɛ kɛ yɛ kulovolɛ ne bawu bɔbɔ la ta yɛ ngyegyelɛ. Ɔluakɛ, anrɛɛ ɔnle kɛ sonla wu. Bɛambɔ ewule bɛamboka yɛ nwo. (Wulomuma 5:12) Yemɔti a Nyamenle Edwɛkɛ ne fɛlɛ ewule kɛ “kpɔvolɛ” la. (1 Kɔlentema 15:26) Ndelebɛbo wɔ nu kɛ ɔyɛ se ɔmaa yɛ kɛ yɛbalie yɛado nu kɛ yɛ kulovolɛ bie bawu la.

Noko akee, saa mbusuafoɔ ne suzu mɔɔ bahola azi la anwo a, ɔbahola yeamaa bɛ ɛzulolɛ ne azo ade na bɛayɛ ninyɛne wɔ ye adenle zo. Bɛha ninyɛne mɔɔ bahola azi la bie mɔ anwo edwɛkɛ wɔ ɛlɛka ne mɔɔ se, “ Mekɛ Mɔɔ Ɔka Ekyi Na Awie Awu La” anu. Ɔwɔ nu kɛ tɛ wuliravolɛ biala a kɔ tɛnlabelɛ ɛhye mɔ amuala anu a, kɛ mɔɔ bɛha nwolɛ edwɛkɛ pɛpɛɛpɛ la. Noko menli mɔɔ ɛnde kpɔkɛ la anu dɔɔnwo kɔ tɛnlabelɛ ɛhye mɔ bie anu.

Saa yɛ kulovolɛ ne wu a, ɔbayɛ kpalɛ kɛ yɛbavɛlɛ yɛ gɔnwo bie mɔɔ ɛlie ɛdo nu kɛ ɔbaboa yɛ la. Ɔwɔ kɛ yɛmaa menli mɔɔ ɛlɛnea wuliravolɛ ne nee mbusuafoɔ ne anwosesebɛ kɛ bɛ kulovolɛ ne amaneɛnwunlɛ ɛra awieleɛ yɛɛ ɔnde nyane bieko. Alesama Bɔvolɛ ne maa yɛ anwodozo kɛ, ‘mowuamra ɛnze ɛhwee.’​—Nolobɔvo ne 9:5.

Ɔhyia kɛ yɛfa yɛ nwo yɛto Nyamenle anwo zo​—tɛ mekɛ mɔɔ yɛ busuanli bie ɛnde kpɔkɛ fee la angome emomu wɔ mekɛ mɔɔ yewu na yɛlɛdi nyane la. Ɔbalua awie mɔ edwɛkɛ nee bɛ nyɛleɛ zo yeaboa wɔ. Doreen ka kɛ, “Menzukoale kɛ mebalie moalɛ biala meado nu. Nɔhalɛ nu moalɛ mɔɔ yɛnyianle ye la bole yɛ nwo zo. Ɛnee me nee me hu ze kɛ Gyihova ɛlɛka kɛ: ‘Mewɔ bɛ nwo ɛke kɛ meboa bɛ.’ Me rɛle ɛnrɛvi ye ɛlɛ.”

Ɛhɛe, Gyihova le Boavolɛ mɔɔ tɛla biala. Kɛ yɛ Bɔvolɛ la, ɔte yɛ nyane nee yɛ alɔbɔlɛlilɛ bo. Yeziezie ɔ nwo kɛ ɔbava moalɛ nee anwosesebɛ mɔɔ yɛhyia la yeamaa yɛ amaa yɛahola yɛagyinla ɔ nloa. Mɔɔ tɛla biala la, yebɔ ɛwɔkɛ kɛ ɔnrɛhyɛ ɔbaye ewule yeavi ɛkɛ ne bɔkɔɔ na yeadwazo menli mgbe mɔɔ wɔ ye ngakyelɛ nu la. (Dwɔn 5:28, 29; Yekile 21:3, 4) Akee yɛ mualɛ yɛbava ɛnelɛ kpole yɛaha ɛzoanvolɛ Pɔɔlo edwɛkɛ ɛhye bie kɛ: “Ewule, wɔ konimlilɛ ne wɔ ni? Ewule, wɔ bɔlɔ ne wɔ ni?”​—1 Kɔlentema 15:55.