Baebolo ne ɛngilehile kɛ sonla ko biala lɛ ye anwumabɔvolɛ mɔɔ sinza ye a. Mekɛ bie Gyisɛse hanle kɛ: “Bɛnlea na bɛambu ngakula ɛhye mɔ anu ko kɛ ɔle mgbane, ɔluakɛ meka meahile bɛ kɛ bɛ anwumabɔvolɛma mɔɔ wɔ anwuma la nwu me Ze mɔɔ wɔ anwuma la anyunlu dahuu.” (Mateyu 18:10) Noko, ɛnee Gyisɛse ɛngile kɛ sonla ko biala lɛ ɔ ti anwo anwumabɔvolɛ mɔɔ bɔ ɔ nwo bane a, emomu anwumabɔvolɛ ne mɔ anye die ye ɛdoavolɛ ne mɔ ko biala anwo. Ɔti, nɔhalɛ azonvolɛ anye fuu ɛnyɛ debie mɔɔ baboda bɛ na bɛazuzu kɛ Nyamenle anwumabɔvolɛ babɔ bɛ nwo bane.

Asoo yemɔ kile kɛ anwumabɔvolɛ ne mɔ ɛmboa menli ɔ? Kyɛkyɛ. (Edwɛndolɛ 91:11) Bie mɔ te nganeɛ kɛ Nyamenle dua anwumabɔvolɛ nwo zo bɔ bɛ nwo bane na ɔsinza bɛ. Kenneth mɔɔ yɛhanle ɔ nwo edwɛkɛ wɔ mɔlebɛbo ne la te zɔhane nganeɛ ne bie. Yɛngola yɛnzi ye pi noko ɔbahola yeayɛ nɔhalɛ. Gyihova Alasevolɛ lɛ daselɛ mɔɔ kile kɛ anwumabɔvolɛma boa bɛ wɔ bɛ daselɛlilɛ gyima ne anu. Noko kɛ mɔɔ yɛnnwu bɛ la ati, yɛngola yɛnga kɛzi bɛboa sonla ko biala wɔ tɛnlabelɛ ngakyile nu la anwo edwɛkɛ dɔɔnwo. Kɛ ɔde ye biala la, yɛda Tumivolɛ ne ase wɔ moalɛ biala mɔɔ ɔfa ɔmaa yɛ la anwo.​—Kɔlɔsaema 3:15; Gyemise 1:17, 18.