Bɛwole me wɔ Saxony, namule bie mɔɔ ɛnee bɛfɛlɛ ye German Democratic Republic (GDR) la azo. Ɛnee yɛ sua nu yɛ fɛ, yɛkulo yɛ nwo yɛɛ me awovolɛ vale ɛbɛlabɔlɛ kpalɛ nwo ngyinlazo tetele me. Ɛnee GDR wɔ Komunis tumi bo, yemɔti wɔ menli dɔɔnwo mɔɔ wɔ Saxony la afoa nu, ɛzonlenlɛ nwo ɛngyia bɛ. Ɛnee menlie menli kɛ Nyamenle wɔ ɛkɛ. Mekanyia ɛvolɛ 18 la ɛnee menlie menli kɛ Nyamenle wɔ ɛkɛ yɛɛ ɛnee mebu menli kɔsɔɔti kɛ bɛ sɛ.

Duzu a maanle menyianle adwenle kɛ menli kɔsɔɔti le ko a? Ɔluakɛ mendele nganeɛ kɛ yɛ muala yɛ sɛ. Eza ɛnee mete nganeɛ kɛ ɔwɔ kɛ bɛkyɛ agyapadeɛ biala anu pɛpɛɛpɛ, mɔɔ bie ɛnle ehyianli yɛɛ bie noko ɛnle sukoavolɛ somaa a. Yemɔti menvale me nwo menwulale eku bie mɔɔ di bodane ɛhye anwo gyima la anu. Menyiale ɛvolɛ 14 la, menyɛle gyima bie, ɛnee yɛfa ngɛlata mɔɔ ɛzɛkye la yɛyɛ ninyɛne. Ezuavolɛ mɔɔ wɔ Aue la anye liele me gyima nee me mɔdenlebɔlɛ nwo yemɔti sua ne azo mgbanyima maanle me ahyɛlɛdeɛ. Ɛnee mele kakula ɛdeɛ, noko GDR maanyɛlɛ mgbanyima bie mɔ rayɛle me gɔnwo mɔ. Ɛnee mesuzu kɛ meva bodane kpalɛ mezie me nye zo na melɛ kenle bie kpalɛ.

Akee me ɛbɛlabɔlɛ hakyile arɛlevilɛ nu. Wɔ 1989 Berlin Bane ne mɔɔ bɛhanle bɛguale aze la vale basabasayɛlɛ rale Komunis arane ne mɔɔ wɔ Eastern Europe la. Akee basabasayɛlɛ ne bule zo. Yeangyɛ menwunle kɛ nzisi ɛbu zo wɔ GDR. Kɛ neazo la, ɛnee bɛmbu menli mɔɔ ɛnlie Komunis arane ne ɛndo nu la kpalɛ. Ɛnee mende ɔ bo. Tɛ yɛdayɛ a ɛnee yɛdie yɛdi kɛ menli kɔsɔɔti sɛ la? Anzɛɛ ɛnee ɔle adwenle mgbane bie ala? Ɔyɛle me adwenleadwenle.

Yemɔti mengakyile me adwenle. Menyɛle kɛ mebabɔ edwɛne na meadɔlɔdɔlɔ ninyɛne. Menzukoale edwɛne ɛdolɛ wɔ sukulu bie anu na menyɛle kɛ metoa zo wɔ Yunivɛsiti na meava edwɛne ɛdolɛ meayɛ me gyima. Bieko, ɛbɛlabɔlɛ kpalɛ mɔɔ bɛvale bɛtetele me wɔ me ngakula nu la amuala yɛle mgbane. Mɔɔ ɛnee hyia me kpalɛ la a le kɛ mebalie me nye na measesa mraalɛ dɔɔnwo. Noko edwɛne ɛdolɛ nee ninyɛne mɔɔ medɔlɔdɔlɔle la ammaa me adwenleadwenle zo ande. Akee bɔbɔ memaanle menli dele nganeɛ kɛ me nwo yɛ ɛzulolɛ. Duzu  a bazi kenle bie a? Ɛbɛlabɔlɛ atiakunlukpɔkɛ a le boni?

Menwunle kpuya ɛhye mɔ anwo mualɛ la, ɔzinle me nwo. Kenle ko bie ɛnee me nee sukoavoma bie ɛlɛbɔ mɔɔ bazi kenle bie la anwo adawu wɔ sukulu ɛkɛ. Ɛnee Mandy * le Gyihova Dasevolɛ wɔ sukulu ɛkɛ ne. Kenle ko nɔsolɛ zɔhane, ɔmaanle menwunle ninyɛne nye zo. Ɔhanle kɛ “Andreas, saa ɛkpondɛ kpuya mɔɔ fale ɛbɛlabɔlɛ nee kenle bie anwo mualɛ a, sukoa Baebolo ne kpalɛ.”

Meanlie meanli, noko ɛnee me nwo ɛlɛpele me kɛ mebade ninyɛne bo kenle ko zɔhane. Mandy maanle mengengale Daneɛle 2, ɛkɛ ne edwɛkɛ ne maanle me nloa hale nwo. Ngapezo zɔhane ka ewiade tumivolɛma ngakyile mɔɔ bali tumi too yearadwu yɛ mekɛ ye azo la anwo edwɛkɛ. Mandy hilele me Baebolo ngapezo gyɛne mɔɔ ka kenle bie anwo edwɛkɛ la. Akee menyianle me kpuya ne mɔ anwo mualɛ! Noko membizale me nwo kɛ, nwane a hɛlɛle ɛhye mɔ a, na nwane bɔbɔ a bahola aha kenle bie edwɛkɛ fɔɔnwo a? Asoo amgba Nyamenle wɔ ɛkɛ?

Mandy hanle me nwo edwɛkɛ hilele Gyihova Alasevolɛ agyalɛma bie, Horst nee Angelika na bɛboale me bɛmaanle mendele Baebolo ne abo kpalɛ. Menwunle kɛ Gyihova Alasevolɛ ala a le ɛzonlenlɛ mɔɔ fa Nyamenle duma Gyihova ne di gyima a. (Edwɛndolɛ 83:18; Mateyu 6:9) Menwunle kɛ Gyihova ɛva dahuu ngoane wɔ Paladaese ɛbɔ ɛwɔkɛ. Edwɛndolɛ 37:9 ka kɛ: ‘Bɛdabɛ mɔɔ bɛ rɛle wɔ Gyihova anu la bava azɛlɛ ne.’ Ɔyɛle me fɛ kɛ Nyamenle ɛbuke nwolɛ adenle ɛhye ɛmaa alesama kɔsɔɔti mɔɔ fa ɛbɛlabɔlɛ ngyinlazo kpalɛ mɔɔ wɔ Baebolo ne anu bɔ bɛ ɛbɛla la.

Noko menvɛle kolaa na meahola meayɛ nzenzaleɛ amaa meabɔ me ɛbɛla kɛ mɔɔ Baebolo ne kile la. Edwɛne ɛbɔlɛ maanle menzukoale anwomemaazo, yemɔti ɛnee ɔwɔ kɛ mesukoa mɛlɛbɛnwoaze. Bieko, ɛnee ɔnla aze kɛ mebagyakyi me ɛbɛlabɔlɛ ɛtane ne mɔ. Meda Gyihova ase kɛ yenyia me nwo abotane, ɔzele me anwunvɔne na ɔdele me edwɛkɛ bo wɔ mekɛ mɔɔ melɛbɔ mɔdenle meava mɔɔ Baebolo ne ka meali gyima la!

Adwenle mɔɔ ɛnee melɛ kɛ Nyamenle ɛnle ɛkɛ yɛɛ menli kɔsɔɔti mɔɔ mebu bɛ kɛ bɛ sɛ la nyianle me nwo zo tumi ɛvolɛ 18; ɔvi zɔhane mekɛ ne, Baebolo ne ɛlɛkakyi me ɛbɛlabɔlɛ. Mɔɔ menzukoale la maanle me adwenleadwenle zo dele na ɔmaanle menyianle kenle bie nee ɛbɛlabɔlɛ kpalɛ. Bɛzɔnenle me kɛ Gyihova Dasevolɛ wɔ 1993, na mengyale Tabitha mɔɔ bɔ mɔdenle wɔ ɛzonlenlɛ ne anu la wɔ ɛvolɛ 2000. Yɛfa mekɛ dɔɔnwo yɛboa awie mɔ yɛmaa bɛnwu Baebolo ne anu kpalɛ. Menli dɔɔnwo mɔɔ yɛyia bɛ la le kɛ medame, bɛnlie bɛnli kɛ Nyamenle wɔ ɛkɛ yɛɛ bɛlɛ adwenle kɛ menli kɔsɔɔti sɛ, bie ɛndɛla bie. Saa meboa bɛ memaa bɛnwu Gyihova a, me nye die kpole.

Mɔɔ membɔle ɔ bo kɛ me nee Gyihova Alasevolɛ tu la, me awovolɛ lile nyane. Noko ɔvi zɔhane mekɛ ne bɛranwu kɛzi Alasevolɛ ne mɔ mɔɔ me nee bɛ dule la ɛmaa me ɛbɛlabɔlɛ ɛyɛ kpalɛ la. Ɔyɛ anyelielɛ kɛ ɛnɛ, bɛkenga Baebolo ne na bɛkɔ Kilisiene ayia la.

Me nee Tabitha anye die wɔ yɛ agyalɛ ne anu ɔluakɛ yɛfa agyalɛ nwo folɛdulɛ mɔɔ wɔ Baebolo ne anu la yɛdi gyima. Kɛ neazo la, folɛdulɛ mɔɔ fale nɔhalɛlilɛ nwo mɔɔ yɛfa yɛdi gyima la ɛmaa yɛ agyalɛ ne ɛzɔ kpalɛ.​—Hibuluma 13:4.

Ɛnɛ menzulo mɔɔ bazi ɛbɛlabɔlɛ nu nee kenle bie la. Mete nganeɛ kɛ meboka ewiade amuala mediema mɔɔ anzodwolɛ nee koyɛlɛ wɔ bɛ avinli la anwo. Wɔ abusua ɛhye anu, yɛ muala yɛbu yɛ nwo kɛ yɛ sɛ. Debie mɔɔ ɛnee me nye la ye ade wɔ me ɛbɛlabɔlɛ kɔsɔɔti anu la ɛne.