SƐLA denrɛle ye nu na ɔdole ɔ nye wɔ anwuma. Ɛnee ye azonvolɛ ne mɔ mɔɔ ɔ nee bɛ yɛ gyima la ɛlɛfa anyelielɛ adie ye adehilelɛ. Sɛla mɔɔ anye bolo ye gyima nwo la noko yɛle ye afoa nu ɛdeɛ. Pɛ Sɛla mɔɔ ɔluakɛ ɔ sa akunlu ɛlɛfofo ye la ati, ɔlɛwɔza la anwo nvoninli wɔ wɔ adwenle nu. Ɔkɛyɛ kɛ ɛnee ɔlɛkpomgba bɛ ndanlɛsua ne ɛleka mɔɔ ɛtete la. Ewia nee nzule mɔɔ ɛbɔ abɔnkye nwoma ne mɔɔ bɛva bɛyɛ ndanlɛ sua ne la ati, yemaa yelu. Ɛhye maa Sɛla kakye ɛvolɛ dodo mɔɔ bɛva bɛkpɔsa la. Maanle nu ɛlɛkakyi, aleɛ ɛlɛdwo. Ebileham * ɛlɛfi sua nu nwonlomɔ ne la, ɔnwunle ye na ɔ nye gyi adenle zo ɔlɛkendɛ ye. Mɔɔ ɔnwunle kɛ yekpakye boka ne azo lɔ ɔlɛba la, anyelielɛ ngome maanle ɔ nyunlu yɛle ɛzelekɛzelekɛ.

Ɛvolɛ dɔɔnwo anzi yɛɛ Ebileham nee ye abusua ne amuala dule adenle pɛle Azule Yufileti ne hɔle Keena a. Sɛla vile ye ahonle nu boale ɔ hu wɔ mekɛ mɔɔ bɛtu adenle bɛahɔ ɛleka mɔɔ bɛnze la. Ɛnee ɔze ye kɛ ɔ hu lɛ gyima titili di wɔ Nyamenle bodane nu. Ɔbayɛ awie mɔɔ maanle mɔɔ bɛyila ye bavi ye nu ara. Ɛnee duzu a Sɛla bahola ayɛ a? Dɛba ye amuala ɔle mota, kɛkala yeli ɛvolɛ 75. Bie a ɔbizale ɔ nwo kɛ, ‘Kɛ ɔkɛyɛ na Gyihova ɛwɔkɛ ɛhye ara nu wɔ mekɛ mɔɔ metɛde Ebileham aye la ɛ?’ Ndelebɛbo wɔ nu saa ɛnee ɛhye le ye ngyegyelɛ na ɔ nwo ɛlɛpele ye a.

Ɔdwu mekɛ ne bie a, yɛdayɛ noko yɛdwenle mekɛ mɔɔ Nyamenle ɛwɔkɛ ne mɔ bara nu la anwo. Ɔnla aze kɛ yɛbanyia abotane titili saa yɛlɛkendɛ debie mɔɔ yɛ nye la ye ade kpalɛ la a. Kɛzi raalɛ ɛhye diedi ne baboa yɛ ɛ?

Ɔtɛkyɛle biala yɛɛ abusua ne vile Yigyibiti a. (Mɔlebɛbo 13:1-4) Ɛnee bɛde Bɛtɛle anzɛɛ Lɛze azɛlɛ zo, kɛmɔ ɛnee Keenama fɛlɛ ye la. Wɔ ɛkɛ ne, ɛnee Sɛla kola nwu ɛwɔkɛ azɛlɛ ne. Ɛnee Keenama namule wɔ ɛkɛ yɛɛ ndenle mɔɔ adenduvoma dua zo kɔ ɛleka ngakyile la wɔ ɛkɛ. Kɛmɔ ɛnee bɛdwu moa la ati ɛnee Sɛla ɛmbikye ye sua zo fee. Ɔnyinle wɔ Yule, sua bie mɔɔ wɔ Mɛsɔpɔteemea la, ye tendenle bayɛ mayɛlɛ 1,200 (km 1,900). Ɛnee yegyakyi ye mbusuafoɔ dɔɔnwo ɔ nzi, asetɛnla kpalɛ mɔɔ ɛnee ɔlɛ ye wɔ ye sua zo nee nuhua gualilɛ, sua kpalɛ mɔɔ ɛnee ɔde nu, bie a ɛnee nzule kpalɛ bie wɔ ɛkɛ! Noko saa yɛdwenle kɛ Sɛla lile nyane ɔluakɛ ɔ nwo lɔle asetɛnla kpalɛ mɔɔ ɛnee ɔlɛ ye wɔ ye sua zo la ati a, ɛnee yɛnze raalɛ ɛhye mɔɔ sulo Nyamenle la kpalɛ.

Wɔ ɛvolɛ kɛyɛ 2,000 anzi, sunsum ne hanle ɛzoanvolɛ Pɔɔlo maanle ɔhɛlɛle Sɛla nee Ebileham diedi ne anwo edwɛkɛ kɛ: “Noko, saa bɛhɔle zo bɛhakyele ɛleka mɔɔ bɛvi bɛrale la a, anrɛɛ bɛbahola bɛazia bɛahɔ.” (Hibuluma 11:8, 11, 15) Sɛla nee Ebileham amunwiɔ angakye mɔɔ bɛgyakyi ye bɛ nzi la. Saa bɛnyianle adwenle ɛhye a, anrɛɛ bɛbazia  bɛ nzi bɛahɔ bɛ sua zo. Saa bɛziale bɛhɔle Yule a, anrɛɛ nwolɛ adenle kpole zɔhane mɔɔ Gyihova vale maanle bɛ la bɔle bɛ. Anrɛɛ ɛnɛ sonla ɛngakye bɛ bieko bɔbɔ na bɛ diedi nwo neazo kɛnlɛma ne aboa yɛ.

Kɛ anrɛɛ Sɛla bɛanlea ɔ nzi la, ɔnleanle ɔ nyunlu fɔɔnwo. Ɔboale ɔ hu ɔmaanle bɛlile tutɛnla wɔ azɛlɛ ne azo. Ɔboale ye ɔmaanle bɛdudule na bɛhyehyɛle ɛdanlɛsua ne fane dɔɔnwo. Bɛka mboane ne mɔ bɛgua bɛ nyunlu a, ɛnee bɛlɛkɔ ɛleka fofolɛ. Ɔgyinlanle ngyegyelɛ gyɛne nloa na ɔliele nzenzaleɛ biala ɔdole nu. Gyihova eza dinle ye ɛwɔkɛ ne anu hilele Ebileham noko yeambɔ Sɛla duma!​—Mɔlebɛbo 13:14-17; 15:5-7.

Awieleɛ bɔkɔɔ ne, Sɛla vale edwɛkɛ bie mɔɔ ɛnee yedwenle nwo yehyɛ la dole Ebileham anyunlu. Pɛ kɛzi Sɛla ɛyɛ ɔ nyunlu na ɔlɛtendɛ yeahile ɔhu la nvoninli. Ɔhanle kɛ: ‘Nea, Gyihova ammaa meanwo.’ Akee ɔhanle ɔhilele ɔ hu kɛ ɔ nee ye sonvolɛ raalɛ Heega ɛwo ngakula. Dwenle kɛzi Sɛla bava nyane aha edwɛkɛ ɛhye ahile ɔ hu la anwo. Ɛnɛ, ɔle kɛ asɛɛ nrɛlɛbɛ ɛnle zɔhane edwɛkɛ ne anu, noko wɔ zɔhane mekɛ ne, ɛnee nrenyia kola gya raalɛ bieko boka ɔ ye anwo amaa ɔ nee ye awo na yeanyia awie ali ye agya. * Saa Sɛla dele nganeɛ kɛ zɔhane mɔɔ ɔbayɛ la bamaa Nyamenle bodane mɔɔ ɔlɛ kɛ maanle bavi Ebileham anu ara la ara nu bɔbɔ a, kɛ ɔde ye biala la, ɔnyianle ɛhulolɛ kɛ ɔbabɔ afɔle mɔɔ anu yɛ se. Duzu Ebileham yɛle a? Yɛkenga kɛ “Ebilam diele ɔ ye [Sɛla] ane.”​—Mɔlebɛbo 16:1-3.

Asoo kɛlɛtokɛ ne kile kɛ Gyihova a maanle Sɛla hanle zɔhane edwɛkɛ ne ɔ? Kyɛkyɛ. Emomu, ye edwɛkɛ ne da sonla subane ali. Sɛla zuzule kɛ Nyamenle a ɛlɛmaa yeayia ngyegyelɛ a na Nyamenle ɛnrɛhola ɛnrɛboa ye. Ɛnee ye adwenle ne bamaa yeali nyane. Noko, ɛnee ye adwenle ne kile kɛ ɔnle angomedi. Sɛla neazo ne le ngakyile fi ɛnɛ ewiade mɔɔ awie biala dwenle ɔ ngomekye ye boɛyɛlɛ nwo la anwo. Saa yɛfa Nyamenle ɛhulolɛdeɛ yɛdimoa yɛ ɛdeɛ nyunlu a, ɛnee yɛlɛsukoa Sɛla diedi ne.

Yeangyɛ biala yɛɛ Ebileham nee Heega nrenzɛle a. Heega dele nganeɛ kɛ ɔle kpalɛ ɔtɛla Sɛla yemɔti a yehola yenrenzɛ la. Ɔbɔle ɔ bo kɛ ɔgolo ɔmenle raalɛ ne anwo. Nea kɛzi ɔyɛle Sɛla mɔɔ ɛnee ɔtɛwole la nyane a! Nyamenle nee Ebileham gyinlanle Sɛla anzi maanle ɔhwenle Heega anzo wɔ adenle bie mɔɔ Baebolo ne anga la azo. Heega wole ralɛ nrenyia na ɔdonle ye Yehyemeeyɛle. (Mɔlebɛbo 16:4-9, 16) Kɛlɛtokɛ ne kile kɛ,  Gyihova kadendɛ ahile bɛ bieko la ɛnee Sɛla ɛnyia ɛvolɛ 89 yɛɛ ɔhu ɛnyia ɛvolɛ 99. Edwɛkɛ mɔɔ bɛdele la yɛ anyelielɛ!

Gyihova bɔle Ebileham ɛwɔkɛ kɛ ɔbamaa ɔ bo zo amra abu abɔ nwo. Nyamenle eza hakyile nrenyia ne duma. Alimoa ne ɛnee bɛfɛlɛ ye Ebilam. Noko nzinlii Gyihova vɛlɛle ye Ebileham mɔɔ kile “Maanle maanle kɔsɔɔti bɛ Ze.” Ɛke yɛɛ Gyihova limoale hilele kɛzi Sɛla anwo ba edwɛkɛ ne anu la. Ɔhakyile ye duma Sɛleeyae mɔɔ bie a ɔbahile “Butule” la ɔyɛle ye Sɛla, duma mɔɔ yɛ muala yɛze ye la. Sɛla abo kile “Belemgbunli Ara Raalɛ!” Gyihova hilehilele deɛmɔti yeva duma ɛhye yemaa raalɛ ɛhye mɔɔ ɔkulo ye edwɛkɛ la anu kɛ: “Mebayila ye, na yeayɛ maanle maanle bɛ nli. Ɔ bo zo amra bie mɔ bayɛ arelemgbunli.”​—Mɔlebɛbo 17:5, 15, 16.

Ngyekyeleɛ mɔɔ Gyihova yɛle kɛ abozonli bie mɔɔ ɔ nwo zo a bɛbalua bɛayila maanle maanle kɔsɔɔti la bavi Sɛla ara nrenyia anu a ara a! Duma mɔɔ Nyamenle vale donle kakula ne la a le Ayezeke mɔɔ abo kile “Ɛzelekɛ” la. Mekɛ mɔɔ limoa mɔɔ Ebileham dele kɛ Sɛla banyia ɔ kunlu ralɛ na ɔ nwo zo a Gyihova balua ali ye bodane nwo gyima la, “ɔdule ɔdɔle mutule nu ɔzelele.” (Mɔlebɛbo 17:17) Ɔzinle ɔ nwo na anyelielɛ yile ye ahonle. (Wulomuma 4:19, 20) Na Sɛla noko ɛ?

Ɛnee ɔtɛkyɛle biala yɛɛ mrenyia nsa mɔɔ le nyɛvolɛ la rale Ebileham ndanlɛ sua ne anu a. Ɛnee ɔle ewia henlema noko agyalɛma ne yɛle ye ndɛ liele menli ɛhye mɔ nyɛvolɛ. Ebileham zele Sɛla kɛ: “Ka ɛ nwo suzu esamo kpalɛ ekyi yɛ kpanwo.” Ɛnee ɛyɛvolɛyɛlɛ ɛnla aze wɔ zɔhane mekɛ ne. Ebileham angyakyi gyima ne amuala angua ɔ ye anwo zo; ɔyɛle ye ndɛ ɔhɔhyele ɛnlankɛ ne bie ɔdonle aleɛ na ɔvale nza ɔbokale nwo ɔmaanle bɛ. (Mɔlebɛbo 18:1-8) Amuanrɛɛ “mrenyia” ɛhye mɔ le anwumabɔvolɛma! Ɛnee edwɛkɛ ɛhye wɔ ɛzoanvolɛ Pɔɔlo adwenle nu wɔ mekɛ mɔɔ ɔhɛlɛle ɛhye la: “Bɛmmamaa bɛ rɛle fi nyɛvolɛlielɛ, ɔluakɛ bie mɔ luale zo liele anwumabɔvolɛma mɔɔ bɛannwu ye.” (Hibuluma 13:2) Ɛbahola wɔazukoa nyɛvolɛ ɛlielɛ nwo neazo kɛnlɛma mɔɔ Ebileham nee Sɛla yɛle la ɔ?

Mekɛ mɔɔ anwumabɔvolɛ ne mɔ anu ko dinle Nyamenle ɛwɔkɛ mɔɔ yebɔ kɛ ɔbamaa Sɛla awo ralɛ nrenyia anu la, ɛnee ɔvea ye ndanlɛ sua ne anu ɔlɛtie. Mɔɔ ɔdele kɛ ɔdaye ɛrelera nu ɔbawo la, yeangola ɔ nwo sɔ​—ɔzelele na ɔhanle kɛ: “Asoo kɛkala mɔɔ mewie ɛrelera yɛ, na me hu ɔdaye yeyɛ ɛrelera la, yɛɛ akee mebalie me nye a?” Anwumabɔvolɛ ne bizale Sɛla kpuya bie ɔvale ɔdenrɛle ye adwenle, ‘Asoo ɔyɛ se ɔmaa Gyihova?’ Sɛla yɛle debie bie mɔɔ sonla biala bayɛ la, ye ahonle dule na ɔbɔle mɔdenle kɛ ɔfea zolɛ. Ɔhanle ye ndɛndɛ kɛ: “Meanzele.” Anwumabɔvolɛ ne buale kɛ: “Kyɛkyɛ, ɛzelele.”​—Mɔlebɛbo 18:9-15.

Asoo Sɛla ɛzelekɛ ne kile kɛ ɔnlɛ diedi? Ɔnle zɔ fee. Baebolo ne ka kɛ: “Diedi ti a Sɛla noko nyianle anwosesebɛ nrenzɛle a, wɔ mekɛ mɔɔ ɛnee yebo awolɛ zo bɔbɔ la, ɔluakɛ ɔbule Ahenle mɔɔ bɔle ɛwɔkɛ ne la nɔhavo.” (Hibuluma 11:11) Ɛnee Sɛla ze Gyihova yɛɛ ɔze kɛ ɔdi ye ɛwɔkɛ zo. Yɛ nuhua boni a ɛngyia diedi kpole ɛhye bie a? Yɛbɔ mɔdenle yɛnwu Nyamenle ne mɔɔ le Baebolo ne kɛlɛvolɛ la kpalɛ. Saa yɛyɛ zɔhane a yɛbanwu deɛmɔti Sɛla nyianle diedi zɔhane la. Nɔhalɛ nu, Gyihova le nɔhavo yɛɛ ɔdi ye ɛwɔkɛ biala azo​—ɔdwu mekɛ bie a, ɔyɛ ye wɔ adenle mɔɔ yɛ nwanwane la azo na wɔannea a, ɔbazi ɛ nwo na wɔazele!

Mɔɔ Sɛla nyianle ɛvolɛ 90 la, ɔnyianle debie mɔɔ yeva mekɛ tendenle yehendɛ la. Ɔwole ralɛ nrenyia ɔmaanle ɔ hu mɔɔ ɛnyia ɛvolɛ ɛya ko la! Ebileham donle kakula ne Ayezeke anzɛɛ “Ɛzelekɛ” kɛ mɔɔ Nyamenle hanle la. Yɛbahola yɛapɛ Sɛla mɔɔ anloa nwo ɛyɛ monvoo la anwo nvoninli wɔ mekɛ mɔɔ ɔlɛka kɛ: “Nyamenle ɛmaa ɛzelekɛ ɛdɔ me nwo. Awie biala mɔɔ kɛde me nganeɛ la nee me bazele.” (Mɔlebɛbo 21:6) Ahyɛlɛdeɛ ɛhye mɔɔ  yɛ nwanwane la maanle Sɛla anye liele wɔ ye ngoane mekɛ kɔsɔɔti anu. Noko akee ɔvale gyima kpole ɔdole ɔ nwo.

Mɔɔ Ayezeke nyianle ɛvolɛ nnu la, bɛlile ɛvoya bɛvale bɛpɛle kakula ne nyɛfonlɛ. Noko akee, ɛnee ninyɛne ɛngɔ ye boɛ. Yɛkenga kɛ Sɛla hɔle zo “nwunle” ngyegyelɛ bie mɔɔ ɛnee ɛlɛkɔ zo la. Heega ara Yehyemeeyɛle mɔɔ ɛnee ɛnyia ɛvolɛ 19 la bɔle ɔbo kɛ ɔsi Ayezeke amgbu. Ɛnee ɛhye ɛnle ahyi ɛhanlɛ bie ala. Amozii sunsum ne hanle ɛzoanvolɛ Pɔɔlo maanle ɔhanle tɛnlabelɛ ne anwo edwɛkɛ kɛ Yehyemeeyɛle yɛle Ayezeke kpɔdekpɔde. Sɛla nwunle anyebolo mɔɔ wɔ edwɛkɛ ne anu la, ɛnee ɔfale ɔ ra ne boɛyɛlɛ nwo. Ɛnee Sɛla ze kɛ Ayezeke ɛnle ɔ ra ala emomu ɔlɛ gyima titili ɔdi ye wɔ Gyihova bodane nu. Yemɔti ɔvale akɛnrasesebɛ ɔhanle nwolɛ edwɛkɛ wienyi ɔhilele Ebileham. Ɔhanle kɛ ɔmaa Heega nee ɔ ra Yehyemeeyɛle ɛhɔ.​—Mɔlebɛbo 21:8-10; Galeehyeama 4:22, 23, 29.

Kɛzi Ebileham dele nganeɛ ɛ? Yɛkenga kɛ: “Ebileham anye anlie ɛhye anwo fee, ɔluakɛ ɔ ra nrenyia a le kakula ne.” Ɛnee ɔkulo ɔ ra Yehyemeeyɛle edwɛkɛ kpalɛ yemɔti ɔvale ye adwenle ɔziele nganeɛ mɔɔ ɛnee ɔte ɔmaa ɔ ra ne la azo somaa. Noko Gyihova nwunle tɛnlabelɛ ne kpalɛ, yemɔti ɔvale ɔ nwo ɔliele edwɛkɛ ne anu. Yɛkenga kɛ: “Na Nyamenle zele Ebileham kɛ, ‘Mmadwenle ɛ ra nrenyia ne nee wɔ akɛlɛ raalɛ ne anwo. Di edwɛkɛ biala mɔɔ Sɛla ɛha ɛhile wɔ la azo, ɔluakɛ ɛ bo zo amra vi Ayezeke anu a bara a.’” Gyihova bɔle Ebileham ɛwɔkɛ kɛ ɔbanlea Heega nee ɔ ra nrenyia ne. Ebileham mɔɔ di nɔhalɛ la diele Gyihova.​—Mɔlebɛbo 21:11-14.

Ɛnee Sɛla le Ebileham aye mɔɔ ɔkulo ye na ɔle ye boavolɛ kpalɛ. Tɛ mekɛ ne amuala a ɔhanle mɔɔ ɔ hu kulo kɛ ɔte la ɔhilele ye a. Mɔɔ ɔnwunle kɛ ngyegyelɛ ne bahola aha bɛ abusua ne nee bɛ kenle bie la, ɔhanle nwolɛ edwɛkɛ fɔɔnwo ɔhilele ɔ hu. Ɛhye ɛngile kɛ ɔmbu ɔ hu. Nɔhalɛ nu, ɛzoanvolɛ Pita mɔɔ ɛnee egya la hanle kɛ Sɛla yɛle neazo maanle agyalɛ mraalɛ kɛ bɛhile ɛbule kpole bɛmaa bɛ hu mɔ. (1 Kɔlentema 9:5; 1 Pita 3:5, 6) Saa Sɛla yɛle koonwu wɔ edwɛkɛ ɛhye anwo a, anrɛɛ ɔkile kɛ ɔmbu Ebileham, ɔluakɛ anrɛɛ ngyegyelɛ mɔɔ bavi nu ara la bayɛ kpole na ɔbaha abusua ne amuala. Sɛla vile ɛhulolɛ nu hanle mɔɔ ɔwɔ kɛ ɔka la.

Agyalɛ mraalɛ dɔɔnwo anye die Sɛla neazo ne anwo. Bɛfi nɔhalɛlilɛ nee ɛhulolɛ nu bɛ nee bɛ hu mɔ tendɛ kɛnlɛma bɛfa bɛsukoa ye neazo ne. Bɛ nuhua dɔɔnwo akunlu a anrɛɛ Gyihova fa ɔ nwo die bɛ agyalɛ nu edwɛkɛ nu kɛ mɔɔ ɔyɛle ɔmaanle Sɛla la. Noko, bɛnyia ɛhulolɛ nee abotane nwo ɛzukoalɛdeɛ bɛfi Sɛla mɔɔ lɛ diedi kpole la ɛkɛ.

Gyihova vɛlɛle raalɛ ɛhye “Belemgbunli Ara Raalɛ” ɛdeɛ, noko yeanlea ade kɛ bɛbazonle ye. Ɔnyɛ ɛzulolɛ kɛ mekɛ mɔɔ Sɛla nyianle ɛvolɛ 127 na ɔwule la, Ebileham “zunle ye.” * (Mɔlebɛbo 23:1, 2) Ɔ nwo lɔle ye kulovolɛ “Belemgbunli Ara Raalɛ” ne kpole. Kpolerazulɛ biala ɛnle nwolɛ kɛ Gyihova noko anwo ɛlɛdɔ raalɛ ɛhye mɔɔ di nɔhalɛ la​—na yeyɛ kɛ ɔbadwazo ye yeamaa yeara Paladaese azɛlɛ zo. Dahuu ngoane wɔ ɛkɛ maa Sɛla nee menli mɔɔ sukoa ye diedi ne la amuala.​—Dwɔn 5:28, 29.