1. Kɛ mɔɔ bɛhɛlɛ ye wɔ Nolobɔvo 7:20 la, nɔhalɛ edwɛkɛ boni a Belemgbunli Sɔlɔmɔn hanle a?

 BELEMGBUNLI Sɔlɔmɔn hɛlɛle kɛ: “Tenlenenli biala ɛnle azɛlɛ ye azo mɔɔ dahuu yɛ kpalɛ na ɔnyɛ ɛtane ɛlɛ a.” (Nol. 7:20) Ɔle nɔhalɛ bɔkɔɔ! Yɛ muala yɛle ɛtanevolɛma. (1 Dwɔn 1:8) Ɔti yɛ muala yɛhyia ɛtanefakyɛ yɛfi Nyamenle nee yɛ gɔnwo mɔ menli ɛkɛ.

2. Saa yɛ gɔnwo kpalɛ bie fa yɛ ɛtane kyɛ yɛ a, kɛzi yɛte nganeɛ ɛ?

² Bie a ɛkakye mekɛ mɔɔ ɛvonle ɛ gɔnwo kpalɛ bie la. Ɛnee ɛkulo kɛ ɛdi ngyegyelɛ ne anwo gyima na bɛyɛ agɔnwolɛma bieko, ɔti ɛvile wɔ ahonle nu ɛkpale ye kyɛlɛ. Mɔɔ ɛ gɔnwo ne vale hyɛle wɔ bɔkɔɔ la, kɛzi ɛdele nganeɛ ɛ? Wɔ ahonle dɔle wɔ azule nu ɔ? Ɛhɛe, na eza ɛ nye liele!

3. Duzu a yɛbazuzu nwo wɔ edwɛkɛ ɛhye anu a?

³ Yɛkulo kɛ Gyihova yɛ yɛ Gɔnwo mɔɔ yɛbikye ye kpalɛ a, noko ɔdwu mekɛ ne bie a yɛbaha anzɛɛ yɛbayɛ ninyɛne mɔɔ ɔ nye ɛnlie nwo la. Noko duzu a maa yɛdie yɛdi kɛ Gyihova ɛziezie ɔ nwo kɛ ɔbava yɛ ɛtane yeahyɛ yɛ a? Ngakyile boni a wɔ Gyihova fakyɛ nee alesama ɛdeɛ ne anu a? Mɔɔ li awieleɛ, nwane mɔ a Nyamenle fa bɛ ɛtane kyɛ bɛ a?

4. Kɛ ɔkɛyɛ na yɛalie yɛali kɛ Gyihova lɛ ɛhulolɛ kɛ ɔbava yɛ ɛtane yeahyɛ yɛ ɛ?

⁴ Nyamenle Edwɛkɛ ne maa yɛnwu kɛ Gyihova lɛ ɛhulolɛ kɛ  ɔbava ɛtane yeahyɛ. Mɔɔ Gyihova ka ɔ nwo edwɛkɛ ahile Mosisi wɔ Saenae Boka ne azo la, ɔluale anwumabɔvolɛ nwo zo ɔhanle kɛ: “Gyihova, Gyihova, anwunvɔnezelɛ nee ahunluyelɛyelalɛ Nyamenle, ɔkyɛ na yeava ɛya yɛɛ ɛlɔlɛ kpundii nee nɔhalɛlilɛ ɛyi ye tɛkɛɛ, ɔda ɛlɔlɛ kpundii ali ɔkile apenle apenle, ɔfa nvonleɛ nee mɛladonlɛ yɛɛ ɛtane ɔkyɛ.” (Ɛzɛ. 34:6, 7) Gyihova le atiakunlukɛnlɛma nee anwunvɔnezelɛ Nyamenle mɔɔ dahuu ɛziezie ɔ nwo kɛ ɔbava ɛtanevolɛma mɔɔ nu bɛ nwo la ɛtane yeahyɛ bɛ a.​—Nih. 9:17; Edw. 86:15.

5. Kɛmɔ Gyihova ze alesama kpalɛ la ati, duzu a Edwɛne 103:13, 14, se ɔka ye ɔmaa ɔyɛ a?

⁵ Kɛmɔ Gyihova a le yɛ Bɔvolɛ la ati, ɔze yɛ nwo edwɛkɛ biala. Wɔmɔ suzu nwolɛ nea! Ɔze sonla ko biala mɔɔ wɔ azɛlɛ ye azo la anwo edwɛkɛ biala. (Edw. 139:15-17) Ɔti ɔze sinlidɔlɛ mɔɔ yɛnyianle yɛvile yɛ awovolɛ ɛkɛ la kɔsɔɔti. Mɔɔ tɛla biala la, ɔze mɔɔ ɛdo yɛ mɔɔ ɛmaa yɛnyia subane mɔɔ yɛlɛ la kɔsɔɔti. Duzu a alesama anwo edwɛkɛ ɛhye mɔɔ Gyihova ze ye kpalɛ la ka ye maa ɔyɛ a? Ɔmaa ɔse yɛ anwunvɔne.​—Edw. 78:39; kenga Edwɛne 103:13, 14.

6. Kɛzi Gyihova ɛmaa yela ali kɛ ɔlɛ ɛhulolɛ kɛ ɔbava ɛtane yeahyɛ ɛ?

⁶ Gyihova ɛmaa yela ali kɛ ɔlɛ ɛhulolɛ kɛ ɔbava ɛtane yeahyɛ. Ɔze kɛ ɔlua mɔɔ Adam, sonla mɔɔ limoa la yɛle la ati, yɛ muala yɛyɛ ɛtanevolɛma na awieleɛ bɔkɔɔ ne yɛbawu. (Wlo. 5:12) Ɛnee debie biala ɛnle ɛkɛ mɔɔ yɛbahola yɛayɛ yɛalie yɛ nwo nee awie mɔ yɛavi ɛtane nee ewule nu a. (Edw. 49:7-9) Noko yɛ Nyamenle ne mɔɔ lɛ ɛlɔlɛ la lale ahunluyelɛyelalɛ ali na ɔyɛle ngyehyɛleɛ ɔliele yɛ. Duzu a ɔyɛle a? Kɛ mɔɔ Dwɔn 3:16 kile la, Gyihova zoanle ɔ Ra kokye ne ɔmaanle ɔrawule ɔmaanle yɛ. (Mat. 20:28; Wlo. 5:19) Gyisɛse gyinlanle yɛ gyakɛ anu wule amaa yealie awie biala mɔɔ kɛla ye ali kɛ ɔlɛ diedi wɔ ye nu la. (Hib. 2:9) Nea kɛzi ɔyɛle Gyihova nyane kɛ ɔnwunle kɛ ye kulovolɛ Ralɛ ne ɛlɛnwu amaneɛ na yeawu anyiemgba ewule la! Nɔhalɛ nu, saa Gyihova ɛngulo kɛ ɔfa yɛ ɛtane ɔkyɛ yɛ a, anrɛɛ ɔnrɛmaa ɔ Ra ne ɛnrɛwu.

7. Menli mɔɔ Gyihova vale bɛ ɛtane hyɛle bɛ bɔkɔɔ la anwo neazo boni mɔ a wɔ Baebolo ne anu a?

⁷ Menli mɔɔ Gyihova vale bɛ ɛtane hyɛle bɛ bɔkɔɔ la anwo neazo dɔɔnwo wɔ Baebolo ne  anu. (Ɛfɛ. 4:32) Nwane a ɛra wɔ adwenle nu a? Bie a Belemgbunli Manasɛ ɔ. Zɔhane nrenyia atisesebɛ ne yɛle ɛtane mgbole dɔɔnwo tiale Gyihova. Ɔzonlenle awozonle na ɔzile menli adua ɔmaanle bɛdabɛ noko bɛyɛle bie. Ɔhunle ɔdaye mumua ne ɔ mra ɔbɔle afɔle ɔmaanle awozonle. Mɔɔ ɛnle kpalɛ fee la a le kɛ, ɔzele adalɛ nyamenle bie ananze ɔziele Gyihova ɛzonlenlɛsua nwuanzanwuanza ne anu. Baebolo ne hanle ɔ nwo edwɛkɛ kɛ: “Ɔyɛle ɛtane kpole wɔ Gyihova anye zo ɔvale ɔhanle ye ɛya.” (2 Ek. 33:2-7) Noko mɔɔ Manasɛ nlunle ɔ nwo nɔhalɛ nu la, Gyihova vale ye ɛtane hyɛle ye bɔkɔɔ. Nyamenle maanle ɔhɔlile ye belemgbunli ne bieko bɔbɔ. (2 Ek. 33:12, 13) Bie a eza ɛlɛdwenle Belemgbunli Devidi mɔɔ yɛle ɛtane mgbole tiale Gyihova, mɔɔ bie a le agyalɛzɛkyelɛ nee sonlahunlɛ la anwo. Noko mɔɔ Devidi liele ye nvonleɛ ne dole nu na ɔnlunle ɔ nwo nɔhalɛ nu la, Gyihova vale hyɛle ye. (2 Sa. 12:9, 10, 13, 14) Ɔti yɛbahola yɛalie yɛali kɛ, Gyihova lɛ ɛhulolɛ kɛ ɔbava ɛtane yeahyɛ. Yɛɛ kɛ mɔɔ yɛbanwu ye la, Gyihova fakyɛ le ngakyile fi alesama ɛdeɛ ne anwo.

8. Kɛmɔ Gyihova le Ndɛnebuavolɛ mɔɔ tɛla biala la ati, kɛzi ɔka ɛhulolɛ mɔɔ ɔlɛ kɛ ɔbava ɛtane yeahyɛ la ɛ?

⁸ Gyihova a le “azɛlɛ ye kɔsɔɔti Ndɛnebuavolɛ ne” a. (Gyn. 18:25) Ɔwɔ kɛ ndɛnebuavolɛ kpalɛ biala nwu mɛla ne akunlu nee ɔ nzi. Na zɔhane ala a Gyihova de a, ɔluakɛ ɔnle yɛ Ndɛnebuavolɛ ala, eza ɔle yɛ Mɛla Maavolɛ. (Aye. 33:22) Awie biala ɛnze mɔɔ le kpalɛ nee mɔɔ le ɛtane la anwo edwɛkɛ ɛndɛla Gyihova. Duzu bieko a ɔhyia kɛ ndɛnebuavolɛ kpalɛ yɛ a? Ɔwɔ kɛ ɔnwu nɔhalɛ mɔɔ wɔ edwɛkɛ bie anu la amuala kolaa na yeabua ndɛne. Ɔti Gyihova a le Ndɛnebuavolɛ mɔɔ tɛla biala a, ɔluakɛ dahuu ɔze nɔhalɛ biala mɔɔ wɔ edwɛkɛ bie anu la.

9. Duzu a Gyihova gyinla zo si kpɔkɛ kɛ ɔfa ɛtane yeahyɛ anzɛɛ ɔnrɛva ɔnrɛhyɛ a?

⁹ Gyihova ɛnle kɛ alesama ndɛnebuavolɛma la. Dahuu ɔze nɔhalɛ kɔsɔɔti mɔɔ wɔ edwɛkɛ biala mɔɔ ɔbaradɔ ɔ nyunlu la anu la. (Gyn. 18:20, 21; Edw. 90:8) Tɛ mɔɔ alesama nwu ye anzɛɛ bɛte la a ɔgyinla zo ɔbua ndɛne a. Ɔze kɛzi subane mɔɔ awie nyianle vile ye awovolɛ ɛkɛ, kɛzi bɛtetele ye, ɛleka mɔɔ ɔde yɛɛ kɛzi ɔte kpɔkɛ wɔ nganeɛdelɛ nee adwenle nu la ka ye maa ɔyɛ ye nyɛleɛ la. Eza Gyihova nwu ahonle nu. Ɔze debie mɔɔ ka yɛ nuhua ko biala ɔmaa ɔyɛ ninyɛne bie mɔ, adwenle mɔɔ ɔfa ɔyɛ deɛ ne nee ye ɛhulolɛdeɛ. Yɛnrɛhola yɛnrɛva debie biala yɛnrɛvea Gyihova. (Hib. 4:13) Ɔti saa Gyihova fa awie ɛtane kyɛ ye a, ɔkile kɛ ɔgyinlanle nɔhalɛ biala mɔɔ wɔ edwɛkɛ ne anu la azo a ɔyɛle zɔ a.

10. Duzu ati yɛkola yɛka kɛ Gyihova bua ndɛne fɔɔnwo dahuu a? (Ditilɔnomi 32:4)

¹⁰ Gyihova bua ndɛne fɔɔnwo dahuu. Ɔnli mɔguazo fee. Tɛ kɛzi awie de, ye anwonyia, duma mɔɔ yelie anzɛɛ ninyɛne mɔɔ ɔkola ɔyɛ la azo a ɔgyinla ɔfa ye ɛtane ɔkyɛ ye a. (1 Sa. 16:7; Gye. 2:1-4) Awie biala ɛnrɛhola ɛnrɛtinlitinli Gyihova anwo zo anzɛɛ ɛnrɛmaa ye belaebo. (2 Ek. 19:7) Tɛ anyezota anzɛɛ kɛzi ɔte nganeɛ la a ɔgyinla zo ɔsi kpɔkɛ a. (Ɛzɛ. 34:7) Nɔhalɛ nu, Gyihova le Ndɛnebuavolɛ mɔɔ tɛla biala a, ɔluakɛ ɔze yɛ nwo edwɛkɛ biala nee tɛnlabelɛ biala mɔɔ yɛwɔ nu la.​—Kenga Ditilɔnomi 32:4.

11. Kɛzi Gyihova fakyɛ le ngakyile fi alesama ɛdeɛ ne anwo ɛ?

¹¹ Menli mɔɔ hɛlɛle Hibulu Ngɛlɛlera ne la nwunle kɛ Gyihova fakyɛ le ngakyile bɔkɔɔ. Wɔ tɛnlabelɛ bie mɔ anu, bɛfa Hibulu edwɛkɛkpɔkɛ  bie bɛdi gyima na buluku ko hanle kɛ “bɛfa bɛkilehile kɛzi Nyamenle fa ɛtanevolɛma ɛtane kyɛ bɛ la ala anu. Kɛzi alesama fa bɛ gɔnwo mɔ ɛtane kyɛ bɛ la ɛndwu ɛleka biala, ɔti bɛnva zɔhane edwɛkɛkpɔkɛ ne bɛngilehile yemɔ anu ɛlɛ.” Gyihova angomekye a lɛ tumi fa ɛtanevolɛ mɔɔ ɛnlu ɔ nwo la ɛtane kyɛ ye bɔkɔɔ a. Saa Gyihova fa yɛ ɛtane kyɛ yɛ a, duzu a fi nu ba a?

12-13. (a) Saa Gyihova fa awie ɛtane kyɛ ye a, duzu a ɔnyia a? (b) Gyihova fa awie ɛtane kyɛ ye a, ɔboa ye ɔkɔdwu kenlenzu?

¹² Saa yɛdie yɛto nu kɛ Gyihova ɛva yɛ ɛtane ɛhyɛ yɛ a, ɔle “anwodɔlɛ mekɛ” ɔmaa yɛ, eza ɔmaa yɛ nzo nu dwo yɛ na yɛnyia adwenle mɔɔ anu te. Ɛtanefakyɛ mɔɔ “vi Gyihova ɛkɛ” la ala a maa yɛ nwo tɔ yɛ zɛhae a, yɛnrɛhola yɛnrɛnyia ye wɔ alesama ɛkɛ. (Gyi. 3:19) Saa Gyihova fa yɛ ɛtane kyɛ yɛ a, ɔmaa yɛ nee ye agɔnwolɛvalɛ ne yɛ kpalɛ bɔkɔɔ kɛ asɛɛ yɛtɛyɛle ɛtane ɛlɛ la.

¹³ Saa Gyihova fa yɛ ɛtane kyɛ yɛ a, ɔnrɛbɔ yɛ somolɛ anzɛɛ ɔnrɛhwe yɛ nzo bieko ɛlɛ wɔ zɔhane ɛtane ne anwo. (Aye. 43:25; Gyɛ. 31:34) Gyihova ye yɛ ɛtane ne mɔ fi ɔ nwo kɔ moa “kɛ mɔɔ aduduleɛ nee adɔleɛ avinli twe la.” * (Edw. 103:12) Saa yɛdwenledwenle kɛzi Gyihova fakyɛ le kpole la anwo a, ɔmaa anyezɔlɛ yi yɛ ahonle na ɔsi yɛ nwo. (Edw. 130:4) Noko nwane mɔ a Gyihova bahola ava bɛ ɛtane ahyɛ bɛ a?

14. Badwu ɛke, duzu a yɛzukoa wɔ deɛmɔti Gyihova fa ɛtane kyɛ anzɛɛ ɔnva ɔngyɛ la anwo a?

¹⁴ Kɛ mɔɔ yɛnwu ye la, saa Gyihova bava awie ɛtane ahyɛ ye a, ɔngyi kɛzi ɛtane ne kpole de la azo. Eza yɛzukoa kɛ, kɛmɔ Gyihova le yɛ Bɔvolɛ, Mɛla Maavolɛ nee yɛ Ndɛnebuavolɛ la ati, ɔboa ye ɔmaa ɔsi kpɔkɛ kɛ ɔbava awie ɛtane yeahyɛ ye anzɛɛ ɔnrɛva ɔnrɛhyɛ ye. Ninyɛne boni mɔ a Gyihova suzu nwo a?

15. Kɛ mɔɔ Luku 12:47, 48 kile la, debie ko boni a Gyihova suzu nwo a?

¹⁵ Debie ko mɔɔ Gyihova suzu nwo la a le kɛ saa ɛnee ɛtanevolɛ ne ze kɛ mɔɔ ɔlɛyɛ la ɛnle kpalɛ a. Gyisɛse maanle ɛhye anu lale ɛkɛ wɔ Luku 12:47, 48. (Kenga.) Saa awie anye fuu  bɔ adwenle kɛ ɔyɛ debie mɔɔ ɛnle kpalɛ, wɔ mekɛ mɔɔ ɔze kɛ mɔɔ ɔlɛyɛ la ɛnzɔ Gyihova anye la a, ɛnee yeyɛ ɛtane kpole. Wɔannea a Gyihova ɛnrɛva sonla zɛhae ɛtane ɛnrɛhyɛ ye. (Maake 3:29; Dwɔn 9:41) Noko ɔwɔ kɛ yɛdie yɛto nu kɛ, ɔdwu mekɛ ne bie a yɛze kɛ mɔɔ yɛyɛle la ɛnle kpalɛ. Saa ɔba ye zɛhae a, asoo yɛlɛ anyelazo bie ɔ? Ɛhɛe! Na ɛhye fa yɛ ba debie bieko mɔɔ Gyihova suzu nwo la azo.

16. Duzu a le anlubɛnwo, na duzu ati a ɔhyia na Gyihova ava yɛ ɛtane ahyɛ yɛ a?

¹⁶ Debie bieko mɔɔ Gyihova suzu nwo la a le kɛ saa ɛtanevolɛ ne ɛnlu ɔ nwo nɔhalɛ nu a. Saa bɛka kɛ awie ɛnlu ɔ nwo a, ɔkile duzu? Ɔkile kɛ “yehakyi ye adwenle, ye subane anzɛɛ ye bodane.” Ɔkile kɛ awie ɛlɛdi nyane kpole wɔ ninyɛndane bie mɔɔ yeyɛ anzɛɛ debie kpalɛ bie mɔɔ anrɛɛ ɔwɔ kɛ ɔyɛ na yeanyɛ la anwo. Awie mɔɔ ɛnlu ɔ nwo la ɛnli nyane wɔ ninyɛndane mɔɔ ɔyɛle la angomekye anwo, emomu eza ɔdi nyane kɛ ɔmaanle ɔ nee Gyihova avinli agɔnwolɛvalɛ ne zɛkyele na ɔhɔyɛle ninyɛndane zɔhane mɔ la. Kakye kɛ arelemgbunli ɛhye mɔ, Manasɛ nee Devidi, yɛle ɛtane mgbole noko Gyihova vale bɛ ɛtane hyɛle bɛ ɔluakɛ bɛnlunle bɛ nwo nɔhalɛ nu. (1 Arl. 14:8) Ɔti, ɔwɔ kɛ Gyihova nwu debie mɔɔ kile kɛ yɛnlu yɛ nwo la na yeagyinla zo yeava yɛ ɛtane yeahyɛ yɛ. Noko saa yɛdi nyane wɔ ɛtane mɔɔ yɛyɛle la anwo a, ɛnee ɔtɛwiele. Ɔwɔ kɛ yɛnyia ɛhulolɛ kɛ yɛbayɛ nwolɛ debie. * Ɛhye fa yɛ ba debie bieko mɔɔ Gyihova suzu nwolɛ la azo.

17. Duzu a kile kɛ awie ɛhakyi a, na duzu ati a nwolɛ hyia amaa yeanyɛ ɛtane mɔɔ ɔyɛle la bieko a? (Ayezaya 55:7)

¹⁷ Debie bieko mɔɔ Gyihova suzu nwo la a le kɛ saa ahenle ɛhakyi a. Awie mɔɔ ɛhakyi la gyakyi ninyɛndane mɔɔ ɔyɛ la na ɔbɔ ɔ bo ɔbɔ ye ɛbɛla kɛ mɔɔ Gyihova kulo la. (Kenga Ayezaya 55:7.) Ɔwɔ kɛ ahenle kakyi ye adwenle na ɔnyia Gyihova adwenle. (Wlo. 12:2; Ɛfɛ. 4:23) Ɔwɔ kɛ ɔbɔ kpɔkɛ kɛ ɔbahakyi adwenle ɛtane mɔɔ ɛnee ɔlɛ la na yeagyakyi ninyɛndane mɔɔ ɔyɛ la. (Kɔl. 3:7-10) Nɔhalɛ nu, diedi mɔɔ yɛlɛ wɔ Kelaese afɔlebɔlɛ ne  anu la a le debie titili mɔɔ Gyihova gyinla zo fa yɛ ɛtane kyɛ yɛ na ɔte yɛ nwo ɔfi yɛ ɛtane nwo a. Noko saa Gyihova nwu kɛ yɛlɛbɔ mɔdenle yɛahakyi yɛ ɛbɛlabɔlɛ a, yɛɛ ɔbagyinla zɔhane afɔlebɔlɛ ne azo yeava yɛ ɛtane yeahyɛ yɛ a.​—1 Dwɔn 1:7.

18. Duzu a yɛzuzu nwo wɔ Gyihova fakyɛ ne anwo a?

¹⁸ Bɛmaa yɛva mekɛ ekyii yɛdi ninyɛne titili mɔɔ yɛzuzu nwo la anu. Amgba, Gyihova a le Awie mɔɔ fa ɛtane kyɛ kpalɛ wɔ aleɛabo amuala a. Duzu ati a yɛkola yɛka ye zɔ a? Mɔɔ limoa, dahuu ɔlɛ ɛhulolɛ kɛ ɔbava ɛtane yeahyɛ. Mɔɔ tɔ zo nwiɔ, ɔze yɛ nwo edwɛkɛ kɔsɔɔti. Ɔze kɛzi yɛde la kpalɛ yɛɛ ɔdaye a ɔle awie mɔɔ fɛta bɔkɔɔ mɔɔ ɔbahola yeahile kɛ amgba yɛnlu yɛ nwo nɔhalɛ nu a. Yɛɛ mɔɔ tɔ zo nsa, saa Gyihova fa yɛ ɛtane kyɛ yɛ a, ɔkyikyi yɛ ɛtane ne bɔkɔɔ. Ɛhye maa yɛnyia adwenle mɔɔ anu te na yɛnyia ɔ nyunlu ɛlolɛ.

19. Yɛnli munli yɛɛ yɛbahɔ zo yɛayɛ ɛtane ɛdeɛ, noko duzu ati a yɛ nye bahola alie a?

¹⁹ Nɔhalɛ nu, mekɛ ala mɔɔ yɛnli munli la, yɛbahɔ zo yɛayɛ ɛtane. Noko edwɛkɛ mɔɔ wɔ Insight on the Scriptures Volume 2, mukelɛ 771 la bahola akyekye yɛ rɛle. Ɔse: “Gyihova se anwunvɔne yɛɛ ɔze kɛ ye azonvolɛ le bɛtɛɛ. Ɔti ɔnle kɛ bɛdi nyane dahuu ɔluakɛ bɛnli munli na bɛyɛ nvonleɛ la ati. (Ed 103:8-14; 130:3) Saa bɛlɛbɔ mɔdenle bɛayɛ mɔɔ Nyamenle kulo la a, bɛ nye bahola alie. (Fe 4:4-6; 1Dw 3:19-22).” Edwɛkɛ ɛhye maa anwosesebɛ kpalɛ!

20. Duzu a yɛbazuzu nwo wɔ edwɛkɛ bieko anu a?

²⁰ Ɔyɛ yɛ fɛ kɛ Gyihova lɛ ɛhulolɛ kɛ saa yɛnu yɛ nwo nɔhalɛ nu a, ɔbava yɛ ɛtane yeahyɛ yɛ la. Noko kɛ ɔkɛyɛ na yɛazukoa Gyihova fakyɛ ne ɛ? Ndenle boni mɔ azo a yɛ fakyɛ ne zɔho Gyihova ɛdeɛ ne a, yɛɛ ndenle boni mɔ azo a eza ɔle ngakyile a? Duzu ati a ɔhyia kɛ yɛbanwu ngakyile mɔɔ wɔ nu la ɛ? Edwɛkɛ mɔɔ doa zo la babua zɔhane kpuya ne mɔ.