MGBAVOLƐ NEE MBƐLƐRA
11: Gyima Ɛsesebɛyɛlɛ
MƆƆ ƆKILE LA
Menli mɔɔ kulo gyima ɛsesebɛ la ɛnnriandi gyima ɛyɛlɛ. Emomu, bɛyɛ gyima ɛsesebɛ bɛdi bɛ nee awie mɔ ngyianlɛ nwo gyima—saa bɔbɔ awie mɔ ɛmbu gyima mɔɔ bɛyɛ la a.
DEƐMƆTI ƆHYIA LA
Saa ɛkulo o, ɛngulo o, ɛzonlelilɛ dɔɔnwo wɔ ɛbɛlabɔlɛ nu. Wɔ ewiade mɔɔ menli ɛngulo gyima ɛsesebɛyɛlɛ la anu, saa ɛmaa ɛ nye bolo wɔ gyima nwo a, ɛbanyia zolɛ nvasoɛ.—Nolobɔvo 3:13.
“Menwu ye kɛ saa ɛyɛ gyima ɛsesebɛ a, ɔmaa ɛ nye die na ɛ kunlu dwo ɛ nwo. Ahunlundwolɛ zɔhane ɛmaa mezukoa kɛ mebahulo gyima. Saa ɛmaa ɛ nye bolo gyima ɛyɛlɛ nwo a, ɔbamaa wɔanyia duma kpalɛ.”—Reyon.
BAEBOLO NGYINLAZO: “Gyima ɛsesebɛ biala azo lɛ nvasoɛ.”—Mrɛlɛbulɛ 14:23.
MƆƆ ƐBAHOLA WƆAYƐ LA
Amaa wɔanyia gyima nwo adwenle kpalɛ la, fa nzuzulɛ mɔɔ doɔdoa zo la yɛ gyima.
Maa ɛ nye ɛlie kɛ ɛbayɛ gyima kpalɛ. Saa ɛlɛyɛ sua nu gyima, sukulu gyima anzɛɛ gyima mɔɔ bɛtua wɔ kakɛ la a, fa ɛ nwo wula ye ɛyɛlɛ nu kpalɛ. Saa ɛkola ɛyɛ gyima bie kpalɛ a, kpondɛ ndenle dua zo nyia anyuhɔlɛ—yɛ ye ndɛndɛ anzɛɛ yɛ ye kpalɛ tɛla alimoa ɛdeɛ ne. Mekɛ mɔɔ ɛlɛnyia anyuhɔlɛ dɔɔnwo la, ɛ nye balie wɔ gyima ɛyɛlɛ nwo.
BAEBOLO NGYINLAZO: “Wɔnwu sonla mɔɔ ze ye gyima nye zo la ɔ? Ɔbagyinla arelemgbunli nyunlu; ɔnrɛgyinla koahweabanema anyunlu.”—Mrɛlɛbulɛ 22:29.
Fa wɔ adwenle sie nvasoɛ mɔɔ wɔ zo la azo. Fane dɔɔnwo ne ala, saa ɛdi wɔ ɛzonlelilɛ nwo gyima kpalɛ a, awie mɔ nyia zolɛ nvasoɛ. Kɛ neazo la, saa ɛmaa ɛ nye bolo ɛyɛ wɔ sua nu gyima a, ɔbamaa wɔ abusua ne anu amra gyima zo ade.
BAEBOLO NGYINLAZO: “Anyelielɛ dɔɔnwo wɔ ɛmaanlɛ nu tɛla ɛlielɛ.”—Gyima ne 20:35.
Bɔ mɔdenle kɛ ɛbayɛ dɔɔnwo. Kɛ anrɛɛ ɛbayɛ ekyi bie ala la, kpondɛ adenle dua zo yɛ dɔɔnwo tɛla mɔɔ bɛkpondɛ bɛavi wɔ ɛkɛ la. Wɔ adenle ɛhye azo, ɛdawɔ a ɛlɛ wɔ ɛbɛlabɔlɛ zo tumi a—ɛlɛyɛ dɔɔnwo ɔluakɛ ɛkulo ye zɔ, tɛ kɛ awie gyi ɛ kɔme zo la ati ɔ.—Mateyu 5:41.
BAEBOLO NGYINLAZO: ‘Mmamaa wɔ kpalɛyɛlɛ ne yɛ mialeranu debie, emomu maa ɔyɛ mɔɔ vi ɛdawɔ mumua ne wɔ ɛhulolɛ nu la.’—Faelimɔn 14.
Nyia gyima nwo adwenle kpalɛ. Menli mɔɔ kulo gyima la ɛnle mgbovonle anzɛɛ bɛnyɛ gyima bɛmaa ɔmbo zo. Bɛmaa bɛ nye die gyima ɛsesebɛyɛlɛ nwo na eza bɛnyia mekɛ bɛdie bɛ menle.
BAEBOLO NGYINLAZO: “Bɛ menle ɛlielɛ ekyi le kpalɛ tɛla gyima ɛsesebɛyɛlɛ nee anwoma mɔɔ bɛpele bɛtoa ye la.”—Nolobɔvo 4:6.
Bie A Eza Ɛ Nye Balie
ƐZINZALƐ ARANE
Kɛzi Ɛ Nye Balie Gyimaɛyɛlɛ Nwo La
Suzu ndenle bie mɔ mɔɔ Baebolo ne maa yɛ folɛdulɛ kpalɛ mɔɔ bamaa yɛanyia anyelielɛ nee ahunlundwolɛ wɔ yɛ gyima nwo la anwo nea.
AWAKE!
Kɛzi Ɛbava Wɔ Mekɛ Wɔali Gyima Nrɛlɛbɛ Nu La
Adenle ko mɔɔ ɛbalua zo wɔava wɔ mekɛ wɔali gyima kpalɛ la a le kɛ ɛbalua ndenle nwiɔ bie azo wɔazuzu wɔ ɛbɛlabɔlɛ nwo. Bɛmɛ a le boni?
MGBAVOLƐ NEE MBƐLƐRA BIZA KƐ
Nzɔne Ati A Ɔwɔ Kɛ Meboa Awie Mɔ A?
Yeanyɛ boɛ fee la, saa ɛboa awie mɔ a ɔbaboa wɔ wɔ ndenle nwiɔ azo. Bɛmɛ a le boni?
MGBAVOLƐ NEE MBƐLƐRA BIZA KƐ
Kɛ Ɔkɛyɛ Na Meagyakyi Tu Sie Ɛ?
Kpondɛ nzuzulɛ mɔɔ baboa wɔ yeamaa wɔagyakyi tu sie la!
