Awovolɛ mɔɔ bɛyɛ mɔɔ bɛka la yɛ neazo maa bɛ mra. Kɛ neazo la, saa awie ɛlɛkpondɛ wɔ, na ɛka ɛkile ɛ ra ne kɛ, “Ka kile ye kɛ menle ɛkɛ a,” asoo ɛnea a ɔdaye noko ɔbaha nɔhalɛ?

“Bie mɔ ta ka kɛ, ‘Yɛ mɔɔ meka la, mmanea mɔɔ meyɛ la.’ Noko ɛhye ɛmboa ngakula. Ngakula le kɛ emiane la, mɔɔ yɛbaha anzɛɛ yɛbayɛ la a bɛdabɛ noko bɛsukoa a, na saa mɔɔ yɛkilehile bɛ la nee yɛ nyɛleɛ ɛnle ko a, bɛbaha bɛahile yɛ.”​—David.

BAEBOLO NGYINLAZO: “Wɔmɔ mɔɔ ɛka kɛ, ‘Mmawua’ la, ɛwua ɔ?”​—Wulomuma 2:21.

Awovolɛ bahola anyia bɛ mra ngakula nee mgbavolɛ nee mbɛlɛra bɔbɔ anwo zo tumi kpalɛ adɛla awie gyɛne biala​—mɔɔ bɛ tipɛnema boka nwo la. Ɛhye kile kɛ awovolɛ titili a bahola ava adehilelɛ kpalɛ amaa bɛ mra a​—mɔɔ hyia la a le kɛ bɛbayɛ mɔɔ bɛka la.

“Yɛbahola yɛaha edwɛkɛ bie fane dɔɔnwo, na bie a yɛngola yɛnnwu ye saa yɛ ra ne tie a, noko kenle ko bɔbɔ yɛanyɛ mɔɔ yɛka la a, yɛ ra ne baha ahile yɛ. Ngakula nea debie biala mɔɔ yɛyɛ la kpalɛ, saa bɔbɔ yɛsuzu kɛ bɛnnea yɛ a.”​—Nicole.

BAEBOLO NGYINLAZO: “Nrɛlɛbɛ ne mɔɔ vi anwuma lɔ la ɛdeɛ, . . . ɔnle nabalaba.”​—Gyemise 3:17.

Suzu kɛzi ɛyɛ wɔ ninyɛne la anwo. Duzu ninyɛne a ɛnea ɛfa ɛdielie ɛ nye a? Kɛzi ɛ nee ɛ hu anzɛɛ ɛ ye nee ɛ mra di ɛ? Nwane mɔ a le ɛ gɔnwo mɔ? Ɛdwenle awie mɔ anwo ɔ? Ye sikalɛ nu, ɛkulo kɛ ɛ mra nyi yɛ kɛ ɛdawɔ ɔ?

“Me nee me hu, yɛnga yɛngile yɛ mra ne mɔ kɛ bɛli ngyinlazo mɔɔ yɛdayɛ mumua ne yɛnva yɛnli gyima la azo.”​—Christine.

Saa ɛfo a kpa kyɛlɛ. Ɛ mra ne mɔ ze kɛ ɛnli munli. Yemɔti saa ɛfo ɛ hu, ɛ ye anzɛɛ ɛ mra ne mɔ na ɛka kɛ, “Gyakɔ meanyɛ ye boɛ” a, ɔbamaa ɛ mra ne mɔ azukoa kɛ bɛbali nɔhalɛ na bɛabɛlɛ bɛ nwo aze.

“Saa yɛanyɛ debie bie kpalɛ a, ɔwɔ kɛ yɛmaa yɛ mra nwu ye kɛ yɛlie yɛ nvonleɛ yɛdo nu, yɛɛ ɔwɔ kɛ bɛte kɛ yɛlɛkpa kyɛlɛ. Saa yɛanyɛ zɔ a, ɔnrɛmaa bɛnrɛzukoa kɛ bɛfo a bɛbalie bɛado nu.”​—Robin.