1-3. (a) Duzu a menli di nwolɛ nyane a, na kɛzi ɛhye kola gyegye yɛ ɛ? (b) Mɔɔ fane Nyamenle mɔɔ bɛnva nyanelilɛ bɛnzonle ye anwo la, duzu a yɛkola yɛsukoa yɛfi Pɔɔlo ɛkɛ a?

EDWƐKƐDWƐNDOLƐNLI bie hɛlɛle kɛ: “Edwɛkɛ mɔɔ yɛ alɔbɔlɛ kpalɛ mɔɔ bɛka anzɛɛ bɛkɛlɛ la a le ɛhye: ‘Meze ye zɔ a anrɛɛ!’” Edwɛkɛdwɛndolɛnli ne a le J. G. Whittier, na ɛnee ɔlɛka ninyɛne mɔɔ yɛdi nwolɛ nyane mɔɔ yɛ kunlu a anrɛɛ yɛbahola yɛayɛ ye fofolɛ la anwo edwɛkɛ. “Nyane” le debie mɔɔ awie di ye wɔ adwenle nu wɔ debie bie mɔɔ ɔyɛle anzɛɛ anrɛɛ ɔwɔ kɛ ɔyɛ la anwo, na ɔkola ɔmaa “bɛsu.” Yɛ muala yɛyɛ ninyɛne mɔɔ yɛ kunlu a anrɛɛ yɛanyɛ ye zɔ la. Nyɛleɛ boni mɔ a ɛlɛdi nwolɛ nyane a?

² Menli bie mɔ ɛyɛ nvonleɛ dɔɔnwo, bɔbɔ bɛyɛ ɛtane mgbole wɔ bɛ ɛbɛlabɔlɛ nu. Bie mɔ noko ɛtɛyɛle ɛtane noko bɛngola bɛnnwu ye saa kpɔkɛ bie mɔɔ bɛzile la le kpalɛ a. Bie mɔ ɛndwenle mɔɔ bɛyɛle ye dɛba ne la anwo bieko. Bie mɔ noko kɔ zo di kpɔkɛ bie mɔɔ bɛzile la anwo nyane na bɛka kɛ “meze ye zɔ a anrɛɛ.” (Edw. 51:3) Kɛzi ɛte nganeɛ ɛ? Ɛ kunlu a anrɛɛ ɔvi ɛnɛ mɔɔ kɔ la ɛbahola wɔazonle Nyamenle mɔɔ ɛnrɛli nyane fee ɔ? Asoo awie wɔ ɛkɛ mɔɔ yɛbahola yɛazukoa debie yɛavi ye neazo ne anu ɔ? Ɛhɛe, ɛzoanvolɛ Pɔɔlo wɔ ɛkɛ.

³ Pɔɔlo yɛle nvonleɛ mgbole noko ɔzile kpɔkɛ kpalɛ wɔ ye ɛbɛlabɔlɛ nu. Ɔlile nyane kpole wɔ ninyɛne mɔɔ ɔyɛle ye dɛba ne la anwo, noko eza ɔvale nɔhalɛlilɛ ɔzonlenle Nyamenle ɔmanle ye ɛbɛlabɔlɛ wiele ye boɛ. Maa yɛnlea kɛzi ye neazo ne bahola aboa yɛ na yɛanva nyanelilɛ yɛanzonle la.

4. Duzu a ɛzoanvolɛ Pɔɔlo yɛle mɔɔ nzinlii ɔnlunle ɔ nwo wɔ nwolɛ a?

⁴ Mekɛ mɔɔ ɛnee Pɔɔlo le kpavolɛ nee Falasiinli la, ɔyɛle ninyɛne mɔɔ nzinlii ɔnlunle ɔ nwo wɔ nwolɛ la. Kɛ neazo la, ɔlile ɛlɔne nyunlu ɔmanle bɛyɛle Kelaese ɛdoavolɛma ne kpɔdekpɔde kpalɛ. Baebolo ne ka kɛ mekɛ mɔɔ bɛhunle Sitivin bɛwiele ala la, “Sɔɔlo  [mɔɔ nzinlii bɛravɛlɛle ye Pɔɔlo la] bɔle mɔdenle ala kɛ ɔkɛzɛkye Asɔne ne. Ɔwolowolole azua nu ɔhɔhwenle mraalɛ nee mrenya mɔɔ ɛzɔ diedi ne anu la na ɔvale bɛ ɔvindele ɔmanle bɛguale bɛ efiade.” (Gyi. 8:3) Abɔlɔba Albert Barnes hanle kɛ Giliki edwɛkɛkpɔkɛ mɔɔ bɛhilele ɔ bo “[ɔ]bɔle mɔdenle ala kɛ ɔkɛzɛkye” la le “edwɛkɛ mɔɔ anyebolo wɔ nu, ɔmaa yɛnwu mɔdenlebɔlɛ nee ɛya kpole mɔɔ [Sɔɔlo] vale yɛle bɛ kpɔdekpɔde la.” Ɛhye ati, Barnes hanle kɛ, “Sɔɔlo tetale asɔne ne kɛ nane anwo ɛzulolɛ bie la.” Kɛmɔ ɛnee Sɔɔlo le awie mɔɔ ɛdu ɔ nwo ɛmaa Dwuu ɛzonlenlɛ ne la ati, ɔdele nganeɛ kɛ Nyamenle ɛmaa ye gyima kɛ ɔgu Keleseɛne ɛzonlenlɛ ne. Yemɔti, ɔvale ye kɔdiawu adwenle ne ‘ɔgyegyele Awulae ɛdoavolɛma ne, mraalɛ nee mrenya’ kɛ ɔsɛkye bɛ.—Gyi. 9:1, 2; 22:4. *

5. Kilehile kɛzi Sɔɔlo gyakyile Gyisɛse ɛdoavolɛ ne mɔ ɛkpɔlɛ na ɔralile Kelaese anwo daselɛ la anu.

⁵ Ɛnee Pɔɔlo adwenle a le kɛ ɔkɔ Dɛmasekɛse yeahɔhwe Gyisɛse ɛdoavolɛ ne mɔ yeavi bɛ azua nu ɔ nee bɛ ahɔ Gyɛlusalɛm yeamaa Sanhedrin ne ali bɛ edwɛkɛ. Noko akee, yeanyɛ boɛ ɔluakɛ ɛnee ɔ nee ahenle mɔɔ ɔle Keleseɛnema asafo ne Ati la a ɛlɛko a. (Ɛfɛ. 5:23) Mekɛ mɔɔ ɛnee Sɔɔlo lua adenle nu ɛlɛkɔ Dɛmasekɛse la, Gyisɛse hɔyiale ye na wienyi bie mɔɔ yɛ nwanwane la manle Sɔɔlo anye zinle. Akee Gyisɛse zoanle Sɔɔlo kɛ ɔhɔkpondɛ moalɛ wɔ Dɛmasekɛse. Yɛze mɔɔ ɔzile la.—Gyi. 9:3-22.

6, 7. Duzu a kile kɛ ɛnee Pɔɔlo ze ɛtane mɔɔ ɔyɛle la ɛ?

⁶ Mekɛ mɔɔ Pɔɔlo rayɛle Keleseɛnenli la ye ɛbɛlabɔlɛ hakyile bɔkɔɔ. Kɛ anrɛɛ ɔbakpɔ Keleseɛnema ɛsesebɛ la, ɔraboale bɛ kpalɛ emomu. Yemɔ bɔbɔ, nzinlii ɔhɛlɛle kɛ: “Bɛdabɛ bɛde mɔɔ menyɛle wɔ mekɛ mɔɔ ɛnee meli Dwuuma Nyamenlezonlenlɛ maamɛla ne anzi la. Menyɛle Nyamenle menli ne kpɔdekpɔde memanle ɔbole zolɛ na membɔle mɔdenle kɛ megu asɔne ne.” (Gal. 1:13) Nzinlii mɔɔ ɔkɛlɛ Kɔlentema, Felepaema nee Temɔte la, ɔhanle ninyɛne mɔɔ ɔyɛle na ɔlɛdi nwolɛ nyane la anwo edwɛkɛ bieko. (Bɛgenga 1 Kɔlentema 15:9; Fel. 3:6; 1 Tem. 1:13) Pɔɔlo angɛlɛ ninyɛne ɛhye mɔ kɛ ɔfa yeadu ɔ nwo, yɛɛ yeambɔ mɔdenle kɛ ɔyɛ ɔ nwo kɛ ninyɛne ɛhye mɔ anzi la. Ɛnee ɔze ye wienyi kɛ ɔyɛle ɛtane kpole.—Gyi. 26:9-11.

⁷ Baebolo nwo abɔlɔba Frederic W. Farrar hɛlɛle kɛ saa yɛdwenle kɛzi Pɔɔlo yɛle Keleseɛnema ne kpɔdekpɔde kpalɛ la anwo a, yɛbade nyane kpole ne mɔɔ ɔlile nee kɛzi awie mɔ badendɛ atia ye la abo kpalɛ. Mekɛ mɔɔ Pɔɔlo hɔkpɔlale asafo ne mɔ la, ɔbahola yeara ye kɛ mekɛ mɔɔ ɔlumua mɔɔ mediema ne mɔ kɛnwu ye la bɛka kɛ: ‘Yemɔti wɔmɔ a bɛfɛlɛ wɔ Pɔɔlo la. Ɛdawɔ a ɛyɛle yɛ kpɔdekpɔde la!’—Gyi. 9:21.

8. Kɛzi Pɔɔlo dele nganeɛ wɔ anwunvɔnezelɛ nee ɛlɔlɛ mɔɔ Gyihova nee Gyisɛse lale ye ali hilele ye la anwo ɛ, na duzu a yɛsukoa yɛfi nu a?

⁸ Noko akee, Pɔɔlo nwunle kɛ Nyamenle ɛlolɛ ne a manle ɔholale ɔyɛle ye ɛzonlenlɛ gyima ne a. Wɔ ye ngɛlata 14 ne mɔɔ ɔhɛlɛle la anu ɔhanle Nyamenle anwunvɔnezelɛ ne anwo edwɛkɛ fane 90. Ɛhye tɛla mɔɔ Baebolo kɛlɛvolɛ gyɛne biala hɛlɛle la. (Bɛgenga 1 Kɔlentema 15:10.) Pɔɔlo anye zɔle anwunvɔne ne mɔɔ bɛzele ye la kpalɛ, na ɛnee ɔngulo kɛ Nyamenle ɛlolɛ ne kɛyɛ mgbane. Yemɔti, ɔhanle kɛ: “Meyɛ gyima kpalɛ medɛla ɛzoanvolɛma mɔɔ ɛha la amuala.” Pɔɔlo neazo ne maa ɔda ali wienyi kɛ saa yɛka yɛ ɛtane na yɛgyakyi a, Gyihova balua Gyisɛse ɛkpɔnenlɛ afɔle ne azo yeava yɛ ɛtane yeahyɛ yɛ. Nea kɛzi ɛhye le ɛzukoalɛdeɛ  kpalɛ maa awie mɔɔ ɔnlie ɔnli kɛ bɛbahola bɛagyinla Kelaese afɔle ne azo bɛava ye ɛtane bɛahyɛ ye la ɛ! (Bɛgenga 1 Temɔte 1:15, 16.) Pɔɔlo yɛle Kelaese kpɔdekpɔde kpalɛ ɛdeɛ, noko ɔholale ɔhɛlɛle kɛ: “Nyamenle Ara ne . . . hulole me na ɔdole ye ngoane aze ɔmanle me.” (Gal. 2:20; Gyi. 9:5) Pɔɔlo zukoale kɛzi ɔbabɔ mɔdenle wɔ ye Nyamenle ɛzonlenlɛ nu ɔnva nwo mɔɔ ɔyɛle ye dɛba ne la, amaa yeanli debie biala anwo nyane. Asoo wɔzukoa kɛ ɛbayɛ ɛhye bie?

9, 10. (a) Duzu ati a Gyihova menli ne bie mɔ di nyane a? (b) Nvonleɛ boni a wɔ nwo kɛ awie bahɔ zo adwenle mɔɔ ɔyɛle ye dɛba ne la anwo a?

⁹ Wɔyɛ ninyɛne bie mɔ mɔɔ ɛlɛdi nwolɛ nyane ɔ? Wɔva wɔ anwosesebɛ nee wɔ mekɛ wɔyɛ ninyɛne mɔɔ nvasoɛ ɛnle zo la ɔ? Mɔɔ ɛyɛle la gyegyele awie mɔ ɔ? Anzɛɛ ninyɛne gyɛne bie ɛlɛmaa wɔali nyane. Kpuyia ne a le kɛ, Duzu a ɛbahola wɔayɛ ye wɔ nwo a?

¹⁰ Menli bie mɔ ta dwenledwenle! Saa bɛkɔ zo bɛdwenledwenle bɛ nvonleɛ nwo a, ɔmaa bɛ rɛle bɔ na bɛdi nyane. Asoo adwenleadwenle kola di ngyegyelɛ nwo gyima? Kyɛkyɛ! Ɔle kɛ ɛde ɛlɛne mɔɔ bɛdo ye sɛkɛ la anu na ɛlɛka ɛdahoma, ɛbava wɔ anwosesebɛ wɔaha dedee noko ɔnrɛdu ɔ bo ɛlɛ! Emomu, saa ɛnyia adwenle kpalɛ a, ninyɛne kpalɛ bavi nu ara. Ɛbahola wɔakpa ahenle mɔɔ ɛvonle ye la kyɛlɛ na bie a baziezie bɛ avinli. Ɔwɔ kɛ ɛtwe ɛ nwo ɛfi mɔɔ vale ngyegyelɛ ne rale la anwo, na wɔanyɛ bieko kenlebie. Bie noko a ɛnrɛhola ɛnrɛyɛ wɔ tɛnlabelɛ ne anwo ɛhwee. Noko adwenleadwenle ɛnrɛhola ɛnrɛboa wɔ, emomu ɔbado ɛ sa nu wɔ wɔ Nyamenle ɛzonlenlɛ nu. Yɛɛ ahatualɛ biala ɛnle adwenleadwenle zo!

11. (a) Kɛ ɔkɛyɛ na Gyihova ala ye anwuvɔnezelɛ nee ye ɛhulolɛ kpundii ne ali ahile yɛ ɛ? (b) Duzu a Nyamenle kpondɛ kɛ yɛyɛ na yɛ adwenle angyegye yɛ wɔ ɛtane mɔɔ yɛyɛ ye dɛba la anwo a?

¹¹ Bie mɔ maa nvonleɛ mɔɔ bɛyɛ ye  dɛba la gyegye bɛ dedee bɛte nganeɛ kɛ bɛnfɛta wɔ Nyamenle anye zo. Bie a bɛbade nganeɛ kɛ bɛnfɛta Nyamenle anwunvɔnezelɛ ɔluakɛ bɛyɛ ɛtane kpole bie anzɛɛ dɔɔnwo. Nɔhalɛ nu, ɔnva nwo ɛtane biala mɔɔ bɛyɛle la, bɛkola bɛnu bɛ nwo, bɛkakyi, na bɛbiza ɛtanefakyɛ. (Gyi. 3:19) Gyihova bahola ala ye anwunvɔnezelɛ nee ye ɛhulolɛ kpundii ne ali yeahile bɛ kɛmɔ yeyɛ yemaa menli dɔɔnwo la. Gyihova bala ye atiakunlukɛnlɛma ne ali ahile bɛdabɛ mɔɔ bɛbɛlɛ bɛ nwo aze, bɛdi nɔhalɛ na bɛnu bɛ nwo nɔhalɛ nu la. Nyamenle yɛle ye zɔ manle Dwobu mɔɔ ɔhanle edwɛkɛ ɛhye la: “Menlu me nwo; mebɔ ndɛtɛlɛ nee nzonle.” (Dwo. 42:6) Ɔwɔ kɛ yɛ kɔsɔɔti yɛfa adenle ɛhye mɔɔ Nyamenle kpondɛ kɛ yɛfa zo la azo na yɛ adwenle angyegye yɛ: “Sonla mɔɔ fea ye mɛladonlɛ zo la ɛnrɛkpazi, na sonla mɔɔ ka ye ɛtane na ɔgyakyi ye ɛyɛlɛ la, bɛse ye anwunvɔne.” (Mrɛ. 28:13; Gye. 5:14-16) Yemɔti, yɛbahola yɛaha yɛ ɛtane yɛahile Nyamenle, yɛazɛlɛ ye ɛtanefakyɛ, na yɛahwe yɛ nwo yɛavi ɛtaneyɛlɛ nwo. (2 Kɔl. 7:10, 11) Saa yɛyɛ ɛhye mɔ a, anwunvɔnezelɛ Nyamenle ne ‘bava yɛ ɛtane ahyɛ yɛ.’—Aye. 55:7.

12. (a) Adenle kpalɛ mɔɔ bɛfa zo bɛdi adwenle nu fɔlɛbualɛ nwo gyima la boni a Devidi neazo ne maa yɛnwu ye a? (b) Saa yɛka kɛ debie yɛle Gyihova nyane a ɔkile duzu, na kɛzi ndelebɛbo ɛhye boa yɛ ɛ? (Nea ɛlɛka ne anu.)

¹² Tumi wɔ nzɛlɛlɛ nu; ɔboa yɛ kpalɛ wɔ Nyamenle ɛzonlenlɛ nu. Devidi lale ye nganeɛdelɛ ali wɔ diedi mɔɔ ɔvale ɔzɛlɛle mɔɔ yɛnwu ye wɔ Edwɛndolɛ ne anu la. (Bɛgenga Edwɛndolɛ 32:1-5.) Devidi liele dole nu kɛ mɔdenle mɔɔ ɔbɔle kɛ ɔfa ye adwenle mɔɔ bua ye fɔlɛ yeavea la manle ɔnwunle amaneɛ kpalɛ! Kɛmɔ yeanga ye ɛtane ne la ati, ɔbayɛ kɛ ye adwenle gyegyele ye ɔmanle ɔhanle ye kpɔkɛdelɛ na ɔ nye anlie. Duzu a manle Devidi nyianle ɛtanefakyɛ na ɔ nwo dɔle ye a? Nyamenle mɔɔ ɔhanle ye ɛtane ne ɔhilele ye la ɔ. Gyihova buale Devidi nzɛlɛlɛ ne na ɔmanle ye anwosesebɛ ɔyɛle ninyɛne mɔɔ fɛta la. Zɔhane ala a saa ɛfi ahonle nu ɛsɛlɛ a, ɛbahola wɔanyia anwondozo kɛ Gyihova badie wɔ asɔneyɛlɛ ne a. Saa ɛtane mɔɔ wɔyɛ ye dɛba la tɛgyegye wɔ a, di nwolɛ gyima kɔkpula kɛ ɛbanyia anwondozo kɛ Gyihova ɛva wɔ ɛtane ɛhyɛ wɔ!—Edw. 86:5.

13, 14. (a) Duzu a ɔwɔ kɛ nwolɛ kyia yɛ kɛkala a? (b) Kpuyia boni mɔ a bamaa yɛanleɛnlea ɛbɛla mɔɔ yɛlɛbɔ ye ɛnɛ la anu a?

¹³ Ɔle nɔhalɛ kɛ yɛbahola yɛazukoa debie yɛavi mɔɔ ɛzi dɛba la anu ɛdeɛ, noko ɔnle kɛ yɛkɔ zo yɛdwenle nwolɛ bieko. Kɛ anrɛɛ yɛbahɔ zo yɛadwenle mɔɔ ɛzi dɛba anwo la, ɔwɔ kɛ yɛdwenle mɔɔ ɛlɛkɔ zo ɛnɛ nee mɔɔ la yɛ nyunlu la anwo. Duzu a yɛlɛyɛ ye kɛkala anzɛɛ yɛngola yɛnyɛ mɔɔ kenlebie yɛbade nganeɛ wɔ nwolɛ kɛ yɛze a anrɛɛ yɛyɛle anzɛɛ yɛanyɛ a? Asoo yɛlɛfa nɔhalɛlilɛ yɛabɔ yɛ ɛbɛla mɔɔ yɛnrɛli nyane kenlebie ɔ?

 ¹⁴ Mekɛ mɔɔ anwongyelelɛ kpole ne ɛlɛbikye la, yɛmkpondɛ kɛ adwenleadwenle ɛhye mɔ bu yɛ abɛ nu: ‘Anrɛɛ mebahola meayɛ dɔɔnwo wɔ Nyamenle ɛzonlenlɛ nu ɔ? Duzu ati a meanyɛ adekpakyelɛ wɔ mekɛ mɔɔ ɛnee nwolɛ adenle wɔ ɛkɛ la ɛ? Duzu a ammaa bɛangola bɛamkpa me asafo nu sonvolɛ a? Asoo membɔle mɔdenle amgba kɛ menyia su fofolɛ ne ɔ? Asoo menli mɔɔ bɛle kɛ medame la yɛɛ Gyihova kpondɛ bɛ wɔ ye ewiade fofolɛ ne anu a?’ Kɛ anrɛɛ ɛbadwenledwenle mɔɔ wɔangola wɔanyɛ anwo la, dwenledwenle mɔɔ ɛlɛyɛ ye kɛkala la anwo na nwu ye kɛ ɛlɛyɛ mɔɔ ɛbahola la kɔsɔɔti wɔ Gyihova ɛzonlenlɛ nu. Tɛ ye zɔ a, yɛbayɛ ninyɛne mɔɔ ɔbamaa yɛali nyane kpole la anu.—2 Tem. 2:15.

15, 16. (a) Afɔle boni a menli dɔɔnwo ɛbɔ amaa bɛava Nyamenle ɛzonlenlɛ balumua bɛ ɛbɛlabɔlɛ nu a? (b) Duzu ati a ɔnle kɛ yɛnlu yɛ nwo anzɛɛ yɛdi nyane wɔ afɔle mɔɔ yɛbɔ yɛva Belemgbunlililɛ ne yɛlumua la anwo a?

¹⁵ Na bɛdabɛ mɔɔ bɛva ninyɛne bɛbɔ afɔle bɛlɛfa bɛ mekɛ kɔsɔɔti bɛazonle Gyihova la noko ɛ? Ɔbahola yeara ye kɛ ɛvale gyima kpole bie nwo adenle ɛbɔle afɔle anzɛɛ ɛtetele ninyɛne zo amaa wɔanyia mekɛ dɔɔnwo wɔayɛ Belemgunlililɛ gyima ne. Anzɛɛ bie a ɛlile belazinli, anzɛɛ ɛzile kpɔkɛ kɛ ɛnrɛwo kɛkala amaa wɔanyia adenle wɔayɛ dahuu ɛzonlenlɛ gyima ne wɔahɔzonle wɔ Bɛtɛle, wɔayɛ maanle nee maanle avinli suazilɛ, maanzinli nee edwɛkpatɛlɛvolɛ gyima ne bie. Kɛkala mɔɔ ɛlɛyɛ kpanyinli wɔ Gyihova ɛzonlenlɛ nu la, asoo ɔwɔ kɛ ɛnu ɛ nwo anzɛɛ ɛdi nyane? Asoo ɔwɔ kɛ ɛte nganeɛ kɛ afɔle mɔɔ ɛbɔle la anwo ɛngyia anzɛɛ wɔambɔ ye wɔ mekɛ kpalɛ nu ɔ? Kyɛkyɛ!

¹⁶ Wɔ kpɔkɛzilɛ ne gyi ɛhulolɛ kpole mɔɔ ɛlɛ ɛmaa Gyihova nee awie mɔ mɔɔ bɛkpondɛ kɛ bɛsonle ye mɔɔ ɛboa bɛ la azo. Mmanyia adwenle kɛ saa ɛbɔle wɔ ɛbɛla wɔ adenle fofolɛ zo a anrɛɛ ɔbawie wɔ boɛ yeadɛla ɛhye. Wɔ ahonle badɔ wɔ azule nu kɛ ɛyɛle mɔɔ ɛnee ɛze kɛ ɔle kpalɛ ɔmaa wɔ la. Ɛbahola wɔali fɛlɛko kɛ wɔyɛ debie kpalɛ wɔ Gyihova ɛzonlenlɛ nu la. Ɔ rɛle ɛnrɛvi afɔle mɔɔ ɛbɔle la ɛlɛ. Wɔ nɔhalɛ ngoane ne mɔɔ ɔbara la anu, ɔbayila wɔ dɔɔnwo yeadɛla mɔɔ ɛbazuzu nwo ɛnɛ la amuala!—Edw. 145:16; 1 Tem. 6:19.

17, 18. (a) Ngyinlazo boni a boale Pɔɔlo manle ɔzonlenle mɔɔ yeanli nyane a? (b) Kpɔkɛ boni a wɔzi ye wɔ mɔɔ ɛzi dɛba, mɔɔ ɛlɛyɛ ye kɛkala, nee kɛzi ɛbazonle Gyihova kenlebie la anwo a?

¹⁷ Duzu ngyinlazo a boale Pɔɔlo mɔɔ yeanli nyane wɔ ye Nyamenle ɛzonlenlɛ nu a? Kɛmɔ J. B. Phillips ngilebɛbo ne ka la, Pɔɔlo hɛlɛle kɛ: “Megyakyi mɔɔ ɛze la me nzi na medende me sa kɛ mesɔ ahyɛlɛdeɛ ne mɔɔ wɔ me nyunlu la anu.” (Bɛgenga Felepaema 3:13, 14.) Pɔɔlo angɔ zo andwenledwenle ninyɛndane ne mɔɔ ɔyɛle ye wɔ Dwuu ɛzonlenlɛ ne anu la anwo. Emomu, ɔvale ye anwosesebɛ kɔsɔɔti ɔyɛle gyima mɔɔ bamaa ɔ sa aha dahuu ngoane ahyɛlɛdeɛ ne la.

¹⁸ Duzu a yɛsukoa yɛfi mɔɔ Pɔɔlo hanle la anu a? Kɛ anrɛɛ yɛbadwenledwenle ninyɛne mɔɔ yɛyɛle bɛ dɛba mɔɔ yɛnrɛhola yɛnrɛyɛ nwolɛ ɛhwee la anwo la, ɔwɔ kɛ yɛfa yɛ adwenle yɛsie ninyɛne mɔɔ saa yɛyɛ a yɛbanyia nyilalɛ kenlebie la azo. Yɛnrɛhola yɛnrɛye ɛtane mɔɔ yɛyɛ la yɛnrɛvi yɛ adwenle nu bɔkɔɔ, noko ɔngyia kɛ yɛmaa yɛ adwenle bua yɛ fɔlɛ wɔ nwolɛ dahuu. Yɛbahola yɛaye mɔɔ ɛzi dɛba la yɛavi yɛ adwenle nu, yɛazonle Gyihova kpalɛ ɛnɛ, na yɛadwenledwenle nyilalɛ ngɛnlɛma mɔɔ yɛ sa baha ye kenlebie la anwo!