Ngɛlɛlera ne bɔ yɛ kɔkɔ kɛ: “Ahonle nu yɛɛ adwenle ɛtane mɔɔ le kɛ sonla ɛhunlɛ, awuvolɛvalɛ, adwɔmanebɔlɛ, awule ɛyɛlɛ, daselɛ adalɛ ɛlilɛ, yɛɛ nwondomgbɔ ɛpɛlɛ vi ba a.” (Mat. 15:19) Yɛ sɛkɛlɛneɛ adenle zo ahonle ne bahola abɛlɛbɛla yɛ yeamaa yɛayɛ ninyɛne mɔɔ Nyamenle ɛngulo la. Na bie a yɛnrɛnwu ye kɔkpula kɛ yɛbayɛ ninyɛne mɔɔ ɛnle kpalɛ la. Duzu a baboa yɛ yeamaa yɛanwu mɔɔ wɔ yɛ ahonle nu na yɛanyɛ ɛtane a?

Kenga Baebolo ne dahuu na dwenledwenle nwolɛ.

Ɛzoanvolɛ Pɔɔlo hɛlɛle kɛ: “Ngoane wɔ Nyamenle edwɛkɛ ne anu, yɛɛ tumi wɔ nu, na ɔyɛ nla ɔtɛla dadeɛ anye nwiɔ biala, yɛɛ ɔkola ɔwolo ɔgya ɛkɛla nee sunsum, yɛɛ bowule nee nuhua ɛnlome ɛweɛne, yɛɛ ɔkola ɔnwu ahonle ne adwenle nee ye nzuzulɛ.” Nyamenle edwɛkɛ ne mɔɔ wɔ Baebolo ne anu la kola nwu “ahonle ne adwenle nee ye nzuzulɛ.” (Hib. 4:12, NW) Saa yɛdua Ngɛlɛlera ne azo yɛnwu kɛzi yɛdayɛ mumua ne yɛde la a ɔbamaa yɛanwu mɔɔ wɔ yɛ ahonle ne anu la. Nea kɛzi nwolɛ hyia kɛ yɛbagenga Nyamenle Edwɛkɛ ne dahuu yɛadwenledwenle mɔɔ ɔka la anwo amaa yɛanyia Gyihova adwenle nee ye nzuzulɛ ne bie a!

Saa yɛdie Ngɛlɛlera ne anu folɛdulɛ yɛto nu na yɛfa Baebolo nu ngyinlazo yɛdi gyima a, ɔnyia yɛ  “adwenle” ne mɔɔ ɔtendɛ ɔkile yɛ la azo tumi. (Wulo. 9:1) Yɛ adwenle ne mɔɔ ɔtendɛ ɔkile yɛ la ɛmmaa yɛnva ninyɛne yɛnye yɛ nloa. Bieko, neazo dɔɔnwo mɔɔ bɛbahola ‘bɛayɛ kɔkɔbɔlɛ bɛamaa yɛ la,’ wɔ Baebolo ne anu. (1 Kɔl. 10:11) Saa yɛsukoa debie yɛfi nu a ɔnrɛmaa yɛnrɛyɛ ɛtane. Duzu a ɔwɔ kɛ yɛ nuhua ko biala yɛ a?

Sɛlɛ Nyamenle kɛ ɔmaa ɛnwu mɔɔ wɔ wɔ ahonle nu la.

Gyihova ‘nea mɔɔ wɔ ahonle nu la.’ (1 Edk. 29:17) Nyamenle “le kpole tɛla yɛ [ahonle], yɛɛ ɔze debie biala.” (1 Dwɔn 3:20) Bɛngola bɛmbɛlɛbɛla Nyamenle. Saa yɛda yɛ ngyegyelɛ, yɛ nganeɛdelɛ, nee mɔɔ yɛkulo la ali wɔ nzɛlɛlɛ nu a, Gyihova bamaa yɛanwu mɔɔ wɔ yɛ ahonle nu la. Yɛbahola yɛazɛlɛ Nyamenle bɔbɔ kɛ ‘ɔbɔ ahonle mɔɔ anu te la ɔwula yɛ nu.’ (Edw. 51:10) Saa yɛbanwu mɔɔ wɔ yɛ ahonle nu la a, ɔnle kɛ yɛbu yɛ nye yɛgua asɔneyɛlɛ zo.

Ɛkɔ debiezukoalɛ a gyele ɛ nzo.

Yɛgyele yɛ nzo wɔ Keleseɛnema ayia bo a, ɔbamaa yɛanleɛnlea yɛ nwo nu nɔhalɛ nu, yɛanwu kɛzi yɛdayɛ mumua ne anzɛɛ yɛ ahonle de la. Ɔwɔ nuhua kɛ yɛnrɛde edwɛkɛ fofolɛ wɔ debiezukoalɛ ko biala abo ɛdeɛ, noko saa yɛkɔ ɛkɛ a ɔboa ɔmaa yɛte Baebolo nu ngyinlazo bo na yɛnyia ngakyelɛ kpalɛ mɔɔ ɔbamaa yɛanleɛnlea yɛ ahonle ne anu a. Mualɛ mɔɔ yɛ mediema maa la noko kola boa maa yɛyɛ nzenzaleɛ. (Mrɛ. 27:17) Saa yɛangɔ debiezukoalɛ dahuu na yɛtwe yɛ nwo yɛfi yɛ mediema nwo a, ɔbahola yeayɛ esiane yeamaa yɛ. Ɔbahola yeamaa ‘yɛabua yɛ nwo benle’ yɛayɛ mɔɔ yɛkulo. (Mrɛ. 18:1) Yemɔti nrɛlɛbɛ wɔ nu kɛ yɛbabiza yɛ nwo kɛ, ‘Asoo mekɔ debiezukoalɛ ne mɔ kɔsɔɔti na menyia zolɛ nvasoɛ ɔ?’—Hib. 10:24, 25.

Yɛ ahonle ne mɔɔ le mɛlɛbɛla la bahola amaa yɛavo wɔ ninyɛne dɔɔnwo anu. Maa yɛzuzu nuhua nna anwo: nwonane afoa nu ninyɛne, nza ɛnlonlɛ, agɔnwolɛvalɛ, nee anyelielɛ ninyɛne.

Nwonane afoa nu ninyɛne nzililɛ.

Ɛhulolɛ mɔɔ yɛlɛ kɛ yɛ sa baha ninyɛne mɔɔ yɛhyia nwo wɔ nwonane nu la ɛnle ɛtane. Noko, Gyisɛse bɔle yɛ kɔkɔ wɔ nwonane afoa nu ninyɛne nwo. Wɔ Gyisɛse ndonwo ne mɔ ko anu, ɔhanle kɛ yɛzuzu sukoavolɛ bie mɔɔ ye bonwolo dɛba ne mɔ yile la anwo. Yemɔti, ɛnee ɔnlɛ ɛleka mɔɔ ɔbava ye aleɛ yeagua wɔ ɛbuhenle bieko anu a. Nrenya ne nyianle adwenle kɛ ɔbubu ye bonwolo ne mɔ na yeasisi mgbole. Ɔhanle ye ɔ ti anu kɛ: “Na meava me aleɛ nee me ninyɛne ne mɔ amuala meagugua zolɛ. Na akee meaze me nwo kɛ, Me ɛkɛla, ɛ ti ɛyɛ boɛ! Wɔnyia ninyɛne kpalɛ dɔɔnwo mɔɔ nee wɔ badwu ɛvolɛ dɔɔnwo a. Die wɔ ɛnwomenle, di, no, na die ɛ nye!” Noko akee, sukoavolɛ ne manle ɔ rɛle vile nɔhalɛ edwɛkɛ ɛhye: Bɛbahola bɛaye ye ngoane ne bɛavi ye nu wɔ zɔhane nɔe ne ala.—Luku 12:16-20.

Mekɛ mɔɔ yɛlɛnyi la, bie a yɛbadwenle ngyehyɛleɛ mɔɔ yɛbayɛ yɛamaa yɛ mgbanyinli mekɛ nu la anwo na yɛabɔ ɔ bo yɛayɛ gyima wɔ mekɛ mɔɔ ɔwɔ kɛ yɛfa yɛkɔ debiezukoalɛ anzɛɛ yɛfa yɛyɛ asafo ne anu gyima bie la. Asoo ɔnle kɛ yɛkoati nzuzulɛ zɛhae ɔ? Anzɛɛ bie a yɛle kpavolɛ na yɛnwu  ye kɛ gyima kpalɛ biala ɛnle ɛkɛ ne kɛ dahuu ɛzonlenlɛ gyima ne. Noko akee, asoo yɛpia adekpakyelɛ gyima ne yɛto ahane yɛsuzu kɛ ɔwɔ kɛ yɛdumua yɛnyia ezukoa bie kolaa na yɛayɛ bie ɔ? Asoo tɛ mekɛ ɛhye a ɔwɔ kɛ yɛbɔ mɔdenle kɛ yɛbayɛ sukoavolɛ wɔ Nyamenle anyunlu a? Saa ɛhyema bado yɛ bɔbɔ a nwane a ze a?

Wɔ nza ɛnlonlɛ nu.

Mrɛlɛbulɛ 23:20 ka kɛ: “Ɛ nee nzabovoma mmatu.” Saa awie kulo nza a, bie a ɔbaha kɛ ɔle debie kpalɛ yemɔti ɔbanlo ye dahuu. Bie a ɔbaha kɛ ɔno ɔdie ɔ nye ala, ɔnno ɔmbo. Saa ɛhyia nza na ɛ nye alie a, ɛnee ɛnɛ a le mekɛ mɔɔ ɔwɔ kɛ ɛfa nɔhalɛlilɛ ɛneɛnlea mɔɔ ɔwɔ wɔ ahonle nu la anu a.

Wɔ agɔnwolɛvalɛ nu.

Nɔhalɛ nu, yɛnrɛhola yɛnrɛhwe yɛ nwo yɛnrɛvi bɛdabɛ mɔɔ bɛnle diedima la anwo wɔ sukulu nee gyima nu yɛɛ mekɛ mɔɔ yɛlɛyɛ daselɛlilɛ gyima ne la. Noko ɔnle kɛ yɛ nee bɛ bɔ anzɛɛ yɛfa bɛ agɔnwolɛ kyengye. Asoo yɛbahola yɛaha kɛ bɛdabɛ mɔɔ yɛ nee bɛ tu la lɛ subane kpalɛ ɔ? Baebolo ne bɔ kɔkɔ kɛ, “Bɛmmamaa bɛbɛlɛbɛla bɛ, ‘Agɔnwolɛ ɛtane sɛkye ɛbɛla kpalɛ.’” (1 Kɔl. 15:33) Kɛmɔ evinli ekyi kola sɛkye nzukpa la, zɔhane ala a bɛdabɛ mɔɔ bɛnzonle Nyamenle mɔɔ yɛbava bɛ agɔnwolɛ la subane bahola azɛkye yɛ sunsum nu gyinlabelɛ na yeamaa yɛanyia ewiade ne adwenle, ye tɛladeɛ ɛwulalɛ, ye ɛdendɛlɛ, nee ye subane ne bie a.

Ninyɛne mɔɔ yɛfa yɛdielie yɛ nye.

Adwuleso ninyɛne mɔɔ bɛyɛ mɔɔ yɛkola yɛfa yɛdielie yɛ nye la dɔɔnwo wɔ ɛkɛ noko nuhua bie mɔ ɛnle kpalɛ ɛmmaa Keleseɛnema. Pɔɔlo hɛlɛle kɛ, “Bɛye adwɔmanebɔlɛ anzɛɛ nyɛleɛ ɛtane ɛtane” wɔ bɛ nu. (Ɛfɛ. 5:3) Na saa yɛ ahonle bɛlɛbɛla yɛ kɛ yɛdie anzɛɛ yɛnlea debie mɔɔ ɛnle kpalɛ la noko ɛ? Bie a yɛbazuzu kɛ awie biala hyia ɛnwomenlelielɛ ekyii, noko kɛzi awie balie ɔ nye la le ɔdaye mumua ne ye edwɛkɛ. Noko akee, bɛmaa yɛzuzu Pɔɔlo folɛdulɛ ne anwo na yɛandie anzɛɛ yɛannea ninyɛne mɔɔ anwo ɛnde la.

Saa ɔle yɛ subane kɛ yɛdi yɛ ahonle ne mɔɔ ɔle mɛlɛbɛla la anzi yɛfa edwɛkɛ bie mɔ yɛye yɛ nloa wɔ nyɛleɛ ɛtane nwo a, yɛbahola yɛahakyi. (Ɛfɛ. 4:22-24) Suzu ɛnɛ mekɛ ye anu neazo nwiɔ ɛhye mɔ anwo.

Ɛnee ɔwɔ kɛ Miguel * kakyi ye adwenle wɔ nwonane afoa nu ninyɛne nwo. Ɔka kɛ: “Me nee me ye nee yɛ ra nrenya ne vi maanle mɔɔ bɛbu adwuleso ninyɛne fofolɛ ɛtotɔlɛ kɛ nwolɛ hyia kpalɛ la anu. Mekɛ bie anu, menyianle adwenle kɛ mebayɛ mɔɔ mebahola biala la amaa meanyia ninyɛne mɔɔ wɔ ewiade ye la biala bie mɔɔ menrɛyɛ awie mɔɔ ɔdi nwonane afoa nu ninyɛne nzi a. Yeangyɛ menwunle kɛ nwonane afoa nu ninyɛne nzililɛ ɛnlɛ ye awieleɛ. Menvale me edwɛkɛ nee me ahonle nu nzuzulɛ mendole Gyihova anyunlu wɔ asɔneyɛlɛ nu. Menganle mengilele ye kɛ yɛ abusua ne kulo kɛ yɛsonle ye kpalɛ. Yɛholale yɛbɔle kpɔkɛ yɛtetele ninyɛne zo na yɛdule yɛhɔle ɛleka mɔɔ moalɛ kpole nwo hyia la. Yeangyɛ yɛbɔle ɔ bo yɛyɛle adekpakyelɛ gyima ne. Yɛranwu ye kɛ yɛngyia nwonane afoa nu ninyɛne dɔɔnwo na yɛ ɛbɛla awie yɛ boɛ na yɛ nye alie.”

Lee anwubielɛ ne kile kɛzi yɛ nwo nu mɔɔ yɛbanleɛnlea ye kpalɛ la kola maa yɛtwe yɛ nwo yɛfi agɔnwolɛ ɛtane ɛdulɛ nwo la. Lee ka kɛ, “Ɔlua me gyima ne ati, ɛnee dahuu me nee nyɛvolɛ a tu a. Ɛnee meze kɛ saa yɛyia nu a bɛno nza dɔɔnwo ɛdeɛ, noko ɛnee mekɔ. Fane dɔɔnwo ne ala, ɛnee medi nyane kpalɛ ɔluakɛ meno nza dɔɔnwo mɔɔ asɛɛ mebo a. Ɛnee ɔwɔ kɛ meneɛnlea me ahonle nu kpalɛ. Nyamenle Edwɛkɛ ne anu folɛdulɛ nee mgbanyima ne mɔ nzuzulɛ ngakyile boale me manle menwunle kɛ me nee menli mɔɔ ɛngulo Gyihova la ɛlɛtila agɔnwolɛ. Kɛkala, medua telefuu zo me nee bɛ yɛ gyima na me nee bɛ ɛmbɔ dɔɔnwo.”

Ɔwɔ kɛ yɛfa nɔhalɛlilɛ yɛneɛnlea yɛ nwo nu na yɛnwu mɔɔ wɔ yɛ ahonle nu la. Saa yɛlɛyɛ zɔ a, bɛmaa yɛlua nzɛlɛlɛ zo yɛkpondɛ Gyihova moalɛ na yɛhakye kɛ “ɔze ahonle muala anu.” (Edw. 44:21) Eza Nyamenle ɛva ye Edwɛkɛ ne mɔɔ le kɛ neanleɛ la ɛmaa yɛ. (Gye. 1:22-25) Ngakyelɛ mɔɔ yɛnyia ye wɔ Asafo mbuluku ne mɔ anu nee debiezukoalɛ bo la noko sonle bolɛ kpalɛ! Nziezielɛ ɛhye mɔ amuala mɔɔ bɛva bɛmaa yɛ la boa yɛ maa yɛbɔ yɛ ahonle ne anwo bane na yɛkɔ zo yɛdua tenlene adenle ne azo dahuu.