1. Kɛzi awie bie mɔɔ su ɛnriandilɛ la nyɛleɛ kilehile kpɔkɛ mɔɔ yɛbɔ kɛ yɛnrɛmaa yɛ sa nu ɛnrɛdo ɛlɛ la anu ɛ?

MEKƐ mɔɔ Mary Decker liele duma kɛ ɔze nriandi kpalɛ la, ɛnee ɔtɛnyianle ɛvolɛ 20. Wɔ ɛvolɛ 1984 Summer Olympics ne anu, ɛnee menli dɔɔnwo anye la kɛ ɔdaye a ɔbanyia nvutuke ahyɛlɛdeɛ ne wɔ mita 3,000 ɛnriandilɛ ne anu a. Noko, yeangola yeanwie ɛnriandilɛ ne. Ɔ gyakɛ bɔle ɛnriandilɛma ne ko yemɔti ɔdɔle aze. Ɔbodale yemɔti ɔzunle kpalɛ. Ɛnee ɔwɔ kɛ bɛmaa ye zo bɛfi ɛleka mɔɔ bɛlɛsu ɛnriandilɛ ne la. Noko Mary angyakyi ɛnriandilɛ ɛzulɛ. Yeandwu ɛvolɛ ko, ɔrazule ɛnriandilɛ bieko na ɔlile konim wɔ mayelɛ ne mɔɔ mraalɛ hɔle ye wɔ ɛvolɛ 1985 ne la anu.

2. Adenle boni azo a Keleseɛnema ɛlɛsu ɛnriandilɛ a, na duzu a ɔwɔ kɛ yɛfa yɛ adwenle yɛsie zo a?

² Keleseɛnema ɛlɛsu ɛnriandilɛ wɔ sɛkɛlɛneɛ adenle zo. Ɔwɔ kɛ yɛfa yɛsie yɛ nye zo kɛ yɛbali konim. Tɛ yɛ nwo mɔɔ ɔbayɛ ndɛ la a bamaa yɛali konim a. Yɛɛ ɔnle kɛ ɛnriandilɛ mɔɔ bɛnriandi bɛkpundikpundi bɛ agbɔkɛ nu mɔɔ bɛkola bɛgyinlegyinla fane dɔɔnwo la. Emomu, ɔle ɛnriandilɛ tendenle mɔɔ ɔhyia kpundiigyinlanlɛ na bali konim a. Ɛzoanvolɛ Pɔɔlo vale awie mɔɔ su ɛnriandilɛ la yɛle ndonwo wɔ ye kɛlata ne mɔɔ ɔhɛlɛle Keleseɛnema mɔɔ ɛnee wɔ Kɔlente, suakpole bie mɔɔ ɛnee bɛta bɛsu ɛnriandilɛ wɔ ɛkɛ la anu. Ɔhɛlɛle kɛ: “Bɛze ye wienyi kɛ menli dɔɔnwo a su ɛnriandilɛ a, noko bɛ nuhua ko ala yɛɛ asa ka nwolɛ ahyɛlɛdeɛ ne a. Ɛhye ati bɛnriandi kpalɛ kɛ bɛkɛnyia nwolɛ ahyɛlɛdeɛ ne.”—1 Kɔl. 9:24.

3. Kɛ ɔkɛyɛ na ɛnriandilɛma ne ahola ali konim wɔ dahuu ngoane nwo ɛnriandilɛ ne anu ɛ?

³ Baebolo ne ka kɛ yɛzu sɛkɛlɛneɛ adenle zo ɛnriandilɛ ɛhye. (Bɛgenga 1 Kɔlentema 9:25-27.) Nwolɛ  ahyɛlɛdeɛ ne a le dahuu ngoane. Keleseɛnema mɔɔ bɛkpokpa bɛ la banyia bɛ ɛdeɛ wɔ anwuma na bɛdabɛ mɔɔ bɛha la anyia bɛ ɛdeɛ wɔ azɛlɛ ye azo. Wɔ ɛnriandilɛ ɛhye anu, awie biala mɔɔ ɔbagyinla kpundii yeahɔ awieleɛ la banyia ahyɛlɛdeɛ ne bie. (Mat. 24:13) Saa ɛnriandilɛma ne anli nwolɛ adehilelɛ ne azo anzɛɛ bɛanriandi bɛangɔ awieleɛ a, yɛɛ bɛnrɛnyia nwolɛ ahyɛlɛdeɛ ne a. Bieko, ɛnriandilɛ ɛhye angome a kola maa awie nyia dahuu ngoane ahyɛlɛdeɛ a.

4. Duzu a maa yɛ dahuu ngoane nwo ɛnriandilɛ ne yɛ se a?

⁴ Ɔnla aze kɛ yɛbawie ɛnriandilɛ ɛhye. Ɔwɔ kɛ yɛsɔ yɛ nwo na yɛfa bodane yɛsie yɛ nye zo. Gyisɛse Kelaese ala a le awie mɔɔ ɛhola ɛwie ɛnriandilɛ ne mɔɔ yeandu koti ko bɔbɔ a. Noko ye ɛdoavolɛ Gyemise hanle ye wɔ Kelaese ɛdoavolɛma ne anwo kɛ: “Yɛ muala yɛfo wɔ ninyɛne dɔɔnwo anu.” (Gye. 3:2) Edwɛkɛ ɛhye le nɔhalɛ bɔkɔɔ! Yɛdayɛ mumua ne yɛ sinlidɔlɛ nee awie mɔ ɛdeɛ gyegye yɛ. Ɛhye ati, ɔdwu mekɛ ne bie a yɛ sa nu bahola ado. Yɛbahola yɛadɔ aze bɔbɔ; noko ɔwɔ kɛ yɛdwazo na yɛtoa yɛ ɛnriandilɛ ne azo. Bie mɔ ɛdɔ aze kpole kpalɛ mɔɔ ɔwɔ kɛ bɛboa bɛ na bɛahola bɛadwazo bɛadoa ɛnriandilɛ ne azo bɛahɔ awieleɛ a. Yemɔti, yɛbahola yɛadu koti anzɛɛ yɛadɔ aze mekɛ ekyi anzɛɛ fane dɔɔnwo wɔ ɛnriandilɛ ɛhye anu.—1 Arl. 8:46.

5, 6. (a) Kɛzi debie biala ɛngola ɛmmaa Keleseɛnenli ‘ɛndu koti ɛ,’ na duzu a baboa ye yeamaa ‘yeadwazo a’? (b) Duzu ati a saa bie mɔ tu koti a bɛndwazo bieko ɛ?

⁵ Bie a wɔva edwɛkɛ agbɔkɛ ‘koti ɛdulɛ’ nee ‘azedɔlɛ’ wɔhile awie mɔ sunsum nu gyinlabelɛ nu ɛlɛ. Wɔ Baebolo ne anu, edwɛkɛ ɛhye mɔ kola kile debie ko noko tɛ mekɛ ne amuala ɔ. Kɛ neazo la, yɛ edwɛkɛ mɔɔ wɔ Mrɛlɛbulɛ 24:16 la nzonlɛ: “Tenlenenli tɔ aze fane nsuu bɔbɔ a, ɔdwazo; na amumuyɛnli ne, munzule sɛkye ye.”

⁶ Gyihova ɛnrɛmaa bɛdabɛ mɔɔ bɛfa bɛ rɛle bɛwula ye nu la ɛnrɛdu koti anzɛɛ ɛnrɛdɔ aze mɔɔ bɛnrɛhola bɛnrɛdwazo  bieko a. Yɛze ye wienyi kɛ Gyihova bamaa ‘yɛadwazo’ na yɛadoa zo yɛazonle ye. Edwɛkɛ ɛhye le arɛlekyekyelɛ maa bɛdabɛ mɔɔ bɛfi bɛ ahonle nu bɛkulo Gyihova la kɔsɔɔti! Amumuyɛma ɛngulo kɛ bɛbadwazo. Bɛmkpondɛ Nyamenle sunsum ne nee ye menli ne moalɛ, anzɛɛ bɛkpo. Noko ‘bɛdabɛ mɔɔ bɛkulo Gyihova mɛla ne la,’ debie biala ɛmmaa bɛndu koti bɔkɔɔ wɔ ngoane nwo ɛnriandilɛ ne anu.—Bɛgenga Edwɛndolɛ 119:165.

7, 8. Kɛ ɔkɛyɛ na awie mɔɔ ɛdɔ “aze” la ahola anyia Nyamenle anyunlu ɛlolɛ ɛ?

⁷ Bie mɔ sinlidɔlɛ ɛmaa bɛva bɛ nwo bɛwula ɛtane ngyikyi nu fane dɔɔnwo. Noko saa ‘bɛdwazo,’ anzɛɛ bɛnu bɛ nwo nɔhalɛ nu bɛsia bɛfa nɔhalɛlilɛ bɛsonle Gyihova a, ɔbabu bɛ kɛ bɛle tenlenema. Yɛkola yɛnwu ɛhye wɔ kɛzi Nyamenle nee tete Yizilayɛma luale la anu. (Aye. 41:9, 10) Kɛ anrɛɛ Mrɛlɛbulɛ 24:16 mɔɔ yɛlumua yɛha ɛkɛ ne edwɛkɛ ne bazi ‘azedɔlɛ ne’ azo dawua la, ɔzile ‘ɛdwazolɛ ne’ mɔɔ yɛ anwunvɔnezelɛ Nyamenle ne bamaa yɛadwazo la azo dawua emomu. (Bɛgenga Ayezaya 55:7.) Gyihova Nyamenle nee Gyisɛse Kelaese si yɛ adua kɛ ‘yɛdwazo’ bɛfa bɛkile kɛ bɛlɛ anwondozo wɔ yɛ nu.—Edw. 86:5; Dwɔn 5:19.

⁸ Saa awie ɛlɛsu ɛnriandilɛ tendenle na ɔtɔ aze bɔbɔ a, ɔbahola yeadwazo yeadoa zo yeahɔ awieleɛ, saa ɔdwazo ndɛndɛ a. Wɔ yɛ dahuu ngoane nwo ɛnriandilɛ ne anu, awie biala ɛnze “kenle ne nee mekɛ ne” mɔɔ yɛbawie la. (Mat. 24:36) Noko akee, saa yɛandu koti dɔɔnwo a, yɛbahola yɛagyinla kpundii yɛawie ɛnriandilɛ ne. Yemɔti, kɛ ɔkɛyɛ na yɛandu koti ɛ?

9. Ninyɛne mɔɔ kola maa yɛtu koti mɔɔ yɛbazuzu nwo la bie mɔ a le boni?

⁹ Bɛmaa yɛzuzu ninyɛne nnu mɔɔ maa yɛtu koti la anwo—yɛdayɛ mumua ne yɛ sinlidɔlɛ, nwonane ne atiakunluwɔzo, mekɛ mɔɔ yɛ mediema nee yɛ anli ye boɛ, amaneɛnwunlɛ anzɛɛ kpɔdekpɔdeyɛlɛ, nee yɛ gɔnwo mɔ sinlidɔlɛ. Noko kakye kɛ saa yɛdu koti bɔbɔ a, Gyihova lɛ yɛ nwo abotane. Ɔnrɛha ye ɛkɛ ne ala kɛ yɛnli nɔhalɛ.

10, 11. Sinlidɔlɛ boni a ɛnee Devidi lɛ a?

¹⁰ Yɛbahola yɛava yɛdayɛ mumua ne yɛ sinlidɔlɛ yɛado awolɛ mɔɔ gua ɛleka mɔɔ bɛsu ɛnriandilɛ la anwo. Belemgbunli Devidi nee ɛzoanvolɛ Pita anwo edwɛkɛ bɛahola amaa yɛanwu zɛhae sinlidɔlɛ ne mɔ anu nwiɔ—bɛ nwo mɔɔ bɛngola ye sɔ nee sonla nwo ɛzulolɛ.

¹¹ Ɛnee Belemgbunli Devidi lɛ bɛ nwo zo ɛhomolɛ nwo ngyegyelɛ. Yɛnwu ɛhye wɔ ɔ nee Batehyɛba edwɛkɛ ne anu. Yɛɛ mekɛ mɔɔ Neebale bɔle ye aholoba la, Devidi yɛle kɛ ɔkadua ye kakɛ. Nɔhalɛ nu, yeangola yeangomo ɔ nwo zo, noko ɔ sa nu ando kɛ ɔbayɛ mɔɔ sɔ Gyihova anye la. Awie mɔ boale ye, yemɔti ɔlile ye ngyegyelɛ ne anwo gyima.—1 Sam. 25:5-13, 32, 33; 2 Sam. 12:1-13.

12. Kɛzi Pita doale ɛnriandilɛ ne azo ɔnva nwo kɛ ɔdule koti la ɛ?

¹² Ɛnee Pita sulo adwenle mɔɔ menli bɛanyia ye ɔ nwo la, ɔdule koti wɔ mekɛ bie mɔ anu; noko akee, ɔlile nɔhalɛ ɔmanle Gyisɛse nee Gyihova. Kɛ neazo la, ɔkpole ɔ Menle ne fane nsa kpalɛ. (Luku 22:54-62) Nzinlii, Pita anyɛ ye debie kɛ Keleseɛnenli la, ɔbule diedima mɔɔ bɛnle Dwuuma la kɛ bɛ nwo ɛngyia kɛ Dwuuma Keleseɛnema mɔɔ bɛyɛ bɛ mrenyanu nzonlɛ la. Noko ɛzoanvolɛ Pɔɔlo nwunle ye wienyi kɛ ɔnle kɛ mgbakyemgbakyenu ba asafo ne anu. Mɔɔ Pita yɛle la ɛnle kpalɛ. Ɛhye ati, amaa Pita nyɛleɛ ne anzɛkye mediema ne mɔ avinli la, Pɔɔlo dule Pita folɛ wɔ bɛ kɔsɔɔti bɛ nyunlu ɛkɛ. (Gal. 2:11-14) Asoo anwomemaazo manle Pita vile ngoane nwo ɛnriandilɛ ne anu? Kyɛkyɛ. Ɔzuzule Pɔɔlo folɛdulɛ ne  anwo kpalɛ, ɔvale ɔlile gyima, na ɔdoale ɛnriandilɛ ne azo.

13. Kɛzi yɛ kpɔkɛdelɛ kola maa yɛtu koti ɛ?

¹³ Ɔdwu mekɛ ne bie a yɛ kpɔkɛdelɛ kola yɛ yɛ ngyegyelɛ. Ɛhye noko kola maa yɛtu koti. Ɔkola ɔmaa yɛkpo aze wɔ sunsum nu na yɛ sa nu to. Kɛ neazo la, adiema raalɛ ko mɔɔ ɔvi Japan la anwo dole ye ɛvolɛ 17 wɔ ye ɛzɔnenlɛ ne anzi. Ɔdwenlenle ye kpɔkɛdelɛ ne anwo dedee ɔyɛle bɛtɛɛ wɔ nɔhalɛ ne anu. Mgbanyima nwiɔ hɔkpɔlale ye. Ɔlua edwɛkɛ kpalɛ mɔɔ bɛhanle bɛwulale ye anwosesebɛ la ati, ɔbɔle debiezukoalɛ ɛhɔlɛ bo bieko. Ɔka kɛ, “Kɛzi mediema ne mɔ liele me kɛnlɛma la manle menzunle.” Kɛkala yɛ diema raalɛ ne ɛzia ɛra ɛnriandilɛ ne anu bieko.

14, 15. Saa atiakunluwɔzo ɛtane sɔ yɛ nea a mɔdenle boni a ɔwɔ kɛ yɛbɔ a? Maa neazo.

¹⁴ Nwonane ne atiakunluwɔzo ɛmaa menli dɔɔnwo ɛdu koti. Saa yɛ atiakunluwɔzo sɔ yɛ nea a, ɔwɔ kɛ yɛbɔ mɔdenle yɛmaa yɛ nwo te wɔ adwenle nu, ɛbɛlabɔlɛ nu, nee sunsum nu. Gyisɛse hanle kɛ saa yɛ nye anzɛɛ yɛ sa ɛlɛtwehwe yɛ ahɔ ɛtane nu a, ‘yɛdu ye yɛdo ye lɔ.’ Ɔnle kɛ yɛdwenledwenle ɛbɛlatane nwo. Emomu, ɔwɔ kɛ yɛtwe yɛ nwo yɛfi ɛbɛlatane nyɛleɛ biala mɔɔ ɔbamaa yɛavi ɛnriandilɛ ne anu la anwo.—Bɛgenga Mateyu 5:29, 30.

¹⁵ Adiema nrenya ko mɔɔ ye awovolɛ le mediema la hɛlɛle kɛ, ɛnee ɔlɛ mrenya mɔɔ bɛ nee mrenya da la anwo ngyegyelɛ. Ɔhanle kɛ: “Ɛnee saa mewɔ mediema avinli a me nwo ɛndɛ me. Na ɛnee mete nganeɛ kɛ menfɛta.” Mekɛ mɔɔ ɔlile ɛvolɛ 20 la, ɛnee ɔle dahuu adekpakyelɛnli nee sonvolɛ wɔ ye asafo ne anu. Ɔdule koti kpole bie, yemɔti bɛvale Ngɛlɛlera ne bɛhwile ɔ nyunlu, na mgbanyima ne mɔ boale ye. Ɔluale asɔneyɛlɛ, Nyamenle Edwɛkɛ ne mɔɔ ɔzukoale, yɛɛ awie mɔ mɔɔ ɔboale bɛ la azo ɔnyianle anwosesebɛ ɔdoale ye sunsum nu ɛnriandilɛ ne azo. Ɛvolɛ dɔɔnwo pɛle nu la, ɔhanle kɛ: “Ɛnee ɔdwu mekɛ ne bie a mete zɔhane nganeɛ ne noko meammaa yeanvo me nwo zo. Menwu kɛ Gyihova ɛnrɛmaa sɔnea mɔɔ bo yɛ nwo zo la ɛnrɛdo yɛ. Yemɔti medie medi kɛ Nyamenle ze kɛ mebahola meali konim.” Adiema ɛhye dwulale ye edwɛkɛ ne kɛ: “Mebanyia ngyegyelɛ ɛhye mɔ mɔɔ megyinla ɔ nloa la kɔsɔɔti anwo ahatualɛ wɔ ewiade fofolɛ ne anu. Mekulo yemɔ! Mebahɔ zo meaho meahɔdwu zɔhane mekɛ ne.” Yezi kpɔkɛ kɛ ɔnrɛvi ɛnriandilɛ ne anu ɛlɛ.

16, 17. (a) Duzu a boale adiema bie mɔɔ ɔdele nganeɛ kɛ bɛ nee ye anli ye boɛ la ɛ? (b) Duzu a ɔwɔ kɛ yɛkakye ye dahuu na yɛandu koti a?

¹⁶ Saa yɛ mediema nee yɛ anli ye boɛ a ɔkola ɔmaa yɛtu koti. Adiema bie mɔɔ ɛnee le asafo nu kpanyinli wɔ France la dele nganeɛ kɛ bɛ nee ye anli ye boɛ yemɔti ɔvale ɛya. Ɔgyakyile debiezukoalɛ nee daselɛlilɛ ɛhɔlɛ. Mgbanyima nwiɔ hɔkpɔlale ye na bɛdiele edwɛkɛ mɔɔ ɔhanle la kpalɛ. Bɛdule ye folɛ kɛ ɔva ye adesoa ne ɔmaa Gyihova na Nyamenle mɔɔ ɔbazɔ ɔ nye la a le debie mɔɔ nwolɛ hyia kpalɛ a. Ɔvale folɛdulɛ ne ɔlile gyima na yeangyɛ ɔziale ɔradoale ɛnriandilɛ ne azo, ɔbɔle mɔdenle wɔ asafo ne anu.

¹⁷ Ɔwɔ kɛ Keleseɛnema kɔsɔɔti kakye kɛ Gyisɛse Kelaese a le asafo ne Ati a, na tɛ menli mɔɔ bɛnli munli la ɔ. Gyisɛse mɔɔ “ɔ nye ma sɔ kɛ senle” la, nwu ninyɛne mɔɔ ɛlɛkɔ zo wɔ asafo ne anu la tɛla yɛ. (Yek. 1:13-16) Kɛ neazo la, ɔze kɛ debie mɔɔ bamaa yɛanyia adwenle kɛ bɛ nee yɛ anli ye boɛ la bahola ayɛ edwɛkɛ bie mɔɔ bɛangile nuhua kpalɛ bɛangile yɛ anzɛɛ yɛande ɔ bo kpalɛ la. Gyisɛse batoto ninyɛne boɛ wɔ asafo ne anu wɔ ye mekɛ nu. Yemɔti, ɔnle kɛ yɛmaa awie mɔ nyɛleɛ nee kpɔkɛ mɔɔ yɛ mediema Keleseɛnema kɛzi la maa yɛtu koti.

18. Kɛzi yɛbahola yɛagyinla sɔnea nee amaneɛnwunlɛ nloa ɛ?

 ¹⁸ Ninyɛne nwiɔ bieko mɔɔ bɛkola bɛmaa yɛtu koti la a le amaneɛnwunlɛ anzɛɛ kpɔdekpɔdeyɛlɛ nee yɛ gɔnwo mɔ sinlidɔlɛ. Wɔ ye ma ɛgualɛ ɛrɛlɛ ne anu, Gyisɛse hanle kɛ saa edwɛkɛ ne ati “bɛyɛ bɛ kpɔdekpɔde anzɛɛ bɛnwu amaneɛ a” bie mɔ bɛadu koti. Ɔnva nwo ɛleka mɔɔ kpɔdekpɔdeyɛlɛ ne bavi la—yɛ mbusuafoɔ, yɛ gɔnwo mɔ, anzɛɛ arane mgbanyima—ɔ nloa ɛgyinlanlɛ bahola ayɛ se amaa menli mɔɔ “edwɛkɛ ne [ɛtɛsɔle] ndinli wɔ bɛ nu” anzɛɛ bɛ nwo ɛnyɛ se wɔ sunsum nu la. (Mat. 13:21) Noko akee, saa yɛnyia ahonle kpalɛ a, Belemgbunlililɛ ne ma ne bahola aboa yɛ yeamaa yɛazɔ ndinli wɔ diedi ne anu. Saa ɛkɔ sɔnea nu a bɔ mɔdenle kɛ ɛbava asɔneyɛlɛ wɔadwenledwenle ninyɛne mɔɔ ayɛlɛyelɛ wɔ nwo la anwo. (Bɛgenga Felepaema 4:6-9.) Ɔlua anwosesebɛ ne mɔɔ Gyihova fa maa la ati, yɛbahola yɛagyinla sɔnea nloa, amaneɛnwunlɛ biala ɛnrɛhola ɛnrɛmaa yɛnrɛdu koti.

19. Kɛ ɔkɛyɛ na awie mɔ nvoleɛ ammaa yɛandu koti ɛ?

¹⁹ Mɔɔ yɛ alɔbɔlɛ la a le kɛ bie mɔ ɛvi ɛnriandilɛ ne anu ɔlua bɛ gɔnwo mɔ sinlidɔlɛ ti. Adwenle mɔɔ ɛnnyia wɔ ninyɛne nwo la ɛmaa bie mɔ ɛdu koti. (1 Kɔl. 8:12, 13) Saa awie fo yɛ a, yɛbamaa yeayɛ edwɛkɛ kpole ɔ? Baebolo ne tu Keleseɛnema folɛ kɛ bɛgyakyi ndɛnebualɛ, bɛva ɛtane bɛhyɛ, na bɛmmadwenle bɛ ngome bɛ ɛdeɛ nwo. (Luku 6:37) Saa ninyɛne ɛhye mɔ bie to wɔ a, biza ɛ nwo kɛ: ‘Asoo megyinla mɔɔ mekulo la azo mebua awie mɔ ndɛne? Kɛmɔ meze kɛ me mediema ne mɔ ɛnli munli la ati, asoo mebamaa munli mɔɔ bɛnli la aye me avi ɛnriandilɛ ne anu ɔ?’ Saa yɛlɛ Gyihova anwo ɛlɔlɛ a yɛbasika yɛ bo kɛ yɛnrɛmaa debie biala mɔɔ awie kɛyɛ la ɛnrɛzi yɛ adenle kɔkpula kɛ yɛbazu ɛnriandilɛ ne yɛahɔ awieleɛ.

20, 21. Duzu a wɔsika ɛ bo kɛ ɛbayɛ ye wɔ ngoane nwo ɛnriandilɛ ne anu a?

²⁰ Wɔzi kpɔkɛ kɛ ‘ɛbawie ɛnriandilɛ ne su ɔ’? (2 Tem. 4:7, 8) Ɛnee ɔwɔ kɛ ɛyɛ bɛtianwo debiezukoalɛ. Fa Baebolo ne nee asafo mbuluku yɛ neɛnleanu, dwenledwenle nwo, na nwu ninyɛne mɔɔ bɛbahola bɛamaa wɔadu koti la. Sɛlɛ sunsum nwuanzanwuanza ne maa ɔboa wɔ. Kakye kɛ, saa yɛtu koti anzɛɛ yɛtɔ aze bɔbɔ a yɛbahola yɛadwazo yɛadoa ɛnriandilɛ ne azo. Ɔwɔ kɛ yɛsukoa debie yɛfi yɛ nvonleɛ ne anu na yɛwie ɛnriandilɛ ne bɔkɔɔ.

²¹ Baebolo ne ka kɛ saa yɛkpondɛ kɛ yɛnyia ngoane ahyɛlɛdeɛ ne a, ɔwɔ kɛ yɛsu ɛnriandilɛ ne yɛkɔ awieleɛ. Saa yɛyɛ zɔ a Gyihova bamaa yɛanyia ‘anzondwolɛ dɔɔnwo.’ (Edw. 119:165) Ɔbaboa yɛ ɛnɛ na saa yɛwie ɛnriandilɛ ne su a yeamaa yɛ ngoane mɔɔ ɛnlɛ awieleɛ.—Gye. 1:12.