1, 2. Kɛzi Nyamenle azonvolɛ te nganeɛ wɔ ɛtane ewiade ɛhye anwo ɛ, na adenle boni azo a bɛlɛ awuke ɛ?

 ASOO ɛ nwo tɔ wɔ wɔ ewiade ɛhye anu? Saa ɔnle zɔ a, ɛnee ɛle kɛ Gyihova azonvolɛ mɔɔ ɛha la. Ɔvi tete ne, menli mɔɔ kulo Gyihova nɔhalɛ nu la ɛde nganeɛ kɛ bɛle nyɛvolɛ wɔ ewiade ɛhye anu. Kɛ neazo la, nɔhalɛ azonvolɛ bie mɔ mɔɔ dule vile ɛleka mɔɔ bɛde bɛhɔle ɛleka fofolɛ wɔ Keena azɛlɛ ne azo la liele dole nu kɛ “bɛle nyɛvolɛ” wɔ ewiade ye anu.—Hib. 11:13.

² Zɔhane ala a Kelaese ɛdoavolɛma mɔɔ bɛkpokpa bɛ mɔɔ “bɛ nzi maanle wɔ anwuma” la bu bɛ nwo kɛ bɛle “nyɛvolɛ nee adendulɛma wɔ ewiade” ɛhye anu a. (Fel. 3:20; 1 Pita 2:11) Kelaese ‘mboane gyɛne ne’ noko ɛnle ‘ewiade ne ɛdeɛ,’ kɛmɔ ɛnee Gyisɛse noko ɛnle ewiade ne ɛdeɛ la. (Dwɔn 10:16; 17:16) Noko akee, ɛhye ɛngile kɛ Nyamenle menli ɛnlɛ bɛ “awuke.” Nɔhalɛ nu, yɛlɛ awuke mɔɔ banebɔlɛ kpalɛ nee ɛlɔlɛ wɔ nu mɔɔ ɛnyelɛ ɛnnwu ye a. Mosisi hɛlɛle kɛ: “O Gyihova, wɔmɔ a wɔyɛ yɛ tɛnlabelɛ wɔ awolɛndoazo kɔsɔɔti anu a.” * (Edw. 90:1, NW) Adenle boni azo a ɛnee Gyihova le “tɛnlabelɛ” maa ye tete azonvolɛ a? Kɛzi ɔle “tɛnlabelɛ” ɔmaa ye menli ɛnɛ ɛ? Na kɛzi ɔbayɛ banebɔlɛ ɛleka yeamaa yɛ kenlebie ɛ?

3. Duzu a bɛvale Gyihova bɛdole nwo wɔ Edwɛndolɛ 90:1 ne a?

³ Ɔdwu mekɛ ne bie a, Baebolo ne fa Gyihova to ninyɛne mɔɔ yɛnwu bɛ la anwo amaa yɛade ye subane ne mɔ abo kpalɛ. Kɛ neazo la, Edwɛndolɛ 90:1 fa Gyihova to “tɛnlabelɛ” anzɛɛ awuke mɔɔ ɛlɔlɛ,  anzondwolɛ nee banebɔlɛ wɔ nu la anwo. Kɛmɔti a bɛva Gyihova bɛdo awuke nwo ɛ? Baebolo ne ka kɛ Gyihova le ɛlɔlɛ. (1 Dwɔn 4:8) Eza ɔka kɛ ɔle anzondwolɛ Nyamenle na ‘ɔsinza’ ye azonvolɛ. (Edw. 4:8) Kɛ neazo la, maa yɛzuzu kɛzi ɛnee Gyihova le kɛ awuke maa ye nɔhalɛ azonvolɛ Ebileham, Ayezeke, nee Gyekɔbo la anwo.

4, 5. Kɛzi Gyihova yɛle “tɛnlabelɛ” manle Ebileham ɛ?

⁴ Bie a ɔzinle Ebileham mɔɔ ɛnee bɛfɛlɛ ye Ebilam la anwo kɛ Gyihova zele ye kɛ: ‘Ɛvi wɔ maanle ye anu tu, ye ɛ nwo fi ɛ nwo amra avinli, na kɔ azɛlɛ ne mɔɔ mebahile wɔ la azo la.’ Saa edwɛkɛ ɛhye gyegyele Ebileham a, ɛnee edwɛkɛ bieko mɔɔ Gyihova hanle la bakyekye ɔ rɛle: “Mebayila wɔ, meamaa wɔayɛ sonlakpole, ɛ bo zo amra adɛlɛ ayɛ maanle kpole, . . . Mebayila bɛdabɛ mɔɔ bɛyila wɔ la, Na meamaa munzule ado mɔɔ kɛzuzu munzule kɛmaa wɔ la.”—Mɔl. 12: 1-3.

⁵ Gyihova yɛle banebɔlɛ ɛleka manle Ebileham nee ɔ bo zo amra ɔlua zɔhane edwɛkɛ ne azo. (Mɔl. 26:1-6) Gyihova lile ye ɛwɔkɛ zo. Kɛ neazo la, yeammaa Falo mɔɔ vi Yigyibiti nee Belemgbunli Abemɛlɛke mɔɔ vi Gilaa la adenle bɛangu Ebileham bɛanva ɔ ye Sɛla. Ɔbɔle Ayezeke nee Relɛbɛka noko anwo bane. (Mɔl. 12:14-20; 20:1-14; 26:6-11) Baebolo ne ka kɛ: “[Gyihova ammaa] awie adenle yeammaa yeansisi bɛ; bɛ ti, ɔdeanle arelemgbunli, ɔhanle kɛ, ‘Awie biala mmafa ɔ sa ka me menli ne mɔɔ mekpa nu meye bɛ la; awie biala mmagyegye me kpɔmanvolɛma ne.’”—Edw. 105:14, 15.

6. Duzu a Ayezeke zele Gyekɔbo kɛ ɔyɛ a, na kɛzi Gyekɔbo dele nganeɛ ɛ?

⁶ Ɛnee Ebileham alɔnra Gyekɔbo boka zɔhane kpɔmanvolɛma anzɛɛ ngapezoma ne anwo. Mekɛ dwule kɛ Gyekɔbo gya raalɛ la, ɔ ze Ayezeke zele ye kɛ: “Ɔnle kɛ ɛgya Keena mraalɛ ne mɔ bie. Dwazo kɔ Mɛsɔpɔteemea wɔ ɛ nli ɔ ze Bɛtuwɛle sua nu na kɔgya ɛ nli adiema nrenya Leeban amra mraalɛ ne mɔ anu ko.” (Mɔl. 28:1, 2) Gyekɔbo yɛle tieyɛ manle Ayezeke. Ɔbayɛ kɛ Gyekɔbo gyakyile ye abusua ne wɔ Keena na ɔ ngome ɔpɛle adenle tendenle ɔhɔle Hɛlan. (Mɔl. 28:10) Bie a ɔbizale ɔ nwo kɛ: ‘Mebali mekɛ nyɛ? Asoo me wuvuanyi ne balie me kɛnlɛma na yeamaa me yelɛ mɔɔ sulo Nyamenle ɔ?’ Noko mekɛ mɔɔ Gyekɔbo dwule Luz mɔɔ ɛvi Biyɛhyiba mɔɔ kɔ ɛkɛ la le mayɛle 60 (anzɛɛ km 100) la, debie bie zile ɔmanle ye adwenleadwenle ne azo pɛle. Duzu a zile a?

7. Kɛzi Nyamenle luale ɛlalɛ zo kyekyele Gyekɔbo arɛle ɛ?

⁷ Gyihova yele ɔ nwo hilele Gyekɔbo wɔ ɛlalɛ nu wɔ Luz na ɔzele ye kɛ: “Me  nee wɔ lua na mebanlea ɛ nwo zo wɔ ɛleka biala mɔɔ ɛkɔ la, na meava wɔ meazia meara azɛlɛ ɛhye azo. Ɔluakɛ menrɛgyakyi wɔ, kyesɛ mewie mɔɔ meva me nloa meha la yɛ.” (Mɔl. 28:15) Nea kɛzi edwɛkɛ kɛnlɛma zɛhae bahola amaa Gyekɔbo anwosesebɛ na yeakyekye ɔ rɛle a! Ɛbahola wɔayɛ kɛzi ɛnee ɔ nye la kɛ Nyamenle bamaa Ye edwɛkɛ ne ara nu la nvoninli wɔ wɔ adwenle nu ɔ? Saa bie a wɔvi sua nu ɛlɛsonle wɔ maanle gyɛne zo a, ɛbahola wɔade kɛzi Gyekɔbo dele nganeɛ la abo kpalɛ. Noko kpolerazulɛ biala ɛnle nwolɛ kɛ wɔnwu ninyɛne mɔɔ ɔkile kɛ Gyihova dwenle ɛ nwo la.

8, 9. Kɛzi Gyihova yɛle “tɛnlabelɛ” manle Gyekɔbo ɛ, na duzu a yɛkola yɛsukoa yɛfi ɛhye anu a?

⁸ Mekɛ mɔɔ Gyekɔbo dwule Hɛlan la, ɔ wuvuanyi Leeban liele ye kɛnlɛma na nzinlii ɔvale Liya nee Relahyɛle ɔmanle ɔgyale bɛ. Yeangyɛ biala, Leeban bɔle mɔdenle kɛ ɔsisi Gyekɔbo, ɔhakyile ye ahatualɛ ne fane bulu! (Mɔl. 31:41, 42) Noko akee, Gyekɔbo gyinlanle nsisi ɛhye mɔ anloa, ɛnee ɔlɛ anwodozo kɛ Gyihova banlea ye na Ɔyɛle ye zɔ! Nɔhalɛ nu, ɔkadwu mekɛ mɔɔ Gyekɔbo sia ahɔ Keena la, ɛnee yenyia “nyɛmoa, sonvolɛ mrenya nee mraalɛ, afunlumu nee asoaso dɔɔnwo.” (Mɔl. 30:43) Gyekɔbo vale anyenzɔlɛ kpole yɛle asɔne kɛ: “Me nwo ɛnfɛta wɔ ahunlunyele bebelebe ne nee nɔhalɛ mɔɔ wɔli wɔmaa me la. Ɔluakɛ kpɔma ala a melɛ mɔɔ menvale mempɛle Azule Dwɔdan ye a. Na kɛkala, meyɛ menli ekpunli nwiɔ a mera a.”—Mɔl. 32:10.

⁹ Ɛhɛe, Mosisi nzɛlɛlɛ ɛhye le nɔhalɛ: ‘O Gyihova, wɔmɔ a wɔyɛ yɛ tɛnlabelɛ wɔ awolɛndoazo kɔsɔɔti anu a.’ (Edw. 90:1) Edwɛkɛ ɛhye fane yɛdayɛ noko yɛ nwo ɔluakɛ Gyihova “ɛnli ngakyile, anzɛɛ ɔmboa ɔngakyi wienyi awozinli.” Ɔtɛde anwondɔlɛ nee banebɔlɛ ɛleka ɔmaa ye nɔhalɛ azonvolɛ. (Gye. 1:17) Bɛmaa yɛnlea kɛzi ɔle zɔ la.

10. Duzu a maa yɛnwu kɛ Gyihova tɛde ɛvealeka tɛmaa ye azonvolɛ ɛ?

¹⁰ Dwenle edwɛkɛ ɛhye anwo nea: Fa ye kɛ ɛwɔ kɔɔto ɛlɛdi daselɛ wɔatia ahyehyɛdeɛ bie mɔɔ bɛku menli la. Bɛ kpanyinli ne anye ɛde kpalɛ, ɔlɛ tumi, ɔnga nɔhalɛ fee yɛɛ ɔle kɔdiawu. Saa bɛdi edwɛkɛ ne bɛwie na ɛfi kɔɔto ɛkɛ ne ɛfinde a, duzu nganeɛ a ɛbade a? Ɛbade nganeɛ kɛ ɛlɛ banebɔlɛ ɔ? Kyɛkyɛ! Nɔhalɛ nu, ndelebɛbo wɔ nu kɛ ɛbakpondɛ banebɔlɛ. Edwɛkɛ ɛhye maa yɛnwu gyinlabelɛ mɔɔ Gyihova azonvolɛ mɔɔ bɛfa akɛnrasesebɛ bɛdi Gyihova anwo daselɛ na bɛkpa ye kpɔvolɛ kpole Seetan anwo ɛdanlɛ wɔ nu la! (Bɛgenga Yekile 12:17.) Noko asoo Seetan ɛhola ɛmaa Nyamenle menli kɔsɔɔti ɛha bɛ nloa ɛdo nu ɔ? Kyɛkyɛ! Yɛlɛnyia sunsum nu ngɔzo dɔɔnwo. Ɛhye maa ɔda ali wienyi kɛ: Gyihova le yɛ ɛvealeka, yɛ “tɛnlabelɛ,” titile wɔ awieleɛ mekɛ ɛhye anu. (Bɛgenga Ayezaya 54:14, 17.) Noko akee, saa yɛmaa Seetan bɛlɛbɛla yɛ a Gyihova ɛnrɛyɛ ɛvealeka ɛnrɛmaa yɛ.

11. Duzu a yɛsukoa yɛfi tete selɛma ne ɛkɛ a?

¹¹ Maa yɛzukoa debie fofolɛ yɛvi tete selɛma ne ɛkɛ. Ɔnva nwo kɛ ɛnee bɛde Keena azɛlɛ ne azo la, bɛanva bɛ nwo bɛanwulowula atisesebɛ nee ɛbɛlatane nyɛleɛ mɔɔ ɛnee menli ne yɛ la anu, bɛkpole ye kolaa. (Mɔl. 27:46) Ɛnee bɛze mɔɔ Gyihova kulo nee mɔɔ ɔngulo la yemɔti bɛangyinla mɛla zo bɛambɔ bɛ ɛbɛla. Ɔluakɛ ɛnee ɔle bɛ tɛnlabelɛ la ati, bɛangulo kɛ bɛkɛbikye ewiade ne ekyii bɔbɔ. Nea kɛzi bɛyɛle neazo kɛnlɛma bɛmanle yɛ a! Asoo ɛlɛbɔ mɔdenle wɔazukoa tete selɛma ɛhye mɔ wɔ wɔ agɔnwolɛvalɛ nee ninyɛne mɔɔ ɛfa  ɛdielie ɛ nye la anwo ɔ? Ɔyɛ alɔbɔlɛ kɛ mediema bie mɔ ka kɛ bɛ nye die anzɛɛ bɛ nwo tɔ bɛ wɔ Seetan ewiade ne anu ninyɛne bie mɔ anwo la. Saa ɔyɛ a ɛte nganeɛ zɛhae bie a, ɛnee yɛ nwolɛ asɔne. Kakye kɛ ewiade ɛhye le Seetan ɛdeɛ. Ɔda ye atisesebɛ nee ye angomedi subane ne ali.—2 Kɔl. 4:4; Ɛfɛ. 2:1, 2.

12. (a) Kɛzi Gyihova di ye sunsum nu abusua ne ngyianlɛ nwo gyima ɛ? (b) Kɛzi ɛte nganeɛ wɔ nziezielɛ ɛhye mɔ anwo ɛ?

¹² Saa yɛbahola yɛagyinla Seetan agyiba ne mɔ anloa a, ɛnee ɔwɔ kɛ yɛfa sunsum nu nziezielɛ kɔsɔɔti mɔɔ Gyihova ɛyɛ ɛmaa ye azonvolɛ mɔɔ bɛva ye bɛyɛ bɛ tɛnlabelɛ la yɛdi gyima. Nziezielɛ ɛhye mɔ bie a le Debiezukoalɛ, abusua ɛzonlenlɛ, nee ‘menli mɔɔ bɛva bɛ bɛmaa kɛ ahyɛlɛdeɛ’—neavolɛma mɔɔ Nyamenle ɛkpa bɛ kɛ bɛkyekye yɛ rɛle na bɛboa bɛmaa yɛli yɛ ngyegyelɛ zo la. (Ɛfɛ. 4:8-12) Adiema George Gangas mɔɔ ɛnee boka Neazo Eku ne anwo na ɔvale ɛvolɛ dɔɔnwo ɔzonlenle la hanle kɛ: “Saa mewɔ [Nyamenle menli] ne avinli a mete nganeɛ kɛ me nee me abusua ne wɔ sua nu, wɔ sunsum nu paladaese nu.” Zɔhane a ɛdawɔ noko ɛte nganeɛ ɔ?

13. Ezukoalɛdeɛ mɔɔ anwo hyia la boni a yɛnwu ye wɔ Hibuluma 11:13 ne a?

¹³ Subane bieko mɔɔ tete selɛma ne lale ye ali la a le kɛ, ɛnee bɛlɛ ɛhulolɛ kɛ bɛbayɛ ngakyile bɛavi menli mɔɔ bɛ nee bɛ de la anwo. Kɛmɔ yɛnwunle ye wɔ  ɛdendɛkpunli 1 ne anu la, “bɛliele bɛdole nu kɛ bɛle nyɛvolɛ mɔɔ ɛra nlɔnu wɔ azɛlɛ ɛhye azo a.” (Hib. 11:13) Asoo wɔzi kpɔkɛ kɛ ɛbayɛ awie mɔɔ ɔle ngakyile ɔ? Nɔhalɛ nu, ɛhye ɛyɛlɛ ɛnla aze. Noko ɔluakɛ Nyamenle boa yɛ na yɛ mediema Keleseɛnema maa yɛ anwosesebɛ la ati, yɛbahola yɛali konim. Kakye kɛ tɛ yɛ ngome a yɛlua a. Ɔwɔ kɛ bɛdabɛ mɔɔ bɛkulo kɛ bɛsonle Gyihova la kɔsɔɔti nwu ye kɛ bɛwɔ konle nu! (Ɛfɛ. 6:12) Ɔle konle mɔɔ saa yɛfa yɛ nwo yɛto Gyihova anwo zo na yɛfa ye yɛyɛ yɛ ɛvealeka a, yɛbali konim.

14. “Suakpole” boni a Gyihova azonvolɛ hendɛle ye a?

¹⁴ Debie bieko mɔɔ anwo hyia la a le ɛhye: Sukoa Ebileham fa ɛ nye to ahyɛlɛdeɛ ne azo. (2 Kɔl. 4:18) Ɛzoanvolɛ Pɔɔlo hɛlɛle kɛ ɛnee Ebileham “ɛlɛkendɛ Nyamenle ɔdaye ye Suakpole ne mɔɔ yehyehyɛ, yewula ye aze na yekyekye la.” (Hib. 11:10) “Suakpole” ɛhye a le Mɛzaya Belemgbunlililɛ ne. Ɛhɛe, ɛnee ɔwɔ kɛ Ebileham kendɛ “Suakpole” ɛhye. Ɔnle zɔ wɔ yɛ afoa nu. Tumililɛ ɛhye ɛbɔ ɔ bo wɔ anwuma. Yɛlɛ daselɛ dɔɔnwo mɔɔ ɔkile  kɛ ɔnrɛhyɛ ɔbali azɛlɛ ye azo tumi. Asoo ɛdie Belemgbunlililɛ ɛhye ɛto nu? Asoo ɛmaa ɔdumua wɔ ɛbɛlabɔlɛ nu na ɛtwe ɛ nwo ɛfi ewiade ne anwo?—Bɛgenga 2 Pita 3:11, 12.

15. Kɛzi menli mɔɔ fa bɛ nwo to ewiade ɛhye azo la awieleɛ bayɛ ɛ?

¹⁵ Kolaa na Seetan ewiade ɛhye ahɔ ye awieleɛ la, nuhua ngyegyelɛ mɔɔ le kɛ “awolɛ nyane ɛdelɛ” la bahɔ ɔ nyunlu kpalɛ. (Mat. 24:7, 8) Na saa anwongyelelɛ kpole ne bɔ ɔ bo a, akee azedɛnlanlɛ nu bayɛ se kpalɛ. Bɛbazɛkye ninyɛne wɔ ewiade ɛleka biala, menli bayɛ basaa na ɛzulolɛ baha bɛ. (Hab. 3:16, 17) Baebolo ne ka kɛ bɛ nye zo bada bɛ na bɛbakpondɛ ɛvealeka wɔ “awolɛ mbɔne nu nee awolɛ mɔɔ wɔ awoka ne mɔ azo la abo.” (Yek. 6:15-17) Noko bɛnrɛnyia banebɔlɛ biala wɔ awolɛ mbɔne nee maanyɛlɛ yɛɛ gualilɛ ngyehyɛleɛ mɔɔ bɛle kɛ awoka la anu.

16. Kɛzi ɔwɔ kɛ yɛbu Keleseɛnema asafo ne ɛ, na duzu ati ɔ?

¹⁶ Gyihova babɔ ye menli nwo bane wɔ anwongyelelɛ kpole ne anu. Kɛmɔ ngapezonli Habakɛke lile fɛlɛko la, ‘Gyihova ati, yɛbali fɛlɛko.’ Yɛ nye balie ɔlua yɛ “ngoanelielɛ Nyamenle” ne ati. (Hab. 3:18) Ndenle boni azo a Gyihova babɔ yɛ nwo bane wɔ anwongyelelɛ mekɛ ne anu a? Ɔwɔ kɛ yɛkendɛ na yɛnea mɔɔ bazi la. Noko yɛlɛ anwondozo kɛ: Kɛmɔ ɔboɔboale Yizilayɛma anloa na ɔmanle bɛ adehilelɛ wɔ mekɛ mɔɔ bɛvile Yigyibiti la, zɔhane ala a ɔbayɛ yeamaa yɛdayɛ noko a. (Yek. 7:9; bɛgenga Adendulɛ 13:18.) Kɛzi Gyihova bava adehilelɛ zɔhane amaa yɛ ɛ? Gyihova balua ye asafo ne azo ahile yɛ mɔɔ ɔwɔ kɛ yɛyɛ la. Nɔhalɛ nu, asafo apenle dɔɔnwo mɔɔ bɛwɔ ewiade amuala la bayɛ kɛ anwobanebɔlɛ “azua ne mɔ” mɔɔ bɛhanle nwolɛ edwɛkɛ wɔ Ayezaya 26:20 la. (Bɛgenga.) Asoo asafo debiezukoalɛ ne mɔ anwo hyia wɔ? Asoo ɛfa adehilelɛ mɔɔ Gyihova dua asafo ne azo ɔfa ɔmaa la ɛdi gyima ndɛndɛ ɔ?—Hib. 13:17.

17. Adenle boni azo a Gyihova le ye nɔhalɛ azonvolɛ mɔɔ bɛwu la “tɛnlabelɛ” ɛ?

¹⁷ Gyihova bayɛ “tɛnlabelɛ” amaa ye nɔhalɛ azonvolɛ mɔɔ bɛbawu kolaa na anwongyelelɛ kpole ne abɔ ɔ bo la bɔbɔ. Adenle boni azo? Ɔbadwazo bɛ yeavi ewule nu. Mɔɔ Ebileham, Ayezeke nee Gyekɔbo wule na mekɛ guale nu la, Gyihova zele Mosisi kɛ ɔtɛde bɛ Nyamenle. (Ade. 3:6) Gyisɛse zile zɔhane edwɛkɛ ne azo na ɔvale ɔzɔle zo kɛ: “Ɔle teasema Nyamenle, ɔnle bɛdabɛ mɔɔ bɛwu la Nyamenle; ɔluakɛ ɔ nye zo a bɛ muala bɛde ngoane nu.” (Luku 20:38) Ɔluakɛ Gyihova lɛ ɛhulolɛ kpole kɛ ɔbadwazo ye nɔhalɛ azonvolɛ mɔɔ bɛwu la ati; ɔ nye zo a bɛtɛde aze.—Nolo. 7:1.

18. Adenle titile boni azo a Gyihova bayɛ “tɛnlabelɛ” amaa ye menli wɔ ewiade fofolɛ ne anu a?

¹⁸ Wɔ ewiade fofolɛ ne mɔɔ ɔnrɛhyɛ na yɛahɔ nu la anu, Gyihova bayɛ “tɛnlabelɛ” amaa ye menli wɔ adenle titile bie azo. Yekile 21:3 ka kɛ: “Kɛkala, akee Nyamenle sua nu a le ye menli avinli. Ɔ nee bɛ badɛnla.” Gyihova bamaa Kelaese Gyisɛse anlea ye menli ne anwo zo wɔ ɛvolɛ apenle ko tumililɛ ne anu. Wɔ ɛvolɛ apenle ko ne awieleɛ, Gyisɛse bazia ava Belemgbunlililɛ ne awula Gyihova asa, ɔluakɛ ɛnee yewie gyima mɔɔ ɔ Ze kpondɛ kɛ ɔyɛ ɔmaa ye bodane mɔɔ ɔlɛ ɔmaa azɛlɛ ne ba nu la. (1 Kɔl. 15:28) Akee Gyihova mumua ne banlea alesama mɔɔ bɛli munli la anwo zo. Nea nwolɛ adenle kɛnlɛma mɔɔ la yɛ nyunlu a! Ɛhye ati, bɛmaa yɛzukoa tete nɔhavoma mɔɔ bɛvale Gyihova bɛyɛle bɛ “tɛnlabelɛ” la.