Debie ko mɔɔ kola boa yɛ kpalɛ la a le arɛlekyekyelɛ mɔɔ yɛnyia yɛfi yɛ mbusuafoɔ, agɔnwolɛma, nee yɛ mediema diedima ɛkɛ la.

Edwɛkɛ kɛnlɛma mɔɔ yɛ gɔnwo bie baha ahile yɛ la bahola ayɛ yɛ ayile yeamaa yɛ nwo adɔ yɛ. (Mrɛ. 16:24; 18:24; 25:11) Nɔhalɛ Keleseɛnema ɛndwenle arɛlekyekyelɛ mɔɔ bɛnyia bɛfi awie mɔ ɛkɛ la angome anwo, emomu, bɛkpondɛ ndenle bɛdua zo ‘bɛkyekye bɛdabɛ mɔɔ bɛ nwo ɛhyele bɛ wɔ ndenle ngakyile dɔɔnwo anu la arɛle.’ (2 Kɔl. 1:4; Luku 6:31) Antonio, maangyeba zo neavolɛ bie mɔɔ ɔwɔ Mexico la di ɛhye anwo daselɛ.

Mekɛ mɔɔ bɛnwunle kɛ Antonio ɛnyia mogya nu ewule bie mɔɔ bɛfɛlɛ ye lymphoma la, nyane kpole hanle ye. Noko ɔbɔle mɔdenle kɛ ɔbali ye nyanelilɛ ne azo. Wɔ adenle boni azo? Ɔbɔle mɔdenle kɛ ɔbahakye Belemgbunlililɛ edwɛne ne bie mɔ yeado na yeadwenledwenle nuhua edwɛkɛ ne mɔ anwo. Nzɛlɛlɛ mɔɔ ɔbukele ɔ nloa ɔyɛle nee Baebolo ne mɔɔ ɔgengale la noko boale ye.

Noko akee, awieleɛ kolaa ne Antonio hanle kɛ mediema ne mɔ a boale ye kpalɛ a. Ɔka kɛ: “Mekɛ mɔɔ me nee me ye yɛ rɛle kɛbɔ yɛ nwo la, yɛfɛlɛ asafo nu kpanyinli bie mɔɔ ɔle yɛ busuanli la kɛ ɔ nee yɛ ɛrayɛ asɔne. Ɛhye kyekyele yɛ rɛle na ɔmanle yɛ ahonle dɔle yɛ azule nu.” Ɔvale ɔzɔle zo kɛ: “Nɔhalɛ nu, ɔlua moalɛ mɔɔ yɛ mbusuafoɔ nee yɛ sunsum nu mediema vale boale yɛ la ati, yeangyɛ yɛɛ yɛ nwo dɔle yɛ a.” Nea kɛzi ɔyɛle ye fɛ kɛ ɔlɛ agɔnwolɛma mɔɔ lɛ ɛlɔlɛ na bɛdwenle sonla nwo a!

Debie bieko mɔɔ kola boa yɛ la a le sunsum nwuanzanwuanza ne. Ɛzoanvolɛ Pita hanle kɛ Nyamenle sunsum nwuanzanwuanza ne le “ahyɛlɛdeɛ.” (Gyi. 2:38) Menli dɔɔnwo ne mɔɔ bɛkpokpale bɛ wɔ Pɛntekɔso 33 Y.M. la, manle edwɛkɛ ne yɛle nɔhalɛ bɔkɔɔ. Noko eza sunsum nwuanzanwuanza ne le ahyɛlɛdeɛ maa yɛ kɔsɔɔti. Ahyɛlɛdeɛ ɛhye ɛnwie ɛlɛ, yemɔti duzu ati a ɛnzɛlɛ ɛmbiza ye dɔɔnwo ɛ?—Aye. 40:28-31.

Ɛzoanvolɛ Pɔɔlo yiale ngyegyelɛ dɔɔnwo, bɔbɔ ɔhale ye nee ewule. (2 Kɔl. 1:8-10) Noko akee, ɛnee Pɔɔlo ɛnzulo kɛ ɔbawu. Kɛmɔ ɛnee ɔze kɛ Nyamenle wɔ ye afoa la ati, ɔ rɛle kyekyele. Ɔhɛlɛle kɛ: “Bɛmaa yɛyɛ Nyamenle, yɛ Awulae Kelaese Gyisɛse ɔ Ze ne, anwunvɔnezelɛ Selɛ ne nee arɛlekyekyelɛ Nyamenle ne mo. Ɔkyekye yɛ rɛle wɔ amaneɛnwunlɛ kɔsɔɔti anu.” (2 Kɔl. 1:3, 4) Pɔɔlo ammaa ye tɛnlabelɛ ne anwo nyane anvo ɔ nwo zo. Emomu, ngyegyelɛ mɔɔ ɔhɔle nu la manle ɔnyianle menli nwo ɛlɔlɛ kpole, na ɔyɛle awie mɔɔ kola kyekye menli rɛle kpalɛ.

Mekɛ mɔɔ Antonio dele kpɔkɛ la, ɔhɔdoale ye neavolɛ adenduvo gyima ne azo. Ɛnee ɔda ye ali kɛ ɔ nye die ɔ mediema diedima ne anwo dahuu, noko kɛkala ɔ nee ɔ ye bɛbɔ mɔdenle kpalɛ kɛ bɛbahɔkpɔla bɛdabɛ mɔɔ bɛnde kpɔkɛ la na bɛamaa bɛ anwosesebɛ kpalɛ. Kɛ neazo la, mekɛ mɔɔ Antonio hɔkpɔlale adiema ko mɔɔ ɔ nwo dole ye kpole la, ɔnwunle kɛ adiema ɛhye ɛmkpondɛ kɛ ɔkɔ debiezukoalɛ. Antonio hanle kɛ: “Tɛ kɛ asɛɛ adiema ne ɛngulo Gyihova anzɛɛ mediema ne mɔ a, emomu anwondolɛ ne a ɛmaa yede nganeɛ kɛ nvasoɛ ɛnle ɔ nwo zo a.”

Mekɛ bie mɔɔ mediema dɔɔnwo yiale nu la, Antonio manle adiema ɛhye yɛle asɔne ɔvale ɔmanle ye anwosesebɛ. Ɔwɔ nuhua kɛ ɛnee adiema ne te nganeɛ kɛ ɔnfɛta ɛdeɛ, noko ɔliele ɔdole nu. Antonio hanle kɛ: “Ɔyɛle asɔne kɛnlɛma na nzinlii ɔ nwo dɔle ye. Ɔdele nganeɛ bieko kɛ nvasoɛ wɔ ɔ nwo zo.”

Nɔhalɛ nu, yɛ muala yɛnwu amaneɛ ɛlɛ. Noko, kɛmɔ Pɔɔlo hanle la, ɛhye kola tete yɛ maa yɛyɛ menli mɔɔ kola kyekye yɛ mediema rɛle wɔ bɛ ngyianlɛ nu a. Zɔhane ati, kɛ Keleseɛnema la, bɛmaa yɛzukoa yɛ Nyamenle Gyihova yɛnyia menli mɔɔ bɛlɛnwu amaneɛ la anwo ɛhulolɛ kpole na yɛkyekye bɛ rɛle.