1, 2. Ngapezo mɔɔ fane awieleɛ mekɛ ne anwo la boni a Gyisɛse ɛdoavolɛ ne mɔ anye liele nwo kpalɛ a, na duzu ati ɔ?

MEKƐ ne anu, ɛnee Pita, Gyemise, Dwɔn nee Andelu angome a nee bɛ Menle ne lua a. Ɛnee edwɛkɛ mɔɔ Gyisɛse ɛha ye wɔ ɛzonlenlɛ sua ne mɔɔ bɛbazɛkye ye anwo la ɛlɛgyegye bɛ kpalɛ. (Mak. 13:1-4) Yemɔti, bɛbizale ye kɛ: “Ka mekɛ mɔɔ ɛhye mɔ kɛzi la kile yɛ, na ka debie mɔɔ bazi ahile kɛ wɔ ɛralɛ ne ɛdwu na ewiade ɛhye ɛlɛba awieleɛ la kile yɛ?” (Mat. 24:1-3) Gyisɛse hilele bɛ ninyɛne mɔɔ ɔbamaa banwu kɛ ewiade ne ɛhakyi na eza ɔbahile kɛ Seetan ɛtane ewiade ɛhye ɛlɛba ye awieleɛ la. Ɔbayɛ kɛ Gyisɛse ɛdoavolɛ ne mɔ anye liele debie ko anwo titile. Mekɛ mɔɔ Gyisɛse hanle ninyɛne mɔɔ gyegye adwenle le kɛ konle, ɛhɔne, nee mɛladonlɛ mɔɔ ɔbabu anwo edwɛkɛ wiele la, ɔhanle kɛ debie kpalɛ bie noko bayɛ awieleɛ mekɛ ne anwo sɛkɛlɛneɛ. Ɔhanle kɛ: “Bɛbabɔ Edwɛkpa ɛhye mɔɔ fane Anwuma Belemgbunlililɛ ne anwo la nolo wɔ aleɛabo amuala, amaa yeayɛ daselɛlilɛ yeamaa aleɛabo amra kolaa na awieleɛ ne ara.”—Mat. 24:7-14.

² Ɛnee Gyisɛse Kelaese ɛdoavolɛ ne mɔ nee ye ɛha Belemgbunlililɛ ne anwo edwɛkpa ne. (Luku 8:1; 9:1, 2) Bie a bɛhakyele kɛ ɔhanle kɛ: “Bɛyɔba ne ɛra dɔɔnwo, na gyimayɛvoma mɔɔ bu la le ekyi. Zɔhane ati bɛzɛlɛ kɛ egyinli menle ne kɛnyia gyimayɛvoma dɔɔnwo kɛmaa bɛkɛhɔbu bɛyɔba ne.” (Luku 10:2) Noko kɛ ɔkɛyɛ na bɛaha edwɛkɛ ne wɔ “aleɛabo amuala” na “yeayɛ daselɛlilɛ yeamaa aleɛabo amra” ɛ? Nienwu a gyimayɛvoma ne bavi ara a? Saa bɛyɛle mɔɔ bazi kenlebie la nvoninli wɔ bɛ adwenle nu wɔ mekɛ mɔɔ ɛnee bɛ nee Gyisɛse de ɛkɛ ne la a, anrɛɛ ɔbaboa bɛ! Anrɛɛ kɛzi edwɛkɛ sikalɛ ne mɔɔ wɔ Mateyu 24:14 ɛra nu la ɛnrɛzi bɛ nwo.

3. Kɛzi edwɛkɛ mɔɔ wɔ Luku 21:34 la ɛra nu ɛ, na edwɛkɛ boni mɔ a ɔwɔ kɛ yɛbiza yɛ nwo a?

 ³ Gyisɛse ngapezo ne ɛra nu wɔ yɛ mekɛ ye anu. Menli dɔɔnwo ɛha ɛbɔ nu ɛlɛbɔ Belemgbunlililɛ edwɛkpa ne nolo wɔ azɛlɛ ye kɔsɔɔti azo. (Aye. 60:22) Noko Gyisɛse hanle kɛ ɔbayɛ se yeamaa bie mɔ kɛ bɛbamaa bɛ adwenle agyinla ɛleka ko wɔ awieleɛ mekɛ ɛhye anu. Bɛbamaa ninyɛne ali bɛ adwenle na bɛade nganeɛ kɛ ‘bɛvɛ.’ (Bɛgenga Luku 21:34.) Yɛnwu kɛ zɔhane edwɛkɛ ne noko ɛra nu. Ninyɛne ɛlɛtwehwe Nyamenle menli ne bie mɔ adwenle. Yɛkola yɛnwu ɛhye wɔ kpɔkɛ mɔɔ bɛsi ye wɔ gyimayɛlɛ, nwoma kpole ezukoalɛ, nwonane afoa nu ninyɛne, yɛɛ mekɛ mɔɔ bɛfa bɛdi nwɔhoa nee mɔɔ bɛfa bɛdielie bɛ nye anwo la anu. Bie mɔ asa nu ɛlɛto ɔlua ɛbɛlabɔlɛ nu ngyegyelɛ nee adwenleadwenle ti. Biza ɛ nwo kɛ: ‘Duzu a melɛyɛ a? Mefa Nyamenle ɛhulolɛdeɛ ɛyɛlɛ medumua ɔ?’

4. (a) Duzu a Pɔɔlo zɛlɛle manle Keleseɛnema mɔɔ ɛnee wɔ Felepae la ɛ, na duzu ati ɔ? (b) Duzu a yɛbazukoa ye wɔ debiezukoalɛ ɛhye nee mɔɔ doa ye la anu a, na duzu ati ɔ?

⁴ Ɛnee ɔwɔ kɛ ɛvoya ne mɔɔ lumua la anu Keleseɛnema bɔ mɔdenle kpalɛ na bɛahola bɛava sunsum nu ninyɛne bɛalumua. Ɛzoanvolɛ Pɔɔlo nwunle kɛ ɔwɔ kɛ ɔsɛlɛ ɔmaa bɛdabɛ mɔɔ bɛwɔ Felepae la amaa bɛabɔ mɔdenle ‘bɛanwu ninyɛne mɔɔ nwolɛ hyia kpalɛ la.’ (Bɛgenga Felepaema 1:9-11.) Ɛnee ɛzoanvolɛ Pɔɔlo nee tete amra dɔɔnwo “ɛzi pi wɔ Awulae anu na bɛlɛbɔ Edwɛkpa ne nolo mɔɔ bɛnzulo ɛhwee a.” (Fel. 1:12-14) Zɔhane ala a ɛnɛ noko yɛ nuhua dɔɔnwo ɛlɛfa akɛnrazilɛ abɔ Nyamenle Edwɛkɛ ne nolo a. Noko, saa yɛsuzu mɔɔ Gyihova ahyehyɛdeɛ ne ɛyɛ ye ɛnɛ la anwo a, asoo ɔbamaa yɛava yɛ adwenle yɛazie gyima mɔɔ nwolɛ hyia tɛla biala—edwɛkɛhanlɛ gyima ne azo kpalɛ ɔ? Ɛhɛe! Yɛbazuzu ngyehyɛleɛ mɔɔ Gyihova ɛyɛ amaa edwɛkɛ mɔɔ wɔ Mateyu 24:14 ara nu la anwo wɔ debiezukoalɛ ɛhye anu. Duzu a gyi ye ahyehyɛdeɛ ne anye zo a, saa yɛnwu ye a kɛzi ɔbaha yɛ nee yɛ abusua ne ɛ? Yɛbazuzu debie mɔɔ ɔbamaa yɛadoa yɛ ɛzonlenlɛ gyima ne azo na yɛ nee Gyihova ahyehyɛdeɛ ne alua dahuu la anwo wɔ debiezukoalɛ ne mɔɔ doa zo la anu.

5, 6. (a) Duzu ati a Gyihova manle bɛnwunle ye ahyehyɛdeɛ ne foa mɔɔ wɔ anwuma la anwo ɛnyelɛzodeɛnwunlɛ ɛ? (b) Duzu a Yizikeɛle nwunle ye wɔ ɛnyelɛzodeɛnwunlɛ nu a?

⁵ Ninyɛne dɔɔnwo wɔ ɛkɛ mɔɔ Gyihova ammaa bɛangɛlɛ ye wɔ ye Edwɛkɛ ne anu a. Kɛ neazo la, ɔnva nwo kɛ anrɛɛ yɛ nye balie nwo kpole la, yeammaa bɛangɛlɛ kɛzi yɛ amelɛ ne nee ninyɛne mɔɔ wɔ ewiade ye la dɔɔnwo yɛ gyima! Emomu, Gyihova ɛmaa yɛ edwɛkɛ mɔɔ ɔbamaa yɛanwu ye ɛhulolɛdeɛ na yɛayɛ la. (2 Tem. 3:16, 17) Yɛ nye die kɛ Gyihova ɛmaa yɛnwu ye ahyehyɛdeɛ ne foa mɔɔ wɔ anwuma la anwo ninyɛne bie mɔ wɔ Baebolo ne anu la! Saa yɛkenga nwolɛ edwɛkɛ wɔ mbuluku mɔɔ Ayezaya, Yizikeɛle, Daneɛle, nee Yekile buluku ne mɔɔ Dwɔn hɛlɛle la anu a, yɛ nye die kpalɛ. (Aye. 6:1-4; Yiz. 1:4-14, 22-24; Dan. 7:9-14; Yek. 4:1-11) Ɔle kɛ asɛɛ Gyihova ɛye mgbɛnu ɛdanlɛ bie ɛvi ɛkɛ amaa yɛanwu ninyɛne mɔɔ wɔ anwuma lɔ la. Duzu ati a ɔmaa yɛnwu ninyɛne ɛhye mɔ a?

⁶ Gyihova ɛngulo kɛ yɛ rɛle kɛvi ye ɛlɛ kɛ yɛboka ewiade amuala ahyehyɛdeɛ bie anwo. Gyihova ahyehyɛdeɛ ne foa mɔɔ ɛnyelɛ ɛnnwu ye la, ɛlɛbɔ mɔdenle ali Nyamenle bodane nwo gyima. Kɛ neazo la, Yizikeɛle nwunle kɛ bɛva ehwili kpole bie bɛyɛ Gyihova ahyehyɛdeɛ ne mɔɔ ɛnyelɛ ɛnnwu ye la anwo nvoninli.  Ehwili ɛhye tia ndɛndɛ yɛ ɔkola ɔkakyi ɔ nye arelevilɛ nu. (Yiz. 1:15-21) Eza ɔnwunle Ahenle mɔɔ ɔlɛka ehwili ne la. Ɔhanle kɛ: ‘Deɛ ne mɔɔ menwunle ye la ta kɛ kɔbele mɔɔ ɛlɛta la, na yeyɛ kɛ asɛɛ debie mɔɔ senle ɛbɔ ɛyia ye; ɔle kɛ Gyihova anyunlunyia ne sɔhovolɛ la.’ (Yiz. 1:25-28) Nea kɛzi ɛnyelɛzodeɛnwunlɛ ɛhye bazi Yizikeɛle anwo a! Ɔnwunle kɛ Gyihova nea ye ahyehyɛdeɛ ne azo na ɔdua ye sunsum nwuanzanwuanza ne azo ɔkile ye adenle. Nɔhalɛ nu, ehwili ne le Gyihova ahyehyɛdeɛ ne mɔɔ ɛnyelɛ ɛnnwu ye la gyimayɛlɛ nwo nvoninli kɛnlɛma kpalɛ!

7. Adenle boni azo a Daneɛle ɛnyelɛzodeɛnwunlɛ ne maa yɛnyia anwondozo ɛ?

⁷ Daneɛle noko nwunle ninyɛne dɔɔnwo mɔɔ baboa yɛ la. Ɔnwunle Gyihova, “Sonla ne mɔɔ ɔvi tete ɛnee ɔwɔ ɛkɛ ne la” kɛ ɔde ye ebia ne mɔɔ ɔle kɛ senle la azo. Ebia ne agyakɛ ne le ehwili. (Dan. 7:9) Ɛnee Gyihova kpondɛ kɛ Daneɛle nwu kɛ Ye ahyehyɛdeɛ ne ɛlɛkɔ ɔ nyunlu, ɔlɛdi Ye bodane nwo gyima. Eza Daneɛle nwunle “debie bie mɔɔ zɔho sonla ra la,” Gyisɛse, kɛ bɛva Gyihova ahyehyɛdeɛ ne foa mɔɔ wɔ azɛlɛ ye azo la bɛwula ɔ sa. Tɛ mekɛ ekyi bie ala a Kelaese tumililɛ ne mɔɔ di munli la bali tumi a. Emomu, “Ye belemgbunlililɛ ne ɛnlɛ awieleɛ, ɔnrɛpɛ nu ɔnrɛze ɛlɛ yɛɛ awie ɛnrɛhola ye sɛkye.” (Dan. 7:13, 14) Ɛhye ka yɛ maa yɛfa yɛ rɛle yɛwula Gyihova anu na yɛkile ninyɛne mɔɔ ɔlɛyɛ la anwo anyezɔlɛ. Ɔvale “ebialilɛ tumi, anyunlunyia, yɛɛ enililɛ,” ɔmanle ɔ Ra Gyisɛse mɔɔ bɛzɔle ye bɛnleanle la. Gyihova vale ɔ rɛle wulale ɔ Ra ne nu. Ɛhye ati, yɛbahola yɛava yɛ rɛle yɛawula Gyisɛse tumililɛ ne noko anu.

8. Kɛzi ɛnyelɛzodeɛnwunlɛ bie mɔɔ Gyihova manle Yizikeɛle nee Ayezaya nwunle ye la hanle bɛ ɛ, na kɛzi ɔwɔ kɛ ɔka yɛdayɛ noko ɛ?

 ⁸ Kɛzi ɔwɔ kɛ Gyihova ahyehyɛdeɛ ne mɔɔ ɛnyelɛ ɛnnwu ye la anwo ɛnyelɛzodeɛnwunlɛ ɛhye maa yɛte nganeɛ ɛ? Nɔhalɛ nu, mɔɔ Gyihova ɛlɛyɛ la yɛ azibɛnwo na ɔmaa yɛbɛlɛ yɛ nwo aze kɛ Yizikeɛle la. (Yiz. 1:28) Saa yɛdwenledwenle mɔɔ Gyihova ahyehyɛdeɛ ne ɛlɛyɛ la anwo a, ɔbaha yɛ yeamaa yɛayɛ dɔɔnwo kɛ Ayezaya la. Mekɛ mɔɔ ɔnyianle nwolɛ adenle kɛ ɔhɔha mɔɔ Gyihova ɛlɛyɛ anwo edwɛkɛ la, yeandwenlehwenle ɔ bo aze. (Bɛgenga Ayezaya 6:5, 8.) Ɛnee Ayezaya lɛ anwondozo kɛ kɛmɔ Gyihova gyi ɔ nzi la ati, ɔbahola yeali ngyegyelɛ biala anwo gyima. Zɔhane ala noko a, ɔwɔ kɛ Gyihova ahyehyɛdeɛ ne mɔɔ ɛnyelɛ ɛnnwu ye la anwo debie ekyi mɔɔ yɛnwu ye la ka yɛ maa yɛyɛ dɔɔnwo a. Nea kɛzi ɔmaa anwosesebɛ kɛ yɛbadwenledwenle ahyehyɛdeɛ ɛhye mɔɔ ɔ nyunlu ala a ɔkɔ na ɔlɛdi Gyihova bodane ne mɔ anwo gyima la anwo a!

9, 10. Duzu ati a Gyihova ahyehyɛdeɛ ne foa mɔɔ ɛnyelɛ nwu ye la anwo hyia ɛ?

⁹ Gyihova ɛlua ɔ Ra ne anwo zo yeyɛ ngyehyɛleɛ bie wɔ azɛlɛ ye azo mɔɔ ɔ nee ye ahyehyɛdeɛ ne mɔɔ ɛnyelɛ ɛnnwu ye la bɔ nu yɛ gyima a. Duzu ati a ngyehyɛleɛ mɔɔ yɛ nye nwu ye la anwo hyia na yɛahola yɛayɛ gyima ne mɔɔ bɛha nwolɛ edwɛkɛ wɔ Mateyu 24:14 la ɛ? Maa yɛzuzu ninyɛne nsa anwo.

¹⁰ Mɔɔ lumua la, Gyisɛse hanle kɛ edwɛkɛhanlɛ gyima ne bava ye ɛdoavolɛ ne mɔ ahɔ “aleɛabo ɛleka biala.” (Gyi. 1:8) Mɔɔ tɔ zo nwiɔ, ɔwɔ kɛ bɛyɛ ngyehyɛleɛ bɛfa bɛmaa sunsum nu aleɛ na eza bɛnea menli mɔɔ ɛlɛyɛ gyima ɛhye la. (Dwɔn 21:15-17) Mɔɔ tɔ zo nsa, ɔwɔ kɛ bɛyɛ ngyehyɛleɛ bɛmaa menli mɔɔ ɛlɛka edwɛkɛ ne la yia nu sonle Gyihova na bɛkile bɛ kɛzi ɔwɔ kɛ bɛyɛ gyima ne la. (Hib. 10:24, 25) Bɛnrɛhola bɛnrɛyɛ gyima ɛhye mɔɔ ngyehyɛleɛ biala ɛnle nwo a. Ɛhye ati, saa Kelaese ɛdoavolɛ ne mɔ bahola ayɛ gyima ɛhye a, kyesɛ bɛyɛ nwolɛ ngyehyɛleɛ kpalɛ.

11. Kɛzi yɛdi yɛboa ngyehyɛleɛ mɔɔ Gyihova ahyehyɛdeɛ ne ɛyɛ la ɛ?

¹¹ Kɛzi yɛdi yɛboa ngyehyɛleɛ mɔɔ Gyihova ahyehyɛdeɛ ne ɛyɛ la ɛ? Adenle titile ko mɔɔ yɛdua zo la a le kɛ yɛbalie menli mɔɔ Gyihova nee Gyisɛse ɛlɛmaa bɛali edwɛkɛhanlɛ gyima ne anyunlu la yɛali. Ninyɛne dɔɔnwo wɔ ɛkɛ ɛnɛ mɔɔ anrɛɛ mediema ɛhye mɔ bahola ava azie bɛ nye zo a. Noko akee, duzu a Gyihova ahyehyɛdeɛ ne foa mɔɔ ɔwɔ azɛlɛ ye azo la ɛva ɛzie ɔ nye zo a?

12, 13. Kɛzi Keleseɛne mgbanyima di bɛ ɛzonlelilɛ nwo gyima ɛ, na duzu ati a ɛhye maa wɔ anwosesebɛ ɛ?

¹² Bɛkpa mgbanyima mɔɔ lɛ anwubielɛ la wɔ ewiade ɛleka biala kɛ bɛnlea bɛmaa Belemgbunlililɛ edwɛkɛhanlɛ gyima ne ɛhɔ zo wɔ maanle mɔɔ bɛwɔ nu la anu. Mediema ɛhye mɔ kpondɛ adehilelɛ fi Nyamenle Edwɛkɛ ne ‘mɔɔ le kɛ kɛnlaneɛ nee wienyi wɔ bɛ adenle nu la anu,’ na bɛfi ahonle nu bɛyɛ asɔne kolaa na bɛazi kpɔkɛ.—Edw. 119:105; Mat. 7:7, 8.

¹³ Keleseɛne mgbanyima mɔɔ bɛnea edwɛkɛhanlɛ gyima ne azo la, fa bɛ mekɛ ne yɛ “Edwɛkpa ne ɛhanlɛ gyima ne” kɛmɔ menli mɔɔ lile gyima ne anyunlu wɔ ɛvoya ne mɔɔ lumua anu yɛle la. (Gyi. 6:4) Bɛdi fɛlɛko kpole kɛ edwɛkɛhanlɛ gyima ne ɛlɛnyia ngɔzo wɔ bɛ maanle ne anu nee ewiade  amuala la. (Gyi. 21:19, 20) Bɛnli debie biala anwo mɛla yɛɛ bɛnyɛ kyengye. Emomu, bɛdua Ngɛlɛlera ne nee Nyamenle sunsum nwuanzanwuanza ne adehilelɛ zo bɛyɛ ngyehyɛleɛ mɔɔ bamaa edwɛkɛhanlɛ gyima ne ahɔ zo la. (Bɛgenga Gyima ne 15:28.) Bɛdua adenle ɛhye azo bɛyɛ neazo kpalɛ bɛmaa bɛdabɛ mɔɔ bɛwɔ asafo ne anu amuala la.—Ɛfɛ. 4:11, 12.

14, 15. (a) Duzu ngyehyɛleɛ a bɛyɛ bɛboa edwɛkɛhanlɛ gyima ne wɔ ewiade amuala a? (b) Kɛzi ɛte nganeɛ wɔ wɔ afoa nu ɛdeɛ mɔɔ ɛyɛ ɛboa Belemgbunlililɛ edwɛkɛhanlɛ gyima ne la anwo ɛ?

¹⁴ Yɛ mediema dɔɔnwo yɛ mbuluku, debiezukoalɛ, nee nyianu nwo ngyehyɛleɛ mɔɔ yɛnnwu ye a. Kɛ neazo la, bɛdabɛ mɔɔ bɛdu bɛ nwo bɛmaa la kile yɛ mbuluku ne mɔ abo kɔ aneɛ mɔɔ bo 600 la anu. Ɔlua zo, menli dɔɔnwo kola sukoa “ninyɛne mgbole mɔɔ Nyamenle ɛyɛ la” wɔ bɛ sua zo aneɛ nu. (Gyi. 2:7-11) Mgbavolɛ nee mbɛlɛra fa mɛlahyinli mɔɔ prente debie ndɛndɛ la yɛ mbuluku. Akee bɛfa mbuluku ɛhye mɔ bɛkɔma asafo ne mɔ, bɔbɔ bɛkɔ ɛleka mɔɔ wɔ moɔmoa kpalɛ la.

¹⁵ Bɛyɛ ngyehyɛleɛ dɔɔnwo amaa yɛ nee yɛ asafo ne abɔ nu abɔ edwɛkpa ne nolo. Kɛ neazo la, menli dɔɔnwo tu bɛ nwo maa sisi Belemgbunlililɛ Asalo nee Nyianu Asalo. Bie mɔ noko boa bɛdabɛ mɔɔ esiane to bɛ anzɛɛ bɛyia ayileyɛlɛ nu ngyegyelɛ la. Eza bɛyɛ maanzinli nee maangyeba nyianu nwo ngyehyɛleɛ, na bɛyɛ Baebolo sukulu mɔ bɛfa bɛkilehile la. Bodane boni ati a bɛyɛ gyima ɛhye mɔ a? Bɛyɛ ɛhye bɛfa bɛboa yɛ amaa yɛabɔ edwɛkpa ne nolo na nɔhalɛ ɛzonlenlɛ ne anu adɛlɛ. Nɔhalɛ nu, Gyihova ahyehyɛdeɛ ne foa mɔɔ wɔ azɛlɛ ye azo la ɛva ninyɛne mɔɔ anwo hyia kpalɛ la ɛlumua!

16. Baebolo ɛzukoalɛ nwo ngyehyɛleɛ kpalɛ boni a ɛdawɔ anzɛɛ wɔ abusua ne bahola ayɛ a?

¹⁶ Asoo ɔvi mekɛ mɔɔ kɔ mekɛ la yɛtɛnla aze yɛsuzu gyima mɔɔ Gyihova ahyehyɛdeɛ ne ɛlɛyɛ la anwo? Bie mɔ fa mekɛ mɔɔ bɛfa bɛyɛ bɛ abusua ɛzonlenlɛ anzɛɛ bɛtianwo debiezukoalɛ la bie yɛ neɛnleanu wɔ ninyɛne ɛhye mɔ anwo na bɛdwenledwenle nwo. Kɛ neazo la, ɔbayɛ wɔ anyelielɛ kɛ ɛbazukoa Ayezaya,Yizikeɛle, Daneɛle nee Dwɔn ɛnyelɛzodeɛnwunlɛ ne mɔ anwo debie. Ahyehyɛdeɛ ne anwo edwɛkɛ mɔɔ yɛ anyelielɛ la wɔ Jehovah’s Witnesses—Proclaimers of God’s Kingdom buluku ne nee mbuluku gyɛne nu anzɛɛ DVD zo.

17, 18. (a) Kɛzi edwɛkɛ ɛhye ɛboa wɔ ɛ? (b) Kpuyia boni mɔ a ɔwɔ kɛ yɛsuzu nwo a?

¹⁷ Ɔle kpalɛ kɛ yɛbadwenledwenle kɛzi Gyihova ɛlɛdua ye ahyehyɛdeɛ ne azo aboa edwɛkɛhanlɛ gyima ne la anwo. Bɛmaa yɛbɔ kpɔkɛ yɛ nee ahyehyɛdeɛ kɛnlɛma ɛhye ɛlua na yɛva yɛ adwenle yɛzie ninyɛne mɔɔ anwo hyia kpalɛ la azo. Saa yɛyɛ zɔ a, yɛbanyia anwosesebɛ kɛ Pɔɔlo mɔɔ hɛlɛle edwɛkɛ ɛhye la: “Nyamenle ɛlolɛ nu ala yɛɛ yeva gyima ɛhye yewula yɛ sa nu a, zɔhane ati yɛ rɛle ɛmbɔ.” (2 Kɔl. 4:1) Eza ɔzile ɔ gɔnwo mɔ gyimayɛvoma adua kɛ: “Bɛmaa yɛhɔ zolɛ yɛyɛ kpalɛ; ɔluakɛ saa yɛangyakyi nyele ɛyɛlɛ a, kenle bie yɛbanwu ɔ bo aleɛ.”—Gal. 6:9.

¹⁸ Asoo nzenzaleɛ bie wɔ ɛkɛ mɔɔ ɔhyia kɛ yɛ nuhua ko biala anzɛɛ yɛ mbusua yɛ amaa yɛanwu ninyɛne mɔɔ anwo hyia kpalɛ wɔ yɛ ɛbɛlabɔlɛ nu la ɔ? Asoo yɛbahola yɛatete ninyɛne zo anzɛɛ yɛnrɛmaa ninyɛne ɛnrɛhwehwe yɛ adwenle amaa yɛahola yɛava yɛ adwenle yɛazie edwɛkɛhanlɛ gyima ne mɔɔ nwolɛ hyia kpalɛ la azo ɔ? Wɔ edwɛkɛ ne mɔɔ doa zo la anu, yɛbazuzu ninyɛne nnu mɔɔ baboa yɛ na yɛ nee Gyihova ahyehyɛdeɛ ne alua la anwo.