Debie wɔ ɛkɛ mɔɔ ɔdi daselɛ kɛ edwɛkɛ ɛhye fane Nyamenle sunsum nu mralɛ ne mɔ anwo a. Duzu a di daselɛ a?

Ngyɛnu ne mɔɔ lumua la kenga kɛ: “Anwomanyunlu menli [anzɛɛ, “nɔhalɛ Nyamenle ne amra,” NW] bie nwunle kɛ menli amra mraalɛ ne mɔ anwo yɛ fɛ; yemɔti bɛvale mɔɔ bɛdabɛ bɛkulo la bɛgyale bɛ.”—Mɔl. 6:2.

Wɔ Hibulu Ngɛlɛlera ne anu, edwɛkɛ “nɔhalɛ Nyamenle ne amra” nee “Nyamenle amra” finde Mɔlebɛbo 6:2, 4; Dwobu 1:6; 2:1; 38:7; yɛɛ Edwɛndolɛ 89:6. Duzu a ngɛlɛlera ɛhye mɔ ka ye wɔ “Nyamenle amra” ɛhye mɔ anwo a?

‘Nyamenle amra’ ne mɔɔ bɛ nwo edwɛkɛ wɔ Dwobu 1:6 la a le sunsum nu abɔdeɛ ne mɔ mɔɔ yiale nu wɔ Nyamenle anyunlu la. Seetan mɔɔ ɛnee ‘wɔ akpɔsa nu wɔ aleɛabo la,’ boka bɛ nwo. (Dwobu 1:7; 2:1, 2) Yɛkenga ye wɔ Dwobu 38:4-7 la noko kɛ, mekɛ mɔɔ Nyamenle “dole [azɛlɛ] ye mgbɛnezo bolɛ ne” la “Nyamenle amra” ne “vale fɛlɛkolilɛ deɛdeanle nu.” Ɔbayɛ ɔ mra anwumabɔvolɛ ne mɔ ɔluakɛ ɛnee ɔtɛbɔle menli. Yemɔti, “Nyamenle amra” ne mɔ mɔɔ bɛha bɛ nwo edwɛkɛ wɔ Edwɛndolɛ 89:6 (NW) la a le abɔdeɛ mɔɔ bɛwɔ Nyamenle anwo lɔ wɔ anwuma la, tɛ menli ɔ.

Nwane mɔ a le “nɔhalɛ Nyamenle ne amra” mɔɔ bɛha bɛ nwo edwɛkɛ wɔ Mɔlebɛbo 6:2, 4 ne la? Kɛmɔ Baebolo ne anu edwɛkɛ ne kile la, yɛbahola yɛaha kɛ ɔfane Nyamenle amra mɔɔ bɛrale azɛlɛ ye azo la anwo.

Bie mɔ ɛnlie ɛndo nu kɛ anwumabɔvolɛma anye bahola alie nla nwo. Gyisɛse edwɛkɛ mɔɔ wɔ Mateyu 22:30 la kile kɛ agyalɛ nee nla ɛnle anwuma lɔ. Noko mekɛ bie anwumabɔvolɛma hakyile bɛ nwo menli bɛ nee menli lile aleɛ na bɛnlonle. (Mɔl. 18:1-8; 19:1-3) Ɛhye ati, yɛbahola yɛaha kɛ mekɛ mɔɔ bɛhakyile bɛ nwo menli la, ɛnee bɛbahola bɛ nee mraalɛ ala.

Yɛlɛ mɔɔ yɛkola yɛgyinla zo yɛdie yɛdi kɛ anwumabɔvolɛ ne mɔ yɛle zɔ la anwo neazo wɔ Baebolo ne anu. Dwuudu 6, 7 fa ɛtane mɔɔ mrenya mɔɔ ɛnee wɔ Sodɔm yɛle la to “Nyamenle soanvolɛma ne mɔ mɔɔ bɛangola bɛanzie bɛ ti ɛleka ko, na bɛkpole bɛ gyinlabelɛ kpalɛ ne” yɛle la anwo. Ekpunli nwiɔ ne anu biala, anwumabɔvolɛma ne nee Sodɔma “bɔle adwɔmane nee munzule ɛbɛla.” Edwɛkɛ ko ne ala mɔɔ ɔwɔ 1 Pita 3:19, 20 la ka kɛ anwumabɔvolɛ ɛhye mɔ yɛle anzosesebɛ wɔ ‘Nowa mekɛ zo.’ (2 Pita 2:4, 5) Zɔhane ati, bɛkola bɛfa anzosesebɛ ne mɔɔ anwumabɔvolɛ ne mɔ yɛle ye wɔ Nowa mekɛ zo la bɛto ɛtane mɔɔ menli mɔɔ ɛnee wɔ Sodɔm nee Gomɔla yɛle la anwo.

Yemɔti, saa yɛka kɛ “anwomanyunlu menli” anzɛɛ “nɔhalɛ Nyamenle ne amra” mɔɔ bɛha bɛ nwo edwɛkɛ wɔ Mɔlebɛbo 6:2, 4 la a le anwumabɔvolɛ ne mɔ mɔɔ hakyile bɛ nwo menli bɛ nee mraalɛ rabɔle ɛbɛla ɛtane la a, ɛnee ɔle nɔhalɛ.

Ɛzoanvolɛ Pita hilehilele nuhua kɛ sunsum ɛhye mɔ a le “bɛdabɛ mɔɔ bɛyɛle Nyamenle anwo anzosesebɛ wɔ mekɛ mɔɔ ɛnee Nyamenle ɛlɛkendɛ abotane nu ala yeamaa Nowa abobɔ ɛlɛne ne la.” (1 Pita 3:20) Ɔda ali kɛ, ɛnee Pita edwɛkɛ ne fane anwumabɔvolɛma mɔɔ hɔbokale Seetan anwo wɔ ye atuadelɛ ne anu la anwo. Dwuudu hanle anwumabɔvolɛ bie mɔ mɔɔ “bɛangola bɛanzie bɛ ti ɛleka ko, na bɛkpole bɛ gyinlabelɛ kpalɛ ne” mɔɔ Nyamenle “ɛgua bɛ nwɔnzɔnwɔnzɔ mɔɔ bɛnzianyi bɛ ɛlɛ la wɔ awozinli kabikabi ne anu lɔ kɛ bɛhendɛ Ndɛnebualɛ Kenle kpole ne” la anwo edwɛkɛ.—Dwu. 6.

Adenle boni azo a sunsum nu abɔdeɛ bie mɔ yɛle anzosesebɛ wɔ Nowa mekɛ zo a? Kolaa na Azuyilɛ ne ara la, sunsum ɛtane ɛhye mɔ hakyile bɛ nwo menli wɔ mekɛ mɔɔ Nyamenle ambɔ bɛ zɔ la. (Mɔl. 6:2, 4) Bieko, zɔhane anwumabɔvolɛma ne mɔɔ bɛ nee mraalɛ ralale la yɛle mɔɔ bɛnyɛ. Nyamenle ambɔ sunsum nu abɔdeɛ kɛ bɛ nee mraalɛ ɛla. (Mɔl. 5:2) Nyamenle bazɛkye zɛhae anwumabɔvolɛ anzosesebɛ ɛhye mɔ wɔ mekɛ kpalɛ nu. Kɛkala, Dwuudu ka kɛ, bɛwɔ “awozinli kabikabi ne anu”—bɛgua bɛ efiade.

Mekɛ boni yɛɛ kɛzi Gyisɛse hanle edwɛkɛ ne hilele “sunsum nu amra mɔɔ bɛgua bɛ anga la” ɛ? Pita hɛlɛle kɛ ɛhye zile mekɛ mɔɔ “bɛdwazole [Gyisɛse] wɔ sunsum nu” la. (1 Pita 3:18, 19) Yɛ ye nzonlɛ bieko kɛ, Pita hanle kɛ Gyisɛse bɔle “Edwɛkpa ne nolo.” Edwɛkɛkpɔkɛ mɔɔ ɛkpa nwo mɔɔ Pita vale lile gyima la kile kɛ Gyisɛse bɔle nolo ne kolaa na Pita ahɛlɛ ye kɛlata ne mɔɔ lumua la. Yemɔti, ɔzɔho kɛ Gyisɛse ewudwazo ne anzi yɛɛ ɔhanle ndɛnebualɛ mɔɔ fɛta bɛ la anwo edwɛkɛ ɔhilele sunsum ɛtane ne mɔ a. Gyisɛse ambɔ anyelazo nwo nolo biala angile bɛ. Ɛnee ɔle ndɛnebualɛ nwo nolobɔlɛ. (Dwn. 1:1, 2) Suzuamgba ala mɔɔ Gyisɛse ɛla diedi nee nɔhalɛlilɛ ali ɛhɔ ewule nu na bɛdwazo ye la—Abɔnsam ɛnlɛ ɔ nwo zo tumi biala—yemɔti Gyisɛse nyianle debie gyinlanle zo bɔle ndɛnebualɛ ɛhye nolo.—Dwɔn 14:30; 16:8-11.

Kenlebie, Gyisɛse bagua Seetan nee zɔhane anwumabɔvolɛ ne mɔ anga na yeavuandi bɛ yeagua azɛlɛ kuma ne mɔɔ ɛnlɛ ɔ bo la anu. (Luku 8:30, 31; Yek. 20:1-3) Kɔkpula mekɛ zɔhane, sunsum ɛhye mɔ mɔɔ ɛyɛ anzosesebɛ la wɔ sunsum nu awozinli kabikabi nu na bɛ ɛzɛkyelɛ mɔɔ li awieleɛ la bara mɔɔ ɔnrɛli mgba.—Yek. 20:7-10.