Angela, * le adiema raalɛ mɔɔ ɔtɛgyale, yenyia ɛvolɛ 30 nee ekyi, yɛɛ ɔsulo debie ekyii. Ɔlɛkendɛ mgbanyima ne mɔ. Duzu edwɛkɛ a bɛbaha bɛahile ye a? Nɔhalɛ, debiezukoalɛ bie mɔ ɛkpa ɔ ti, noko gyima mɔɔ yeyɛ yemaa menli mɔɔ anye ɛvi wɔ kenle ne anu amuala la, ɛmaa yevɛ kpalɛ. Ye mame anwodolɛ ne anwo adwenleadwenle noko ɛlɛgyegye ye.

Saa ɛlɛkɔ wɔahɔkpɔla Angela a, anrɛɛ kɛzi ɛbamaa sonla ɛhye “mɔɔ ɛvɛ la” anwosesebɛ ɛ? (Gyɛ. 31:25) Mɔɔ lumua la, anrɛɛ kɛzi ɛbaziezie ɛ nwo wɔamaa wɔ ɛkpɔlalɛ ne ayɛ mɔɔ ɔmaa anwosesebɛ ɛ?

Ɔdwu mekɛ ne bie a, ɔlua yɛ gyima anzɛɛ teokelase ɛzonlelilɛ ti, yɛfɛ. Kɛ neazo la, mekɛ mɔɔ bɛyele ɛnyelɛzodeɛnwunlɛ bie bɛhilele ngapezonli Daneɛle na ɔnde ɔ bo la, ɔ ‘nwo bubule ye.’ (Dan. 8:27) Mɔɔ anwumabɔvolɛ Geebeleɛle yele ɔ nwo hilele ye la ɔboale ye. Nyamenle soanvolɛ bie manle Daneɛle nyianle ndelebɛbo, na ɔzile ye adua kɛ Gyihova ɛdie ye modolɛ nzɛlɛle ne, na ‘ɔkulo ye kpole.’ (Dan. 9:21-23) Nzinlii, edwɛkɛ kɛnlɛma bie mɔɔ anwumabɔvolɛ gyɛne hanle la manle ngapezonli ne mɔɔ anwo ɛbubu ye la anwosesebɛ.—Dan. 10:19.

 Yemɔti, kolaa na wɔahɔkpɔla adiema bie mɔɔ yevɛ anzɛɛ ɔ sa nu ɛdo la, dumua suzu ye tɛnlabelɛ ne anwo. Duzu ngyegyelɛ a ɔwɔ nu a? Kɛzi ngyegyelɛ ne ɛlɛte ye ɛbolɛ ɛ? Subane kpalɛ boni a ɔda ye ali a? Richard, kpanyinli bie mɔɔ ɛva ɛvolɛ 20 ɛzonle la ka kɛ, “Memaa anwosesebɛ mɔɔ mefa meamaa me mediema la anwo kyia me.” Ɔhanle ɔzɔle zo kɛ, “Saa ɛsuzu bɛ tɛnlabelɛ ne anwo kolaa na wɔahɔ bɛ ɛkɛ a, ɔnyɛ se kɛ ɛbanwu ndenle mɔɔ ɛfa zo a, wɔ anwosesebɛmanlɛ ne bɛali bɛ ngyianlɛ nwo gyima la.” Saa ɛ nee adiema kpanyinli gyɛne a bɛahɔ a, duzu ati a bɛmbɔ nu bɛnzuzu bɛ diema ne anwo a?

Ɛbalie wɔado nu kɛ ɔyɛ se kɛ awie baha ye edwɛkɛ. Ndonwo ɛne: Ɔyɛ se ɔmaa ɛ diema kɛ ɔ nee mgbanyima mɔɔ ɛra ye ɛkpɔlalɛ la bali adwelie. Duzu a ɛbayɛ na yeahola yeadendɛ a? Saa ɛfi ahonle nu ɛsele, na ɛka edwɛkɛ kpalɛ ɛkile ye a ɔbaboa. Michael mɔɔ ɛva ɛvolɛ mɔɔ bo 40 ɛzonle kɛ kpanyinli la kɔkpɔla awie a, ɔta ɔbɔ ye edwɛkɛ ne abo kɛ: “Ɛze ɔ, nwolɛ adenle ngɛnlɛma mɔɔ kpanyinli lɛ la anu ko a le kɛ, ɔbahɔkpɔla ɔ mediema wɔ bɛ azua nu amaa yeanwu bɛ kpalɛ. Yemɔti, ɛnee me nye la yɛ ɛkpɔlalɛ ɛhye ade.”

Ɛbahola wɔavi ahonle nu wɔayɛ asɔne wɔava wɔabɔ ɛkpɔlalɛ ne abo. Pɔɔlo hanle ɔ mediema diedi, ɛlɔlɛ, nee bɛ kpundiigyinlanlɛ nwo edwɛkɛ wɔ ye nzɛlɛlɛ nu. (1 Tɛs. 1:2, 3) Saa ɛka kɛzi ɛte nganeɛ wɔ subane kpalɛ mɔɔ ɛ diema ne lɛ la anwo edwɛkɛ a, ɛnee ɛlɛsiezie wɔ ahonle nee ye ɛdeɛ ne wɔamaa adawu kpalɛ ɛbɔlɛ. Edwɛkɛ mɔɔ ɛbaha la noko bahola amaa bɛ ahonle adɔ bɛ azule nu. Ray, kpanyinli bie mɔɔ ɔlɛ anwubielɛ la ka kɛ, “Ɔdwu mekɛ ne bie a yɛ kɔsɔɔti yɛ rɛle fi debie kpalɛ mɔɔ yɛlɛyɛ la. Yemɔti saa awie kakye yɛ a, ɔmaa yɛ nye die.”

Kɛmɔ Pɔɔlo yɛle la, ɛbahola wɔalua Ngɛlɛlera ne anu ngyɛnu ko pɛ bɔbɔ azo wɔava  “sunsum nu ahyɛlɛdeɛ” wɔamaa. (Wulo. 1:11) Kɛ neazo la, bie a adiema bie mɔɔ asa nu ɛdo la bade nganeɛ kɛ nvasoɛ ɛnle ɔ nwo zo kɛ edwɛndolɛnli ne mɔɔ vale ɔ nwo dole ‘nwoma kodoku mɔɔ henda esike nu’ anwo la. (Edw. 119:83, 176) Mekɛ mɔɔ wɔhilehile zɔhane edwɛkɛ ne anu sikalɛ wɔwie la, ɛbahola wɔamaa ɛ diema ne anwu kɛ ɛlɛ anwodozo kɛ ɔ rɛle ‘ɛtɛfile’ Nyamenle mɛla ne mɔ.

Asoo ɛrɛlɛ ne mɔɔ fane dwɛtɛ fufule ne mɔɔ ɔminlinle anwo la ɛnrɛha adiema raalɛ bie mɔɔ ɛhwe ɔ nwo ɛvi asafo ne anwo anzɛɛ yeyɛ bɛtɛɛ la? (Luku 15:8-10) Ɔbayɛ kɛ ezukoa ne mɔɔ minlinle la boka dwɛtɛ fufule dɔɔnwo ne mɔɔ bɛvale bɛyɛle ndweabane ne mɔɔ sonle bolɛ la anwo. Ɛbahola wɔalua zɔhane ɛrɛlɛ ne mɔɔ ɛ nee ye bazuzu nwo la azo wɔamaa yeanwu kɛ ɔboka Keleseɛnema asafo ne anwo. Mekɛ mɔɔ bɛzuzu nwo bɛwie la, ɛbahola wɔazi kɛzi Gyihova dwenle ɔ nwo kɛ ye mboane ngyikyi ne mɔ anu ko la azo.

Yɛ mediema ne mɔ anye die nwo kɛ bɛbahile bɛ adwenle wɔ Baebolo nu edwɛkɛ bie anwo. Yemɔti, ɛ ngomekye mmatendɛ! Ɛkenga ngyɛnu bie mɔɔ fane bɛ tɛnlabelɛ ne anwo la ɛwie a, ɛbahola wɔava edwɛkɛkpɔkɛ anzɛɛ ɛdendɛfoa bie na wɔamaa bɛahile bɛ adwenle wɔ nwo. Kɛ neazo la, saa kpanyinli bie kenga 2 Kɔlentema 4:16 wie a, ɔbahola yeabiza kɛ, “Asoo wɔde nganeɛ ɛlɛ kɛ Gyihova ɛmaa wɔ anwosesebɛ fofolɛ ɔ?” Saa yɛfa adenle ɛhye azo a, yɛbahola ‘yɛamaa yɛ nwo anwosesebɛ.’—Wulo. 1:12.

Eza ɛbahola wɔamaa ɛ gɔnwo diedinli bie ahonle adɔ ye azule nu, ɔlua Baebolo ne anu sonla bie mɔɔ ye tɛnlabelɛ ne le kɛ ye ɛdeɛ ne mɔɔ ɛ nee ye bazuzu ɔ nwo la azo. Awie mɔɔ arɛle ɛbɔ la edwɛkɛ le kɛ Hana anzɛɛ Ɛpafulodaetɛse mɔɔ bɛ rɛle bɔle mekɛ bie anu, noko ɛnee bɛsonle bolɛ wɔ Nyamenle anye zo la. (1 Sam. 1:9-11, 20; Fel. 2:25-30) Saa ɔbayɛ boɛ a, kɛmɔti a ɛ nee ye ɛnzuzu neazo ngɛnlɛma mɔɔ wɔ Baebolo ne anu la bie anwo a?

Saa ɛtoa zo ɛkpɔla ɛ mediema a, ɔbahile kɛ ɛ nye die bɛ nwo. (Gyi. 15:36) Mekɛ mɔɔ ɛlɛfa wɔ ɛkpɔlalɛ ne wɔara ye awieleɛ la, ɛbahola ɛ nee ye ayɛ daselɛlilɛ nwo ngyehyɛleɛ. Saa Bernard, adiema kpanyinli bie mɔɔ ɔlɛ anwubielɛ la yia adiema mɔɔ yehɔkpɔla ye kenlensa ye la a, ɔfa nrɛlɛbɛ adenle zo ɔtwe ye adwenle ɔkɔ folɛ ne mɔɔ ɔdule ye la azo na ɔbiza ye kɛ, “Kɛzi ninyɛne ɛlɛkɔ ye ɛ, ka kile me?” Saa ɛkile ɔ nwo anyelielɛ wɔ adenle ɛhye azo a, yɛɛ ɛbahola wɔanwu ye saa ɔbahyia moalɛ bieko a.

Mɔɔ tɛla ɛhye la, ɔhyia kɛ yɛ mediema ne mɔ te nganeɛ kɛ yɛdwenle bɛ nwo, yɛte bɛ edwɛkɛ bo, yɛɛ yɛkulo bɛ. (1 Tɛs. 5:11) Ɔlua ɛhye ati, kolaa na wɔahɔkpɔla awie la, nyia mekɛ suzu ɛ diema ne tɛnlabelɛ ne anwo. Yɛ nwolɛ asɔne. Kpa ngɛlɛlera mɔɔ fɛta. Na ɛbanwu edwɛkɛ mɔɔ fɛta mɔɔ ɛbava wɔamaa “mɔɔ ɛvɛ la” anwosesebɛ!