BAEBOLO ne ka kɛ: “Nea, mralɛ mrenya le agyadeɛ mɔɔ vi [Gyihova] ɛkɛ a; awolɛ le nyilalɛ.” (Edw. 127:3) Ɔnyɛ nwanwane kɛ Keleseɛne awovolɛ anye die kpole wɔ mekɛ mɔɔ bɛkɛwo fofolɛ la a.

Anyelielɛ ɛhye nee ɛzonlelilɛ mɔɔ anyebolo wɔ nu la a lua a. Saa kakula banyi kɛnlɛma a, ɔhyia aleɛ kpalɛ. Saa kakula bahola azonle Gyihova nɔhalɛ nu a, ɔhyia sunsum nu aleɛ nee awovolɛ mɔɔ bɛbabɔ mɔdenle bɛahilehile ye Nyamenle ngyinlazo ne mɔ la. (Mrɛ. 1:8) Mekɛ boni a ɔwɔ kɛ bɛbɔ ndetelɛ ɛhye abo a, na duzu a ɔwɔ kɛ bɛkilehile ye a?

Maa yɛva Manowa mɔɔ ɛnee vi Dan abusua ekpunli nu, na ɔdɛnlanle aze wɔ Zɔla, mɔɔ wɔ tete Yizilayɛ la kɛ neazo. Gyihova anwumabɔvolɛ zele Manowa aye mota ne kɛ ɔbawo ralɛ nrenya. (Maa. 13:2, 3) Manowa nee ɔ ye anye liele edwɛkɛ ne anwo. Noko, ɛnee ninyɛne bie mɔ gyegye bɛ. Yemɔti Manowa zɛlɛle kɛ: “O [Gyihova], mesɛlɛ wɔ, maa Nyamenle sonla ne mɔɔ ɛzoanle ye la ɛrɛla bieko, na ɔrahile yɛ kɛ yɛzi yɛyɛ kakula ne mɔɔ bɛbawo ye la.” (Maa. 13:8) Ɛnee Manowa nee ɔ ye dwenle bɛ ra ne ɛtetelɛ nwo kpalɛ. Ɔda ali kɛ bɛvale Nyamenle mɛla ne bɛhilehilele bɛ ra nrenya Samesɛn manle zolɛ rale nvasoɛ. Baebolo ne ka kɛ, ‘Gyihova sunsum ne manle Samesɛn anwosesebɛ.’ Yemɔti, Samesɛn yɛle nwanwane ninyɛne dɔɔnwo wɔ mekɛ mɔɔ ɛnee ɔle Yizilayɛ ndɛnebuavolɛ la.—Maa. 13:25; 14:5, 6; 15:14, 15.

Mekɛ boni a ɔle kpalɛ kɛ bɛbɔ kakula ɛtetelɛ bo a? Temɔte ɔ nla Loyese nee ɔ nli Yunaesi vale “Nyamenle Edwɛkɛ ne” tetele ye ‘sumunli ye ngakula nu.’ (2 Tem. 1:5; 3:15) Ɛhɛe, bɛvale Ngɛlɛlera ne bɛtetele Temɔte wɔ ye ngakula nu.

Nrɛlɛbɛ wɔ nu kɛ Keleseɛne awovolɛ bɛava nzɛlɛlɛ akpondɛ adehilelɛ mɔɔ bɛbava bɛatete bɛ mra bɛavi ‘bɛ ngakula nu’ la. Mrɛlɛbulɛ 21:5 ka kɛ: “Sonla mɔɔ anye bolo ye gyima nwo la adwenle ngyehyɛlɛ maa ɔnyia aleɛ dɔɔnwo.” Kolaa na bɛawo kakula la, awovolɛ dumua siezie bɛ nwo. Bie a bɛyɛ ninyɛne mɔɔ bɛbahyia nwo la anwo kɛlɛtokɛ. Ɔhyia kɛ bɛyɛ sunsum nu ninyɛne noko anwo ngyehyɛleɛ. Ɔwɔ kɛ ɔyɛ bɛ bodane kɛ bɛbatete kakula ne wɔ ye adɔma nu.

Early Childhood Counts—A Programming Guide on Early Childhood Care for Development buluku ne ka kɛ: “Siane mɔɔ lumua wɔ adɔma awolɛ nzi la anwo hyia kpalɛ wɔ ye adwenle ne gyimayɛlɛ nu. Wɔ zɔhane mekɛ ne, ninyɛne mɔɔ boa maa ye adwenle ne kola kye debie la yɛ gyima ndɛndɛ mɔnwo abulanwiɔ.” Nea kɛzi ɔbayɛ kpalɛ kɛ awovolɛ bava sunsum nu ninyɛne alua bɛ adwenle nu wɔ zɔhane mekɛ ne a!

Ninli bie mɔɔ le adekpakyelɛnli la ka kɛ: “Ɔnyianle siane ko ala la yɛɛ membɔle ɔ bo kɛ me nee ye kɔ daselɛlilɛ a. Ɔnva nwo kɛ ɛnee ɔnde mɔɔ ɛlɛkɔ zo abo la, medie medi kɛ mɔɔ menyɛle la nyianle ɔ nwo zo tumi. Mekɛ mɔɔ ɔnyianle ɛvolɛ nwiɔ la, ɛnee ɔkola ɔfa anwodozo ɔmaa telate wɔ daselɛlilɛ nu.”

Nvasoɛ wɔ ngakula mɔɔ bɛtete bɛ ndɛ la azo. Noko, awovolɛ ze kɛ ɔnla aze kɛ bɛbava sunsum nu adehilelɛ bɛahilehile bɛ mra wɔ bɛ ngakula nu.

Ngakula ɛngola ɛleka ko tɛnla na ɛhye kola gyegye bɛ awovolɛ kpalɛ. Bɛkulo kɛ bɛnwu ninyɛne mɔɔ ɛbɔ bɛ ɛyia la na bɛsukoa yemɔti bɛnva bɛ adwenle bɛnzie debie ko azo bɛngyɛ. Ɛhye le ngyegyelɛ maa awovolɛ. Duzu a bɛbahola bɛayɛ na bɛ mra anyia bɛ ngilehilelɛ zo nvasoɛ a?

Suzu mɔɔ Mosisi hanle la anwo. Mɛla ne 6:6, 7 ka kɛ: “Bɛmaa mɛla ɛhye mɔɔ melɛfa meamaa bɛ la ɛdɛnla bɛ ahonle nu, na bɛva bɛhilehile bɛ mra kpalɛ kpalɛ. Bɛwɔ bɛ awuke ne mɔ anu a, bɛdwenledwenle nwolɛ, yɛɛ saa bɛlua adenle zo o, bɛla o, bɛdwazo o, bɛyɛ ye zɔhane.” Edwɛkɛ mɔɔ bɛhile ɔ bo ‘kilehile’ la eza kile kɛ ɛti edwɛkɛ nu fane dɔɔnwo. Kakula ekyii le kɛ baka mɔɔ bɛlua la, ɔhyia nzule dahuu amaa yeayɛ kpalɛ. Zɔhane ala a edwɛkɛ mɔɔ bɛti nu la kola boa mgbanyinli nee ngakula ɔmaa bɛkakye ninyɛne mɔɔ anwo hyia la a!

Ɔwɔ kɛ awovolɛ nyia mekɛ maa bɛ mra amaa bɛahola bɛhilehile bɛ Nyamenle anwo nɔhalɛ ne. Ɛhye ɛyɛlɛ ɛnla aze wɔ ewiade ɛhye mɔɔ alagye ɛnle nu la anu. Noko ɛzoanvolɛ Pɔɔlo hanle kɛ bɛdɔ “mekɛ biala mɔɔ bɛkɛnyia” la bɛyɛ ninyɛne mɔɔ anwo hyia la. (Kɔl. 4:5b) Kɛ ɔkɛyɛ na bɛayɛ ɛhye ɛ? Asafo nu kpanyinli bie mɔɔ ɔ ye le adekpakyelɛnli la nwunle kɛ ɔnla aze kɛ ɛbanyia mekɛ wɔatete ɛ ra, wɔayɛ asafo nu gyima, nee wɔ nwonane afoa nu gyima. Kɛ ɔyɛle mɔɔ bɛnyianle mekɛ bɛtetele bɛ ra raalɛ ne ɛ? Selɛ ne ka kɛ: “Nwonlomɔ biala, kolaa na meahɔ  gyima la, me nee me ye kenga Me Buluku Mɔɔ Ɔka Baebolo nu Edwɛkɛ anzɛɛ Neɛnlea Ngɛlɛlera Ne Anu Dahuu buluku ne anu edwɛkɛ yɛkile ye. Nɔsolɛ noko, yɛkenga debie yɛkile ye kolaa na yeala, yɛɛ saa yɛlɛkɔ daselɛlilɛ a yɛ nee ye kɔ. Yɛngulo kɛ ninyɛne ɛhye mɔ kpa ɔ ti wɔ ye ɛvolɛ mɔɔ lumua la anu.”

Yɛkulo kɛ yɛ mra nyi bayɛ mgbanyima kpalɛ. Noko akee, yɛ bodane titile a le kɛ yɛbava Nyamenle anwo ɛlɔlɛ yɛawula bɛ ahonle nu.—Maake 12:28-30.

Edwɛndolɛ 127:4 ka kɛ: “Mgbavolɛ nu mralɛ mrenya ɛnyialɛ le kɛ ɛda mbaka wɔ ɛlɔnenli asa anu.” Bɛfa ngakula bɛtoto ɛda mbaka mɔɔ ɛdatovolɛ to maa ɔdwu ye bodane nwo la anwo. Ɛdatovolɛ ɛnrɛhola ɛnrɛziane ɛda baka mɔɔ yedo la. Awovolɛ lɛ bɛ mra mɔɔ bɛle kɛ “ɛda mbaka” la wɔ bɛ sa nu mekɛ ekyi bie ala. Ɔwɔ kɛ bɛfa Nyamenle ngyinlazo ne mɔ bɛdua bɛ mra adwenle nee bɛ ahonle nu wɔ mekɛ ɛhye anu.

Mɔɔ fane ye sunsum nu mralɛ nwo la, ɛzoanvolɛ Dwɔn hanle kɛ: “Debie biala ɛnyɛ me anyelielɛ ɛndɛla kɛ menwɔde kɛ me mra ne mɔ lua nɔhalɛ adenle ne anu a.” (3 Dwɔn 4) Saa Keleseɛne awovolɛ nwu kɛ bɛ mra “lua nɔhalɛ adenle ne anu a,” bɛdabɛ noko bɛ nye bɛalie.