Nwolɛ ɛngyia kɛ yɛkɛmaa ɛleka mɔɔ awie mɔɔ bɛdu ye badɛnla ye wɔ Belemgbunlililɛ Asalo la anwo kyia yɛ. Ɛzinzalɛ Arane magazine ne ɛmaa Keleseɛne awovolɛ anwosesebɛ kɛ saa ɔkɛyɛ boɛ a, bɛboa bɛ ra mɔɔ bɛdu ye mɔɔ ɔ nee bɛ de la. Ɔwɔ November 15, 1988, Watchtower ne mukelɛ 19 nee 20 bɔbɔ kɛ, awovolɛ bahola nee bɛ ra ekyi mɔɔ ɔ nee bɛ de mɔɔ bɛdu ye la azukoa Baebolo ne. Yɛ nye la kɛ yemɔ bamaa kakula ne ayɛ nzenzaleɛ.

Saa bɛwɔ Belemgbunlililɛ Asalo a, ɔbayɛ kpalɛ kɛ kakula mɔɔ bɛdu ye la noko badɛnla ye awovolɛ anwo ɛkɛ ne koonwu. Kɛmɔ ɔnle mɛla kɛ awie mɔɔ bɛdu ye la ɔwɔ kɛ tɛnla bɛ nzi la ati, ɛtane biala ɛnle nwolɛ kɛ ɔbadɛnla ye awovolɛ anwo ɛkɛ wɔ ɛleka biala mɔɔ bɛkɛdɛnla la. Saa awovolɛ ɛlɛboa bɛ ra sunsum nu a, bɛkulo kɛ ɔnyia debiezukoalɛ mɔɔ ɔkɔ la azo nvasoɛ. Wɔ mekɛ zɛhae anu, saa bɛmaa kakula ne tɛnla bɛ nwo ɛkɛ a ɔle kpalɛ ɔtɛla kɛ bɛbagyakyi ye bɛamaa ɔ ngome yeadɛnla la.

Na saa kakula ne mɔɔ bɛdu ye la nee ye awovolɛ ɛnde bieko ɛ? Asoo ɛhye kakyi edwɛkɛ ne anye? Magazine ɛhye bie ɛhile mɔɔ ɔwɔ kɛ Keleseɛnenli bɔ mɔdenle yɛ wɔ kɛzi bɛ nee busuanli mɔɔ bɛdu ye mɔɔ ɔnde bɛ nwo tu la anu wienyi. * Kakula mɔɔ bɛdu ye mɔɔ bɛmaa yeadɛnla bɛ nwo ɛkɛ ne koonwu wɔ debiezukoalɛ bo la le ngakyile fi adenle mɔɔ bɛkpondɛ bɛ nee ye adu la anwo. Saa abusua ne anu amra mɔɔ bɛwɔ nɔhalɛ ne anu la nee busuanli ne mɔɔ bɛdu ye la dua kɛmɔ adehilelɛ ne mɔɔ ɔwɔ Ngɛlɛlera ne anu la kile la a, ɔnrɛgyegye awie biala.—1 Kɔl. 5:11, 13; 2 Dwɔn 11.

Saa awie mɔɔ bɛdu ye la nee ye busuanli anzɛɛ awie mɔɔ ɔnle ye busuanli tɛnla na yeanyɛ basabasa biala a, ɔnle kɛ ɔgyegye awie biala. Bɛdi mɛla wɔ ɛleka mɔɔ ɔwɔ kɛ awie tɛnla la anwo a ɔbahola yeava ngyegyelɛ yeara. Saa menli mɔɔ wɔ ɛkɛ la kɔsɔɔti, mɔɔ ye abusua ne anu amra mɔɔ bɛwɔ nɔhalɛ ne anu boka nwo la, bɔ mɔdenle di Baebolo nu ngyinlazo mɔɔ fane awie mɔɔ bɛdu ye anwo la azo, na ɔmmaa mediema ne mɔ ɛndu koti a, ɔnle kɛ bɛmaa ɛleka mɔɔ bɛtɛnla ye wɔ Keleseɛnema ayia bo la yɛ ngyegyelɛ. *