1, 2. Ɛ nye die kpɔkɛzilɛ nwo ɔ, na kɛzi ɛte nganeɛ wɔ kpɔkɛ bie mɔ mɔɔ wɔzi la anwo ɛ?

ALEHYENLƐ biala, yɛnyia nwolɛ adenle yɛsi kpɔkɛ! Kɛzi ɛte nganeɛ wɔ kpɔkɛ mɔɔ ɔwɔ kɛ ɛsi la anwo ɛ? Bie mɔ anwo yɛ ndɛ si kpɔkɛ. Bɛsuzu kɛ bɛlɛ adenle bɛsi bɛ kpɔkɛ, yemɔti bɛngulo kɛ awie si kpɔkɛ maa bɛ. Bie mɔ noko sulo kpɔkɛzilɛ. Yɛɛ bie mɔ sɛkye ezukoa dɔɔnwo wɔ mbuluku nee folɛtuvoma ɛkɛ amaa bɛanyia moalɛ mɔɔ bɛsuzu kɛ bɛhyia na bɛazi kpɔkɛ la.

² Yɛ nuhua dɔɔnwo ze kɛ ninyɛne bie mɔ wɔ ɛkɛ mɔɔ yɛnlɛ adenle yɛnzi nwolɛ kpɔkɛ ɛdeɛ, noko bie mɔ wɔ ɛkɛ mɔɔ yɛkola yɛsi nwolɛ kpɔkɛ wɔ yɛ ɛbɛlabɔlɛ nu a. (Gal. 6:5) Yemɔ bɔbɔ, yɛbahola yɛalie yɛado nu kɛ tɛ kpɔkɛzilɛ ne kɔsɔɔti a nwolɛ hyia anzɛɛ nvasoɛ wɔ zo a.

3. Adehilelɛ boni a yɛlɛ ye wɔ kpɔkɛzilɛ nwo a, noko ngyegyelɛ boni a wɔ ɛkɛ a?

³ Kɛ Gyihova azonvolɛ la, yɛdi fɛlɛko kɛ yemaa yɛ adehilelɛ mɔɔ anu la ɛkɛ mɔɔ maa yɛnwu mɔɔ ɔwɔ kɛ yɛyɛ ye wɔ ninyɛne mɔɔ anwo hyia la anwo a. Yɛze kɛ saa yɛdi adehilelɛ zɛhae mɔ azo a, yɛbahola yɛazi kpɔkɛ mɔɔ baboa yɛ na yeazɔ Gyihova anye la. Noko akee, bie a edwɛkɛ bie bado yɛ anzɛɛ yɛbahɔ tɛnlabelɛ bie anu mɔɔ nwolɛ edwɛkɛ fɔɔnwo ɛnle Baebolo ne anu a. Kɛ ɔkɛyɛ na yɛazi mɔɔ ɔwɔ kɛ yɛyɛ la anwo kpɔkɛ ɛ? Kɛ neazo la, yɛze kɛ ɔnle kɛ yɛwua. (Ɛfɛ. 4:28) Noko duzu a le awule? Asoo deɛ ne mɔɔ ahenle vale la bolɛ mɔɔ ɔsonle, deɛmɔti ɔvale, anzɛɛ debie gyɛne a kile a? Saa bie mɔ ka kɛ adehilelɛ kpɔkyee bie ɛnle mɔɔ ɔwɔ kɛ yɛyɛ la anwo a, kɛ ɔkɛyɛ na yɛazi kpɔkɛ ɛ? Duzu a baboa yɛ a?

4. Saa yɛkpondɛ kɛ yɛsi kpɔkɛ bie a, folɛ boni a awie bahola adu yɛ a?

⁴ Mekɛ mɔɔ yɛkpondɛ kɛ yɛsi kpɔkɛ bie mɔɔ anwo hyia la, yɛ gɔnwo Keleseɛnenli bahola aha kɛ yɛva  adwenle mɔɔ anu la ɛkɛ la yɛzi. Nɔhalɛ, ɛhye le folɛdulɛ kpalɛ. Baebolo ne bɔ yɛ kɔkɔ kɛ: “Sonla mɔɔ pe yɛ debie la ɛnnyia ɛhwee.” (Mrɛ. 21:5) Noko adwenle mɔɔ anu la ɛkɛ la kile duzu? Asoo mɔɔ ɔkile la ala a le kɛ yɛbanyia mekɛ yɛadwenle edwɛkɛ nwo kpalɛ, na yɛala ndelebɛbo nee adwenle kpalɛ ali ɔ? Ɛhye mɔ amuala boa ma yɛsi kpɔkɛ kpalɛ, noko adwenle mɔɔ anu la ɛkɛ la kile ninyɛne dɔɔnwo.—Wulo. 12:3; 1 Pita 3:21.

5. Kɛmɔti a yɛnlɛ adwenle mɔɔ anu la ɛkɛ bɔkɔɔ ɛ?

⁵ Ɔwɔ kɛ yɛdie yɛto nu kɛ yɛ nuhua biala ɛnle ɛkɛ mɔɔ ɔlɛ adwenle mɔɔ anu la ɛkɛ bɔkɔɔ a. Kɛmɔti ɛ? Ɔboalekɛ bɛwole yɛ kɔsɔɔti ɛtane nu yɛɛ yɛtɔ sinli yemɔti yɛnlɛ sonlabaka anzɛɛ adwenle mɔɔ di munli bɔkɔɔ la. (Edw. 51:5; Wulo. 3: 23) Bieko, mekɛ bie mɔɔ ɛze ɛhɔ la ɛnee yɛboka bɛdabɛ mɔɔ Seetan ‘zinle’ bɛ adwenle ne anye la anwo; ɛnee yɛnze Gyihova nee ye tenlene ngyinlazo ne mɔ anwo ɛhwee. (2 Kɔl. 4:4; Tae. 3:3) Ɔlua ɛhye ati, saa mɔɔ ɛnee yɛte nganeɛ kɛ ɔle kpalɛ na ndelebɛbo wɔ nu la ala a yɛgyinlanle zo yɛzile kpɔkɛ a, ɛnee yɛbɛlɛbɛlale yɛ nwo, ɔnva nwo kɛzi yɛzuzule nwolɛ la.—Mrɛ. 14:12.

6. Kɛ ɔkɛyɛ na yɛanyia adwenle mɔɔ anu la ɛkɛ ɛ?

⁶ Ɔwɔ nuhua kɛ yɛnli munli yɛɛ yɛnlɛ adwenle mɔɔ anu la ɛkɛ bɔkɔɔ la ɛdeɛ, noko Gyihova, yɛ anwuma Selɛ ne di munli wɔ debie biala anu. (Mɛla 32:4) Ɔyɛ anyelielɛ kɛ yeyɛ ngyehyɛleɛ mɔɔ yɛbahola yɛalua zo yɛahakyi yɛ adwenle bɔkɔɔ na yɛanyia adwenle mɔɔ anu la ɛkɛ a. (Bɛgenga 2 Kɔlentema 5:13.) Kɛ Keleseɛnema la, yɛkulo kɛ yɛdwenle ninyɛne nwo na yɛyɛ yɛ debie nrɛlɛbɛ nu kɛmɔ ɔfɛta la. Ɔwɔ kɛ yɛnea yɛ nzuzulɛ nee yɛ nganeɛdelɛ boɛ, na yɛsukoa kɛzi Gyihova dwenle, ɔte nganeɛ, na ɔyɛ ye ninyɛne la.

7, 8. Ka kɛzi awie bahola azi kpɔkɛ kpalɛ ɔnva nwo kɛ bɛbagyegye ye anzɛɛ ɔwɔ anwongyelelɛ nu la anwo anwubielɛ.

⁷ Suzu neazo ɛhye anwo. Yerayɛ nyɛvolɛ dɔɔnwo subane kɛ saa bɛwo a bɛfa bɛ mra bɛnwa bɛ awovolɛ wɔ bɛ maanle nu bɛmaa bɛtete bɛ amaa bɛahola bɛayɛ gyima bɛanyia ezukoa. Raalɛ bie mɔɔ ɛdu ɛhɔ maanle fofolɛ nu la wole kakula nrenya anwofɛlɛko bie. Mekɛ zɔhane ɔbɔle ɔ bo kɛ ɔsukoa Baebolo ne na ɔnyianle sunsum nu anyuhɔlɛ. Agɔnwolɛma nee mbusuafoɔ gyegyele ye kɛ ɔva kakula ne ɔhɔmaa ye awovolɛ wɔ ye sua zo. * Noko akee, wɔ debiezukoalɛ ne anu yelɛ ne nwunle kɛ ɔle ɛzonlelilɛ wɔ Nyamenle anyunlu kɛ awovolɛ batete bɛ ra. (Edw. 127:3; Ɛfɛ. 6:4) Asoo ɔbali amaamuo mɔɔ menli dɔɔnwo bu ye kɛ yemɔ a le kpalɛ la azo ɔ? Anzɛɛ ɔbava mɔɔ ɔlɛsukoa ye wɔ Baebolo ne anu la yeayɛ gyima na yeagyinla ezukoa nee tendɛtia nwo ngyegyelɛ mɔɔ ɔlɛyia la anloa ɔ? Saa ɛdawɔ a anrɛɛ duzu a ɛbayɛ a?

⁸ Mekɛ mɔɔ bɛlɛra ne dele nganeɛ kɛ bɛlɛgyegye ye na ɔ rɛle ɛbɔ la, ɔhanle ye ahonle nu edwɛkɛ ɔhilele Gyihova, ɔkpondɛle adehilelɛ ɔvile ye ɛkɛ. Mekɛ mɔɔ ɔhanle ye tɛnlabelɛ ne anwo edwɛkɛ ɔhilele ye Baebolo kilehilevolɛ ne nee menli mɔɔ wɔ asafo ne anu la, akee ɔnwunle Gyihova adwenle wɔ edwɛkɛ ne anwo. Eza ɔzuzule nganeɛdelɛ nu ngyegyelɛ mɔɔ saa kakula ne fi bɛ nwo na ɔlɛnyi a ɔbahɔ nu la anwo. Mɔɔ ɔgyinlanle Ngɛlɛlera ne azo ɔzuzule edwɛkɛ ne anwo la, ɔhanle kɛ ɔnle kpalɛ kɛ ɔbava kakula ne yeahɔ. Ɔ hu nwunle kɛzi mediema ne mɔ yɛle bɛ moalɛ nee kɛzi kakula ne anye die na ɔlɛnyi kɛnlɛma la. Ɔmanle bɛ nee ye zukoale Baebolo ne na ɔbɔle ɔ bo ɔ nee ɔ ye hɔle debiezukoalɛ.

9, 10. Duzu a adwenle mɔɔ anu la ɛkɛ mɔɔ yɛfa yɛazi kpɔkɛ la kile a, na kɛzi yɛbayɛ ye ɛ?

 ⁹ Ɛhye le neazo ko ala, noko ɔmaa yɛnwu kɛ adwenle mɔɔ anu la ɛkɛ la ɛngile kɛ yɛbayɛ mɔɔ awie mɔ dwenle anzɛɛ te nganeɛ kɛ ndelebɛbo wɔ nu anzɛɛ ɔle kpalɛ la bie. Yɛ adwenle nee yɛ ahonle ne mɔɔ bɛnli munli la bahola ayɛ kɛ wate mɔɔ kɔ ndɛndɛ anzɛɛ bɛtɛɛ somaa la. Saa yɛtoa ye a, ɔkola ɔmaa yɛkɔ ngyegyelɛ kpole nu. (Gyɛ. 17:9) Ɔwɔ kɛ yɛdua Nyamenle ngyinlazo ne mɔ azo yɛyɛ nzenzaleɛ wɔ yɛ adwenle nee yɛ ahonle nu.—Bɛgenga Ayezaya 55:8, 9.

¹⁰ Baebolo ne tu folɛ kɛ: “Yeye wɔ ahonle nu fa ɛ rɛle wula [Gyihova] anu, mmafa wɔ adwenle ɛsɔ ɛ ngome wɔ nrɛlɛbɛ. Nwu Nyamenle wɔ wɔ ɛbɛlabɔlɛ muala anu, na ɔbamaa wɔ ndenle adenrɛ fɔɔnwo amaa wɔ.” (Mrɛ. 3:5, 6) Yɛ edwɛkɛ “mmafa wɔ adwenle ɛsɔ ɛ ngome wɔ nrɛlɛbɛ” nzonlɛ. Ɔtoa zo kɛ “nwu [Gyihova] wɔ wɔ ɛbɛlabɔlɛ muala anu.” Yemɔ a ɔle Awie mɔɔ ye adwenle nu la ɛkɛ bɔkɔɔ a. Yemɔti, mekɛ biala mɔɔ ɔwɔ kɛ yɛsi kpɔkɛ bie la, ɔhyia kɛ yɛkɔ Baebolo ne anu na yɛnwu adwenle mɔɔ Nyamenle lɛ ye wɔ nwo la. Akee ɔwɔ kɛ yɛgyinla zo yɛsi kpɔkɛ ne. Saa yɛkpondɛ kɛ yɛnyia adwenle mɔɔ anu la ɛkɛ a, ɔwɔ kɛ yɛnwu kɛzi Gyihova dwenle la.

11. Duzu a boa kpalɛ maa yɛnwu kɛzi yɛbazi kpɔkɛ mɔɔ nrɛlɛbɛ wɔ nu ɛ?

¹¹ Kpɔkɛ mɔɔ nrɛlɛbɛ wɔ nu mɔɔ yɛbazukoa ye ɛzilɛ na yɛali zo la ɛnla aze. Ɛhye bahola ayɛ ngyegyelɛ amaa bɛdabɛ mɔɔ bɛle fofolɛ wɔ nɔhalɛ ne anu anzɛɛ bɔ zo mɔɔ bɛlɛnyi sunsum nu la titile. Noko menli ɛhye mɔ mɔɔ Baebolo ne fɛlɛ bɛ sunsum nu mbɔdɔma la, bahola anyia anyuhɔlɛ. Suzu kɛzi kakula sukoa ɛdialɛ mɔɔ ɔndɔ aze la anwo nea. Debie titile mɔɔ ɔbaboa ye la a le kɛ ɔbadudu ɔ gyakɛ ngyikyi ngyikyi fane dɔɔnwo. Zɔhane ala a saa sunsum nu adɔma ɛlɛsi kpɔkɛ a ɔde a. Kakye kɛ ɛzoanvolɛ Pɔɔlo hanle menli mɔɔ bɛnyi sunsum nu la anwo edwɛkɛ kɛ “bɛfa bɛ adwenle bɛdi gyima la ati, bɛtete ye mɔɔ ɔkola ɔnwu ngakyile mɔɔ wɔ kpalɛ nee ɛtane nu la.” Edwɛkɛ “bɛfa bɛ adwenle bɛdi gyima” nee “bɛtete ye”  kile kɛ bɛhɔle zo bɛbɔle mɔdenle, na zɔhane ala a ɔwɔ kɛ menli mɔɔ ɛlɛba fofolɛ la noko yɛ a.—Hib. 5:13, 14, NW. *

12. Kɛ ɔkɛyɛ na yɛahola yɛazi kpɔkɛ mɔɔ nrɛlɛbɛ wɔ nu ɛ?

¹² Kɛmɔ yɛlumua yɛha la, kenle ko biala yɛsi kpɔkɛ dɔɔnwo, ngyikyi nee mgbole. Neɛnleanu bie kile kɛ, ninyɛne mɔɔ yɛyɛ la anu ɛya ngyɛnu 40 le ninyɛne mɔɔ yɛndwenle nwolɛ kpalɛ na yɛayɛ, ɔba yɛ nu ala a ɛnee yɛlɛyɛ. Kɛ neazo la, nwonlomɔ biala ɔwɔ kɛ ɛsi tɛladeɛ mɔɔ ɛbawula la anwo kpɔkɛ. Wɔannea a ɛbabu ye debie ekyi wɔakpa bie mɔɔ ɛnrɛdwenle nwolɛ kpalɛ a, titile saa ɛkpondɛ ye ndɛndɛ a. Noko ɔhyia kɛ ɛdwenle mɔɔ ɛbawula la anwo saa ɔfɛta wɔ kɛ Gyihova sonvolɛ a. (2 Kɔl. 6:3, 4) Saa ɛlɛkpondɛ tɛladeɛ wɔadɔ a, bie a ɛbadwenle kɛzi bɛkpomgba ye nee kɛzi ɔde la anwo, na kɛzi ɔfɛta nee ye bolɛ ne noko ɛ? Kpɔkɛ kpalɛ mɔɔ yɛbazi wɔ ninyɛne ɛhye mɔ anwo la bamaa yɛatete yɛ adwenle ne yɛamaa kpɔkɛ kpalɛ ɛzilɛ wɔ ninyɛne mɔɔ nwolɛ hyia kpalɛ la anwo.—Luku 16:10; 1 Kɔl. 10:31.

13. Duzu a nwolɛ hyia amaa yɛahola yɛali kpɔkɛ mɔɔ yɛkɛzi la azo a?

¹³ Yɛ muala yɛze kɛ asolo kɛ yɛbazi kpɔkɛ kpalɛ, yɛɛ asolo kɛ yɛbali zo. Kɛ neazo la, bɛdabɛ mɔɔ bɛkulo kɛ bɛgyakyi sigalɛte ɛnlonlɛ la bie mɔ ɛngola ɔluakɛ bɛnnyia mɔɔ ɔbamaa bɛ anwosesebɛ la. Debie mɔɔ ɔhyia la a le kɛ ɛbasika ɛ bo wɔalua adenle kpalɛ ne mɔɔ wɔkpa la azo. Bɛfa ɛhulolɛ mɔɔ yɛlɛ kɛ yɛbayɛ debie la bɛtoto ndinli mɔɔ wɔ nwonane ne anu la anwo. Saa yɛfa yɛdi gyima fane dɔɔnwo a, yɛɛ nuhua yɛ se a. Saa yɛanva yɛanli gyima a ɔbayɛ bɛtɛɛ anzɛɛ ɔbawu. Duzu a bahola aboa yɛ amaa yɛanyi anzɛɛ yɛanyia anwosesebɛ yɛali kpɔkɛ mɔɔ yɛbɔle la anwo gyima ɛ? Saa yɛbikye Gyihova a, ɔbahola yeaboa yɛ.—Bɛgenga Felepaema 2:13.

14. Kɛmɔti a Pɔɔlo nyianle anwosesebɛ yɛle mɔɔ ɛnee ɔwɔ kɛ ɔyɛ la ɛ?

¹⁴ Pɔɔlo anwubielɛ ne manle ɔnwunle kɛ ɔnla aze kɛ yɛbayɛ mɔɔ ɔtenrɛ la, yemɔti ɔhanle kɛ: “Me kunlu a anrɛɛ meyɛ kpalɛ, noko mengola menyɛ.” Ɛnee ɔze mɔɔ ɔkpondɛ kɛ ɔyɛ anzɛɛ mɔɔ ɔwɔ kɛ ɔyɛ la, noko ɔdwu mekɛ ne bie a debie si ye adenle. Ɔhanle kɛ: “Wɔ me nuhua a ɛnee me nye die Nyamenle mɛla ne anwo kpalɛ. Na menwu mɛla fofolɛ bie wɔ me sonlabaka ye nvɛyeba ne mɔ amuala anu. Mɛla ɛhye ko tia mɔɔ me adwenle kulo kɛ ɔyɛ la, na ɔmaa meyɛ kanranli memaa ɛtane mɛla ne mɔɔ ɛlɛdi gyima wɔ me sonlabaka ne anu la.” Asoo ɛnee ɔnlɛ anyelazo biala? Kyɛkyɛ. Ɔdoale zo kɛ: “Melua yɛ Awulae Gyisɛse Kelaese anwo zo meyɛ Nyamenle mo.” (Wulo. 7:18, 22-25) Eza ɔhɛlɛle kɛ: “Ɔlua anwosesebɛ ne mɔɔ [Gyihova] fa maa me la ati, mekola megyinla ninyɛne muala anloa.”—Fel. 4:13.

15. Kɛzi kpɔkɛ kpundii mɔɔ yɛbazi anzɛɛ yɛnrɛzi la baha awie mɔ ɛ?

¹⁵ Ɔda ali kɛ, ɔwɔ kɛ yɛsi kpɔkɛ kpundii na yɛahola yɛazɔ Nyamenle anye. Kakye edwɛkɛ mɔɔ Yilaegya hanle hilele Beeyale azonvolɛ nee Yizilayɛma mɔɔ ɛkpɔkye wɔ Boka Kamɛle azo la: “Duzu ati a bɛ adwenle ɛngya na bɛyɛ bɛ adwenle nwiɔ nwiɔ ɛ? Saa [Gyihova] a le Nyamenle a, bɛdoa ye; na saa bɛkɛzonle bozonle Beeyale noko a, ɛnee bɛdoa ye.” (1 Arl. 18:21) Ɛnee Yizilayɛma ze mɔɔ ɔwɔ kɛ bɛyɛ la, noko bɛyɛle “bɛ adwenle nwiɔ  nwiɔ.” Noko akee, nzinlii Dwɔhyua yɛle neazo kpalɛ, ɔzele Yizilayɛma kɛ: ‘Saa bɛ kunlu ɛndwo kɛ bɛkɛzonle Gyihova a, ɛnee ɛnɛ demua ye, bɛhile mɔɔ bɛkɛzonle ye la, na mame, me nee me sua nu amra, yɛbazonle Gyihova.’ (Dwɔh. 24:15) Duzu a vi ye kpɔkɛzilɛ ne anu rale a? Dwɔhyua nee menli mɔɔ doale ye la hɔle Ɛwɔkɛ Azɛlɛ ne, “azɛlɛ ne mɔɔ le kɛnlɛma na ɔkye aleɛ” la azo.—Dwɔh. 5:6.

16, 17. Maa ndonwo fa kile nvasoɛ mɔɔ wɔ zo kɛ awie bazi kpɔkɛ mɔɔ ɔ nee Gyihova ɛhulolɛdeɛ le ko la anu.

¹⁶ Suzu edwɛkɛ ɛhye anwo. Adiema nrenya mɔɔ liele ɛzɔnenlɛ ɛtɛkyɛle la nee ɔ ye lɛ ngakula nsa. Ye gyima ne ɛndua ye kakɛ kpalɛ biala, noko ɔkpale gyima zɔhane amaa yeanyia dapɛne awieleɛ ne ɔ nee ye abusua ne ahɔ debiezukoalɛ nee daselɛlilɛ. Kenle ko, ɔ gɔnwo gyimayɛvo bie zele ye kɛ ɔmaa bɛhɔ gyima fofolɛ mɔɔ bɛtua kakɛ kpalɛ na bɛkyɛ ninyɛne wɔ ɛkɛ la anu. Yɛ diema ne dwenlenle edwɛkɛ ne anwo na ɔyɛle nwolɛ asɔne. Ɔnwunle kɛ saa ɔkɔ gyima fofolɛ ne anu a, ɔbayɛ se kɛ ɔ nee ye abusua ne bahɔ debiezukoalɛ nee daselɛlilɛ wɔ dapɛne awieleɛ. Saa ɛdawɔ a anrɛɛ duzu a ɛbayɛ a?

¹⁷ Mekɛ mɔɔ ɔvale sunsum nu nyilalɛ ɔdole ahatualɛ kpole ne anwo la, adiema nrenya ne kpole gyima ne. Ɛdwenle kɛ ɔnlunle ɔ nwo wɔ ye kpɔkɛzilɛ ne anwo ɔ? Kyɛkyɛ. Ɔdele nganeɛ kɛ sunsum nu nyilalɛ zo lɛ nvasoɛ maa ye abusua ne tɛla ahatualɛ kpole ne mɔɔ ɔbanyia la. Mekɛ mɔɔ bɛ ra raalɛ kpanyinli mɔɔ ɛnyia ɛvolɛ bulu hanle hilele bɛ kɛ ɔkulo ye awovolɛ nee ɔ mediema ne mɔ edwɛkɛ na ɔkulo Gyihova la, ɔ nee ɔ ye anye liele kpole. Bɛ ra raalɛ ne hanle kɛ ɔkulo kɛ ɔyila ɔ nwo zo ɔmaa Gyihova na bɛsɔne ye. Nea kɛzi ɔhilele anyezɔlɛ wɔ ɔ ze neazo kpalɛ ne mɔɔ ɔyɛle ɔvale Gyihova ɛzonlenlɛ ɔlumuale la anwo a!

18. Duzu ati a nwolɛ hyia kɛ yɛbazi kpɔkɛ mɔɔ nrɛlɛbɛ wɔ nu la kenle ko biala ɛ?

¹⁸ Gyisɛse Kelaese mɔɔ ɔle Mosisi Kpole ne la ɛli Gyihova nɔhalɛ azonvolɛ anyunlu wɔ Seetan ewiade ne anu ɛvolɛ dɔɔnwo. Kɛ Dwɔhyua Kpole ne la, Gyisɛse ɛziezie ɔ nwo kɛ ɔbazɛkye ngyehyɛleɛ ɛtane ɛhye na yeali ye ɛdoavolɛma anyunlu bɛahɔ tenlene ewiade fofolɛ ne anu. (2 Pita 3:13) Ɛhye ati, ɛnɛ ɛnle mekɛ mɔɔ ɔwɔ kɛ yɛsia yɛkɔfa yɛ nzuzulɛ, subane, ngyinlazo, nee yɛ bodane dɛba ne a. Ɔle mekɛ mɔɔ ɔwɔ kɛ yɛnwu Nyamenle ɛhulolɛdeɛ kpalɛ ne yɛtɛla mekɛ biala a. (Wulo. 12:2; 2 Kɔl. 13:5) Maa wɔ kpɔkɛzilɛ nee ninyɛne mɔɔ ɛyɛ ye kenle ko biala la ɛla ye ali kɛ ɛle awie mɔɔ ɛfɛta Nyamenle dahuu ngoane ne a.—Bɛgenga Hibuluma 10:38, 39.