Wɔgenga Ɛzinzalɛ Arane mɔɔ ɛra kenlensa ye la kpalɛ ɔ? Ɛnee nea saa ɛbahola wɔabua kpuyia ɛhye mɔ a:

Mekɛ boni a Gyisɛse hanle edwɛkɛ ne hilele “sunsum nu amra mɔɔ bɛgua bɛ anga la” ɛ? (1 Pita 3:19)

Ɔzɔho kɛ Gyisɛse ewudwazo ne anzi yɛɛ ɔhanle ndɛnebualɛ mɔɔ fɛta bɛ la anwo edwɛkɛ ɔhilele sunsum ɛtane ne mɔ a.—6/15, mukelɛ 23.

Ngyegyelɛ nsa boni a wɔ agyalɛ bieko anu a?

Bɛmɛ ɛne: ɔyɛ se kɛ ɛbamaa agyalɛ fofolɛ ne aheda dɛba ne azo; ɔyɛ se kɛ ɛ nee agɔnwolɛ dɛba mɔɔ bɛnze wɔ bokavolɛ fofolɛ ne la bali adwelie; ɔyɛ se kɛ ɛbalie wɔ bokavolɛ fofolɛ ne wɔali ɔluakɛ mɔɔ lumua la anli nɔhalɛ.—7/1, mukelɛ 9-10.

Mekɛ boni a Gyisɛse babua menli ndɛne kɛ bɛle mboane anzɛɛ mbɔnkye a? (Mat. 25:32)

Gyisɛse babua aleɛabo amra ndɛne wɔ anwongyelelɛ kpole ne anu, wɔ mekɛ mɔɔ bɛzɛkye adalɛ ɛzonlenlɛ bɛwie la.—7/15, mukelɛ 6.

Mekɛ boni a amumuyɛma mɔɔ bɛha bɛ nwo edwɛkɛ wɔ abɛlɛ ne nee ndile ne anwo ɛrɛlɛ ne anu la bazu adedɛ bɛ nwo bonrane nu a? (Mat. 13:36, 41, 42)

Bɛbayɛ zɔ wɔ anwongyelelɛ kpole ne anu wɔ mekɛ mɔɔ bɛbanwu kɛ bɛnlɛ ɛleka biala bɛnvea wɔ ɛzɛkyelɛ ne anu la.—7/15, mukelɛ 13.

Mekɛ boni a Gyisɛse edwɛkɛ ne mɔɔ fane sonvolɛ nɔhavo mɔɔ ze nrɛlɛbɛ ne anwo la rale nu a? (Mat. 24:45-47)

Tɛ Pɛntekɔso 33 Y.M. anu a ɔbɔle ɔ bo kɛ ɔba nu a, emomu, wɔ 1914 anzi. Bɛvale sonvolɛ ne bɛziele sonvolɛma mɔɔ ɛha la mɔɔ Keleseɛnema mɔɔ bɛmaa bɛ sunsum nu aleɛ kɔsɔɔti boka nwo la anwo zo wɔ 1919.—7/15, mukelɛ 21-23.

Mekɛ boni a Gyisɛse bamaa sonvolɛ nɔhavo ne anlea ye agya ninyɛne ne kɔsɔɔti azo a?

Kenlebie, wɔ anwongyelelɛ kpole ne anu, mekɛ mɔɔ sonvolɛ nɔhavo ne ɛnyia ye ahatualɛ wɔ anwuma la yɛɛ ɛhye bazi a.—7/15, mukelɛ 25.

Asoo ɔwɔ kɛ yɛka kɛ menli kɔsɔɔti mɔɔ bɛambɔ bɛ aluma wɔ Baebolo ne anu la lɛ subane ɛtane anzɛɛ bɛ nwo ɛngyia la ati ɔ?

Ɔnle zɔ. Bɛambɔ ɛtanevolɛma nee kpalɛma dɔɔnwo aluma wɔ Baebolo ne anu. (Wulu. 4:1-3; Mat. 26:18) Anwumabɔvolɛma mɔɔ di nɔhalɛ la anu nwiɔ pɛ ala yɛɛ bɛbɔle bɛ alumua wɔ Baebolo ne anu a.—8/1, mukelɛ 10.

Saa yɛye tumi ne mɔɔ Nyamenle vale manle bɛ la yɛsie ahane a, duzu a boale Alasevolɛ 230 ne manle bɛnyianle bɛ ti wɔ ewule adenle ne mɔɔ bɛdiale bɛvile Sachsenhausen mbulalɛ efiade ne la anu a?

Ɔnva nwo kɛ ɛnee ɛhɔne nee anwondolɛ ɛmaa bɛyɛ bɛtɛɛ la, bɛhɔle zo bɛmanle bɛ nwo anwosesebɛ kɛ bɛdoa zo.—8/15, mukelɛ 18.

Kɛmɔti a Yizilayɛma mɔɔ pɛle Azule Dwɔdan ne hɔle Ɛwɔkɛ Azɛlɛ ne azo la anwo edwɛkɛ ne maa yɛ anwosesebɛ ɛ?

Ɔnva nwo kɛ ɛnee azule ne ɛyi bonrabonra la, Gyihova manle ɔgyakyile ɛzenlɛ amaa ye menli ne ahola apɛ. Ɛhye manle bɛnyianle diedi kpole wɔ ye nu na bɛvale bɛ nwo bɛdole ɔ nwo zo, na kɛlɛtokɛ ɛhye kola wula yɛ anwosesebɛ kpalɛ.—9/15, mukelɛ 16.

Duzu a kɔla mɔɔ Baebolo ne ta fa di gyima la da ye ali a?

Kɔla mɔɔ Baebolo ne fa di gyima la maa yɛnwu kɛ Nyamenle ze kɛ ɔka alesama nganeɛdelɛ na eza ɔboa ɔmaa yɛkakye debie.—10/1, mukelɛ 14-15.

Kɛzi mboaneneavolɛma nee mgbanyima nwo ngapezo ne mɔɔ wɔ Maeka 5:5 la ɛra nu ɛnɛ a?

Yɛze kɛ “mboaneneavolɛma kɛyɛ nsuu nee mgbanyima kɛyɛ mɔtwɛ” ne mɔɔ bɛha bɛ nwo edwɛkɛ wɔ Maeka 5:5 la gyi ɛkɛ maa asafo nu mgbanyima mɔɔ bɛlɛboa Nyamenle menli bɛamaa bɛaziezie bɛ nwo bɛamaa kenlebie ɛtetalɛ ne mɔɔ bɛha bɛdo ɛkɛ la.—11/15, mukelɛ 20.

Duzu ati a yɛhyia Nyamenle ɛ?

Yɛhyia adehilelɛ kpalɛ nee ɛbɛlabɔlɛ nu ngyegyelɛ bie mɔ anwo mualɛ mɔɔ kyesɛ Nyamenle ala na yeaboa yɛ a. Nyamenle maa yɛ moalɛ mɔɔ bamaa yɛabɔ ɛbɛla kpalɛ na yɛ nye alie la, eza ɔbali ɛwɔkɛ ngakyile mɔɔ yebɔ yɛ mɔɔ bɛwɔ ye Edwɛkɛ ne anu la azo.—12/1, mukelɛ 4-6.