1. Afɔle boni a bie mɔ bɔ a, na duzu ati ɔ?

MENLI fi bɛ ɛhulolɛ nu fa bɛ nwo bɔ afɔle maa ninyɛne mɔɔ nwolɛ hyia bɛ la. Awovolɛ fa bɛ mekɛ, bɛ ezukoa, nee bɛ anwosesebɛ boa bɛ mra. Mekɛ mɔɔ bɛ tipɛnema ɛlɛdi nwɔhoa na bɛ nye ɛlie la, ngakula mɔɔ kulo kɛ kɔgyinla bɛ maanle ne agyakɛ anu di Olympics nwɔhoa ne la fa mekɛ dɔɔnwo tete bɛ nwo kpalɛ alehyenlɛ biala. Gyisɛse noko vale ɔ nwo bɔle afɔle manle ninyɛne mɔɔ nwolɛ hyia ye kpalɛ la. Yeamkpondɛ anwondɔlɛ, yɛɛ yeanwo mralɛ. Emomu, ɔkpale kɛ ɔbava ye adwenle yeazie Belemgbunlililɛ ne anyuhɔlɛ zo. (Mat. 4:17; Luku 9:58) Ye ɛdoavolɛma ne noko vale bɛ nwo bɔle afɔle boale Nyamenle Belemgbunlililɛ ne. Ɛnee Belemgbunlililɛ zɔhane anyuhɔlɛ nwo hyia bɛ kpalɛ, yemɔti bɛbɔle afɔle bɛyɛle dɔɔnwo bɛboale Belemgbunlililɛ ne. (Mat. 4:18-22; 19:27) Zɔhane ati, yɛbahola yɛabiza yɛ nwo kɛ, ‘Duzu a nwolɛ hyia me kpalɛ wɔ me ɛbɛlabɔlɛ nu a?’

2. (a) Afɔle boni a ɔwɔ kɛ nɔhalɛ Keleseɛnema kɔsɔɔti bɔ a? (b) Afɔle boni bieko a bie mɔ bɔ a?

² Afɔle bie mɔ wɔ ɛkɛ mɔɔ ɔwɔ kɛ nɔhalɛ Keleseɛnema kɔsɔɔti bɔ, na nwolɛ hyia na bɛ nee Gyihova anyia agɔnwolɛvalɛ kpalɛ. Afɔle ɛhye mɔ bie a le kɛ yɛbava yɛ mekɛ nee yɛ anwosesebɛ yɛayɛ nzɛlɛlɛ, yɛagenga Baebolo, yɛayɛ abusua ɛzonlenlɛ, yɛahɔ debiezukoalɛ nee daselɛlilɛ. * (Dwɔh. 1:8; Mat. 28:19, 20; Hib. 10:24, 25) Ɔlua yɛ mɔdenlebɔlɛ nee Gyihova nyilalɛ zo, edwɛkɛhanlɛ gyima ne ɛlɛkɔ ɔ nyunlu yɛɛ menli dɔɔnwo ɛlɛse yuu ara ‘Gyihova sua ne  mɔɔ ɔle kɛ boka la anu.’ (Aye. 2:2) Amaa bɛaboa Belemgbunlililɛ ne la, menli dɔɔnwo bɔ afɔle kɔsonle Bɛtɛle, sisi Belemgbunlililɛ nee Nyianu Asalo, bɛyɛ nyianu nwo ngyehyɛleɛ, anzɛɛ boa mekɛ mɔɔ esiane kɛzi la. Gyima ɛhye mɔ ɛnle debie mɔɔ ɔhyia kɛ awie yɛ na yɛanyia dahuu ngoane a, noko bɛyɛ bɛfa bɛboa Belemgbunlililɛ ne anyuhɔlɛ.

3. (a) Saa yɛbɔ afɔle ɔlua Belemgbunlililɛ ne ati a kɛzi ɔboa yɛ ɛ? (b) Kpuyia boni mɔ a ɔwɔ kɛ yɛsuzu nwo a?

³ Mekɛ ɛhye anu a ɔwɔ kɛ yɛboa Belemgbunlililɛ ne kpalɛ kpalɛ a. Ɔyɛ anyelielɛ kɛ menli dɔɔnwo ɛlɛfi bɛ ɛhulolɛ nu abɔ afɔle amaa Gyihova la! (Bɛgenga Edwɛndolɛ 54:6.) Mekɛ mɔɔ yɛlɛkendɛ kɛ Nyamenle Belemgbunlililɛ ne bara la, nyeleyɛlɛ subane zɛhae maa yɛ nye die. (Mɛla 16:15; Gyi. 20:35) Noko, ɔwɔ kɛ yɛ nuhua ko biala neɛnlea ye nu kpalɛ. Asoo adenle bie wɔ ɛkɛ mɔɔ yɛbahola yɛalua zo yɛabɔ afɔle bieko yɛamaa Belemgbunlililɛ ne ɔ? Kɛzi yɛlɛfa yɛ mekɛ, yɛ ezukoa, yɛ anwosesebɛ nee yɛ nrɛlɛbɛ yɛaboa ɛ? Kɔkɔbɔlɛ boni a yɛbazuzu nwo a? Bɛmaa yɛzuzu afɔlebɔlɛ nwo neazo bie mɔɔ yɛbahola yɛazukoa la anwo amaa yɛ anyelielɛ ayɛ kpole.

4. Kɛzi afɔle mɔɔ Yizilayɛma bɔle la boale bɛ ɛ?

⁴ Afɔle mɔɔ tete Yizilayɛma bɔle la azo a bɛgyinlanle bɛvale bɛ ɛtane bɛhyɛle bɛ a. Ɛnee afɔlebɔlɛ nwo hyia na menli ne anyia Gyihova anyunlu ɛlolɛ. Ɛnee bie mɔ le afɔle mɔɔ bɛkpondɛ bɛavi bɛ ɛkɛ; yɛɛ bie mɔ noko bɛfi bɛ ɛhulolɛ nu a bɛbɔ a. (Sɛlɛ. 23:37, 38) Ɛnee bɛkola bɛfi bɛ ɛhulolɛ nu bɛbɔ ɛyelalɛ afɔle bɛmaa Gyihova, anzɛɛ bɛfa bɛyɛ ahyɛlɛdeɛ. Yɛnwu afɔlebɔlɛ ɛhye mɔ anwo neazo titile wɔ mekɛ mɔɔ bɛbukele ɛzonlenlɛ sua ne wɔ Sɔlɔmɔn mekɛ zo la.—2 Edk. 7:4-6.

5. Nziezielɛ boni a Gyihova yɛle manle ehyiavolɛma a?

⁵ Ɛnee Gyihova ze kɛ bɛ muala bɛ afɔlebɔlɛ ne ɛnrɛzɛ, noko ɛnee ɔkpondɛ kɛ awie biala yɛ mɔɔ ɔbahola la. Gyihova lile mɛla kɛ bɛwola nane ne mogya ne mɔɔ “ɔle ninyɛne kpalɛ mɔɔ bara la sɔhovolɛ,” wɔ ɔ Ra Gyisɛse duma nu la bɛgua. (Hib. 10:1-4) Noko akee, Gyihova anyɛ mɛla ne kyengye. Kɛ neazo la, saa awie ɛnrɛhola ɛnrɛva boane anzɛɛ ɛnlankɛ ɛnrɛbɔ afɔle a, Nyamenle kponle zo kɛ ɔbava mɔlɔnoma yeabɔ. Yemɔti, ɛnee ehyianli bɔbɔ bahola ava anyelielɛ  abɔ afɔle amaa Gyihova. (Sɛlɛ. 1:3, 10, 14; 5:7) Ɔwɔ nuhua kɛ bɛbahola bɛava nane ngakyile bɛabɔ afɔle ɛdeɛ, noko ɛnee ɔkpondɛ ninyɛne nwiɔ yɛavi awie biala mɔɔ ɔkulo kɛ ɔfi ye ɛhulolɛ nu ɔbɔ afɔle la ɛkɛ.

6. Duzu a ɛnee bɛkpondɛ bɛfi awie mɔɔ kulo kɛ ɔbɔ afɔle la ɛkɛ a, na kɛzi ɛnee nwolɛ hyia kɛ bɛbali mɛla ɛhye azo ɛ?

⁶ Mɔɔ lumua la, ɔwɔ kɛ ahenle fa mɔɔ ɔlɛ la anu kpalɛ kpalɛ ne. Gyihova zele bɛ kɛ saa ‘ɔbalie bɛ afɔle ne yeado nu a,’ ɔwɔ kɛ ɔsɔ ɛnyelɛ. (Sɛlɛ. 22:18-20) Saa dɛne wɔ nane ne anwo a, Gyihova ɛnrɛlie afɔle ne ɛnrɛdo nu. Mɔɔ ɔtɔ zo nwiɔ, ɔwɔ kɛ ahenle mɔɔ ɛlɛbɔ afɔle ne la anwo te mɔɔ evinli biala ɛnle ɔ nwo a. Saa ahenle anwo ɛnde a, ɔwɔ kɛ ɔdumua ɔbɔ ɛtane anzɛɛ fɔlɛlilɛ afɔle ɔfa ɔsiezie ɔ nee Gyihova avinli kolaa na yeabɔ ye ɛhulolɛ nu afɔle ne. (Sɛlɛ. 5:5, 6, 15) Ɛnee ɛhye le edwɛkɛ mɔɔ anyebolo wɔ nu. Gyihova lile mɛla kɛ, saa awie anwo ɛnde na ɔdi anzondwolɛ afɔle ne, mɔɔ ɛhulolɛ nu afɔle boka nwo la bie a, bɛye ye bɛvi Nyamenle menli ne avinli. (Sɛlɛ. 7:20, 21) Noko, saa ahenle mɔɔ ɛlɛbɔ afɔle ne la lɛ gyinlabelɛ kpalɛ wɔ Gyihova anyunlu na dɛne ɛnle ye afɔle ne anwo a, ɔ nye balie kpalɛ.—Bɛgenga 1 Edwɛkɛsisilɛ 29:9.

7, 8. (a) Anyelielɛ boni a menli mɔɔ fa ninyɛne bɔ afɔle maa Belemgbunlililɛ ne la nyia a? (b) Ninyɛne boni mɔ a yɛbahola yɛava yɛabɔ afɔle yɛamaa Gyihova a?

⁷ Ɛnɛ, menli dɔɔnwo noko ɛlɛfi bɛ ɛhulolɛ nu ayɛ dɔɔnwo wɔ Gyihova ɛzonlenlɛ ne anu, na Gyihova anye die nwo. Gyima mɔɔ yɛyɛ yɛmaa yɛ mediema la noko maa yɛ nye die. Adiema ko mɔɔ ɔboa ɔmaa bɛsisi Belemgbunlililɛ Asalo na ɔboa bɛdabɛ mɔɔ esiane ɛdo bɛ la ka kɛ ɔnrɛhola ɔnrɛhilehile kɛzi ɔ nye die wɔ mekɛ mɔɔ ɔlɛboa ɔ mediema la anu. Ɔka kɛ: “Saa menwu anyelielɛ nee anyezɔlɛ mɔɔ mediema ne mɔ da ye ali wɔ mekɛ mɔɔ bɛkɛzi Belemgbunlililɛ Asalo fofolɛ bɛkɛmaa bɛ, anzɛɛ bɛkɛboa bɛ wɔ mekɛ mɔɔ esiane bie ɛzi la a, ɔmaa menwu kɛ gyima ne mɔɔ bɛyɛle la fɛta.”

⁸ Gyihova ahyehyɛdeɛ ne foa mɔɔ wɔ azɛlɛ ye azo la ɛhɔ zo ɛkpondɛ ndenle mɔɔ ɔbalua zo yeaboa Gyihova gyima ne la. Adiema C. T. Russell hilehilele nu wɔ 1904 ne anu kɛ: ‘Ɔwɔ kɛ yɛ nuhua ko biala fa ye mekɛ, ye anwosesebɛ, ye  ezukoa, ne mɔɔ bokɛboka nwo la, wula Gyihova anyunlunyia.’ Ɔnva nwo kɛ yɛnyia nyilalɛ dɔɔnwo la, yɛminli debie na yɛahola yɛabɔ afɔle yɛamaa Gyihova. (2 Sam. 24:21-24) Asoo yɛbava ninyɛne mɔɔ yɛlɛ la yɛali gyima wɔ adenle kpalɛ zo?

9. Duzu a yɛsukoa yɛfi Luku 10:2-4 anu wɔ kɛzi ɔwɔ kɛ yɛfa yɛ mekɛ yɛdi gyima la anwo a?

⁹ Yɛ mekɛ. Ɔdie mekɛ na bɛahola bɛahile yɛ mbuluku ne mɔ abo, bɛapelente, bɛasisi azua mɔɔ yɛsonle nu, bɛayɛ maangyeba nyianu nwo ngyehyɛleɛ, bɛava moalɛ bɛamaa wɔ mekɛ mɔɔ esiane kɛzi, na bɛayɛ gyima gyɛne dɔɔnwo mɔɔ nwolɛ hyia la. Dɔnehwele 24 ala a wɔ alehyenlɛ ko biala anu a, noko akee, Gyisɛse manle yɛ ngyinlazo mɔɔ ɔbamaa yɛava yɛ mekɛ ne yɛali gyima kpalɛ la. Mekɛ mɔɔ Gyisɛse soa ye ɛdoavolɛma ne wɔ azɛlɛsinli ne anu la, ɔzele bɛ kɛ “bɛmmagyinla bɛbiza awie biala ahye wɔ adenle nu.” (Luku 10:2-4) Kɛmɔti a Gyisɛse vale adehilelɛ ɛhye manle ɛ? Wɔ Gyisɛse mekɛ zo saa menli ɛlɛbiza ahye a bɛmbɔ bɛ nu aze anzɛɛ bɛnzomaa bɛ sa nu ala, emomu, bɛyɛ bɛ nwo atuu fane dɔɔnwo na bɛda aze bɔbɔ. Ɛhye mɔ kɔsɔɔti die mekɛ. Ɛnee Gyisɛse ɛngile kɛ ye ɛdoavolɛma ɛyɛ mgbanyizonle. Emomu, ɛnee ɔlɛboa bɛ yeamaa bɛanwu kɛ mekɛ mɔɔ bɛlɛ la anzo, yemɔti ɔwɔ kɛ bɛfa bɛdi gyima kpalɛ bɛyɛ ninyɛne mɔɔ anwo hyia la ala. (Ɛfɛ. 5:16) Asoo yɛbahola yɛava ngyinlazo mɔɔ wɔ edwɛkɛ ɛhye anu la yɛali gyima amaa yɛahola yɛava mekɛ dɔɔnwo yɛaboa Belemgbunlililɛ ne anwo gyima ne?

10, 11. (a) Gyima mɔɔ bɛfa yɛ ndoboa mɔɔ yɛye yɛboa ewiade amuala gyima ne bɛdi la bie a le boni? (b) Ngyinlazo boni a wɔ 1 Kɔlentema 16:1, 2 mɔɔ bahola aboa yɛ a?

¹⁰ Yɛ ezukoa. Belemgbunlililɛ ne anwo gyimayɛlɛ ne hyia ezukoa dɔɔnwo. Ɛvolɛ biala, bɛfa ezukoa dɔla mgbe dɔɔnwo bɛnea neavolɛ adenduvoma, adekpakyelɛ titilema, nee edwɛkpatɛlɛvolɛma. Ɔvi 1999, bɛsisi Belemgbunlililɛ Asalo mɔɔ bo 24,500 la wɔ maanle mɔɔ bɛnlɛ ezukoa dɔɔnwo la anu. Noko yɛhyia Belemgbunlililɛ Asalo kɛyɛ 6,400 bieko. Siane biala, bɛpelente Ɛzinzalɛ Arane nee Awake! kɛyɛ mgbe 100. Ndoboa mɔɔ bɛfi bɛ ɛhulolɛ nu bɛye la yɛɛ yɛfa yɛyɛ ɛhye mɔ amuala a.

¹¹ Ɛzoanvolɛ Pɔɔlo manle yɛ ndoboa ɛyelɛ nwo ngyinlazo. (Bɛgenga 1 Kɔlentema 16:1, 2.) Ɔdule ɔ mediema mɔɔ wɔ Kɔlente la folɛ kɛ bɛmmakendɛ dapɛne ne awieleɛ na ezukoa mɔɔ ɔkɛha bɛ sa nu la bɛava bɛaye ndoboa, emomu, bɛzi ezukoa mɔɔ bɛbava bɛaye ndoboa la anwo kpɔkɛ wɔ dapɛne ne mɔlebɛbo. Kɛmɔ ɛnee ɔde ye wɔ ɛvoya ne mɔɔ lumua la anu la, mediema mɔɔ wɔ ɛkɛ ɛnɛ la noko dumua yɛ ndoboa mɔɔ bɛbaye la anwo ngyehyɛleɛ kɛmɔ bɛ tɛnlabelɛ ne de la. (Luku 21:1-4; Gyi. 4:32-35) Gyihova anye sɔ nyeleyɛlɛ subane ɛhye kpalɛ.

12, 13. Duzu ati a bie mɔ ɛnva bɛ anwosesebɛ nee bɛ nrɛlɛbɛ kɔsɔɔti ɛmboa gyima ne ɛ, noko kɛzi Gyihova bahola aboa bɛ ɛ?

¹² Yɛ anwosesebɛ nee yɛ nrɛlɛbɛ. Gyihova boa yɛ wɔ mekɛ mɔɔ yɛlɛbɔ mɔdenle yɛava yɛ anwosesebɛ nee yɛ nrɛlɛbɛ yɛaboa Belemgbunlililɛ ne la. Yebɔ ɛwɔkɛ kɛ saa yɛfɛ a ɔbaboa yɛ. (Aye. 40:29-31) Yɛte nganeɛ kɛ yɛnrɛhola yɛnrɛboa gyima ne ɔ? Asoo yɛlɛ adwenle kɛ bie mɔ bahola ayɛ ye kpalɛ adɛla yɛ ɔ? Kakye kɛ Gyihova bahola amaa yɛanwu gyima bie anye zo kpalɛ kɛmɔ ɔyɛle Bɛzalii nee Oholeabe la.—Ade. 31:1-6; nea mɔlebɛbo nvoninli ne.

¹³ Gyihova tu yɛ folɛ kɛ yɛyɛ mɔɔ yɛbahola ye yɛ la kɔsɔɔti, yɛmmatwenlehwenle yɛ bo aze. (Mrɛ. 3:27) Mekɛ mɔɔ bɛsi ɛzonlenlɛ sua ne la, Gyihova zele  Dwuuma mɔɔ wɔ Gyɛlusalɛm la kɛ bɛdwenle mɔɔ bɛlɛyɛ ye wɔ sua ne ɛzilɛ nwo la anwo kpalɛ. (Hagae 1:2-5) Ɛnee bɛmaa ninyɛne ɛye bɛ adwenle ɛvi gyima mɔɔ ɔwɔ kɛ bɛyɛ la azo. Ɔwɔ kɛ yɛnwu ye kɛ ninyɛne mɔɔ anwo hyia yɛ kpalɛ la le ninyɛne mɔɔ anwo hyia Gyihova. Asoo ‘yɛnea’ yɛ ndenle nu boɛ amaa yɛahola yɛayɛ dɔɔnwo wɔ Belemgbunlililɛ gyima ne anu wɔ awieleɛ mekɛ ɛhye anu?

14, 15. (a) Kɛzi neazo mɔɔ yɛ mediema mɔɔ ɛnlɛ bie yɛle la bahola aboa yɛ ɛ? (b) Ɛhulolɛ boni a ɔwɔ kɛ yɛnyia a?

¹⁴ Menli dɔɔnwo wɔ ɛleka mɔɔ ehyia anzɛɛ anwongyelelɛ dɔɔnwo wɔ la. Yɛ ahyehyɛdeɛ ne ɛlɛbɔ mɔdenle kɛ ‘ɔboa’ mediema mɔɔ ɛnlɛ bie la. (2 Kɔl. 8:14) Noko akee, mediema mɔɔ ɛnlɛ bie bɔbɔ la ye ndoboa. Saa mediema mɔɔ ɛlɛdi ehyia la fi bɛ ahonle nu ye ndoboa a Gyihova anye die nwo kpalɛ.—2 Kɔl. 9:7.

¹⁵ Wɔ Afrika maanle bie anu, mediema mɔɔ wɔ ɛkɛ la gya bɛ egyinli mɔɔ bɛlɛ la foa bie sie ahane na saa bɛtɔne nuhua ninyɛne ne a, bɛava ye ezukoa ne bɛaboa Belemgbunlililɛ gyima ne. Wɔ maanle zɔhane anu, ɛnee mediema ne mɔ kulo kɛ bɛboa Belemgbunlililɛ Asalo bie ɛzilɛ. Noko, ɛnee ɔle mekɛ mɔɔ bɛfa bɛyɛ bɛ ɛbɔ nu gyima. Noko akee, bɛzile kpɔkɛ bɛboale. Ɛnee bɛkɔboa Belemgbunlililɛ Asalo ɛzile ne alehyenlɛ nu na bɛahɔ bɛ ɛya nu nɔsolɛ nu. Nea anwofamaa subane mɔɔ bɛlale ye ali a! Ɛhye kakye yɛ ɛvoya ne mɔɔ lumua la anu mediema mɔɔ ɛnee wɔ Masidonea la. “Ɛnee bɛnlɛ bie suzuamgba ɛdeɛ,” noko bɛtinlinle zo bɛkpale kyɛlɛ kɛ bɛmaa bɛboa ngyehyɛleɛ ne mɔɔ ɛlɛkɔ zo la. (2 Kɔl. 8:1-4) Bɛmaa yɛdayɛ noko ‘yɛva nyilalɛ ne mɔɔ Gyihova ɛva ɛmaa yɛ la bie yɛmaa.’—Bɛgenga Mɛla ne 16:17.

16. Duzu a ɔwɔ kɛ yɛyɛ na Gyihova alie yɛ afɔlebɔlɛ ado nu a?

¹⁶ Noko, ɔwɔ kɛ yɛnea boɛ. Kɛmɔ ɛnee ɔde ye wɔ tete Yizilayɛ la, ɔwɔ kɛ afɔle mɔɔ yɛfi yɛ ɛhulolɛ nu yɛbɔ la yɛ mɔɔ ɔsɔ Nyamenle anye. Ɔwɔ kɛ yɛkakye kɛ ɛzonlenlɛ mɔɔ yɛ abusua ne nee yɛdayɛ mumua ne yɛfa yɛmaa Gyihova la a le yɛ ɛzonlelilɛ titile a. Ɔnle kɛ yɛ mekɛ nee ninyɛne mɔɔ yɛfa yɛbɔ afɔle yɛmaa awie mɔ la maa yɛbu yɛ nye yɛgua yɛ abusua ne sunsum anzɛɛ nwonane nu ngyianlɛ zo. Saa ɔba ye zɛhae a, ɛnee ɔle kɛ yɛlɛfa ninyɛne mɔɔ ɔnle yɛ ɛdeɛ la yɛabɔ afɔle. (Bɛgenga 2 Kɔlentema 8:12.) Bieko, ɔwɔ kɛ yɛbɔ yɛ sunsum nu gyinlabelɛ ne anwo bane. (1 Kɔl. 9:26, 27) Nwu ye kɛ saa yɛfa Baebolo ngyinlazo yɛbɔ yɛ ɛbɛla a, yɛ afɔlebɔlɛ bamaa yɛ nye alie, yɛ kunlu badwo yɛ nwo na Gyihova ‘balie ado nu.’

17, 18. Kɛzi yɛte nganeɛ yɛmaa bɛdabɛ mɔɔ bɛlɛbɔ afɔle bɛamaa Belemgbunlililɛ ne la amuala ɛ, na duzu a ɔwɔ kɛ yɛsuzu nwo a?

¹⁷ Yɛ mediema dɔɔnwo ‘fa bɛ mogya ye ɛdɛne’ ɔlua gyima ɛsesebɛ mɔɔ bɛyɛ bɛboa Belemgbunlililɛ ne la azo. (Fel. 2:17) Yɛ nye die bɛdabɛ mɔɔ bɛfi bɛ ɛhulolɛ nu bɛye ndoboa la anwo kpalɛ. Ɔwɔ kɛ yɛkanvo mediema mɔɔ bɛli yɛ nyunlu wɔ Belemgbunlililɛ ne anwo gyimayɛlɛ nu la aye mɔ nee bɛ mra wɔ ndoboa mɔɔ bɛye na eza bɛfa bɛ nwo bɛbɔ afɔle la anwo.

¹⁸ Ɔwɔ kɛ yɛyɛ gyima ɛsesebɛ yɛboa Belemgbunlililɛ ne. Bɛmaa yɛ muala yɛva nzɛlɛlɛ yɛzuzu kɛzi yɛbahola yɛayɛ dɔɔnwo la anwo. Yɛbanyia nyilalɛ dɔɔnwo ɛnɛ na yɛanyia ye kpole “kenle bie” wɔ ewiade fofolɛ ne anu.—Maake 10:28-30.