Mekɛ mɔɔ ngakula bie vi Cambodia rale me sukulu ɛkɛ wɔ Columbus, Ohio, U.S.A wɔ 1985 ne anu la, ɛnee bɔ zo mɔɔ menyia ɛvolɛ bulu a. Ɛnee ngakula mrenya ne mɔ anu ko te Nrelenza ekyii. Ɔvale menli mɔɔ bɛkile bɛ nyane, mɔɔ bɛku bɛ, nee mɔɔ bɛnyia bɛ ti la nvoninli ɔhilele me. Saa melɛdwenle ngakula ɛhye mɔ anwo nɔɔzo a, ɔmaa mesu. Ɛnee mekulo kɛ meka Paladaese nee ewudwazo anyelazo ne anwo edwɛkɛ mekile bɛ, noko ɛnee bɛnde me aneɛ ne. Ɔnva nwo kɛ ɛnee mele kakula la, menzile kpɔkɛ kɛ mebazukoa Cambodia aneɛ ne amaa meahola meaha Gyihova anwo edwɛkɛ meahile me sukuluma ne. Ɛnee menze kɛ kpɔkɛzilɛ ɛhye baboa me kenlebie.

Cambodia aneɛ ne ɛzukoalɛ ɛnla aze. Menzile kpɔkɛ fane nwiɔ kɛ megyakyi, noko Gyihova luale me awovolɛ nwo zo zile me adua. Nzinlii, me kilehilevolɛma nee me gɔnwo mɔ sukuluma dule me folɛ kɛ memkpondɛ gyima mɔɔ bamaa meanyia ahatualɛ kpole la. Noko ɛnee mekulo kɛ meyɛ adekpakyelɛ, na amaa meadwu me bodane ne anwo la, menzile kpɔkɛ kɛ mebazukoa ninyɛne bie mɔ wɔ mekɛ mɔɔ melɛkɔ sukunwiɔ mɔɔ ɔbamaa meanyia gyima mɔɔ bɛfa mekɛ foa bɛyɛ la. Mekpɔne sukulu a, meta me nee dahuu adekpakyelɛma kɔ daselɛlilɛ. Eza mendule me nwo menziele ɛkɛ mengilele sukuluma mɔɔ ɛnee ɛlɛsukoa Nrelenza aboka bɛ aneɛ ne anwo la debie—kpɔkɛzilɛ ɛhye boale me kpalɛ.

Mekɛ mɔɔ menyianle ɛvolɛ 16 la, mendele kɛ ekpunli bie mɔɔ bɛyɛ debiezukoalɛ wɔ Cambodia aneɛ nu la wɔ Long Beach, California, U.S.A. Me mengɔle ɛkɛ ne na menzukoale kɛzi bɛkenga Cambodian aneɛ ne la. Menwiele sukulu ala la, menyɛle adekpakyelɛ na mendoale zo mengale edwɛkɛ ne mengilele Cambodiama mɔɔ bɛbikye me la. Menyianle ɛvolɛ 18 la, mendwenlenle nwo kɛ metu meahɔ Cambodia. Ɛnee ɛkɛ ne tɛyɛ ɛzulolɛ ɛdeɛ, noko ɛnee meze kɛ menli mɔɔ bo mgbe bulu mɔɔ bɛwɔ Cambodia la anu ekyi bie ala a ɛde Belemgbunlililɛ edwɛkpa ne a. Mekɛ zɔhane, ɛnee asafo ko pɛ mɔɔ nolobɔlɛma 13 ala a wɔ nu la a wɔ maanle ne anu a. Mekɛ mɔɔ lumua mɔɔ mengɔle Cambodia la, ɛnee meli ɛvolɛ 19. Ɛvolɛ nwiɔ anzi, menyɛle kɛ metu meahɔ ɛkɛ. Menyianle gyima mɔɔ bɛfa mekɛ foa bɛyɛ la, ɛnee mekile edwɛkɛ bo na eza mekile Nrelenza mefa menea me nwo wɔ ɛzonlenlɛ gyima ne anu. Nzinlii, mengyale raalɛ mɔɔ ɔ nee me lɛ bodane ko la. Yɛbɔ nu, yɛboa Cambodiama dɔɔnwo yɛmaa bɛyila bɛ nwo zo bɛmaa Nyamenle.

Gyihova ɛmaa ‘menyia mɔɔ mekpondɛ la.’ (Edw. 37:4) Ɛdoavolɛyɛlɛ le gyima mɔɔ maa ahunlundwolɛ tɛla gyima biala. Ɛvolɛ 16 mɔɔ meva medɛnla Cambodia la, Gyihova azonvolɛ 13 ne mɔɔ ɛnee wɔ ɛkɛ la ɛrayɛ asafo 12 yɛɛ ekpunli 4!—Jason Blackwell anloa edwɛkɛ ɔ.