1, 2. Duzu a Nyamenle Belemgbunlililɛ ne bayɛ a, na kɛmɔti a yɛlɛ anwodozo kɛ Belemgbunlililɛ ne bara ɛ?

MEKƐ mɔɔ Gyisɛse Kelaese wɔ boka bie mɔɔ bikye Kapɛnayɛm azo wɔ 31 Y.M. nyenyesuo mekɛ ne anu la, ɔzele ye ɛdoavolɛma ne kɛ bɛyɛ asɔne kɛ: “Wɔ belemgbunlililɛ ɛrɛla.” (Mat. 6:10) Ɛnɛ, menli dɔɔnwo ɛngola ɛnnwu ye saa Belemgbunlililɛ ne bara amgba a. Noko, yɛlɛ anwodozo kɛ bɛbabua nzɛlɛlɛ mɔɔ yɛfi yɛ ahonle nu yɛyɛ kɛ Nyamenle Belemgbunlililɛ ɛrɛla la.

² Gyihova balua Belemgbunlililɛ ne azo yeaha ye abusua ne mɔɔ wɔ anwuma nee aze la yeabɔ nu. Nyamenle bodane ɛhye bara nu. (Aye. 55:10, 11) Nɔhalɛ, Gyihova ɛbɔ ɔ bo ɛlɛdi Belemgbunli wɔ yɛ mekɛ ye anu! Ninyɛne ngɛnlɛma mɔɔ ɛsisi ɛvolɛ 100 mɔɔ ɛze ɛhɔ anu la di ɛhye anwo daselɛ. Nyamenle ɛlɛyɛ ninyɛne mgbole mɔɔ yɛ nwanwane la yeamaa ye azonvolɛ mgbe dɔɔnwo mɔɔ bɛdi nɔhalɛ la. (Zɛk. 14:9; Yek. 15:3) Noko, Belemgbunli ne mɔɔ Gyihova ɛrayɛ la le ngakyile fi Nyamenle Belemgbunlililɛ ne mɔɔ ɔlɛba mɔɔ Gyisɛse hanle kɛ yɛyɛ nwolɛ nzɛlɛlɛ la anwo. Ngakyile boni a wɔ nu a, na kɛzi bɛka yɛ ɛbɛlabɔlɛ ɛ?

3. (a) Mekɛ boni a bɛziele Gyisɛse Belemgbunli a, na nienwu ɔ? (b) Duzu a ɛbava wɔahile nu kɛ Belemgbunlililɛ ne bɔle ɔ bo 1914 ɛ? (Nea ɔ bo ɛkɛ edwɛkɛ ne.)

³ Mɔɔ ɛvoya 19 ne ɛlɛba ye awieleɛ la, yɛbɔle ɔ bo kɛ yɛte ngapezo bie mɔɔ ɛnee Daneɛle ɛhɛlɛ ɛdo ɛkɛ ɛvolɛ 2,500 la abo: “Wɔ  arelemgbunli zɔhane mɔ mekɛ ne anu, anwuma Nyamenle ne bava belemgbunlililɛ bie azie ɛkɛ mɔɔ bɛnrɛzɛkye ye ɛlɛ a.” (Dan. 2:44, NW) Baebolo Sukoavoma vale ɛvolɛ dɔɔnwo bɔle ye nolo kɛ ɛvolɛ 1914 bayɛ titile. Zɔhane mekɛ ne ɛnee menli dɔɔnwo suzu kɛ ninyɛne bayɛ boɛ. Kɛmɔ kɛlɛvolɛ bie hanle la: “Ɛnee bɛ nye la kɛ anyelazo nee ɛwɔkɛ dɔɔnwo bara nu wɔ 1914.” Noko, mekɛ mɔɔ Ewiade Konle I bɔle ɔ bo wɔ zɔhane mekɛ ne la, Baebolo ngapezo ne yɛle nɔhalɛ. Ɛhɔne, azɛlɛkpusulɛ, nee ewulenzane yɛɛ Baebolo ngapezo gyɛne mɔɔ rale nu la lile daselɛ kɛ Gyisɛse Kelaese bɔle ɔ bo lile Nyamenle Belemgbunlililɛ ne azo Belemgbunli wɔ anwuma wɔ 1914. * Gyihova ɛyɛ Belemgbunli wɔ adenle fofolɛ zo, ɔlua ɔ Ra ne mɔɔ yemaa yeyɛ Mɛzaya Belemgbunli la azo!

4. Duzu a Belemgbunli fofolɛ ne lumuale yɛle a, na nwane mɔ bieko a ɔvale ye adwenle ɔziele bɛ nwo zo a?

⁴ Nyamenle Belemgbunli fofolɛ ne balumua aho atia ɔ Ze Kpɔvolɛ kpole ne, Seetan. Gyisɛse nee ye anwumabɔvolɛma ne dule Abɔnsam nee ye sunsum ɛtane ne mɔ vile anwuma. Ɛhye manle anyelielɛ kpole rale anwuma noko ɔvale munzule kpole kpalɛ ɔrale azɛlɛ ye azo. (Bɛgenga Yekile 12:7-9, 12.) Akee Belemgbunli ne hakyile ɔ nye rale ye azonvolɛ mɔɔ bɛwɔ azɛlɛ ye azo la anwo kɛ ɔte bɛ nwo, ɔtete bɛ, na yeahyehyɛ bɛ yeamaa bɛayɛ Nyamenle ɛhulolɛdeɛ. Bɛmaa yɛzuzu kɛzi bɛyɛle Belemgbunlililɛ ne gyima nsa ɛhye mɔ wɔ adenle kɛnlɛma zo na ɔle neazo ɔmaa yɛ ɛnɛ la anwo.

5. Anwondelɛ gyima boni a hɔle zo ɔvi 1914 mɔɔ kɔ ɛvolɛ 1919 mɔlebɛbo a?

⁵ Mekɛ mɔɔ Belemgbunli ne dule Seetan nee ye sunsum ɛtane ne mɔ vile anwuma la, Gyihova manle Gyisɛse ranleanle ye ɛdoavolɛma mɔɔ bɛwɔ azɛlɛ ye azo la sunsum nu gyinlabelɛ na ɔdele bɛ nwo. Ngapezonli Malakae vɛlɛle ɛhye sunsum nu anwondelɛ. (Mal. 3:1-3) Tetedwɛkɛ kile kɛ ɛhye zile 1914 mɔɔ kɔ 1919 mɔlebɛbo. * Ɔwɔ kɛ yɛmaa yɛ nwo te anzɛɛ yɛyɛ nwuanzanwuanza na yɛahola yɛaboka Gyihova abusua ne anwo. (1 Pita 1:15, 16) Ɔwɔ kɛ yɛtwe yɛ nwo yɛfi adalɛ ɛzonlenlɛ nee ewiade ye anu maanyɛlɛ mɔɔ ɔbahola yeagua yɛ nwo evinli la anwo.

6. Kɛzi bɛfa sunsum nu aleɛ ne bɛmaa ɛ, na kɛmɔti a nwolɛ hyia ɛ?

⁶ Akee Gyisɛse vale ye belemgbunlililɛ tumi ne kpale ‘sonvolɛ nɔhavo bie mɔɔ ze nrɛlɛbɛ la.’ Ɛnee sonvolɛ ɛhye bava sunsum nu aleɛ kpalɛ amaa bɛdabɛ mɔɔ bɛboka “mboane ekpunli ko” ne mɔɔ Gyisɛse ɛlɛnea bɛ anwo la dahuu. (Mat. 24:45-47; Dwɔn 10:16) Ɔvi 1919, mediema ekpunli ekyi bie mɔɔ bɛkpokpa bɛ la, ɛli nɔhalɛ ɛyɛ bɛ gyima ɛsesebɛ ne ɛmaa “sonvolɛma mɔɔ ɛha la” aleɛ. Sunsum nu aleɛ dɔɔnwo ne mɔɔ bɛdua sonvolɛ ne anwo zo bɛfa bɛmaa la maa yɛnyia anwosesebɛ yɛnyi wɔ diedi ne anu. Ɔmaa kpɔkɛ mɔɔ yɛbɔ kɛ yɛmaa yɛ nwo ade wɔ sunsum nu, ɛbɛlabɔlɛ nu, adwenle nee nwonane nu la anu mia kpalɛ. Sunsum nu aleɛ ɛhye eza tete yɛ maa yɛfa yɛ nwo yɛwula gyima titile ne mɔɔ bɛlɛyɛ ye wɔ azɛlɛ ye azo ɛnɛ la anu. Ɛlɛfa nziezielɛ ɛhye mɔ wɔali gyima kpalɛ ɔ?

7. Gyima mɔɔ anwo hyia la boni a Gyisɛse bɔle ɔ bo wɔ mekɛ mɔɔ ɛnee ɔwɔ azɛlɛ ye azo la ɛ, na ɛnee bɛbayɛ bɛahɔdwu mekɛ boni?

⁷ Mekɛ mɔɔ Gyisɛse bɔle ye gyima ne abo wɔ azɛlɛ ye azo la, ɔhanle kɛ: “Ɔwɔ kɛ mebɔ Edwɛkpa ne mɔɔ fane Nyamenle Belemgbunlililɛ ne anwo la nolo wɔ azua mɔɔ ɛha la azo noko, ɔluakɛ ɛhye ati yɛɛ Nyamenle zoanle me a.” (Luku 4:43) Wɔ ɛvolɛ nsa nee foa anu, Gyisɛse manle gyima ɛhye  anwo hyianle ye kpalɛ kpalɛ. Ɔzele ye ɛdoavolɛma ne kɛ: “Saa bɛkɔ a, bɛhɔbɔ nolo kɛ, ‘Anwuma Belemgbunlililɛ ne ɛbikye.’” (Mat. 10:7) Mekɛ mɔɔ bɛdwazole Gyisɛse la, ɔzele ye ɛdoavolɛma ne kɛ bɛbadɛlɛ edwɛkɛ ɛhye anu “bɛahɔdwu aleɛabo ɛleka biala.” (Gyi. 1:8) Ɔbɔle bɛ ɛwɔkɛ kɛ ɔbaboka bɛ yeamaa bɛayɛ gyima ɛhye mɔɔ anwo hyia la yearadwu yɛ mekɛ ye anu.—Mat. 28:19, 20.

8. Kɛzi Belemgbunli ne zile ye azonvolɛ mɔɔ bɛwɔ azɛlɛ ye azo la adua ɔmanle bɛyɛle gyima ɛ?

⁸ Ɔkadwu 1919 la, ɛnee bɛnyia “Edwɛkpa ɛhye mɔɔ fane Anwuma Belemgbunlililɛ ne anwo la” anwo ndelebɛbo fofolɛ. (Mat. 24:14) Ɛnee Belemgbunli ne ɛlɛdi tumi wɔ anwuma, na yeboɔboa ye azonvolɛ ekyi mɔɔ yede bɛ nwo la anloa wɔ azɛlɛ ye azo. Bɛvile ahonle nu bɛlile Gyisɛse adehilelɛ ɛhye mɔɔ anu la ɛkɛ la azo: Bɛbɔ Nyamenle Belemgbunlililɛ ne mɔɔ yebɔ ɔ bo wɔ anwuma la nolo wɔ azɛlɛ ye kɔsɔɔti azo! (Gyi. 10:42) Kɛ neazo la, Belemgbunlililɛ ne anwo nolobɔlɛma kɛyɛ 20,000 yɛle maanle maanle avinli nyianu wɔ Cedar Point, Ohio, U.S.A., wɔ September 1922. Nea kɛzi bɛ nye liele wɔ mekɛ mɔɔ Adiema Rutherford manle ɛdendɛlɛ mɔɔ ɔti se “Belemgbunlililɛ Ne” na ɔhanle kɛ: “Bɛnlea, Belemgbunli ne ɛlɛdi tumi! Bɛdabɛ a bɛbabɔ ye nolo a. Ɛhye ati bɛbɔ, bɛbɔ, bɛbɔ, Belemgbunli ne nee ye belemgbunlililɛ ne nolo” la. Nyianuma ne anu 2,000 vale bɛ nwo wulale “Ɛzonlenlɛ Kenle” titile ɛhye anu, bɛvi ɛleka mɔɔ bɛlɛyɛ nyianu ne la bɛhɔle azua mɔɔ wɔ mayɛlɛ 45 (anzɛɛ km 72) la azo bɛhɔhanle edwɛkɛ ne. Nyianuma ne anu ko hanle kɛ: “Me rɛle ɛnrɛvi ɛsalɛ mɔɔ bɛdole bɛvɛlɛle yɛ kɛ yɛbɔ Belemgbunlililɛ ne nolo nee mɔdenle mɔɔ menli mɔɔ ɛnee wɔ ɛkɛ vale yɛle la ɛlɛ!” Tɛ ɔ ngome a ɛnee ɔte nganeɛ zɔhane a.

9, 10. (a) Ngyehyɛleɛ boni mɔ a bɛyɛ kɛ bɛfa bɛatete Belemgbunlililɛ ne nolobɔlɛma a? (b) Kɛzi ɛdawɔ mumua ne wɔnyia ndetelɛ ɛhye azo nvasoɛ ɛ?

⁹ Ɔkadwu 1922 la, ɛnee Belemgbunlililɛ ne nolobɔlɛma mɔɔ bɛwɔ maanle 58 azo wɔ ewiade amuala la ɛbo 17,000. Noko, ɛnee bɛhyia ndetelɛ. Belemgbunli Ne Mɔɔ Bɛkpa Ye la, vale mɔɔ bɛbaha, ɛleka mɔɔ bɛbaha ye, nee kɛzi bɛbaha ye la anwo adehilelɛ fɔɔnwo manle ye ɛdoavolɛma wɔ ɛvoya ne mɔɔ lumua la anu. (Mat. 10:5-7; Luku 9:1-6; 10:1-11) Ɛnɛ noko, Gyisɛse ɛlɛmaa bɛdabɛ mɔɔ bɛlɛyɛ Belemgbunlililɛ gyima ne la kɔsɔɔti anyia adehilelɛ nee ninyɛne mɔɔ bɛhyia nwo amaa bɛayɛ gyima ne kpalɛ la. (2 Tem. 3:17) Gyisɛse ɛlɛdua Keleseɛnema asafo ne azo yeatete ye azonvolɛ yeamaa bɛayɛ gyima ne. Adenle ko mɔɔ ɔdua zo ɔtete bɛ la a le Teokelase Ɛzonlenlɛ Sukulu ne mɔɔ bɛyɛ ye wɔ asafo mɔɔ bo 111,000 kɔsɔɔti anu la. Ɔlua adehilelɛ ɛhye mɔɔ bɛfa bɛdi gyima la ati, nolobɔlɛma mɔɔ bo mgbe nsuu la kola ka edwɛkɛ ne na bɛkilehile “menli muala” wɔ adenle mɔɔ yɛ anyelielɛ la azo.—Bɛgenga 1 Kɔlentema 9:20-23.

¹⁰ Saa yɛye Teokelase Ɛzonlenlɛ Sukulu ne yɛsie ahane a, bɛyɛ sukulu fofolɛ bɛfa  bɛtete asafo nu mgbanyima, adekpakyelɛma, mediema mrenya mɔɔ bɛtɛgyale, Keleseɛnema mɔɔ bɛgya, Ɔfese Kɔmatii ne anu amra nee bɛ ye mɔ, neavolɛ adenduvoma nee bɛ ye mɔ, nee edwɛkpatɛlɛvolɛma. * Keleseɛne Agyalɛma Baebolo Sukulu ne anu sukoavo ko hanle kɛ: “Ndetelɛ titile ɛhye mɔɔ yɛnyia ye la ɛmaa ɛlɔlɛ mɔɔ yɛlɛ yɛmaa Gyihova la ɛyɛ kpole yɛɛ yeziezie yɛ kpalɛ mɔɔ ɔbamaa yɛaboa awie mɔ a.”

11. Kɛzi Belemgbunlililɛ ne nolobɔlɛma ɛhola ɛgyinla ɔnva nwo dwazotia mɔɔ bɛyia la ɛ?

¹¹ Kpɔvolɛ Seetan anye dua Belemgbunlililɛ nolobɔlɛ nee ngilehilelɛ gyima kpole ɛhye mɔɔ yɛlɛbɔ mɔdenle yɛayɛ la. Ɔmaa awie mɔ ye bɛ nyunlu yɛɛ bie mɔ dua azule bo bɔ mɔdenle kɛ bɛsi Belemgbunlililɛ edwɛkɛ ne nee nolobɔlɛma adenle. Noko kpɔvolɛ ne mɔdenlebɔlɛ ne ɛyɛ mgbane. Gyihova ɛmaa ɔ Ra ne ɛli “belemgbunli wɔ arelemgbunli, tumivolɛma, mgbolema nee awulae mɔ anwo zo.” (Ɛfɛ. 1:20-22) Kɛ Belemgbunli la, Gyisɛse fa ye tumi ne bɔ ye ɛdoavolɛ ne mɔ anwo bane na ɔkile bɛ adenle ɔmaa bɛyɛ ɔ Ze ɛhulolɛdeɛ. * Bɛlɛbɔ edwɛkpa ne nolo, yemɔti bɛlɛkile ahonlekpalɛma dɔɔnwo Gyihova ndenle ne mɔ. Nea nwolɛ adenle kɛnlɛma mɔɔ yɛnyia kɛ yɛbayɛ gyima kpole ɛhye bie a!

12. Ka nzenzaleɛ mɔɔ bɛyɛ ye wɔ ahyehyɛdeɛ ne anu ɔvi mekɛ mɔɔ bɛvale Belemgbunlililɛ ne bɛziele ɛkɛ la bie.

¹² Ɔvi mekɛ mɔɔ bɛvale Belemgbunlililɛ ne bɛziele ɛkɛ wɔ 1914 la, Belemgbunli ne ɛyɛ nzenzaleɛ wɔ kɛzi bɛhyehyɛ Nyamenle azonvolɛ la anu amaa bɛayɛ ɔ Ze ɛhulolɛdeɛ. (Bɛgenga Ayezaya 60:17.) Wɔ 1919 ne anu, bɛkpale adekilevolɛ wɔ asafo biala anu bɛmanle ɔlile edwɛkɛhanlɛ gyima ne anyunlu. Bɛyɛle ngyehyɛleɛ mɔɔ ɔbamaa bɛayɛ azua nu daselɛlilɛ Molɛ biala la wɔ 1927. Bɛdabɛ mɔɔ bɛboa Belemgbunlililɛ ne la nyianle anwosesebɛmanlɛ mɔɔ ɔbamaa bɛayɛ gyima dɔɔnwo la wɔ 1931, wɔ mekɛ mɔɔ bɛvale duma Gyihova Alasevolɛ mɔɔ wɔ Baebolo ne anu bɛdole bɛ nwo zo la. (Aye. 43:10-12) Wɔ 1938, bɛgyakyile ma mɔɔ ɛnee bɛto bɛkpa mgbanyinli la na bɛluale teokelase adenle zo. Kɛ anrɛɛ bɛbamaa neavolɛ ko ala anlea asafo ne azo la, ɔvi 1972, bɛvale asafo ne azo ɛnleanlɛ bɛwulale mgbanyima eku sa nu. Bɛmanle mrenya mɔɔ fɛta la kɔsɔɔti anwosesebɛ kɛ “bɛnlea mboane ekpunli ne mɔɔ Nyamenle ɛva ɛwula bɛ sa nu la boɛ.” (1 Pita 5:2) Bɛhyɛle Neazo Eku ne anu bɛyɛle bɛ kɔmatii nsia wɔ 1976 kɛ bɛnlea Belemgbunlililɛ gyima ne azo wɔ ewiade amuala. Gyihova Belemgbunli ne mɔɔ yekpa ye la ɛlua teokelase, anzɛɛ Nyamenle tumililɛ adenle zo yeyɛ ngyehyɛleɛ yemaa Belemgbunlililɛ ne maanlema.

13. Kɛzi ninyɛne mɔɔ Belemgbunlililɛ ne ɛyɛ ye wɔ ye tumililɛ ɛvolɛ 100 ne mɔɔ lumua anu la ɛha wɔ ɛbɛlabɔlɛ ɛ?

 ¹³ Suzu mɔɔ Mɛzaya Belemgbunli ne ɛyɛ ye wɔ ɛvolɛ 100 ne mɔɔ yelumua yeli tumi anu la anwo ekyii nea! Yede menli bie mɔ anwo yemaa Gyihova duma ne. Yemaa bɛyɛ Belemgbunlililɛ gyima ne wɔ maanle 239 anu yɛɛ yetete menli dɔɔnwo yemaa bɛnwu Gyihova ndenle. Yeha menli mɔɔ bɛbo mgbe nsuu mɔɔ bɛdi nɔhalɛ la yebɔ nu, bɛ nuhua ko biala ɛvi ye ɛhulolɛ nu ɛlɛyɛ ɔ Ze ɛhulolɛdeɛ. (Edw. 110:3) Nɔhalɛ, gyima mɔɔ Gyihova ɛlɛdua Mɛzaya Belemgbunlililɛ ne azo yeayɛ la le mgbole yɛɛ ɔyɛ azibɛnwo. Ninyɛne mɔɔ yɛ anyelielɛ kpalɛ bɔbɔ la dɔɔnwo tɛbɔ yɛ nyunlu!

14. (a) Saa yɛsɛlɛ kɛ: “Wɔ belemgbunlililɛ ɛrɛla” a, ɛnee duzu a yɛkpondɛ kɛ Nyamenle yɛ a? (b) Yɛ ɛvolɛ 2014 edwɛkɛ ne a le boni, na kɛmɔti a ɔfɛta ɛ?

¹⁴ Ɔnva nwo kɛ Gyihova yɛle ɔ Ra, Gyisɛse Kelaese, Mɛzaya Belemgbunli wɔ 1914 la, bɛtɛbuale nzɛlɛlɛ mɔɔ yɛyɛ kɛ “wɔ belemgbunlililɛ ɛrɛla” la bɔkɔɔ. (Mat. 6:10) Baebolo ne hanle Gyisɛse anwo edwɛkɛ kɛ: “Di wɔ kpɔvolɛma anwo zo belemgbunli.” (Edw. 110:2) Menli arane mɔɔ wɔ Seetan tumi bo la kɔ zo dwazo tia Belemgbunlililɛ ne. Saa yɛyɛ asɔne kɛ Nyamenle Belemgbunlililɛ ɛrɛla a, ɛnee yɛlɛsɛlɛ Nyamenle kɛ ɔmaa Mɛzaya Belemgbunli ne nee ɔ gɔnwo mɔ mɔɔ ɔ nee bɛ ɛlɛdi ebia ne la ɛraye menli tumililɛ nee bɛdabɛ mɔɔ bɛdwazo bɛtia Belemgbunlililɛ ne la ɔvi azɛlɛ ye azo. Nyɛleɛ ɛhye bamaa edwɛkɛ mɔɔ wɔ Daneɛle 2:44 mɔɔ ɔse Nyamenle Belemgbunlililɛ ne ‘bazɛkye arelemgbunlililɛ ɛhye mɔ amuala bɔkɔɔ la,’ ara nu. Ɔbaye maanyɛlɛma mɔɔ bɛle Belemgbunlililɛ ne agbɔvolɛ la yeavi ɛkɛ. (Yek. 6:1, 2; 13:1-18; 19:11-21) Mekɛ mɔɔ ɛhye bazi la ɛbikye kpalɛ. Nea kɛzi ɛvolɛ 2014, mɔɔ ɛnee Belemgbunlililɛ ne bɔle ɔ bo wɔ anwuma la yenyia ɛvolɛ 100 la edwɛkɛ ne mɔɔ wɔ Mateyu 6:10 fɛta a: “Wɔ belemgbunlililɛ ɛrɛla”!

15, 16. (a) Ninyɛne mɔɔ yɛ anyelielɛ la boni a bahɔ zo wɔ Ɛvolɛ Apenle Ko Tumililɛ ne anu a? (b) Awieleɛ bɔkɔɔ ne, duzu a Mɛzaya Belemgbunli ne bayɛ a, na kɛzi ɛhye fane Gyihova bodane mɔɔ ɔlɛ ɔmaa ye abɔdeɛ kɔsɔɔti la anwo ɛ?

¹⁵ Saa Mɛzaya Belemgbunli ne sɛkye Nyamenle agbɔvolɛ wie a, ɔbavuandi Seetan nee ye sunsum ɛtane ne mɔ yeagua kuma ne mɔɔ ɛnlɛ ɔ bo la anu ɛvolɛ apenle ko. (Yek. 20:1-3) Mekɛ mɔɔ bɛye sunsum ɛtane ne mɔ bɛvi ɛkɛ la, Belemgbunlililɛ ne balua Gyisɛse ɛkpɔnelɛ afɔle ne azo yeaye mɔɔ ɛvi Adam ɛtane ne anu ɛra la yeavi ɛkɛ. Belemgbunli ne badwazo menli mgbe dɔɔnwo avi ewule nu, na yeayɛ ngyehyɛleɛ yeamaa bɛahilehile bɛ Gyihova anwo debie. (Yek. 20:12, 13) Azɛlɛ ne amuala bayɛ kɛ paladaese asetɛnla ne mɔɔ ɛnee wɔ Yidɛn tola ne anu la. Alesama mɔɔ di nɔhalɛ la kɔsɔɔti bali munli.

¹⁶ Mɔɔ Kelaese Ɛvolɛ Apenle Ko Tumililɛ ne kara ye awieleɛ la, ɛnee Mɛzaya Belemgbunlililɛ ne ɛdwu ye bodane nwo. Akee Gyisɛse bava Belemgbunlililɛ ne amaa ɔ Ze. (Bɛgenga 1 Kɔlentema 15:24-28.) Yɛnrɛhyia awie mɔɔ ɔbagyinla Gyihova nee ɔ mra avinli wɔ azɛlɛ ye azo la anwo bieko. Nyamenle amra mɔɔ wɔ anwuma nee aze la nee bɛ anwuma Selɛ ne bayɛ ko kɛ bɛboka ye abusua ne anwo.

17. Duzu a wɔzi kpɔkɛ kɛ ɛbayɛ ye wɔ Belemgbunlililɛ ne anwo a?

¹⁷ Ninyɛne mɔɔ yɛ anyelielɛ mɔɔ ɛsisi wɔ ɛvolɛ 100 Belemgbunlililɛ ne anu la ɛmaa yɛnwu kɛ Gyihova ɛlɛdi tumi na ye bodane mɔɔ ɔdaye ti ɔbɔle azɛlɛ ne la bara nu. Ɔrɛla ye kɛ yɛbahɔ zo yeayɛ ye maanlema mɔɔ bɛdi nɔhalɛ na yɛabɔ ye Belemgbunli ne nee ye Belemgbunlililɛ ne nolo. Yɛfa anwodozo yɛyɛ ɛhye ɔluakɛ yɛze kɛ ɔnrɛhyɛ Gyihova babua asɔne ɛhye mɔɔ yɛfi yɛ ahonle nu yɛyɛ la: “Wɔ belemgbunlililɛ ɛrɛla”!