1, 2. (a) Folɛ boni a sunsum ne manle Sɔlɔmɔn dule ngakula a? (b) Kɛmɔti a Keleseɛnema mɔɔ bɛwɔ bɛ ɛvolɛ 50 ne mɔ anu anzɛɛ bɛbo la noko anye bahola alie Sɔlɔmɔn folɛdulɛ ne anwo ɛ?

SUNSUM ne manle Belemgbunli Sɔlɔmɔn vale edwɛkɛ ɛhye dule ngakula folɛ: “Mekɛ mɔɔ bɛle mgbavolɛ nee mbɛlɛra la, bɛhakye bɛ Bɔvolɛ ne kolaa na munzule mekɛ ne . . . adwu.” Duzu a le “munzule mekɛ ne”? Sɔlɔmɔn vale edwɛkɛdwɛndolɛ bie hilehilele kɛzi kpanyinliyɛlɛ le munzule mekɛ la anu—ɛsalɛ nee egyakɛ bawozowozo, egyele badudu, ɛnyelɛ bayɛ monzomonzo, ɛnzolɛ badi, bɛ ti enrinli bayɛ egyɛne, na sonla bakpo. Ɔnle kɛ awie kendɛ na saa ɔdwu zɛhae mekɛ ne a yeabɔ ɔ bo yeazonle Gyihova.—Bɛgenga Nolobɔvo ne 12:1-5.

² Keleseɛnema mɔɔ bɛwɔ bɛ ɛvolɛ 50 ne mɔ anu anzɛɛ bɛbo la dɔɔnwo tɛdɛ anwosesebɛ. Bie a bɛ ti enrinli ɛyɛ egyɛne ɛdeɛ, noko bɛ tɛnlabelɛ ne ɛtɛyɛle kɛ mɔɔ Sɔlɔmɔn hanle nwolɛ edwɛkɛ la. Asoo Keleseɛnema ɛhye mɔ mɔɔ bɛ nye ɛvi la bahola anyia nvasoɛ avi folɛ ɛhye: “Bɛhakye bɛ Bɔvolɛ ne” mɔɔ bɛvale bɛdule ngakula la anu ɔ? Duzu a zɔhane folɛdulɛ ne kile a?

3. Duzu a yɛ Bɔvolɛ Kpole ne mɔɔ yɛkakye ye la kile a?

 ³ Ɔnva nwo kɛ yɛva ɛvolɛ dɔɔnwo yɛzonle Gyihova la, ɔle kpalɛ kɛ saa ɔdwu mekɛ ne bie a yɛbava mekɛ ekyi yɛazuzu kɛzi yɛ Bɔvolɛ ne le kpole la anwo. Asoo ngoane ɛnyɛ azibɛnwo? Kɛzi nuhua ninyɛne le kpomgbondee la bo sonla ndelebɛbo zo. Gyihova ɛyɛ nziezielɛ dɔɔnwo ɛmaa yɛ, yemɔti yɛ nye bahola alie wɔ ɛbɛlabɔlɛ nu kpalɛ. Saa yɛdwenledwenle Gyihova abɔdeɛ nwo a, ɔmaa anyezɔlɛ mɔɔ yɛlɛ yɛmaa ye ɛlɔlɛ, ye nrɛlɛbɛ, nee ye tumi ne la yɛ kpole. (Edw. 143:5) Noko yɛ Bɔvolɛ Kpole ne mɔɔ yɛkakye ye la eza kile kɛ yɛbayɛ mɔɔ ɔkulo la. Saa yɛdwenledwenle ninyɛne ɛhye mɔ anwo a, ɔmaa yɛsonle yɛ Bɔvolɛ ne bɔkɔɔ wɔ mekɛ mɔɔ yɛde ngoane nu la yɛfa yɛda yɛ anyezɔlɛ ali.—Nolo. 12:13.

4. Kpuyia boni a Keleseɛnema mɔɔ ɛva ɛvolɛ dɔɔnwo ɛzonle la bahola abiza bɛ nwo a, na duzu ati ɔ?

⁴ Kɛmɔ wɔyɛ kpanyinli na wɔnyia anwubielɛ dɔɔnwo la ati, ɔwɔ kɛ ɛbiza ɛ nwo kpuyia titile ɛhye, ‘Duzu a mebayɛ ye wɔ ɛbɛlabɔlɛ nu kɛkala mɔɔ metɛdɛ anwosesebɛ la ɛ?’ Ɛle Keleseɛnenli mɔɔ lɛ anwubielɛ yemɔti ɛlɛ nwolɛ adenle bie mɔ mɔɔ awie mɔ gyɛne ɛnlɛ ye la. Ɛbahola wɔava mɔɔ wɔzukoa wɔvi Gyihova ɛka la wɔahilehile ngakula. Ɛbahola wɔaha anwubielɛ mɔɔ wɔnyia ye wɔ Nyamenle ɛzonlenlɛ nu la wɔahile awie mɔ wɔava wɔamaa bɛ anwosesebɛ. Belemgbunli Devidi yɛle asɔne bizale nwolɛ adenle mɔɔ ɔbava yeayɛ zɔ la. Ɔhɛlɛle kɛ: “O Nyamenle, ɔvi me mgbavolɛ nu yɛɛ ɛvale me ɛhilehilelɛ a, . . . Saa menyi, na me ti zo ɛyɛ nwohyee a, O Nyamenle, mmakpo me, kɔkpula kɛ menwɔbɔ wɔ tumi kpole ne nolo menwɔmaa awolɛndoazo mɔɔ bara la kɛde bie.”—Edw. 71:17, 18.

5. Kɛzi Keleseɛnema mɔɔ anye ɛvi la bahola ava mɔɔ bɛzukoa la aboa awie mɔ ɛ?

⁵ Kɛzi ɛbahola wɔava nrɛlɛbɛ mɔɔ wɔva ɛvolɛ dɔɔnwo wɔzukoa la wɔaboa awie mɔ ɛ? Ɛbahola wɔado ɛsalɛ wɔavɛlɛ ngakula wɔ wɔ sua nu wɔamaa bɛ anwosesebɛ ɔ? Asoo ɛ nee bɛ bahɔ daselɛlilɛ wɔamaa bɛanwu anyelielɛ mɔɔ ɛlɛfa wɔazonle Gyihova la? Ɛlaehu mɔɔ dɛnlanle aze tete ne la hanle kɛ: “Bɛmaa mgbanyinli ɛdendɛ, na egyɛnema ɛhile bɛ nrɛlɛbɛ.” (Dwobu 32:7) Ɛzoanvolɛ Pɔɔlo dule Keleseɛne mraalɛ mɔɔ lɛ anwubielɛ la folɛ kɛ bɛlua bɛ edwɛkɛ nee bɛ neazo zo bɛmaa awie mɔ anwosesebɛ. Ɔhɛlɛle kɛ: ‘Maa mraalɛ mgbanyinli ɛhilehile mɔɔ le kpalɛ la.’—Tae. 2:3.

6. Duzu ati a ɔnle kɛ Keleseɛnema mɔɔ ɛva ɛvolɛ dɔɔnwo ɛzonle la bu mɔɔ bɛkola bɛyɛ la debie ekyi ɛ?

⁶ Saa ɛle Keleseɛnenli mɔɔ lɛ anwubielɛ a, ɛbahola wɔayɛ ninyɛne dɔɔnwo wɔaboa awie mɔ. Fa mɔɔ ɛnee ɛnze ye wɔ ɛvolɛ 30 anzɛɛ 40 mɔɔ ɛze ɛhɔ na kɛkala wɔnwu ye la kɛ neazo. Ɛkola ɛfa Baebolo ngyinlazo ɛdi gyima kpalɛ wɔ ɛbɛlabɔlɛ nu. Ɛkola ɛmaa Baebolo ne anu nɔhalɛ ne ka menli ahonle. Saa ɛle kpanyinli a, ɛze adenle kpalɛ mɔɔ ɛdua zo ɛboa bɛdabɛ mɔɔ bɛkɛyɛ ɛtane la. (Gal. 6:1) Bie a wɔzukoa kɛzi bɛnea asafo nu gyima, maanzinli nyianu, nee Belemgbunlililɛ Asalo ɛzilɛ zo. Ɔbayɛ kɛ ɛze kɛzi bɛ nee dɔketama tendɛ mɔɔ bɛyɛ ayile a bɛnva mogya bɛmboka nwo a. Saa kenlensa ye ala bɔbɔ yɛɛ wɔnwu nɔhalɛ ne a, ɛlɛ anwubielɛ wɔ ɛbɛlabɔlɛ nu mɔɔ nvasoɛ wɔ zo a. Kɛ neazo la, saa wɔtete ngakula a, yemaa wɔnwu nrɛlɛbɛ. Keleseɛnema mɔɔ anye ɛvi la bahola alua bɛ ngilehilelɛ, bɛ adehilelɛ, nee bɛ anwosesebɛmanlɛ zo bɛaboa bɛ mediema.—Bɛgenga Dwobu 12:12.

7. Ndetelɛ boni a Keleseɛnema mɔɔ anye ɛvi la bahola ava amaa mgbavolɛ a?

⁷ Ndenle gyɛne boni bieko a ɛbahola  wɔalua zo wɔaboa awie a? Ɛbahola wɔahile ngakula kɛzi bɛbɔ Baebolo ɛzukoalɛ bo na bɛyɛ la. Saa ɛle adiema raalɛ a, asoo ɛbaboa mrɛladane mɔɔ bɛle mbɛlɛra la wɔamaa bɛava bɛ nwo bɛawula sunsum nu gyimalilɛ nu na eza bɛanlea bɛ mra ɔ? Saa ɛle adiema nrenya a, asoo ɛbahola wɔahilehile mediema mrenya mɔɔ bɛle mgbavolɛ la kɛzi bɛmaa ɛdendɛlɛ mɔɔ yɛ anyelielɛ nee kɛzi bɛyɛ dɔɔnwo wɔ edwɛkpa ne nolobɔlɛ nu la ɔ? Asoo ɛbahola wɔahile bɛ kɛzi ɛkpɔla mediema mrenya nee mraalɛ mɔɔ bɛ nye ɛvi la ɛmaa bɛ anwosesebɛ wɔ sunsum nu la ɔ? Saa bɔbɔ ɛnlɛ anwosesebɛ kɛ dɛba ne la a, ɛlɛ ndenle ngɛnlɛma mɔɔ ɛbahola wɔalua zo wɔatete mgbavolɛ a. Nyamenle Edwɛkɛ ne se: “Mgbavolɛ anyunlunyia a le bɛ anwosesebɛ, yɛɛ mrenya mgbanyinli anwofɛlɛko a le bɛ egyɛne.”—Mrɛ. 20:29.

8. Duzu a ɛzoanvolɛ Pɔɔlo yɛle wɔ ye mgbanyinli mekɛ nu a?

⁸ Ɛzoanvolɛ Pɔɔlo manle ɔ nye bolole Nyamenle ɛzonlenlɛ nwo bɔbɔ wɔ mekɛ mɔɔ ɛnee ɔ nye ɛvi la. Mekɛ mɔɔ bɛyele ye bɛvile efiade wɔ 61 Y.M. wɔ Wulomu la, ɛnee yeyia sɔnea dɔɔnwo wɔ edwɛkpatɛlɛvolɛ gyima ne anu. Anrɛɛ ɔbahola yeadɛnla Wulomu yealie ɔ menle bie na yeahɔ daselɛlilɛ ngyikyi ngyikyi. (2 Kɔl. 11:23-27) Anrɛɛ mediema mɔɔ wɔ suakpole zɔhane azo la anye balie ye moalɛ ne anwo kpalɛ. Noko Pɔɔlo nwunle kɛ bɛhyia moalɛ wɔ maanle gyɛne zo. Yemɔti, ɔ nee Temɔte nee Taetɛse doale bɛ edwɛkpatɛlɛvolɛ gyima ne azo bɛhɔle Ɛfɛsɛse, Kiliti, yɛɛ ɔbayɛ kɛ Masidonea noko. (1 Tem. 1:3; Tae. 1:5) Yɛnze saa ɔhɔle Sepeen a, noko ɛnee ɔkpondɛ kɛ ɔkɔ lɔ.—Wulo. 15:24, 28.

9. Ɔbayɛ kɛ mekɛ boni a Pita dule hɔle ɛleka mɔɔ bɛhyia moalɛ la ɛ? (Nea mɔlebɛbo nvoninli ne.)

⁹ Ɔbayɛ kɛ mekɛ mɔɔ ɛzoanvolɛ Pita lile ɛvolɛ 50 la, ɔdule ɔhɔle ɛleka mɔɔ moalɛ nwo hyia la. Duzu ati a yɛka ye zɔ a? Saa ɔ nee Gyisɛse bɛle atipɛne anzɛɛ ɔtɛla ye ekyii a, ɛnee mekɛ mɔɔ ɔ nee ɛzoanvolɛma mɔɔ ɛha la yiale nu wɔ Gyɛlusalɛm wɔ ɛvolɛ 49 Y.M. anu la, ɛnee yenyia ɛvolɛ kɛyɛ 50. (Gyi. 15:7) Zɔhane mekɛ ne anzi, Pita hɔdɛnlanle Babelɔn. Ɔda ali kɛ ɛnee ɔkulo kɛ ɔka edwɛkɛ ne ɔkile Dwuuma dɔɔnwo ne mɔɔ wɔ ɛkɛ la. (Gal. 2:9) Mekɛ mɔɔ ɔhɛlɛle ye kɛlata ne mɔɔ lumua wɔ ɛvolɛ kɛyɛ 62 Y.M. anu la, ɛnee ɔde nehane. (1 Pita 5:13) Awie maanle zo ɛdɛnlanlɛ ɛnla aze, noko Pita ammaa kpanyinli mɔɔ ɛnee ɔlɛyɛ la anzi ye adenle wɔ Gyihova mɔɔ ɔbazonle ye bɔkɔɔ la anwo.

10, 11. Ka anwubielɛ mɔɔ fane awie mɔɔ ɔ nye ɛvi na yedu yehɔ ɛleka mɔɔ moalɛ nwo hyia anwo la.

¹⁰ Ɛnɛ, Keleseɛnema dɔɔnwo mɔɔ bɛwɔ bɛ ɛvolɛ 50 ne mɔ anu anzɛɛ bɛbo la, ɛnwu kɛ bɛ tɛnlabelɛ ne ɛhakyi yemɔti bɛkola bɛsonle Gyihova wɔ ndenle fofolɛ zo. Bie mɔ ɛdu ɛhɔ ɛleka mɔɔ bɛhyia moalɛ la. Kɛ neazo la, Robert hɛlɛle kɛ: ‘Mekɛ mɔɔ me nee me ye nwunle kɛ nwolɛ adenle bie mɔ wɔ ɛkɛ maa yɛ la, ɛnee yɛli ɛvolɛ asɛɛ 55. Ɛnee yɛ ra kokye ne ɛvi yɛ nwo yɛɛ yɛnlɛ awovolɛ mɔɔ ɔwɔ kɛ yɛnea bɛ a, na ɛnee yɛlɛ agyapadeɛ ekyi. Membule mgbonda menwunle kɛ saa yɛtɔne yɛ sua ne a yɛbahola yɛaduodua yɛ nwo kakɛ na yɛanyia ezukoa mɔɔ ɔbaza yɛ kolaa na bɛadua me pɛnhyɛne ezukoa ne bamaa me la. Yɛdele kɛ menli mɔɔ wɔ Bolivia la anye die Baebolo ɛzukoalɛ nwo na ɛkɛ ne asetɛnla ne ɛnyɛ se. Yemɔti yɛzile kpɔkɛ kɛ yɛbadu yeahɔ ɛkɛ. Ɛnee yɛ sua fofolɛ ne anu ɛdɛnlanlɛ ɛnla aze. Ɛnee debie biala le ngakyile wɔ mɔɔ yɛze ye dɛba wɔ Ameleka Sɔlɔ la anwo. Noko yɛnyianle yɛ mɔdenlebɔlɛ ne anwo ahatualɛ.’

¹¹ Robert toa zo kɛ: “Kɛkala asafo ne anu gyima ala a yɛyɛ ye wɔ yɛ ɛbɛlabɔlɛ nu a. Menli mɔɔ yɛ nee bɛ zukoale Baebolo ne la bie mɔ ɛzɔne. Ɛnee yɛ nee abusua  ko mɔɔ bɛnlɛ bie na bɛde moamoa la sukoa debie. Noko dapɛne biala, abusua ɛhye pɛ adenle tendenle ba debiezukoalɛ wɔ sua zo. Ɛkola ɛnwu kɛzi yɛ nye die wɔ mekɛ mɔɔ abusua ne ɛlɛnyia anyuhɔlɛ na bɛ ra nrenya kpanyinli ne ɛlɛyɛ adekpakyelɛ bɔbɔ la ɔ?”

12, 13. Ka Keleseɛnenli bie mɔɔ dwule mekɛ mɔɔ bɛfa bɛkɔ pɛnhyɛne mɔɔ ɔbɔle ɔ bo kɛ ɔsonle Gyihova wɔ adenle fofolɛ zo la anwubielɛ ne.

¹² Mediema mɔɔ anye ɛvi la bahola aboa asafo nee ekpunli mɔɔ bɛka maanle gyɛne zo aneɛ la kpalɛ. Bieko, azɛlɛsinli zɛhae anu gyimayɛlɛ bahola ayɛ anyelielɛ kpole. Kɛ neazo la, Brian hɛlɛle kɛ: “Mekɛ mɔɔ me nee me ye yɛnyianle ɛvolɛ 65 na yɛhɔle pɛnhyɛne wɔ Britain la, yɛnwunle kɛ yɛ nye ɛnlie. Ɛnee yɛ mra ne mɔ ɛvi yɛ nwo, yɛɛ yɛnnyia menli wɔ sua nu yɛ nee bɛ ɛnzukoa Baebolo ne. Menyiale China kpavolɛ ko mɔɔ ɛlɛyɛ neɛnleanu wɔ yunivɛsiti bie mɔɔ wɔ ɛleka mɔɔ yɛwɔ anu la. Ɔkponlenle ɛsalɛ mɔɔ mendole menvɛlɛle ye kɛ ɔrɛla debiezukoalɛ la azo, na me nee ye bɔle ɔ bo zukoale debie. Mɔɔ dapɛne ekyi pɛle nu la, ɔ nee Chinanli ko mɔɔ ɔ nee ye yɛ gyima la rale debiezukoalɛ. Dapɛne nwiɔ anzi, ɔ nee mɔɔ ɔtɔ zo nsa nee mɔɔ ɔtɔ zo nna la rale.

¹³ “Ɔka ekyii Chinanli mɔɔ ɔtɔ zo nnu ka kɛ yɛ nee ye ɛrazukoa Baebolo ne la, menganle ye me ti anu kɛ, ‘Saa meli ɛvolɛ 65 a ɛnee ɔngile kɛ ɔwɔ kɛ mekɔ pɛnhyɛne wɔ Gyihova ɛzonlenlɛ nu.’ Yemɔti, membizale me ye mɔɔ metɛla ye ɛvolɛ nwiɔ la, saa ɔbahulo kɛ ɔkɛzukoa China aneɛ ne a. Yɛvale aneɛ ne mɔɔ bɛhye bɛgua debie zo la yɛzukoale. Ye ɛvolɛ bulu ɛne. Edwɛkɛ ne mɔɔ yɛhanle yɛhilele menli mɔɔ ka maanle gyɛne zo aneɛ la, manle yɛdele nganeɛ kɛ yɛyɛ ngakula bieko. Badwu ɛnɛ, yɛ nee Chinama 112 ɛzukoa Baebolo ne! Bɛ nuhua dɔɔnwo kɔ debiezukoalɛ. Bɛ nuhua ko nee yɛ ɛlɛyɛ adekpakyelɛ.”

14. Duzu a bamaa Keleseɛnema mɔɔ bɛ nye ɛvi la anye alie a, na adenle boni azo a Pɔɔlo neazo ne maa anwosesebɛ a?

¹⁴ Tɛ Keleseɛnema mɔɔ wɔ bɛ ɛvolɛ 50 ne mɔ anu la amuala a bahola ayɛ ninyɛne  fofolɛ wɔ Gyihova ɛzonlenlɛ nu a. Bie mɔ ɛnlɛ kpɔkɛdelɛ kpalɛ, yɛɛ bie mɔ noko ɛlɛnea bɛ mra anzɛɛ bɛ awovolɛ. Noko ɔwɔ kɛ bɛmaa bɛ nye die kɛ Gyihova anye sɔ mɔɔ bɛkola ye yɛ wɔ ye ɛzonlenlɛ nu la. Yemɔti, mmamaa ɛ sa nu to ɔlua mɔɔ ɛngola ye yɛ la ati, emomu, maa ɛ nye ɛlie mɔɔ ɛkola ye yɛ la anwo. Fa ɛzoanvolɛ Pɔɔlo kɛ neazo. Bɛvale ye bɛdole efiade ɛvolɛ dɔɔnwo mɔɔ ɛnee ɔngola ɔnyɛ ye edwɛkpatɛlɛvolɛ gyima ne a. Noko saa awie mɔ kɔkpɔla ye a, ɔka Ngɛlɛlera ne anu edwɛkɛ ɔfa ɔboa bɛ wɔ diedi ne anu.—Gyi. 28:16, 30, 31.

15. Kɛmɔti a yɛbu Keleseɛnema mɔɔ anye ɛvi la kpalɛ ɛ?

¹⁵ Gyihova noko anye sɔ mɔɔ menli mɔɔ anye ɛvi yɛ ye wɔ ye ɛzonlenlɛ ne anu la kpalɛ. Sɔlɔmɔn hanle kɛ munzule mekɛ ne ɛnle mekɛ kpalɛ mɔɔ bɛfa bɛsonle Gyihova ɛdeɛ, noko Baebolo ne kakye yɛ kɛ Gyihova anye sɔ mɔɔ Keleseɛnema mɔɔ bɛ nye ɛvi yɛ fa ye Ye ayɛlɛ la. (Luku 21:2-4) Asafo ne mɔ anye die nɔhalɛlilɛ mɔɔ mediema ɛhye mɔ ɛva ɛzonle mekɛ tendenle la anwo.

16. Nwolɛ adenle boni mɔ a ɔbayɛ kɛ Ana annyia a, noko duzu a ɛnee ɔbahola yeayɛ yeazonle Nyamenle a?

¹⁶ Baebolo ne hanle kɛ raalɛ bie mɔɔ ɛnee ɔ nye ɛvi mɔɔ bɛfɛlɛ ye Ana la vale nɔhalɛlilɛ hɔle zo yele Gyihova ayɛlɛ wɔ ye mgbanyinli mekɛ nu. Mekɛ mɔɔ bɛwole Gyisɛse la ɛnee yeli ɛvolɛ 84 na ɔ hu ɛwu. Ɔbayɛ kɛ, yeandɛnla aze yeangyɛ yeambanyɛ Gyisɛse ɛdoavolɛ bɛanva sunsum nwuanzanwuanza ne bɛamkpokpa ye, anzɛɛ yeambɔ edwɛkpa ne mɔɔ fane Belemgbunlililɛ ne anwo la nolo. Noko, mɔɔ ɛnee Ana kola yɛ la, ɔ nye liele nwo ɔyɛle. “Ɔ gyakɛ amkpa Ɛzonlenlɛ Sua ne anu ɛlɛ; . . . ɔzonlenle ye Nyamenle nɔɔzo nee ewiazo.” (Luku 2:36, 37) Saa ɛsɔfo ne ɛlɛkpu ɛyɛlɛ nwonlomɔ nee nɔsolɛ nu a, Ana kɔboka menli ekpunli ne anwo wɔ alie ne anwo bɛyɛ nzɛlɛlɛ wɔ bɛ ti anu kɛyɛ dɔnehwele foa ko. Mɔɔ ɔnwunle Gyisɛse adɔma nu la, ɔhanle ɔ nwo “edwɛkɛ ɔhilele bɛdabɛ mɔɔ bɛ nye la kɛ Nyamenle barakpɔne Gyɛlusalɛm la.”—Luku 2:38.

17. Kɛzi yɛbahola yɛaboa Keleseɛnema mɔɔ anye ɛvi anzɛɛ ɛnde kpɔkɛ la, yɛamaa bɛanyia nɔhalɛ ɛzonlenlɛ nu kyɛfoa ɛ?

¹⁷ Ɛnɛ, ɔwɔ kɛ yɛmaa yɛ nye da ɛkɛ yɛboa mediema mɔɔ ɛnyi anzɛɛ bɛnde kpɔkɛ la. Bɛ nuhua dɔɔnwo mɔɔ bɛ nye die nwo kɛ bɛ nee yɛ bahɔ debiezukoalɛ la ɛngola kɔ. Asafo bie mɔ fi ɛlɔlɛ nu yɛ ngyehyɛleɛ maa menli mɔɔ anye ɛvi la dua telefuu zo tie gyimalilɛ ne. Noko, bɛnrɛhola bɛnrɛyɛ ye zɔ wɔ ɛleka bie mɔ. Yemɔ bɔbɔ anzi, saa Keleseɛnema ɛngola debiezukoalɛ kɔ a bɛkola bɛboa nɔhalɛ ɛzonlenlɛ. Kɛ neazo la, bɛ asɔneyɛlɛ kola maa asafo debiezukoalɛ ne kɔ zo.—Bɛgenga Edwɛndolɛ 92:13, 14.

18, 19. (a) Kɛmɔti a Keleseɛnema mɔɔ anye ɛvi la ɛnrɛnwu kɛzi bɛmaa awie mɔ anwosesebɛ la ɛ? (b) Nwane mɔ a bahola ali folɛdulɛ: “Bɛhakye bɛ Bɔvolɛ ne” azo a?

¹⁸ Bie a Keleseɛnema mɔɔ anye ɛvi la ɛnrɛnwu kɛzi bɛmaa mediema anwosesebɛ la. Kɛ neazo la, ɔwɔ nuhua kɛ Ana lile nɔhalɛ ɛvolɛ dɔɔnwo zonlenle wɔ ɛzonlenlɛ sua ne anu ɛdeɛ, noko yeanwu ye kɛ ye neazo ne bamaa awie mɔ anwosesebɛ wɔ ɛvoya dɔɔnwo anzi. Bɛhɛlɛle ɛlɔlɛ mɔɔ ɛnee Ana lɛ maa Gyihova la bɛdole ɛkɛ wɔ Ngɛlɛlera ne anu. Bɛhɛlɛ ɛlɔlɛ mɔɔ ɛlɛ ɛmaa Nyamenle la noko wɔ ɛ mediema diedima ahonle nu. Tɛ mgbane ala a, Nyamenle Edwɛkɛ ne ka kɛ: ‘Mgbanyinli egyɛne le anyunlunyia abɔtile maa mɔɔ lɛ ye, na ɛbɛla kpalɛ ɛbɔlɛ a maa bɛnyia ye la a’!—Mrɛ. 16:31.

¹⁹ Awie biala lɛ mɔɔ ɔbahola ye yɛ la wɔ Gyihova ɛzonlenlɛ nu. Noko ɔwɔ kɛ bɛdabɛ mɔɔ bɛtɛdɛ anwosesebɛ la fa edwɛkɛ ɛhye mɔɔ sunsum ne manle bɛhɛlɛle la kɔ adwenle nu kpalɛ: “Bɛhakye bɛ Bɔvolɛ ne kolaa na munzule mekɛ ne . . . adwu.”—Nolo. 12:1.