1, 2. (a) Duzu a fa adwenle nu anyenzinlira ba a? (b) Duzu a yɛze ye wɔ Nyamenle Belemgbunlililɛ ne anwo a?

BIE a wɔyɛ ye nzonlɛ kɛ asolo kɛzi menli kola kakye edwɛkɛ bie mɔɔ zile bɛ nye zo la. Zɔhane ala a awie arɛle bahola avi edwɛkɛ fɔɔnwo mɔɔ dɔketa bie hanle hilele ye wɔ ye ewule nwo la a. Anzɛɛ awie bahola akpondɛ ye sanvɛ anzɛɛ ye ɛhwɛleɛ wɔ mekɛ mɔɔ ɔla ɔ nwo ɛkɛ ne ala la. Kɛmɔti a ɔyɛ a ɔba ye zɔ ɛ? Neɛnleanu kile kɛ ɔle anyezinlira tɛnlabelɛ mɔɔ adwenle ne kɔ nu wɔ mekɛ mɔɔ ɔlɛbɔ mɔdenle kɛ ɔyɛ ninyɛne dɔɔnwo wɔ mekɛ ko ne ala anu la. Debie ko ala yɛɛ adwenle ne kola di nwolɛ gyima kpalɛ wɔ mekɛ ko anu a.

² Menli dɔɔnwo mɔɔ bɛwɔ ewiade ye anu ɛnɛ la noko lɛ “zɛhae anyezinlira ye bie” wɔ ninyɛne mɔɔ ɛlɛsisi la anwo. Bie a bɛdie bɛto nu kɛ ninyɛne ɛhakyi kpalɛ ɔvi 1914, noko bɛnze mɔɔ ninyɛne ɛhye mɔ kile la. Kɛ Baebolo sukoavoma la, yɛze kɛ Nyamenle Belemgbunlililɛ ne bɔle ɔ bo 1914, mekɛ mɔɔ bɛvale Gyisɛse bɛziele Belemgbunli wɔ anwuma la. Noko, yɛtɛnyianle yɛ nzɛlɛlɛ ɛhye anwo mualɛ bɔkɔɔ: “Wɔ belemgbunlililɛ ɛrɛla; Bɛyɛ Wɔ ɛhulolɛdeɛ wɔ azɛlɛ ye azo, Kɛmɔ bɛyɛ ye wɔ anwuma lɔ la.” (Mat. 6:10) Ewiade ɛhye awieleɛ ne boka mualɛ  ne anwo. Kyesɛ edwɛkɛ ɛhye ba nu kolaa na Nyamenle ɛhulolɛdeɛ ayɛ ɛkɛ bɔkɔɔ wɔ azɛlɛ ye azo kɛmɔ bɛyɛ ye wɔ anwuma la.

3. Duzu a Baebolo ne mɔɔ yɛsukoa la ɛmaa yɛnwu ye a?

³ Baebolo ne mɔɔ yɛsukoa ye dahuu la ɛmaa yɛnwu kɛ ngapezo bie mɔ ɛlɛba nu ɛnɛ. Nea kɛzi ɛhye maa yɛyɛ ngakyile a! Menli ɛmaa bɛ ɛbɛlabɔlɛ ɛli bɛ adwenle ne somaa yemɔti bɛnwu daselɛ wienyi ne mɔɔ kile kɛ Kelaese ɛbɔ ye tumililɛ bo ɔvi 1914 na ɔnrɛhyɛ ɔbazɛkye ɛtane ewiade ɛhye la. Noko, biza ɛ nwo kɛ: Ɔnva nwo ɛvolɛ dodo mɔɔ meva mezonle la, asoo medie medi kɛ ewiade ɛhye awieleɛ ne ɛbikye kpalɛ na ninyɛne mɔɔ ɛlɛsisi la di nwolɛ daselɛ ɔ? Saa ɛrayɛle adiema la ɔtɛkyɛle bɔbɔ a, duzu a wɔva wɔ adwenle wɔzie zo kpalɛ a? Ɔnva nwo kɛzi yɛ mualɛ ne de biala la, bɛmaa yɛzuzu ninyɛne titile nsa mɔɔ maa yɛ anwodozo kɛ ɔnrɛhyɛ Nyamenle Belemgbunli ne mɔɔ yekpokpa ye la baha ɔ nwo na ɔlua zo bɛayɛ Nyamenle ɛhulolɛdeɛ bɔkɔɔ wɔ azɛlɛ ye azo la anwo.

4, 5. (a) Ɔbɔ ye 1914, duzu a Gyisɛse ɛlɛyɛ a? (Nea mɔlebɛbo nvoninli ne.) (b) Mgbɔnwɔkavolɛma nsa ne gyi ɛkɛ maa duzu, na kɛzi ninyɛne ɛlɛkɔ ye ɛ?

⁴ Bɛvale Gyisɛse Kelaese bɛziele Nyamenle Belemgbunlililɛ ne azo Belemgbunli wɔ 1914. Ngapezo ne mɔɔ wɔ Yekile ati 6 la pɛ ye nvoninli kɛ awie mɔɔ ɔlɛka ɛkpɔnwɔ fufule. Mɔɔ bɛziele ye Belemgbunli ala la yɛɛ ɔbɔle ɔ bo kɛ ɔdi Seetan ewiade ne azo konim a. (Bɛgenga Yekile 6:1, 2.) Ngapezo ne hanle kɛ saa Nyamenle Belemgbunli ne bɔ ye tumililɛ bo a, ninyɛne bazɛkye kpalɛ wɔ ewiade ne anu. Konle, ɛhɔne, anwondolɛ, nee ninyɛne gyɛne mɔɔ ku menli la bahɔ ɔ nyunlu kpalɛ. Bɛva mgbɔnwɔkavolɛma nsa mɔɔ bɛli Gyisɛse Kelaese anzi la bɛyɛ ɛhye mɔ anwo nvoninli wɔ ngapezo ne anu.—Yek. 6:3-8.

⁵ Kɛmɔ ngapezo ne hanle la, konle ‘ɛye anzondwolɛ ɛvi azɛlɛ ye azo.’ Ɛhye le zɔ ɔnva nwo kɛ maanle maanle dɔɔnwo ɛbɔ ɛwɔkɛ kɛ bɛbayɛ gyima ɛsesebɛ bɛamaa anzondwolɛ adɛnla ɛkɛ la. Ewiade Konle I le konle mgbole mɔɔ baye anzondwolɛ avi azɛlɛ ye azo la anu ko ala. Ɔnva nwo anyuhɔlɛ mɔɔ bɛnyia ye wɔ ezukoa nee abɔdeɛ nwo nrɛlɛbɛ nu ɔvi 1914 la, ɛhɔne tɛku menli. Ewule ngakyile, esiane, nee ninyɛne gyɛne mɔɔ pɛ menli ngoane zo la kɔ zo ku menli dɔɔnwo ɛvolɛ biala. Ninyɛne ɛhye mɔ ɛlɛyɛ ɛzulolɛ kpalɛ, ɔta ɔsi, yɛɛ ɔku menli ɔtɛla mekɛ biala wɔ alesama tetedwɛkɛ nu. Asoo wɔnwu mɔɔ ɛhye mɔ kile la?

6. Nwane mɔ a nwunle Baebolo ngapezo mɔɔ rale nu la a, na duzu a ɛhye hanle bɛ manle bɛyɛle a?

⁶ Ewiade Konle I nee Spanish influenza ne gyegyele menli dɔɔnwo. Noko ɛnee Keleseɛnema mɔɔ bɛkpokpa bɛ la anye la Maanle Maanle anzɛɛ ‘menli mɔɔ ɛnze Nyamenle la mekɛ ne’ awieleɛ ade wɔ 1914. (Luku 21:24) Ɛnee bɛnze debie mɔɔ ɔbazi la ɛdeɛ, noko bɛnwunle kɛ 1914 bayɛ mekɛ titile wɔ Nyamenle tumililɛ nu. Mɔɔ bɛnyianle Baebolo ngapezo nwo ndelebɛbo ala la yɛɛ bɛbɔle ɔ bo kɛ bɛka ye bagua nu bɛahile menli kɛ Nyamenle tumililɛ ɛbɔ ɔ bo a. Bɛ mɔdenlebɔlɛ ne vale ɛkpɔlɛ kpole rale. Ɛkpɔlɛ ɛhye mɔɔ zile maanle dɔɔnwo anu la le ngapezo mɔɔ rale nu. Wɔ ɛvoya mɔɔ doa zo la anu, Belemgbunlililɛ ne anwo agbɔvolɛma bɔle mɔdenle kɛ “bɛfa amumuyɛ adwenle bɛali bɛ mɛla.” Eza bɛyɛle yɛ mediema ne mɔ kpɔdekpɔde, bɛguale bɛ efiade, bɛhendale bɛ, bɛdole bɛ ɛtu, anzɛɛ bɛpepɛle bie mɔ ati.—Edw. 94:20; Yek. 12:15.

7. Duzu ati a menli dɔɔnwo ɛtɛtele mɔɔ ninyɛne mɔɔ ɛlɛsisi ewiade kile la abo ɛ?

⁷ Duzu ati a ɔnva nwo daselɛ ɛwolaa  ɛhye mɔɔ kile kɛ Nyamenle Belemgbunlililɛ ne ɛbɔ ye tumililɛ bo wɔ anwuma la wɔ ɛkɛ noko menli dɔɔnwo anlie ando nu ɛ? Kɛmɔti a bɛanwu ye kɛ ninyɛne mɔɔ ɛlɛsisi ewiade ye anu la nee Baebolo ngapezo ngakyile mɔɔ Nyamenle menli ɛva ɛvolɛ dɔɔnwo ɛha nwolɛ edwɛkɛ la kile debie fɔɔnwo bie ɛ? Asoo ɔbahola yeara ye kɛ menli ɛhye mɔ fa bɛ adwenle sie ninyɛne mɔɔ bɛ nye nwu bɛ la ala azo ɔ? (2 Kɔl. 5:7) Asoo ɛbɛlabɔlɛ nu ninyɛne mɔɔ ɛli bɛ adwenle la yɛɛ ɛmmaa bɛnnwu mɔɔ Nyamenle ɛlɛyɛ la ɔ? (Mat. 24:37-39) Anzɛɛ adalɛ edwɛkɛ mɔɔ Seetan dua adwelie ngɛlata zo fa yɛ dede la twehwe bɛ adwenle ɔ? (2 Kɔl. 4:4) Diedi nee sunsum nu ndelebɛbo nwo hyia kpalɛ amaa awie anwu mɔɔ Gyihova ɛlɛyɛ la. Nea kɛzi yɛ nye die kɛ yɛ nye ɛtɛsinli wɔ ninyɛne mɔɔ ɛlɛsisi la anwo a!

8-10. (a) Kɛzi 2 Temɔte 3:1-5 ne ɛra nu ɛ? (b) Duzu ati a yɛkola yɛka kɛ amumuyɛma ati ɛlɛyɛ se kpalɛ ɛ?

⁸ Debie mɔɔ tɔ zo nwiɔ mɔɔ ɔmaa yɛkola yɛka ka ɔnrɛhyɛ Nyamenle Belemgbunlililɛ ne bali tumi wɔ azɛlɛ ye azo la a le kɛ: Amumuyɛma ɛlɛmaa bɛ ti ayɛ se kpalɛ adɛla mekɛ biala. Kɛyɛ ɛvolɛ ɛya ko ɛne yɛɛ yɛnwu kɛ ngapezo ne mɔɔ wɔ 2 Temɔte 3:1-5 la ɛra nu a. Yeanyɛ boɛ fee la, ninyɛne mɔɔ bɛha nwolɛ edwɛkɛ wɔ ɛkɛ la ɛhɔ ɔ nyunlu dɔɔnwo wɔ ewiade ɛleka biala. Asoo ɛnnwu kɛ ngapezo ɛhye noko ɛra nu kpalɛ ɔ? Maa yɛnlea neazo bie mɔ mɔɔ kilehile ɛhye anu la.—Bɛgenga 2 Temɔte 3:1, 13.

⁹ Bɛmaa yɛva ninyɛne mɔɔ ɛnee bɛbu ye kɛ ɔnle kpalɛ wɔ 1940 anzɛɛ 1950 ne mɔ anu la yɛdo mɔɔ ɛlɛkɔ zo ɛnɛ wɔ gyima, anyelielɛ ninyɛne, nwɔhoalilɛ nee anwoziezielɛ nu la anwo yɛnlea. Basabasayɛlɛ nee ɛbɛlatane ɛbu zo. Menli su wɔ basabasayɛlɛ, ɛbɛlatane ɛbɔlɛ nee asa ɛyɛlɛ nu. Ɛnɛ, mbusua fa tɛlevihyɛne zo gyimalilɛ mɔɔ ɛnee bɛbu ye kɛ ɔle ɛtane wɔ 1950 ne mɔ anu la dielie bɛ nye. Ɛnɛ, menli mɔɔ bɛ awodeɛ le ko mɔɔ bɛfa bɛ nwo la ɛlie ebia wɔ anyelielɛ ninyɛne nu, yɛɛ bɛfa bɛ nyɛleɛ ne bɛtu bɛ nloa anu wɔ bagua nu. Yɛyɛ Nyamenle mo kɛ yemaa yɛnwu ye adwenle wɔ ɛhye mɔ anwo la!—Bɛgenga Dwuudu 14, 15.

 ¹⁰ Anzɛɛ Keleseɛnenli bahola ava nyɛleɛ mɔɔ ɛnee bɛbu ye kɛ ɔle atuadelɛ wɔ 1950 ne anu la yeado mɔɔ ɛlɛkɔ zo ɛnɛ la anwo. Ɛnee awovolɛ di nyane kpole wɔ mekɛ mɔɔ bɛ mra kɛnlo sigalɛte, nza, anzɛɛ kɛzi adwɔmane agole la. Ɛnɛ, ninyɛne ɛhye mɔ ɛnyɛ azibɛnwo bieko: Sukulu kakula bie mɔɔ yeli ɛvolɛ 15 la hwenle ɛtu hunle menli 2 na ɔbodale menli 13 wɔ ye sukulu ɛkɛ. Ngakula ekpunli bie mɔɔ ɛnlo nza ɛbo la bodale kakula raalɛ mɔɔ yeli ɛvolɛ ngɔnla la na bɛbole ye papa nee ɔ diema. Nolobɔlɛ bieko ka kɛ, wɔ Asia maanle bie anu, ngakula a wuale ninyɛne bie mɔɔ minlinle ɛvolɛ bulu anu la foa ko a. Asoo awie bahola azu kpolera kɛ ninyɛne ɛngɔ ye boɛ ɔ?

11. Duzu ati a menli dɔɔnwo ɛnnwu ye kɛ ninyɛne ɛlɛsɛkye a?

¹¹ Ɛzoanvolɛ Pita hanle ye wienyi kɛ: “Ɔwɔ kɛ bɛnyia ndelebɛbo kɛ mekɛ mɔɔ li awieleɛ la amgbuzilɛma bie mɔɔ di bɛ atiakunluwɔzo nzi la badwazo na bɛarazi bɛ amgbu. Bɛbagolo bɛ nwo, na bɛabiza kɛ, ‘Se ɔbɔle ɛwɔkɛ kɛ ɔbara, na ɔwɔ nienwu? Sumunli mɔmoane mɔɔ yɛ nlenya mɔ wule la, kɛ debie biala de, ɔvi aloamɔleɛ la yɛɛ ɔde a.’” (2 Pita 3:3, 4) Duzu a maa menli yɛ ninyɛne ɛhye mɔ a? Ɛbaha kɛ fane dodo mɔɔ yɛnwu debie bie la ɛmmaa yɛmbu nwolɛ mgbonda bieko. Saa yɛ gɔnwo bie subane kakyi arɛlevilɛ nu a ɔyɛ yɛ azibɛnwo, noko saa menli subane nee bɛ nyɛleɛ kakyi ngyikyingyikyi a, wɔannea a yɛnrɛnwu ye. Noko akee, esiane wɔ ɛbɛla kpalɛ mɔɔ sɛkye ngyikyingyikyi la anu.

12, 13. (a) Kɛmɔti a ɔnle kɛ yɛmaa ninyɛne mɔɔ ɛlɛsisi la maa yɛ sa nu to ɛ? (b) Duzu a bamaa yɛagyinla awieleɛ mekɛ ɛhye mɔɔ “anwongyelelɛ dɔɔnwo” wɔ nu la anloa a?

¹² Ɛzoanvolɛ Pɔɔlo bɔle yɛ kɔkɔ kɛ wɔ “awieleɛ mekɛ ne” anu “anwongyelelɛ dɔɔnwo” bara. (2 Tem. 3:1) Noko ɛhye mɔ ɛnle debie mɔɔ yɛnrɛhola ɔ nloa gyinla a, yemɔti ɔnle kɛ yɛnriandi. Ɔlua Gyihova, ye sunsum ne, nee Keleseɛne asafo ne moalɛ zo, yɛbahola yɛali ngyegyelɛ nee ɛzulolɛ biala mɔɔ ɔbara yɛ nwo zo la azo konim. Yɛbahola yɛahɔ zo yɛali nɔhalɛ! “Tumi bedevinli ne” le Nyamenle ɛdeɛ, na ɔnle yɛ ɛdeɛ.—2 Kɔl. 4:7-10.

¹³ Pɔɔlo vale edwɛkɛ “mekpondɛ kɛ ɛnwu ye kɛ” a bɔle ye awieleɛ mekɛ ne anwo ngapezo ne abo a. Edwɛkɛ ɛhye kile kɛ ninyɛne mɔɔ doa ye la bayɛ debie mɔɔ yɛkola yɛnwu ye. Amumuyɛma ati bahɔ zo ayɛ se kpalɛ kɔkpula kɛ Gyihova bava ɔ nwo alie nu yeapɛ zo la. Tetedwɛkɛ kɛlɛvoma ɛha kɛ maanle bie mɔ ɛbɛlabɔlɛ zɛkyele kpole kpalɛ ɔmanle ɔbɔle bɔkɔɔ. Ɛnɛ, kɛzi menli ɛbɛla ɛzɛkye wɔ ewiade ye amuala la, bie ɛtɛsile ɛlɛ wɔ alesama tetedwɛkɛ nu. Bie a menli dɔɔnwo babu bɛ nye agua mɔɔ ɛhye kile la azo, noko ninyɛne ɛhye mɔ mɔɔ ɛlɛsisi ɔvi 1914 la da ye ali wienyi kɛ ɔnrɛhyɛ Nyamenle Belemgbunlililɛ ne bamaa amumuyɛ kɔsɔɔti ara awieleɛ.

14-16. Debie mɔɔ tɔ zo nsa mɔɔ maa yɛnwu kɛ ɔnrɛhyɛ na Nyamenle Belemgbunlililɛ ne ‘ara’ la a le duzu?

¹⁴ Debie mɔɔ tɔ zo nsa mɔɔ maa yɛnyia anwodozo kɛ awieleɛ ne ɛbikye la noko wɔ ɛkɛ. Mɔɔ ɛhɔ zo wɔ Nyamenle menli avinli la di ɛhye anwo daselɛ. Kɛ neazo la, kolaa na bɛava Nyamenle Belemgbunlililɛ ne bɛazie ɛkɛ wɔ anwuma la, ɛnee nɔhavoma ekpunli bie mɔɔ bɛkpokpa bɛ la ɛlɛsonle Nyamenle. Mɔɔ ɛnee bɛ nye la ye wɔ 1914 ammaa la, duzu a bɛyɛle a? Bɛ nuhua dɔɔnwo lile nɔhalɛ wɔ sɔnea nee ɛkpɔlɛ mekɛ nu na bɛhɔle zo bɛzonlenle Gyihova. Ɛvolɛ dɔɔnwo mɔɔ ɛze la, menli mɔɔ bɛkpokpa bɛ la anu dɔɔnwo—saa tɛ bɛ muala a, ɛva nɔhalɛlilɛ ɛwie bɛ azɛlɛ ye azo gyima ne.

¹⁵ Gyisɛse hanle ye wɔ ngapezo ne mɔɔ fane Seetan ewiade ye awieleɛ ne  anwo la anu kɛ: “Ninyɛne ɛhye mɔ bazi na menli mɔɔ kɛkala de aze la amuala awie wu [anzɛɛ, “awolɛndoazo ɛhye ɛnrɛpɛ nu ɛlɛ kɔkpula kɛ ninyɛne ɛhye mɔ amuala bara nu,” NW].” (Bɛgenga Mateyu 24:33-35.) Yɛze kɛ ɛnee Gyisɛse ɛlɛka Keleseɛnema ekpunli nwiɔ mɔɔ bɛkpokpa bɛ la anwo edwɛkɛ wɔ mekɛ mɔɔ ɔhanle “awolɛndoazo ɛhye” anwo edwɛkɛ la. Ɛnee ekpunli ne mɔɔ lumua la wɔ ɛkɛ wɔ 1914, na bɛnwunle sɛkɛlɛneɛ ne mɔɔ kile kɛ Kelaese ɛbɔ ye tumililɛ bo wɔ ɛvolɛ zɔhane anu la. Menli mɔɔ wɔ ekpunli ɛhye anu la ɛnle menli mɔɔ ɛnee de aze ala wɔ 1914, emomu, bɛvale sunsum ne bɛkpokpale bɛ kolaa na zɔhane ɛvolɛ ne adwu anzɛɛ wɔ ɛvolɛ zɔhane anu.—Wulo. 8:14-17.

¹⁶ Menli mɔɔ wɔ ekpunli ne mɔɔ tɔ zo nwiɔ wɔ “awolɛndoazo ɛhye” anu la, radole ekpunli ne mɔɔ lumua la anu amra. Tɛ yemɔ angome, ɛnee eza bɛva sunsum nwuanzanwuanza ne bɛkpokpa bɛ wɔ mekɛ mɔɔ ekpunli ko ne anu amra bie wɔ azɛlɛ ye azo la. Yemɔti tɛ awie biala mɔɔ bɛkpokpa ye ɛnɛ la a boka “awolɛndoazo ɛhye” mɔɔ Gyisɛse hanle bɛ nwo edwɛkɛ la anwo a. Ɛnɛ, menli mɔɔ wɔ ekpunli ɛhye mɔɔ tɔ zo nwiɔ noko anu la anye ɛvi. Noko, Gyisɛse edwɛkɛ ne mɔɔ wɔ Mateyu 24:34 la maa yɛnyia anwodozo kɛ ‘awolɛndoazo ɛhye anu amra bie mɔ ɛnrɛpɛ nu’ na anwongyelelɛ kpole ne abɔ ɔ bo. Ɔwɔ kɛ ɛhye maa diedi mɔɔ yɛlɛ kɛ yeha mekɛ ekyi bie ala na Nyamenle Belemgbunlililɛ ne azo Belemgbunli ne azɛkye ɛtanevolɛma na yeava tenlene ewiade fofolɛ ne yeara la yɛ kpole.—2 Pita 3:13.

17. Duzu a yɛsukoa yɛfi daselɛ nsa ne mɔɔ yɛzuzu nwo la anu a?

¹⁷ Duzu a yɛsukoa yɛfi daselɛ nsa ne mɔɔ yɛzuzu nwo la anu a? Gyisɛse bɔle kɔkɔ kɛ yɛnze kenle ne nee dɔnehwele ne yɛɛ yɛnrɛnwu ye. (Mat. 24:36; 25:13) Noko kɛmɔ Pɔɔlo hanle la, yɛze kɛ ‘mekɛ ɛdwu mɔɔ ɔwɔ kɛ yɛfi nafelɛ nu yɛdwazo a.’ (Bɛgenga Wulomuma 13:11.) Yɛwɔ awieleɛ mekɛ ne anu. Saa yɛfa yɛ adwenle yɛsie Baebolo ngapezo, nee mɔɔ Gyihova Nyamenle yɛɛ Gyisɛse Kelaese ɛlɛyɛ la azo kpalɛ a, yɛbanwu daselɛ mɔɔ kile kɛ amgba yɛwɔ ewiade ɛhye awieleɛ mekɛ ne anu la.

18. Duzu a bado menli mɔɔ kpo kɛ bɛbalie Nyamenle Belemgbunlililɛ ne bɛado nu la ɛ?

¹⁸ Ɔnrɛhyɛ, menli mɔɔ kpo kɛ bɛbalie tumi kpole ne mɔɔ bɛva bɛmaa Gyisɛse Kelaese, ɛkpɔnwɔ fufule ne Kavolɛ ne mɔɔ ɔlɛdi konim bɛado nu la bɛanwu kɛ bɛvo kpole. Bɛnrɛhola gyinla. Mekɛ zɔhane, menli dɔɔnwo bava ɛzulolɛ azu adeɛdea nu kɛ: “Nwane bɔbɔ a kɛhola kɛgyinla ɔ nloa a?” (Yek. 6:15-17) Yekile ati nsuu ne bua kpuyia ɛhye. Kenle zɔhane, menli mɔɔ bɛkpokpa bɛ la nee bɛdabɛ mɔɔ bɛlɛ anyelazo kɛ bɛbadɛnla azɛlɛ ye azo la, bahola “gyinla,” ɔluakɛ Nyamenle die bɛ to nu. Akee mboane gyɛne ne anu “menli pemgbenleamgbe” ne banyia bɛ ti wɔ anwongyelelɛ kpole ne anu.—Yek. 7:9, 13-15.

19. Kɛ awie mɔɔ ɛlɛ anwodozo kɛ ɔnrɛhyɛ na awieleɛ ne ara la, duzu a ɛ nye la ye ade a?

¹⁹ Saa yɛmaa yɛ nye da ɛkɛ yɛfa yɛ adwenle yɛsie Baebolo nu ngapezo mɔɔ ɛlɛba nu wɔ yɛ mekɛ ye anu la azo a, Seetan ewiade ne anu dede ne ɛnrɛhwehwe yɛ adwenle; yɛɛ yɛnrɛyɛ anyezinlirama wɔ mɔɔ ɛhye mɔ kile la anwo. Ɔnrɛhyɛ, Kelaese baho ye konle ne mɔɔ li awieleɛ mɔɔ ɔbava yeazɛkye ɛtane ewiade ɛhye wɔ tenleneyɛlɛ nu la yeava yeawie ye konimlilɛ ne. (Yek. 19:11, 19-21) Pɛ anyelielɛ mɔɔ Baebolo ne ka kɛ yɛbanyia ye wɔ zɔhane mekɛ ne la anwo nvoninli nea!—Yek. 20:1-3, 6; 21:3, 4.