Amaneɛnwunlɛ bahola agyegye yɛ kpole kpalɛ. Ɔkola ɔsɛkye yɛ adwenle, ɔmaa yɛyɛ bɛtɛɛ na ɛbɛlabɔlɛ fonle yɛ. Belemgbunli Devidi mɔɔ dɛnlanle aze wɔ tete Yizilayɛ la hɔle ngyegyelɛ dɔɔnwo anu. Kɛzi ɔlile nwolɛ gyima ɛ? Devidi luale edwɛne mɔɔ ka ahonle la azo buale kɛ: “Metea nu mefɛlɛ [Gyihova], mefa me modolɛ nzɛlɛlɛ meto ɔ nyunlu. Meye me edwɛkɛ kɔsɔɔti meto ɔ nyunlu; meka me amaneɛnwunlɛ mekile ye. Saa me ɛnwomenle wie a, ɛze me ndenle kɔsɔɔti.” Ɛhɛe, Devidi bɛlɛle ɔ nwo aze zɛlɛle Nyamenle moalɛ.—Edw. 142:1-3.

Devidi hanle ye wɔ ye edwɛne bieko anu kɛ: ‘Debie ko yɛɛ mebiza ye Gyihova ɛkɛ a, na yemɔ yɛɛ mebakpo ɔ bo zo a; kɛ menwɔdɛnla Gyihova sua nu dahuu, wɔ mekɛ mɔɔ mede ngoane nu, kɛ menwɔnwu kɛ Gyihova kɛnlɛma si de, na meabiza moalɛ wɔ ye Ɛzonlenlɛ Sua ne anu.’ (Edw. 27:4) Ɛnee Devidi ɛnle Livaenli, noko dwenle nwo nea kɛ ɔgyi ɛleka nwuanzanwuanza mɔɔ ɔbikye ɛleka mɔɔ bɛsonle nɔhalɛ ɛzonlenlɛ la wɔ alie ne anwo. Devidi nyianle anyezɔlɛ kpole wɔ ye ahonle nu na ɔhulole kɛ ɔkɛva ye ngoane mekɛ kɔsɔɔti ɔkɛdɛnla ɛkɛ amaa yeanwu “kɛ [Gyihova] kɛnlɛma si de.”

Edwɛkɛkpɔkɛ “kɛnlɛma” kile “debie mɔɔ ɔle kpalɛ, anzɛɛ adwenle nee nganeɛdelɛ mɔɔ anu te.” Devidi anye zɔle Nyamenle ngyehyɛleɛ mɔɔ yeyɛ yemaa ye ɛzonlenlɛ la dahuu. Bie a yɛbabiza yɛ nwo kɛ, ‘Asoo mete nganeɛ mɔɔ Devidi dele la bie?’

Ɛnɛ, ngyehyɛleɛ mɔɔ yɛdua zo yɛbikye Gyihova la ɛngyi sua bie mɔɔ ɛnyelɛ nwu ye la azo. Emomu, yemɔ a le Nyamenle sunsum nu ɛzonlenlɛ sua kpole ne—ngyehyɛleɛ nwuanzanwuanza mɔɔ bɛdua zo bɛsonle nɔhalɛ nu la. * Saa yɛkile anyezɔlɛ wɔ ngyehyɛleɛ ɛhye anwo a, yɛdayɛ noko ‘yɛbanwu kɛ Gyihova kɛnlɛma si de la.’

Suzu kɔbele azukponle ne mɔɔ bɛyela azubɔdeɛ wɔ zo mɔɔ ɛnee gyi ndanlɛ sua ne anuhɔlɛ ne la anwo nea. (Ade. 38:1, 2; 40:6) Azukponle zɔhane gyi ɛkɛ maa ɛhulolɛ mɔɔ Nyamenle lɛ kɛ ɔbalie Gyisɛse afɔlebɔlɛ ne yeado nu la. (Hib. 10:5-10) Dwenle mɔɔ ɛhye kile maa yɛ la anwo nea! Ɛzoanvolɛ Pɔɔlo hɛlɛle kɛ: “Mɔɔ ɛnee yɛle Nyamenle kpɔvolɛma la, yelua ɔ Ra ne ewule zo ɔ nee yɛ ɛli ngamɔnu na yeyɛ yɛ ɔ gɔnwo mɔ.” (Wulo. 5:10) Saa yɛnyia diedi wɔ Gyisɛse mogya ne anu a, yɛbahola yɛanyia Nyamenle anyunlu ɛlolɛ na yɛanyia anwodozo kɛ yɛle Ɔ gɔnwo. Saa yɛyɛ zɔ a, yɛ nee ‘Gyihova bɛanyia agɔnwolɛvalɛ mɔɔ anu yɛ se.’—Edw. 25:14.

Ɔluakɛ yɛnlu yɛ nwo na yɛzia yɛra Nyamenle ɛkɛ la ati, yeva yɛ “ɛtane ne mɔ amuala” yehyɛ yɛ. (Gyi. 3:19) Yɛ gyinlabelɛ ne le kɛ pilizanli mɔɔ ɔdi ninyɛne mɔɔ ɔyɛle ye dɛba la anwo nyane na ɔyɛ nzenzaleɛ wɔ mekɛ mɔɔ ɔlɛkendɛ kɛ bɛbahu ye la. Ndɛnebuavolɛ mɔɔ se anwunvɔne la nwu ɛhye a, ɔbamaa bɛapɛ nrenya ne edwɛkɛ ne anu—mɔɔ bɛnrɛhu ye a. Nea kɛzi pilizanli ɛhye bali fɛlɛko a! Kɛmɔ ndɛnebuavolɛ ne yɛle la, Gyihova nwu bɛdabɛ mɔɔ bɛnlu bɛ nwo la anwunvɔne na ɔmbua bɛ ewule fɔlɛ.

Ninyɛne mɔɔ fane nɔhalɛ ɛzonlenlɛ nwo mɔɔ Devidi nwunle ye wɔ Gyihova ɛzonlenlɛ sua ne  anu la bie a le ɔ gɔnwo mɔ Yizilayɛma dɔɔnwo ne mɔɔ ɔ nee bɛ yia nu, Mɛla ne mɔɔ bɛkenga na bɛkilehile nu wɔ bagua nu, ɛyɛlɛ evuanlɛ ne mɔɔ bɛyela, yɛɛ ɛsɔfoma nee Livaema ɛzonlenlɛ nwuanzanwuanza ne. (Ade. 30:34-38; Ɛdi. 3:5-8; Mɛla 31:9-12) Nɔhalɛ ɛzonlenlɛ nu gyimalilɛ ɛhye mɔ mɔɔ ɛnee wɔ tete Yizilayɛ la lɛ ye sɔhovolɛ ɛnɛ.

Kɛmɔ ɛnee ɔde ye wɔ tete ne la, ɛnɛ noko nea “kɛ ɔsi ɔle kɛnlɛma nee kpalɛ, kɛ mediema kɛbɔ nu kɛdɛnla koyɛlɛ nu [a]!” (Edw. 133:1) Yɛ “gɔnwo mɔ diedima” anwo ɛlɛso kpalɛ wɔ ewiade amuala. (1 Pita 2:17) Bɛkenga Nyamenle Edwɛkɛ ne bɛkilehile nu wɔ yɛ debiezukoalɛ ne mɔ abo. Gyihova dua ye ahyehyɛdeɛ ne azo ɔfa adehilelɛ kpalɛ ɔmaa yɛ. Eza bɛdua mbuluku zo bɛmaa yɛ sunsum nu aleɛ dɔɔnwo mɔɔ yɛfa yɛyɛ bɛtianwo nee abusua debiezukoalɛ. Neazo Eku ne anu amra ko hanle kɛ: “Saa medwenledwenle Gyihova Edwɛkɛ ne anwo, mesuzu mɔɔ ɔkile la anwo, mekpondɛ nwunu nee ndelebɛbo nwonlomɔ biala a, ɔmaa menyia sunsum nu anwonyia nee ahunlundwolɛ.” Ɛhɛe, ‘adwenle nu ɛbukelɛ’ kola maa yɛ nye die kpalɛ.—Mrɛ. 2:10.

Ɛnɛ, Gyihova Nyamenle die ye azonvolɛ nzɛlɛlɛ to nu dahuu. Gyihova bu nzɛlɛlɛ ɛhye mɔ kɛ ɛyɛlɛ evuanlɛ. (Edw. 141:2) Nea kɛnlɛma mɔɔ ɔde kɛ, saa yɛbɛlɛ yɛ nwo aze yɛbikye Gyihova Nyamenle wɔ nzɛlɛlɛ nu a Ɔ nye die yɛ nwo kpalɛ a!

Mosisi zɛlɛle kɛ: “Maa yɛ Awulae yɛ Nyamenle ne anwunvɔnezelɛ ne ɛrɛla yɛ nwo zo, na maa yɛ sa anloa gyima ɛyɛ kpalɛ ɛmaa yɛ.” (Edw. 90:17) Saa yɛfa mɔdenlebɔlɛ yɛyɛ ɛzonlenlɛ gyima ne a, Gyihova yila yɛ gyima ne azo. (Mrɛ. 10:22) Bie a ɛnee yɛboa awie mɔ yɛmaa bɛzukoa nɔhalɛ ne. Ɔbayɛ kɛ yɛgyinla yɛ munlililɛ nu ɛvolɛ dɔɔnwo ne ala wɔ ɛzonlenlɛ gyima ne anu ɔnva nwo anyetele, anwodolɛ, nyanelilɛ anzɛɛ kpɔdekpɔdeyɛlɛ mɔɔ yɛyia la. (1 Tɛs. 2:2) Noko akee, ‘yɛnwu kɛ Gyihova kɛnlɛma si de’ nee kɛzi yɛ anwuma Selɛ ne anye die yɛ mɔdenlebɔlɛ nwo kpalɛ la.

Devidi dole edwɛne kɛ: “[Gyihova] a le me afoa nu ɛdeɛ nee me debie biala a; wɔmɔ yɛɛ ɛlɛ me a. Me ɛdeɛ ɛdɔ aze anyelielɛ nu ɛmaa me.” (Edw. 16:5, 6) Devidi hilele agɔnwolɛvalɛ mɔɔ ɔ nee Gyihova lɛ nee nwolɛ adenle mɔɔ yenyia ɔlɛsonle ye, mɔɔ ɔle ye “afoa nu ɛdeɛ” la anwo anyezɔlɛ kpole. Kɛmɔ ɔdole Devidi la, yɛdayɛ noko yɛbahola yɛahɔ ngyegyelɛ dɔɔnwo anu, noko yɛlɛ sunsum nu nyilalɛ dɔɔnwo! Yemɔti bɛmaa yɛhɔ zo yɛhile nɔhalɛ ɛzonlenlɛ nee Gyihova sunsum nu ɛzonlenlɛ sua ne anwo anyezɔlɛ dahuu.