1. Kɛmɔ bɛbɔle yɛ kɛ Nyamenle ɛsaso la ati, duzu a yɛkola yɛyɛ a?

BƐTA bɛka kɛ, “kɛ selɛ de la, zɔhane ala a ralɛ nrenya noko de a.” Nɔhalɛ nu, ngakula dɔɔnwo zɔho bɛ awovolɛ kpalɛ. Ye biala anu, selɛ nee ninli ne subane a bɛ ra ne bava a. Gyihova, yɛ anwuma Selɛ ne a le ngoane Maavolɛ ne a. (Edw. 36:9) Ɔ mra mɔɔ yɛle menli la zɔho ye wɔ adenle bie azo. Kɛmɔ ɔbɔle yɛ kɛ ye ɛsaso la ati, yɛkola yɛsuzu ninyɛne nwo yɛsi kpɔkɛ na yɛ nee ye nyia agɔnwolɛvalɛ dahuu.—Mɔl. 1:26.

2. Duzu a Gyihova gyinla zo maa yɛyɛ ɔ Gɔnwo a?

² Gyihova bahola ayɛ yɛ Gɔnwo kpalɛ. Agɔnwolɛvalɛ ɛhye gyi ɛlɔlɛ mɔɔ Nyamenle lɛ maa yɛ, nee diedi mɔɔ yɛlɛ ye wɔ ɔ nee ɔ Ra ne anu la azo. Gyisɛse hanle kɛ: “Ɔluakɛ Nyamenle hulole ewiade amra kpole kpalɛ la ati yɛɛ ɔvale Ɔ Ra kokye ne ɔmanle a, amaa awie biala mɔɔ kɛlie ye kɛli la anwu na yeanyia ngoane mɔɔ ɛnlɛ awieleɛ.” (Dwɔn 3:16) Menli mɔɔ bɛ nee Gyihova nyianle agɔnwolɛvalɛ kpalɛ la anwo neazo dɔɔnwo wɔ ɛkɛ. Bɛmaa yɛzuzu bɛ nuhua nwiɔ anwo.

3, 4. Ka ngakyile mɔɔ wɔ agɔnwolɛvalɛ mɔɔ Ebileham nee ɔ bo zo amra nee Gyihova nyianle la anu.

³ Gyihova vɛlɛle tete selɛ ne mɔɔ ɔ bo zo amra a le  Yizilayɛma la kɛ, “me gɔnwo Ebileham.” (Aye. 41:8) Edwɛkɛsisilɛ mɔɔ tɔ zo nwiɔ 20:7 ne noko ka Ebileham anwo edwɛkɛ kɛ ɔle Nyamenle agɔnwo. Duzu a nrenya nɔhavo ɛhye gyinlanle zo nee ye Bɔvolɛ ne nyianle agɔnwolɛvalɛ a? Ebileham diedi ne ɔ.—Mɔl. 15:6; bɛgenga Gyemise 2:21-23.

⁴ Ɛnee Gyihova le Ebileham abozoamra mɔɔ rayɛle tete Yizilayɛma la bɛ Ze nee bɛ Gɔnwo. Noko, ɔyɛ alɔbɔlɛ kɛ bɛzɛkyele agɔnwolɛvalɛ ɛhye mɔɔ bɛ nee Nyamenle nyianle la. Duzu ati ɔ? Bɛannyia diedi wɔ Gyihova ɛwɔkɛ ne mɔ anu.

5, 6. (a) Kɛ ɔyɛle mɔɔ Gyihova rayɛle ɛ Gɔnwo ɛ? (b) Kpuyia boni mɔ a ɔwɔ kɛ yɛsuzu nwo a?

⁵ Saa yɛsukoa Gyihova anwo debie dɔɔnwo a, ye nu diedi mɔɔ yɛlɛ nee ɛlɔlɛ mɔɔ yɛlɛ yɛmaa ye la noko yɛ kpole. Kakye mekɛ mɔɔ ɛlumuale ɛnwunle kɛ Nyamenle wɔ ɛkɛ amgba, na ɔle Awie mɔɔ ɛbahola ɛ nee ye ava agɔnwolɛ la. Eza ɛzukoale kɛ ɔlua Adam anzosesebɛ ne ati bɛwo yɛ kɔsɔɔti wɔ ɛtane nu. Ɛradele ɔ bo kɛ alesama amuala nee Nyamenle avinli ɛde. (Kɔl. 1:21) Akee ɛranwunle kɛ yɛ anwuma Selɛ ne mɔɔ lɛ ɛlɔlɛ la ɛnle angomedi sonla mɔɔ ɔndwenle sonla nwo a. Mɔɔ yɛzukoale ɔ ra Gyisɛse ɛkpɔnedeɛ afɔle ne anwo debie na yɛnyianle nu diedi la, yɛbɔle ɔ bo yɛ nee Nyamenle nyianle agɔnwolɛvalɛ.

⁶ Kɛkala, yɛbahola yɛabiza yɛ nwo kɛ: ‘Asoo me nee Nyamenle agɔnwolɛvalɛ ne anu ɛlɛmia ɔ? Asoo anwodozo mɔɔ melɛ wɔ ye nu la anu yɛ se na ɛlɔlɛ mɔɔ melɛ memaa me Gɔnwo kulovolɛ Gyihova la, yɛ kpole alehyenlɛ biala ɔ?’ Awie bieko mɔɔ dɛnlanle aze tete ne mɔɔ ɔ nee Gyihova nyianle agɔnwolɛvalɛ kpalɛ la a le Gedɛyɔn. Bɛmaa yɛzuzu neazo kɛnlɛma mɔɔ ɔyɛle la anwo na yɛzukoa debie yɛvi nu.

7-9. (a) Anwubielɛ mɔɔ yɛ nwanwane la boni a Gedɛyɔn nyianle a, na duzu a vi nu rale a? (Nea mɔlebɛbo nvoninli ne.) (b) Kɛ ɔkɛyɛ na yɛ nee Gyihova anyia agɔnwolɛvalɛ ɛ?

⁷ Ndɛnebuavolɛ Gedɛyɔn zonlenle wɔ mekɛ mɔɔ anu yɛ se la anu wɔ Yizilayɛma tetedwɛkɛ nu wɔ mekɛ mɔɔ ɛnee bɛwɔ Ɛwɔkɛ Azɛlɛ ne azo la. Maanlebuvolɛma ati 6 ka kɛ Gyihova soanvolɛ bie yele ɔ nwo hilele Gedɛyɔn wɔ Ɔfela. Mekɛ zɔhane, ɛnee Medeanema a sie Yizilayɛma a. Ɔlua ɛhye ati, kɛ anrɛɛ ɔbayɛ ye wɔ wienyi nu la, Gedɛyɔn hɔveale ɛleka mɔɔ bɛyɛ nwanye la kɛ ɔwozo atoko amaa yeahola yeava ma kpalɛ ne yeazie. Ɔyɛle Gedɛyɔn azibɛnwo kɛ anwumabɔvolɛ ne vɛlɛle ye “Nrenya katakyie” la, yemɔti ɔbizale ye saa Gyihova mɔɔ liele Yizilayɛma vile Yigyibitima asa nu la baho amaa bɛ a. Anwumabɔvolɛ ne tendɛ amaa Bɔvolɛ ne la, ɔzele Gedɛyɔn kɛ Gyihova nee wɔ lua.

⁸ Gedɛyɔn bizale ye kɛ ɔkɛyɛ na yeahola ‘yealie Yizilayɛma yeavi Medeanema asa nu la.’ Gyihova buale ye kɛ: “Me nee wɔ bahɔ. Ɛbahu Medeanema kɔsɔɔti kɛ asɛɛ bɛle sonla kokye ala.” (Maa. 6:11-16) Ɔbayɛ kɛ ɛnee Gedɛyɔn tɛdwenle kɛ ɔkɛyɛ na ɛhye ayɛ boɛ la anwo, yemɔti ɔbizale sɛkɛlɛneɛ ɔvile Nyamenle ɛkɛ. Yɛ ye nzonlɛ kɛ wɔ adawu ɛhye anu, Gedɛyɔn nwunle Gyihova kɛ Awie mɔɔ ɔwɔ ɛkɛ ne amgba.

⁹ Mɔɔ zile bieko la manle Gedɛyɔn diedi nu mianle na ɔhwenle ɔbikyele Nyamenle kpalɛ. Ɔdonle aleɛ ɔrɛlɛle anwumabɔvolɛ ne. Mɔɔ anwumabɔvolɛ ne vale ye kpɔma ne ati hanle aleɛ ne na ɔlɛsɔ wɔ nwanwane adenle zo la, Gedɛyɔn liele lile kɛ amgba Gyihova soanvolɛ ɔ, na ɔzele kɛ: “O, Awulae Nyamenle! Me nee [Gyihova] soanvolɛ yɛ nye ɛyɛ nna.” (Maa. 6:17-22) Noko asoo deɛ ɛhye mɔɔ zile la zɛkyele Gedɛyɔn nee Nyamenle  agɔnwolɛvalɛ ne ɔ? Kyɛkyɛ! Emomu, Gedɛyɔn ranwunle Gyihova kɛ ɔle Nyamenle mɔɔ maa anzondwolɛ. Yɛkola yɛka ye zɔ ɔluakɛ Gedɛyɔn zile afɔlemokyea wɔ ɛkɛ na ɔvɛlɛle ye Gyihova-hyalɔm. Zɔhane duma ne abo kile kɛ ‘Gyihova Le Anzondwolɛ.’ (Bɛgenga Maanlebuvolɛma 6:23, 24.) Yɛdwenledwenle mɔɔ Gyihova yɛ maa yɛ alehyenlɛ biala la anwo a, ɔmaa yɛnwu kɛ ɔle Agɔnwolɛ kpalɛ. Dahuu asɔneyɛlɛ maa yɛ anzondwolɛ yɛ kpole na yɛnyia anwosesebɛ yɛbikye Nyamenle kpalɛ.

10. Kɛmɔ Edwɛndolɛ 15:3, 5 kile la, ninyɛne boni a Gyihova kpondɛ kɛ yɛyɛ na yeava yɛ agɔnwolɛ a?

¹⁰ Noko kolaa na Gyihova ayɛ yɛ Gɔnwo la, ɔwɔ kɛ yɛyɛ ninyɛne bie mɔ. Wɔ Edwɛndolɛ 15, Devidi vale ninyɛne mɔɔ ɔwɔ kɛ yɛyɛ na yɛayɛ Nyamenle agɔnwo la dole edwɛne. Ɔbizale kɛ ‘nwane a bahɔ Gyihova sua nu a’? (Edw. 15:1) Maa yɛzuzu ninyɛne ne mɔ nwiɔ—ɛsokpalɛ nee nɔhalɛlilɛ nwo. Devidi hanle awie mɔɔ ɔkola ɔkɔ Gyihova sua nu la anwo edwɛkɛ kɛ: ‘Ɔnzɛkye ɔ gɔnwo duma, . . . ɔnlie ndoloboa ɔntia mɔɔ ɛnze nwolɛ bie la.’—Edw. 15:3, 5.

11. Duzu ati a ɔnle kɛ yɛsɛkye awie mɔ duma ɛ?

¹¹ Devidi eza bɔle kɔkɔ wɔ edwɛndolɛ fofolɛ nu kɛ: “Sɔ ɛ nloa, mmaka ɛtane.” (Edw. 34:13) Saa yɛanva kɔkɔbɔlɛ ɛhye yɛanyɛ gyima a, yɛ nee yɛ anwuma Selɛ ne mɔɔ le tenlenenli la avinli bade. Nɔhalɛ nu, dumanzɛkyelɛ le Gyihova kpɔvolɛ kpole Seetan subane. Bɛnyianle edwɛkɛkpɔkɛ “Abɔnsam” bɛvile Giliki edwɛkɛkpɔkɛ mɔɔ kile “sokpavolɛ” la anu. Saa yɛnea edwɛkɛ mɔɔ yɛka ye wɔ awie mɔ anwo la boɛ a, ɔbamaa yɛ nee Gyihova avinli ahɔ zo ayɛ kɛnlɛma. Ɛhye anwo hyia titile wɔ subane mɔɔ yɛda ye ali yɛkile mgbanyima mɔɔ bɛwɔ asafo ne anu la anu.—Bɛgenga Hibuluma 13:17; Dwuudu 8.

12, 13. (a) Duzu ati a ɔwɔ kɛ yɛdi nɔhalɛ wɔ debie biala anu a? (b) Kɛzi yɛ nɔhalɛlilɛ ne ka awie mɔ ɛ?

¹² Bɛze Gyihova azonvolɛ kɛ menli mɔɔ di nɔhalɛ, na bɛnle nzisi. Ɛzoanvolɛ Pɔɔlo hɛlɛle kɛ: “Bɛhɔ zolɛ bɛzɛlɛ bɛmaa yɛ. Yɛsi pi kɛ yɛ adwenle nu le wienyi, ɔboalekɛ yɛkpondɛ kɛ dahuu yɛyɛ mɔɔ le kpalɛ la.” (Hib. 13:18) Ɔluakɛ “yɛsi pi kɛ yɛ adwenle nu le wienyi” la ati, yɛngulo kɛ yɛsisi yɛ mediema Keleseɛnema. Kɛ neazo la, saa awie yɛ yɛ gyima a, yɛnea yɛtua ye kakɛ mɔɔ ɔfɛta. Keleseɛnema di nɔhalɛ maa bɛ gyimayɛvoma nee menli kɔsɔɔti. Na saa Keleseɛnenli bie fa yɛ gyima nu a, yɛnea boɛ kɛ yɛnrɛkpondɛ nwolɛ adenle bie mɔ yɛnrɛvi ye ɛkɛ.

¹³ Ɔnyɛ nwanwane kɛ menli kanvo Gyihova Alasevolɛ wɔ bɛ nɔhalɛlilɛ nwo la! Kɛ neazo la, kpanyinli bie mɔɔ nea gyima kpole bie azo la nwunle kɛ Gyihova Alasevolɛ di bɛ ɛwɔkɛ zo. Ɔhanle kɛ: “Bɛyɛ debie biala mɔɔ bɛlie bɛdo nu kɛ bɛbayɛ la.” (Edw. 15:4) Subane ɛhye boa maa agɔnwolɛvalɛ mɔɔ yɛ nee Gyihova lɛ la kɔ zo dahuu. Eza ɔmaa menli ye yɛ anwuma Selɛ ne mɔɔ lɛ ɛlɔlɛ la ayɛlɛ.

14, 15. Kɛ ɔkɛyɛ na yɛaboa menli mɔɔ wɔ yɛ azɛlɛsinli ne anu la yɛamaa bɛayɛ Gyihova agɔnwo ɛ?

¹⁴ Menli dɔɔnwo mɔɔ wɔ yɛ azɛlɛsinli ne anu la die di kɛ Nyamenle wɔ ɛkɛ, noko ɔnle bɛ Gɔnwo. Kɛ ɔkɛyɛ na yɛaboa bɛ ɛ? Suzu adehilelɛ mɔɔ Gyisɛse vale manle ye ɛdoavolɛ 70 ne wɔ mekɛ mɔɔ ɔzoanle bɛ nwiɔ nwiɔ kɛ bɛhɔha edwɛkɛ ne la anwo nea: “Awuke biala mɔɔ bɛkɛwolo nu la, bɛlumua bɛze kɛ, ‘Nyamenle  anzonudwolɛ ɛha awuke ye anu amra.’ Saa awie mɔɔ kpondɛ anzonudwolɛ la bie wɔ awuke ne anu a bɛ anzonudwolɛ ne nee ye badɛnla. Na saa bie ɛnle ɛkɛ ne a bɛ anzonudwolɛ ne bazia ara bɛ nwo.” (Luku 10:5, 6) Saa yɛfa menli agɔnwolɛ a, bɛ nye kola die nɔhalɛ ne anwo. Ɛhye kola maa dwazotiama kakyi adwenle ɛtane mɔɔ bɛlɛ ye yɛ nwo la na bɛtie yɛ wɔ mekɛ fofolɛ nu.

¹⁵ Saa yɛ nee menli mɔɔ ati ɛmi adalɛ ɛzonlenlɛ nu anzɛɛ bɛdi amaamuo mɔɔ ɛngyi Baebolo ne azo la yia a, yɛkɔ zo yɛda agɔnwolɛvalɛ subane nee anzondwolɛ ali yɛkile bɛ. Saa bɛba yɛ debiezukoalɛ ne mɔ abo ɔluakɛ bɛ nye ɛnlie mɔɔ ɛlɛkɔ zo wɔ ewiade ye anu la anwo, na bɛkulo kɛ bɛsukoa yɛ Nyamenle ne anwo ninyɛne dɔɔnwo a, yɛdie bɛ kɛnlɛma. Yɛlɛ ɛhye anwo neazo dɔɔnwo wɔ edwɛkɛ mɔɔ se “Baebolo Ne Kakyi Sonla” mɔɔ ba yɛ magazine ne anu la anu.

16. Ndelebɛbo boni ati a yɛbahola yɛabu yɛ nwo kɛ Gyihova agɔnwo mɔ nee ye “gyimayɛvoma” ɛ?

¹⁶ Menli mɔɔ bɔ nu yɛ gyima ko la ta yɛ agɔnwolɛma. Bɛdabɛ mɔɔ bɛyila bɛ nwo zo bɛmaa Gyihova la kɔsɔɔti ɛnyia nwolɛ adenle kɛ, Nyamenle agɔnwo mɔ nee ye “gyimayɛvoma.” (Bɛgenga 1 Kɔlentema 3:9.) Nɔhalɛ nu, saa yɛyɛ daselɛlilɛ nee ɛdoavolɛyɛlɛ gyima ne dɔɔnwo a, ɔmaa yɛte yɛ anwuma Selɛ ne subane ne mɔ abo kpalɛ. Yɛnwu kɛzi ye sunsum nwuanzanwuanza ne boa yɛ maa yɛbɔ edwɛkpa ne nolo kpalɛ la.

17. Kɛzi sunsum nu aleɛ ngakyile mɔɔ yɛnyia ye wɔ yɛ nyianu mgbole nee ngyikyi ne mɔ abo la kile kɛ Gyihova le yɛ Gɔnwo ɛ?

¹⁷ Saa yɛyɛ daselɛlilɛ gyima ne dɔɔnwo a, ɔmaa yɛtwe yɛbikye Gyihova kpalɛ. Kɛ neazo la, yɛnwu kɛzi Gyihova si dwazotiama adenle la. Nea ɛvolɛ ekyi mɔɔ ɛze la. Asoo yɛnnwu kɛzi Nyamenle ɛlɛbɔ yɛ nwo bane la? Sunsum nu aleɛ mɔɔ ba ye mekɛ nloa dahuu la yɛ azibɛnwo. Yɛ nyianu mgbole nee ngyikyi ne mɔ maa yɛnwu kɛ yɛ ɛlɔlɛ Selɛ ne ze yɛ ngyegyelɛ nee yɛ ngyianlɛ. Abusua ko hɛlɛle kɛlata hilele kɛzi bɛ nye die nyianu ne mɔ anwo la anu kɛ: “Gyimalilɛ ne hanle yɛ ahonle kpalɛ. Yɛnwunle kɛzi Gyihova kulo yɛ nuhua ko biala na ɔkulo kɛ ɔwie yɛ boɛ la.” Mɔɔ agyalɛma bie mɔɔ bɛvi Germany hɔle nyianu titile bie wɔ Ireland la, bɛhanle kɛzi bɛ nye sɔ adenle mɔɔ mediema vale zo liele bɛ kɛnlɛma na bɛnleanle bɛ la, bɛdoale zo kɛ: “Noko yɛ moyɛlɛ kpole kpalɛ ne kɔ Gyihova nee ye Belemgbunli Gyisɛse Kelaese ɛkɛ. Bɛvɛlɛ yɛ kɛ yɛraboka maanle ɛhye mɔɔ koyɛlɛ wɔ bɛ nu wɔ ewiade amuala la anwo. Tɛ koyɛlɛ nwo edwɛkɛ ala a yɛka a, emomu, yɛ nye die dahuu. Anwubielɛ ɛhye nee mɔɔ yɛnyianle ye wɔ Dublin nyianu titile ne abo la kakye yɛ nwolɛ adenle kpole mɔɔ  yɛnyia yɛ nee bɛ kɔsɔɔti ɛlɛsonle yɛ Nyamenle kpole ne la dahuu.”

18. Kɛzi yɛ nee Gyihova di adwelie la anwo kpuyia boni a yɛbahola yɛabiza yɛ nwo a?

¹⁸ Agɔnwolɛ sɔ kpalɛ wɔ mekɛ mɔɔ adwelielilɛ kpalɛ kɔ zo dahuu la. Ɛnɛ, adwelielilɛ nee nrɛlaleɛ mɔɔ bɛdua Intanɛte nee ɛlɛtɔlɔnek ninyɛne zo bɛfa bɛnwa la ɛbu. Noko kɛzi yɛ nuhua ko biala nee Gyihova mɔɔ le yɛ Gɔnwo kpalɛ la di adwelie ɛ? Nɔhalɛ, ɔle ‘nzɛlɛlɛ Tievolɛ.’ (Edw. 65:2) Noko fane nyɛ yɛɛ yɛnyia mekɛ yɛ nee ye di adwelie a?

19. Moalɛ boni a yɛnyia wɔ mekɛ mɔɔ ɔyɛ se kɛ yɛbala yɛ nganeɛdelɛ ali yɛahile yɛ anwuma Selɛ ne la ɛ?

¹⁹ Noko akee, ɔyɛ se ɔmaa yɛ mediema ne mɔ bie kɛ bɛbala kɛzi bɛte nganeɛ la ali. Noko Gyihova kulo kɛ yɛyɛ zɔ wɔ yɛ asɔneyɛlɛ nu. (Edw. 119:145; Awo. 3:41) Saa bɔbɔ yɛnnwu edwɛkɛ agbɔkɛ mɔɔ ɔwɔ kɛ yɛfa yɛda nganeɛdelɛ ɛhye mɔ ali la a, yɛlɛ moalɛ. Pɔɔlo hɛlɛle Keleseɛnema mɔɔ bɛwɔ Wulomu la kɛ: “Yɛnze nzɛlɛlɛ yɛ, kɛmɔ ɔwɔ kɛ yɛyɛ la. Sunsum ne ɔdaye a ɔsɛlɛ Nyamenle ɔmaa yɛ wɔ nyanedelɛ nee ɛkponlenlɛ mɔɔ ɛnloanlɛ ɛnrɛhola ye ka la anu a. Nyamenle mɔɔ neɛnlea menli kɔsɔɔti ahonle nu la ze sunsum nu adwenleadwenle biala kɛ si de la, ɔluakɛ Sunsum ne kpa ye menli ti kyɛlɛ, ɔsɛlɛ, kɛmɔ Nyamenle ɛhulolɛdeɛ ne de la.” (Wulo. 8:26, 27) Saa yɛdwenledwenle edwɛkɛ mɔɔ wɔ Baebolo mbuluku le kɛ Dwobu, Edwɛndolɛ nee Mrɛlɛbulɛ anu la anwo a, ɔbamaa yɛala kɛzi yɛte nganeɛ la ali yɛahile Gyihova.

20, 21. Arɛlekyekyelɛ boni a wɔ Pɔɔlo edwɛkɛ ne mɔɔ wɔ Felepaema 4:6, 7 ne la anu a?

²⁰ Saa tɛnlabelɛ mɔɔ anu yɛ se la gyegye yɛ adwenle a, bɛmaa yɛli Pɔɔlo folɛ ɛhye mɔɔ ɔdule Felepaema la azo: “Bɛmmadwenle debie biala anwo. Wɔ debie biala anu bɛyɛ moyɛlɛ nzɛlɛlɛ na bɛva mɔɔ bɛhyia nwolɛ la bɛdo Nyamenle anyunlu.” Yɛ nu mɔɔ yɛbuke yɛ nee yɛ Gɔnwo kpalɛ ne di adwelie la kyekye yɛ rɛle, ɔluakɛ Pɔɔlo doale ye folɛdulɛ ne azo kɛ: “Na Nyamenle anzonudwolɛ ne mɔɔ bo sonla ndelebɛbo muala azo la bazie bɛ ahonle nee bɛ adwenle gyɛlɛɛnye wɔ Kelaese ati.” (Fel. 4:6, 7) Bɛmaa yɛhile “Nyamenle anzonudwolɛ ne” mɔɔ tɛla debie biala na ɔbɔ yɛ adwenle nee yɛ ahonle nwo bane la anwo anyezɔlɛ dahuu.

²¹ Asɔneyɛlɛ boa maa yɛ nee Gyihova nyia agɔnwolɛvalɛ. Yemɔti, bɛmaa yɛyɛ “nzɛlɛlɛ dahuu.” (1 Tɛs. 5:17) Ɔrɛla ye kɛ debiezukoalɛ ɛhye bamaa yɛ nee Nyamenle agɔnwolɛvalɛ ne nee yɛ bo mɔɔ yɛsika kɛ yɛbali ye tenlene ngyinlazo ne mɔ azo la anu ayɛ se dahuu. Eza bɛmaa yɛnyia mekɛ yɛdwenledwenle nyilalɛ mɔɔ yɛnyia ɔlua Gyihova mɔɔ amgba le yɛ Ze, yɛ Nyamenle, nee yɛ Gɔnwo la anwo.