1, 2. (a) Kilehile deɛmɔti ɛnee Mosisi ngoane la esiane nu la anu. (Nea mɔlebɛbo nvoninli ne.) (b) Duzu ati a Mosisi anzulo belemgbunli ne ɛya mɔɔ ɔkɛva la ɛ?

ƐNEE Falo le Yigyibitima belemgbunli mɔɔ ɔ ti yɛ se nee bɛ nyamenle. Buluku bie ka kɛ, “Bɛbule ye kɛ ɔze nrɛlɛbɛ yɛɛ ɔlɛ tumi ɔtɛla abɔdeɛ mɔɔ wɔ azɛlɛ ye azo la kɔsɔɔti.” (When Egypt Ruled the East) Ɛnee ɛwɔbile mɔɔ ɛziezie ɔ nwo kɛ ɔka la ananze wɔ Falo belemgbunli kyɛlɛ ne anyunlu—ɛhye manle ɛzulolɛ hanle ye maanlema na ɔhakyele belemgbunli ne agbɔvolɛ kɛ ɔkola ɔsɛkye bɛ ndɛndɛ. Yemɔti, dwenle kɛzi Mosisi bade nganeɛ wɔ mekɛ mɔɔ Gyihova hanle edwɛkɛ ɛhye hilele ye la anwo nea: “Bɛla, mesoa wɔ wɔ Yigyibiti belemgbunli ne ɛkɛ amaa wɔahɔye me menli, Yizilayɛma wɔavi Yigyibiti.”—Ade. 3:10.

² Mosisi hɔle Yigyibiti, ɔhɔhanle Nyamenle nrɛlaleɛ ne, na Falo vale ɔ nwo ɛya. Mekɛ mɔɔ ngyegyelɛ ngɔnla rale azɛlɛ ne azo la, Falo bɔle Mosisi kɔkɔ kɛ: “Mmamaa menwu ɛ nyunlu bieko! Kenle biala mɔɔ menwɔnwu ɛ nyunlu la, ɛbawu!” (Ade. 10:28) Kolaa na Mosisi avi Falo anyunlu ɛkɛ ahɔ la, ɔhanle kɛ belemgbunli ne belamunli ralɛ ne bawu. (Ade. 11:4-8) Awieleɛ bɔkɔɔ ne, Mosisi zele Yizilayɛ abusua biala kɛ ɔhu abɔnkye anzɛɛ boaneralɛ—nane mɔɔ ɛnee le nwuanzanwuanza maa Yigyibitima nyamenle  Ra la—na bɛva ye mogya ne bɛha bɛ nlenkɛ ne felɛmo ne mɔ anwo. (Ade. 12:5-7) Duzu a Falo bayɛ a? Ɛnee Mosisi ɛnzulo. Duzu ati ɔ? Diedi manle ɔdiele Gyihova, ‘yeanzulo belemgbunli ne ɛya mɔɔ ɔkɛva la, ɔgyinlanle kpundii kɛ sonla mɔɔ ɛnwu Ahenle ne mɔɔ bɛnnwu ye la.’—Bɛgenga Hibuluma 11:27, 28.

3. Diedi mɔɔ Mosisi nyianle ye wɔ ‘Ahenle ne mɔɔ bɛnnwu ye anu la’ anwo ninyɛne boni mɔ a yɛbazuzu nwo a?

³ Asoo wɔ diedi ne anu yɛ se kɛ asɛɛ ‘wɔnwu Nyamenle ɔ’? (Mat. 5:8) Bɛmaa yɛzuzu Mosisi neazo ne anwo amaa yɛahola yɛanwu ‘Ahenle ne mɔɔ bɛnnwu ye la.’ Kɛzi diedi mɔɔ ɛnee ɔlɛ ye wɔ Gyihova anu la bɔle ɔ nwo bane wɔ sonla nwo ɛzulolɛ nwo ɛ? Adenle boni azo a ɔnyianle diedi wɔ Nyamenle ɛwɔkɛ ne mɔ anu a? Na kɛzi ‘Ahenle ne mɔɔ bɛnnwu ye’ mɔɔ Mosisi nwunle ye la, boale ye wɔ mekɛ mɔɔ ɔ nee ye menli ne hɔle ngyegyelɛ nu la ɛ?

4. Wɔ sonla nye zo, kɛzi ɛnee Mosisi de wɔ Falo anyunlu ɛ?

⁴ Wɔ sonla nye zo, ɛnee Mosisi ɛnzɔho ɛhwee wɔ Falo anyunlu. Ɛnee ɔle kɛ asɛɛ Mosisi ngoane, ye ɛkpazilɛ, nee ye kenlebie wɔ Falo asa nu. Mosisi mumua ne bizale Gyihova kɛ: “Nwane bɔbɔ a le medame, mɔɔ mekɔ Yigyibiti belemgbunli anyunlu, meahɔye Yizilayɛma meavi Yigyibiti a?” (Ade. 3:11) Mosisi nriandile vile Yigyibiti la, ɛvolɛ 40 ɛze. Bie a ɔbizale ɔ nwo kɛ, ‘Asoo nrɛlɛbɛ wɔ nu kɛ mebazia meahɔ Yigyibiti meahɔha belemgbunli ne ɛya bieko ɔ?’

5, 6. Duzu a manle Mosisi zulole Gyihova na yeanzulo Falo a?

⁵ Kolaa na Mosisi azia ahɔ Yigyibiti la, Nyamenle hilele ye ngyinlazo bie mɔɔ anwo hyia la. Nzinlii, Mosisi hɛlɛle ngyinlazo ɛhye wɔ Dwobu buluku ne anu: “Nrɛlɛbɛ a le kɛ ɛkɛzulo [Gyihova].” (Dwobu 28:28) Amaa Mosisi anyia ɛzulolɛ ɛhye na yeayɛ ye debie nrɛlɛbɛ nu la, Gyihova manle ɔnwunle ngakyile mɔɔ wɔ sonla nee Nyamenle Tumivolɛ Bedevinli ne avinli la. Ɔbizale kɛ: “Nwane a bɔle sonla nloa a? Nwane a maa ɔyɛ mumule anzɛɛ anzondiliravolɛ, anzɛɛ nwane a maa ɔnwu debie anzɛɛ ɔyɛ anyenzinliravolɛ a? Asoo tɛ medame, [Gyihova] ɔ?”—Ade. 4:11.

⁶ Ɛzukoalɛdeɛ boni a wɔ nu a? Ɛnee ɔnle kɛ Mosisi sulo. Gyihova mɔɔ ɔbamaa Mosisi asa aha debie biala mɔɔ ɔhyia nwo na yeahola yeaha Nyamenle edwɛkɛ ne yeahile Falo la a zoanle ye a. Bieko, yɛnrɛhola yɛnrɛva Falo yɛnrɛdo Gyihova anwo. Yeanyɛ boɛ fee la, tɛ ɛhye a le mekɛ mɔɔ lumua mɔɔ Nyamenle menli ngoane nwo ɛra edwɛkɛ wɔ Yigyibiti belemgbunli asa nu a. Bie a Mosisi zuzule kɛzi Gyihova bɔle Ebileham, Dwosefi nee ɔdaye Mosisi mumua ne bɔbɔ anwo bane wɔ Falo ne mɔ mɔɔ bɛlumua asa nu la anwo. (Mɔl. 12:17-19; 41:14, 39-41; Ade. 1:22–2:10) Diedi mɔɔ ɛnee Mosisi lɛ ye wɔ Gyihova, ‘Ahenle ne mɔɔ bɛnnwu ye anu la,’ manle ɔvale akɛnrasesebɛ ɔhɔle Falo anyunlu na ɔhanle edwɛkɛ biala mɔɔ Gyihova hanle hilele Mosisi la ɔhilele ye.

7. Kɛzi Gyihova anu diedi bɔle adiema raalɛ ko anwo bane ɛ?

⁷ Gyihova anu diedi bɔle adiema raalɛ Ella noko anwo bane, yeammaa yeanzulo sonla. Wɔ 1949 ne anu, KGB ne hyele Ella wɔ Estonia, bɛyele ɔ nwo amuala na bɛmanle kpolisi mgbavolɛ bie nleanle ye. Ɔhanle kɛ: “Mendele nganeɛ kɛ bɛgua me nyunlu aze. Noko, mekɛ mɔɔ menzɛlɛle Gyihova la, menyianle anzondwolɛ na menziele me nwo diinyi.” Eza bɛvale Ella bɛdole sonla ko efiade nu kenle nsa. Ɔka kɛ: “Kpolisima ne deanle nu kɛ: ‘Yɛyɛ amaa bɛangakye Gyihova duma ne bɔbɔ wɔ Estonia! Yɛto wɔ efiade, na yɛ nee menli mɔɔ ɛha la ahɔ Siberia!’ Bɛgolole ɔ nwo bɛhanle kɛ, ‘Wɔ Gyihova ne wɔ ni?’” Asoo Ella bazulo menli anzɛɛ ɔbava ɔ nwo yeado Gyihova anwo zo? Mekɛ mɔɔ bɛbizebizale ye edwɛkɛ la, ɔvale akɛnrasesebɛ ɔzele  menli mɔɔ ɛlɛgolo ɔ nwo la kɛ: “Mezuzu edwɛkɛ ɛhye anwo kpalɛ, na mekulo kɛ meda efiade mebɔ agɔnwolɛvalɛ mɔɔ me nee Nyamenle lɛ la anwo bane ɔtɛla kɛ bɛbaye me na me nee ye avinli azɛkye la.” Ɛnee Ella bu Gyihova kɛ ɔwɔ ɛkɛ amgba, ɔle kɛ menli mɔɔ bɛgyigyi ɔ nwo ɛkɛ ne la. Ye diedi manle ɔgyinlanle ye munlililɛ nu.

8, 9. (a) Sonla nwo ɛzulolɛ ayile a le duzu? (b) Saa ɛyia sonla nwo ɛzulolɛ nwo sɔnea a, nwane a ɔwɔ kɛ ɛfa wɔ adwenle ɛsie ɔ nwo zo a?

⁸ Gyihova anu diedi bamaa wɔali wɔ ɛzulolɛ zo konim. Saa tumivolɛma ɛlɛsi wɔ Nyamenle ɛzonlenlɛ nwo adenle a, ɔmaa ɔyɛ kɛ asɛɛ wɔ ngoane, wɔ ɛkpazilɛ, nee wɔ kenlebie wɔ sonla sa nu la. Bie a ɛbanyia adwenle bɔbɔ kɛ asoo nrɛlɛbɛ wɔ nu kɛ ɛbahɔ zo wɔazonle Gyihova na wɔaha tumivolɛma ɛya ɔ. Kakye: Sonla nwo ɛzulolɛ ayile a le Nyamenle anu diedi. (Bɛgenga Mrɛlɛbulɛ 29:25.) Gyihova biza kɛ: “Duzu ati a bɛsulo sonla mɔɔ ɛngyɛ na yeawu, mɔɔ ye ngoane le kɛ ndile la ɛ?”—Aye. 51:12, 13.

⁹ Fa wɔ adwenle sie wɔ tumivolɛ Selɛ ne anwo zo. Ɔnwu bɛdabɛ mɔɔ maanlebuvoma sisi bɛ la, ɔ kunlu yelɛyela ye maa bɛ na ɔboa bɛ. (Ade. 3:7-10) Saa ɔba ye kɛ bɛye bɛ nloa wɔ maanlebuvoma anyunlu bɔbɔ a, “bɛmmadwenle mɔɔ bɛbaha la anwo anzɛɛ kɛ bɛbazi bɛaha ye la anwo; saa mekɛ ne dwu a, bɛbava mɔɔ bɛbaha la bɛamaa bɛ.” (Mat. 10:18-20) Yɛnrɛhola yɛnrɛva arelemgbunli nee arane mgbanyima mɔɔ bɛwɔ ewiade la yɛnrɛdo Gyihova anwo. Saa ɛmia wɔ diedi ne anu ɛnɛ a, ɛbanwu kɛ Gyihova le Awie mɔɔ ɔwɔ ɛkɛ amgba a, na ɔkulo kɛ ɔboa wɔ.

10. (a) Adehilelɛ boni a Gyihova vale manle Yizilayɛma wɔ Naesan siane ne anu wɔ 1513 K.Y.M. a? (b) Duzu ati a Mosisi lile Nyamenle adehilelɛ ne azo ɛ?

¹⁰ Wɔ Naesan siane ne anu wɔ 1513 K.Y.M., Gyihova zele Mosisi nee Aalɔn kɛ bɛva adehilelɛ ɛhye mɔ bɛmaa Yizilayɛma: Bɛkpondɛ boane anzɛɛ abɔnkye nyinli mɔɔ anwo ɛnlɛ dɛne la bɛhu ye na bɛva ye mogya ne bɛha bɛ nlenkɛ ne mɔ anloa. (Ade. 12:3-7) Duzu a Mosisi yɛle a? Nzinlii, ɛzoanvolɛ Pɔɔlo hɛlɛle kɛ: “Diedi zo yɛɛ ɔluale ɔhyehyɛle Akpabɛnwo ne na ɔmanle Yizilayɛma vale mogya kpondenle bɛ nlenkɛ nloa a, amaa saa Nyamenle Ewule Soanvolɛ ne ba a yeangu Yizilayɛma belamunli mralɛ ne mɔ.” (Hib. 11:28) Ɛnee Mosisi ze kɛ bɛkola bɛfa bɛ nwo bɛto Gyihova anwo zo, yemɔti ɔliele ɛwɔkɛ mɔɔ Gyihova bɔle kɛ ɔbahu Yigyibiti belamunli mralɛ mrenya la ɔlile.

11. Duzu ati a Mosisi bɔle menli ne kɔkɔ a?

¹¹ Ɔda ali kɛ ɛnee Mosisi amra ɛdeɛ ne wɔ Medean, bɛmbikye “Ewule Soanvolɛ ne.” * (Ade. 18:1-6) Noko, ɔyɛle tieyɛ ɔvale adehilelɛ ne ɔmanle Yizilayɛ mbusua mɔɔ ɛnee bɛ belamunli mralɛ mrenya ngoane la esiane nu la. Ɛnee ɔle ewule nee ngoane edwɛkɛ, na ɛnee Mosisi kulo ɔ gɔnwo mɔ. Baebolo ne ka kɛ: “Akee Mosisi vɛlɛle Yizilayɛ mgbanyima ne mɔ amuala na ɔhanle ɔhilele bɛ kɛ, ‘Awie biala ɛhɔhye boane ko ɛhu ye ɛmaa ye awuke nu amra ɛva ɛli Akpabɛnwo ne.’”—Ade. 12:21.

12. Edwɛkɛ mɔɔ anwo hyia la boni a Gyihova se yɛbɔ ye nolo a?

¹² Anwumabɔvolɛma ɛlɛnea bɛamaa Gyihova menli abɔ edwɛkɛ ɛhye mɔɔ anwo hyia la nolo: “Bɛzulo Nyamenle, na bɛye ye ayɛlɛ. Ɔluakɛ mekɛ ne ɛdwu mɔɔ ɔbabua aleɛabo amra ndɛne a. Bɛzonle Nyamenle mɔɔ bɔle anwuma, azɛlɛ, nyevile, nee azule muala la.” (Yek. 14:7) Ɛnɛ a le mekɛ mɔɔ ɔwɔ kɛ yɛbɔ nolo zɔhane a. Ɔwɔ kɛ yɛbɔ yɛ kpalɛzoamra kɔkɔ yɛmaa bɛfi Babelɔn Kpole ne anu, anrɛɛ “ye munzule ne bie kɛha bɛ.” (Yek. 18:4) ‘Mboane gyɛne’ ne nee Keleseɛnema mɔɔ bɛkpokpa bɛ la ɛlɛsɛlɛ bɛdabɛ mɔɔ bɛ nee Nyamenle avinli  ɛde la kɛ “bɛmaa Nyamenle adenle bɛmaa ɔhakyi bɛ kɛ bɛnle agbɔvolɛ na bɛle ɔ gɔnwo mɔ.”—Dwɔn 10:16; 2 Kɔl. 5:20.

13. Duzu a bamaa ɛhulolɛ mɔɔ yɛlɛ yɛbɔ edwɛkpa ne nolo la ayɛ kpole a?

¹³ Yɛze kɛ “mekɛ ne ɛdwu mɔɔ ɔbabua aleɛabo amra ndɛne a.” Eza yɛdie yɛdi kɛ Gyihova ɛtɛwudule kɛzi edwɛkɛhanlɛ nee ɛdoavolɛyɛlɛ gyima ne hyia ndɛndɛ la anu. Ɛzoanvolɛ Dwɔn hanle ye wɔ ɛnyelɛzodeɛnwunlɛ bie anwo kɛ: “Ɛhye anzi menwunle Nyamenle soanvolɛma nna kɛ bɛgyigyi azɛlɛ ye muleɛ nna ne mɔ azo na bɛdedɛ ewiade anwoma ngakyile nna ne anu.” (Yek. 7:1) Asoo wɔ diedi maa ɛnwu zɛhae anwumabɔvolɛ ne mɔ kɛ bɛziezie bɛ nwo kɛ bɛgyakyi anwongyelelɛ kpole ne ɛzɛkyelɛ anwoma ne anu wɔ ewiade ɛhye anu ɔ? Saa ɛfa diedi ɛnyelɛ ɛnwu zɔhane anwumabɔvolɛma ne a, ɔbamaa wɔava anwodozo wɔabɔ edwɛkpa ne nolo.

14. Duzu a ka yɛ maa ‘yɛbɔ amumuyɛnli ne kɔkɔ yɛmaa ɔkakyi ye subane a’?

¹⁴ Nɔhalɛ Keleseɛnema nee Gyihova lɛ agɔnwolɛvalɛ yɛɛ dahuu ngoane anyelazo. Noko, yɛze kɛ ɔle yɛ ɛzonlelilɛ kɛ ‘yɛbabɔ amumuyɛnli ne kɔkɔ yɛamaa yeahakyi ye subane na yealie ye ɛkɛla ngoane.’ (Bɛgenga Yizikeɛle 3:17-19.) Nɔhalɛ nu, tɛ kɛ yɛngulo kɛ yɛkɛli mogya nwo fɔlɛ la ati a yɛka edwɛkɛ ne a. Yɛkulo Gyihova nee yɛ gɔnwo mɔ. Gyisɛse hilehilele mɔɔ nɔhalɛ ɛlɔlɛ nee anwunvɔnezelɛ kile la anu wɔ Samɛleanli agɔnwolɛ kpalɛ ne anwo ɛrɛlɛ ne anu. Ɔwɔ kɛ yɛbiza yɛ nwo kɛ, ‘Asoo mele kɛ Samɛleanli ne mɔɔ “alɔbɔlɛ hunle ye” manle ɔlile daselɛ la ɔ?’ Yɛngulo kɛ yɛyɛ kɛ ɛsɔfo ne anzɛɛ Livaenli ne mɔɔ bɛwɔ ɛrɛlɛ ne anu la, yɛfa debie yɛye yɛ nloa yɛbu “foa ko” yɛkɔ. (Luku 10:25-37) Nyamenle ɛwɔkɛ ne  mɔ anu diedi nee ɛlɔlɛ mɔɔ yɛlɛ yɛmaa yɛ gɔnwo mɔ la bamaa yɛava yɛ nwo yɛawula edwɛkɛhanlɛ gyima ne anu kpalɛ kolaa na mekɛ ne adwu.

15. Duzu ati a Yizilayɛma dele nganeɛ kɛ bɛdo ɛhane ɛ?

¹⁵ Mekɛ mɔɔ Yizilayɛma vile Yigyibiti na bɛlɛnwu amaneɛ la, Mosisi diedi mɔɔ ɛnee ɔlɛ ye wɔ ‘Ahenle ne mɔɔ bɛnnwu ye’ anu la boale ye. Baebolo ne ka kɛ: “Yizilayɛma manle bɛ nye zo nwunle kɛ Yigyibitima ɛlɛba bɛ nwo zo la, ɛzulolɛ hanle bɛ. Yizilayɛma zunle vɛlɛle [Gyihova].” (Ade. 14:10-12) Asoo ngyegyelɛ ɛhye rale arɛlevilɛ nu? Kyɛkyɛ. Gyihova hanle dole ɛkɛ ne kɛ: “Mebamaa belemgbunli ne [Falo] ahonle ayɛ se, na yeadoa bɛ, na meanyia anyunlunyia wɔ belemgbunli ne nee ye ɛlɔnema ne kɔsɔɔti anyunlu, amaa Yigyibitima anwu kɛ medame a mele [Gyihova] a.” (Ade. 14:4) Noko akee, mɔɔ ɛnee Yizilayɛma anye dua ye la ala a bɛnwunle ye a—Nyevile Kɔkɔlɛ ne mɔɔ bɛngola ye pɛ, Falo konle ehwili ne mɔ, nee mboaneneavolɛ bie mɔɔ yenyia ɛvolɛ 80 mɔɔ ɔli bɛ ti la! Bɛdele nganeɛ kɛ bɛdo ɛhane.

16. Kɛzi diedi boale Mosisi wɔ Nyevile Kɔkɔlɛ ne anloa ɛ?

¹⁶ Noko, Mosisi ahonle andu. Kɛmɔti ɛ? Ɔluakɛ ye diedi manle ɔnwunle awie mɔɔ ɔlɛ tumi ɔtɛla nyevile ne anzɛɛ ɛlɔnema ne la. Ɔnwunle ‘kɛzi Gyihova bazi alie bɛ la,’ na ɛnee ɔze kɛ Gyihova baho amaa Yizilayɛma. (Bɛgenga Adendulɛ 14:13, 14.) Mosisi diedi ne boale Nyamenle menli ne. Baebolo ne ka kɛ: “Diedi zo yɛɛ Yizilayɛma luale mɔɔ bɛpɛle Ndɔ Nyevile ne kɛ asɛɛ bɛlua azɛlɛ resee zo la a; mɔɔ Yigyibitima yɛle kɛ bɛdabɛ noko bɛpɛ la, azule ne vale bɛ.” (Hib. 11:29) Yemɔ anzi, ‘menli ne zulole Gyihova na bɛliele Gyihova nee ye sonvolɛ Mosisi bɛlile.’—Ade. 14:31.

17. Duzu a bazi kenlebie mɔɔ ɔbazɔ yɛ diedi yeanlea a?

¹⁷ Ɔnrɛhyɛ, ɔbayɛ kɛ asɛɛ yɛ ngoane la esiane nu la. Anwongyelelɛ kpole ne kadwu ye kpɔmgbɔse la, ɛnee ewiade arelemgbunli ɛzɛkye ɛzonlenlɛ mɔɔ bɛle mgbole na bɛ nwo zonle tɛla yɛ la bɔkɔɔ. (Yek. 17:16) Gyihova manle ye ngapezoma hanle anwobanebɔlɛ mɔɔ yɛnlɛ la anwo edwɛkɛ kɛ, “bɛtɛdiele bɛ azua ne mɔ anwo bane, na bɛnlɛ nlenkɛ mgbole mɔɔ mbulalɛ gua bɛ nzi la.” (Yiz. 38:10-12, 14-16) Wɔ yɛ nye zo, ɔbayɛ kɛ yɛnrɛnyia yɛ ti la. Duzu a ɛbayɛ a?

18. Kilehile deɛmɔti yɛbahola yɛagyinla kpundii wɔ anwongyelelɛ kpole ne anu la anu.

¹⁸ Ɔnle kɛ ɛzulolɛ ka yɛ. Duzu ati ɔ? Ɔluakɛ Gyihova ɛha Nyamenle menli ne mɔɔ bɛbateta bɛ la anwo edwɛkɛ ɛdo ɛkɛ. Ɔhanle mɔɔ ɔbavi nu yeara la noko. “Awulae Nyamenle ne se, ‘Mekɛ ne anu, mɔɔ Gɔɔgo bara Yizilayɛma maanle ne anu la, mebava ɛya kpole. Ɔluakɛ melɛ anyebolo nee ɛya kpole [mebadendɛ].’” (Yiz. 38:18-23) Akee Nyamenle bazɛkye bɛdabɛ mɔɔ bɛkulo kɛ bɛgyegye Gyihova menli la. Diedi mɔɔ ɛlɛ ye wɔ mɔɔ ɔbavi “[Gyihova] kenle kpole anu ɛzulolɛ ne” anu ara anu la, baboa wɔ yeamaa wɔanwu ‘kɛzi Gyihova bazi alie’ wɔ la, amaa wɔagyinla wɔ munlililɛ nu.—Dww. 2:31, 32.

19. (a) Kɛzi ɛnee Gyihova nee Mosisi avinli de ɛ? (b) Saa ɛnwu Gyihova wɔ wɔ ɛbɛlabɔlɛ muala anu a, nyilalɛ boni a ɛbanyia a?

¹⁹ Gyinla “kpundii kɛ sonla mɔɔ ɛnwu [Ahenle] ne mɔɔ bɛnnwu ye la” fa siezie ɛ nwo maa ninyɛne mɔɔ basisi kenlebie la! Dua dahuu debiezukoalɛ nee asɔneyɛlɛ zo mia agɔnwolɛvalɛ mɔɔ ɛ nee Gyihova Nyamenle lɛ la anu. Ɛnee Mosisi nee Gyihova lɛ agɔnwolɛvalɛ kpalɛ, yemɔti Gyihova vale ye lile gyima manle ɔyɛle ye ɛhulolɛdeɛ. Baebolo ne ka kɛ: ‘Mosisi ɛnwu Gyihova anyunlu.’ (Mɛla 34:10) Ɛnee Mosisi le ngapezonli titile. Noko, diedi bamaa ɛdawɔ noko wɔahola wɔabikye Gyihova kpalɛ kɛ awie mɔɔ ɛkola ɛnwu ye la. Saa ɛnwu ye “wɔ wɔ ɛbɛlabɔlɛ muala anu” dahuu kɛmɔ Nyamenle Edwɛkɛ ne si yɛ adua kɛ yɛyɛ la a, “ɔbamaa wɔ ndenle adenrɛ fɔɔnwo.”—Mrɛ. 3:6.