‘Me Aleɛ A Le Kɛ Menwɔyɛ Nyamenle Ɛhulolɛdeɛ’
Duzu a maa ɛ nye die kpalɛ a? Asoo ngitanwolilɛ mɔɔ bie a le agyalɛ, ngakula ɛtetelɛ, anzɛɛ agɔnwolɛvalɛ ɔ? Ɔda ali kɛ saa ɛ nee wɔ kulovolɛma bɔ nu di aleɛ a ɛ nye die. Noko, kɛ Gyihova sonvolɛ la, asoo nvasoɛ kpole ɛnle zo kɛ ɛbayɛ Nyamenle ɛhulolɛdeɛ, ɛbazukoa ye Edwɛkɛ ne, na wɔabɔ edwɛkpa ne nolo ɔ?
Belemgbunli Devidi mɔɔ dɛnlanle aze wɔ tete Yizilayɛ la dole edwɛne yele Bɔvolɛ ne ayɛlɛ kɛ: “O me Nyamenle, mekulo kɛ meyɛ wɔ ɛhulolɛdeɛ; wɔ mɛla ne wɔ me ahonle nu.” (Edw. 40:8) Devidi vale nɔhalɛ anyelielɛ yɛle Nyamenle ɛhulolɛdeɛ, ɔnva nwo amaneɛnwunlɛ nee ngyegyelɛ mɔɔ ɔyiale ye wɔ ye ɛbɛlabɔlɛ nu la. Nɔhalɛ nu, tɛ Devidi angomekye a le Gyihova sonvolɛ mɔɔ vale anyelielɛ zonlenle nɔhalɛ Nyamenle ne a.
Ɛzoanvolɛ Pɔɔlo hanle kɛ edwɛkɛ mɔɔ wɔ Edwɛndolɛ 40:8 la fane Mɛzaya, anzɛɛ Kelaese ne anwo. Ɔhɛlɛle kɛ: “Mɔɔ Kelaese bara ewiade la, ɔzele Nyamenle kɛ, ‘Ɛmkpondɛ azubɔlɛ nee azubɔdeɛ noko wɔmaa me nwolɛ nwonane. Ɛ nye ɛnlie nane mumua ɛyelalɛ anzɛɛ ɛtanefakyɛ azubɔlɛ nwo.’ Ɛhye ati menganle kɛ, ‘O Nyamenle, mera kɛ mebayɛ mɔɔ ɛkpondɛ la, kɛmɔ bɛhɛlɛ ye wɔ me nwo wɔ mɛla buluku ne anu la.’”
Mɔɔ Gyisɛse wɔ azɛlɛ ye azo la, ɛnee ɔ nye die kɛ ɔbanleɛnlea abɔdeɛ, yeava agɔnwolɛ, na ɔ nee awie mɔ abɔ nu ali aleɛ. (Mat. 6:26-29; Dwɔn 2:1, 2; 12:1, 2) Noko, debie mɔɔ ɛnee ɔ nye die nwolɛ kpalɛ kpalɛ la a le kɛ ɔbayɛ ɔ Ze ne ɛhulolɛdeɛ. Ɛhɛe, Gyisɛse hanle kɛ: “Me aleɛ a le kɛ menwɔli mɔɔ zoanle me la ɛhulolɛdeɛ zo na menwɔwie gyima mɔɔ ɔvale ɔmanle me kɛ menyɛ la yɛ.” (Dwɔn 4:34; 6:38) Ɛdoavolɛma ne zukoale debie mɔɔ fa nɔhalɛ anyelielɛ ba la vile bɛ Menle, Gyisɛse ɛkɛ. Bɛvale anyelielɛ kpole nee mɔdenlebɔlɛ bɛvile bɛ ɛhulolɛ nu bɛhanle Belemgbunlililɛ edwɛkɛ ne bɛhilele awie mɔ.
‘BƐHƆ, BƐMAA MENLI ƐRAYƐ ME ƐDOAVOLƐMA’
Gyisɛse zele ye ɛdoavolɛma ne kɛ: “Bɛhɔ maanle ti nee maanle bo, bɛmaa menli ɛrayɛ me ɛdoavolɛma; bɛzɔne bɛ wɔ Selɛ ne, Ralɛ ne nee Sunsum Nwuanzanwuanza ne duma nu, na bɛhilehile bɛ bɛmaa bɛli debie biala mɔɔ meha mehile bɛ la azo. Na bɛhakye kɛ me nee bɛ lua dahuu, kɔkpula ewiade awieleɛ.” (Mat. 28:19, 20) Gyima ɛhye foa bie a le kɛ bɛbahɔ ɛleka biala mɔɔ bɛbado menli la, bɛbahɔkpɔla bɛdabɛ mɔɔ bɛhilele anyelielɛ la, na bɛ nee bɛ azukoa Baebolo ne. Gyima ɛhye ɛyɛlɛ kola maa bɛ nye die kpole kpalɛ.
Ɛlɔlɛ maa yɛkɔ zo yɛdi daselɛ ɔnva nwo anyetele biala mɔɔ yɛkɛyia la
Saa menli kile anyelielɛ wɔ yɛ edwɛkɛ ne anwo anzɛɛ bɛangile nwolɛ anyelielɛ a, mɔɔ yɛbayɛ la a bamaa yɛ nye alie wɔ daselɛlilɛ nu a. Duzu ati a yɛkɔ zo yɛbɔ edwɛkpa ne nolo ɔnva nwo bɔbɔ kɛ bie a yɛyia anyetelema anzɛɛ menli mɔɔ anye ɛnlie nwolɛ la ɛ? Ɔboalekɛ yɛze kɛ yɛ Belemgbunlililɛ edwɛkɛhanlɛ ne nee ɛdoavolɛyɛlɛ gyima ne da ɛlɔlɛ mɔɔ yɛlɛ yɛmaa Nyamenle nee yɛ gɔnwo mɔ la ali. Yɛ nee yɛ gɔnwo mɔ ngoane la esiane nu. (Yiz. 3:17-21; 1 Tem. 4:16) Bɛmaa yɛzuzu ninyɛne mɔɔ ɛboa yɛ mediema ne mɔ dɔɔnwo bɛmaa bɛgyinla kpundii anzɛɛ bɛmia bɛ mɔdenlebɔlɛ nu wɔ azɛlɛsinli mɔɔ anu yɛ se anu la bie mɔ anwo.
FA NWOLƐ ADENLE BIALA MƆƆ ƐBANYIA LA DI DASELƐ
Mekɛ dɔɔnwo ne ala, saa yɛfa edwɛkɛmiza mɔɔ fɛta la yɛdi gyima a, ɔboa kpalɛ. Kenle ko nwonlomɔ, Amalia nwunle kɛ nrenya bie ɛlɛkenga adwelie kɛlata wɔ ɛleka bie mɔɔ menli die bɛ ɛnwomenle la. Ɔbikyele ye na ɔbizale ye saa yegenga edwɛkɛ kpalɛ bie a. Mekɛ mɔɔ ɔbuale kɛ kyɛkyɛ la, Amalia hanle kɛ, “Melɛ edwɛkpa mɔɔ fane Nyamenle Belemgbunlililɛ ne anwo memaa wɔ.” Ɛhye manle nrenya ne anye liele, na ɔkponlenle Baebolo ɛzukoalɛ zo. Amalia luale adenle ɛhye azo bɔle Baebolo ɛzukoalɛ nsa abo wɔ ɛnwomenlelielɛ ɛleka ne.
Janice ɛva ye gyima nu ɛyɛ ye azɛlɛsinli. Mekɛ mɔɔ sinzavolɛ ne nee ɔ gɔnwo gyimayɛvonli hilele edwɛkɛ bie mɔɔ rale The Watchtower nu anwo anyelielɛ la, Janice zele bɛ kɛ ɔbava magazine ne bie yearɛlɛ bɛ dahuu. Ɔyɛle zɔ ɔmanle ɔ gɔnwo gyimayɛvo fofolɛ mɔɔ ɔ nye liele edwɛkɛ ngakyile mɔɔ wɔ The Watchtower nee Awake! nu anwo la noko. Ɛhye manle ɔ gɔnwo gyimayɛvo bieko liele magazine ne bie. Janice ka kɛ: “Ɛhye le nyilalɛ kpole mɔɔ vi Gyihova ɛkɛ a!” Awieleɛ bɔkɔɔ ne, ɔnyianle menli 11 mɔɔ ɔmaa bɛ magazine dahuu wɔ ye gyima nu ɛkɛ a.
MMAMAA Ɛ SA NU TO
Neavolɛ adenduvo ko hanle kɛ, ɔnle kɛ nolobɔlɛma ka ye sikalɛ kile suamenlema kɛ yɛbazia yeara kenle fofolɛ fa dwula bɛ azua nu daselɛlilɛ ne. Emomu, bɛbahola bɛabiza ahenle kɛ: “Ɛbahulo kɛ mebahile wɔ kɛzi bɛsukoa Baebolo ne la ɔ?” anzɛɛ, “Kenlenzu yɛɛ mekɛ boni a ɛbahulo kɛ mebazia meara na yɛadoa yɛ adawubɔlɛ ne azo a?” Neavolɛ adenduvo ne bɔle amaneɛ kɛ, ɔlua adenle ɛhye azo mediema mɔɔ wɔ asafo ko mɔɔ ɛnee ɔlɛsonle bɛ anu la bɔle Baebolo ɛzukoalɛ 44 abo wɔ dapɛne ko anu.
Siakɔkpɔla mɔɔ yɛyɛ ye ndɛndɛ la, bahola aboa kpalɛ. Kɛmɔti ɛ? Saa yɛyɛ ye zɔ a, ɔkile kɛ yɛ nye die nwo kɛ yɛbaboa ahonlekpalɛma yɛamaa bade Baebolo ne abo. Mekɛ mɔɔ bɛbizale raalɛ bie deɛmɔti ɔkponlenle zo kɛ Gyihova Alasevolɛ nee ye ɛzukoa Baebolo ne la, ɔhanle kɛ, “Membɔle ɔ bo kɛ mesukoa ɔluakɛ bɛhilele me nwo anyelielɛ yɛɛ bɛlale ɛlɔlɛ ali bɛhilele me.”
Ɛbahola wɔabiza suamenle ne kɛ, “Ɛbahulo kɛ mebahile wɔ kɛzi bɛsukoa Baebolo ne la ɔ?”
Mɔɔ Madaí wiele Adekpakyelɛ Ɛzonlenlɛ Sukulu ne la, yeangyɛ ɔnyianle Baebolo sukoavoma 15 yɛɛ yeva 5 noko yemaa nolobɔlɛma gyɛne. Ye Baebolo sukoavoma dɔɔnwo bɔle ɔ bo rale debiezukoalɛ dahuu. Duzu a boale Madaí manle ɔbɔle debiezukoalɛ dɔɔnwo abo a? Sukulu ne manle ɔnwunle kɛ ɔwɔ kɛ ɔsia ɔkɔ bɛ ɛkɛ kɔkpula kɛ ɔbanwu bɛdabɛ mɔɔ bɛlumuale bɛhilele anyelielɛ la. Dasevolɛ gyɛne mɔɔ ɔdaye noko yeboa menli dɔɔnwo yemaa bɛnwu Baebolo ne anu nɔhalɛ ne la ka kɛ: “Menwu kɛ mɔdenlebɔlɛ mɔɔ bɛfa bɛyɛ siakɔkpɔla la a le debie titile mɔɔ boa menli mɔɔ kulo kɛ nwu Gyihova la a.”
Saa yɛsia yɛkɔkpɔla menli mɔɔ yɛka edwɛkɛ ne yɛkile bɛ la ndɛndɛ a ɔkile kɛ yɛ nye die bɛdabɛ mɔɔ bɛkulo kɛ bɛte Baebolo ne abo la anwo
Ɔhyia mɔdenlebɔlɛ kpalɛ na yɛahola yɛayɛ siakɔkpɔla nee Baebolo ɛzukoalɛ. Noko akee, nwolɛ ahatualɛ ne le kpole. Saa yɛfa yɛ nwo yɛwula Belemgbunlililɛ edwɛkɛhanlɛ gyima ne anu a, yɛbahola yɛaboa awie mɔ yɛamaa ‘bɛanwu nɔhalɛ ne,’ na bɛanyia ngoane. (1 Tem. 2:3, 4) Ɔbahola yeamaa yɛanyia ahunlundwolɛ nee anyelielɛ mɔɔ debie biala nee ye ɛnzɛ la.
