MEKƐ mɔɔ Nyamenle menli ne vile Babelɔn wɔ 537 K.Y.M. la, ɛnee Gyihova anye wɔ bɛ nwo zo wɔ bɛ Gyɛlusalɛm adendulɛ ne anu. Ɔzele bɛ kɛ: “Bɛziezie adenle ne bɛmaa menli ne; Bɛdu ademgbole, bɛyeye zolɛ awolɛ ne mɔ.” (Aye. 62:10) Dwenledwenle ndenle mɔɔ bie a Dwuuma vale zo yɛle ɛhye la anwo. Ɔbayɛ kɛ bɛ nuhua bie mɔ lumuale menli ne anyunlu hɔduoduale ahuma mɔɔ wɔ adenle ne azo la na bɛyɛle ye boɛ. Ɛhye mɔɔ bɛyɛle la baboa bɛ mediema mɔɔ lile bɛ nzi rale bɛ sua zo la kpalɛ.

Yɛbahola yɛava ɛhye yɛayɛ adenle mɔɔ yɛdua zo yɛdwu yɛ sunsum nu bodane ne mɔ anwo la anwo ndonwo. Gyihova kulo kɛ ye azonvolɛ kɔsɔɔti dwu bɛ bodane nwo mɔɔ ninyɛne mɔɔ anwo ɛngyia la ɛnzi bɛ adenle a. Ye Edwɛkɛ ne tu yɛ folɛ kɛ: ‘Nea kɛ ɛsi ɛtudu ɛ gyakɛ la boɛ, amaa wɔazi pi wɔ wɔ ndenle nu.’ (Mrɛ. 4:26) Mgbanyinli nee ngakula kɔsɔɔti kola nwu nrɛlɛbɛ mɔɔ wɔ edwɛkɛ ɛhye anu la.

Baebolo ne ka kɛ: “Mgbavolɛ anyunlunyia a le bɛ anwosesebɛ.” (Mrɛ. 20:29) Mgbavolɛ nee mbɛlɛra dɔɔnwo lɛ kpɔkɛdelɛ kpalɛ, adwenle mɔɔ yɛ gyima ndɛ, yɛɛ bɛkulo kɛ ɔwie bɛ boɛ. Mgbanyinli kola nwu mɔdenle mɔɔ mgbavolɛ nee mbɛlɛra bɔ nee mɔɔ bɛkola ye yɛ la na bɛkulo kɛ ɔwie bɛ boɛ. Kpavolɛ anzɛɛ bɛlɛra mɔɔ fa ye nrɛlɛbɛ nee ye anwosesebɛ sonle Gyihova la kola nyia nɔhalɛ anyelielɛ.

Noko, yɛze kɛ ewiade ne nwu ninyɛne mɔɔ yɛ mgbavolɛ ne mɔ kola ye yɛ la. Saa Dasevolɛ kakula bie bɔ mɔdenle wɔ sukulu a, kilehilevolɛma anzɛɛ sukuluma ne bie mɔ bɔ mɔdenle piepia ye kɛ ɔzukoa nwoma kpole amaa yeawie ye boɛ. Anzɛɛ bɛwula mɔɔ bɔ mɔdenle wɔ nwɔhoalilɛ bie anu la anwosesebɛ kɛ ɔva ɔyɛ ye gyima. Ɛhye bie ɛdo wɔ ɛlɛ, anzɛɛ ɛze awie mɔɔ ɛlɛyia ngyegyelɛ ɛhye bie ɔ? Duzu a baboa Keleseɛnenli yeamaa yeazi kpɔkɛ kpalɛ a?

 Baebolo ngilehilelɛ bahola aboa yɛ yeamaa yɛadu adenle kpalɛ ne mɔɔ kɔ ngoane nu la. Nolobɔvo ne 12:1 ka kɛ: “Mekɛ mɔɔ bɛle mgbavolɛ nee mbɛlɛra la, bɛhakye bɛ Bɔvolɛ ne.” Kɛ ɔkɛyɛ na ɛdawɔ anzɛɛ ɛ gɔnwo kpavolɛ bie ahola ‘ahakye ye Bɔvolɛ ne ɛ’?

Maa yɛva mɔɔ dole Eric * mɔɔ wɔ Afrika Adɔleɛ la kɛ neazo. Ɛnee ɔkulo bɔlo ɛbɔlɛ kpalɛ. Ɔkanyia ɛvolɛ 15 la, ɛnee ɔgyinla ye maanle ne agyakɛ anu ɔbɔ bɔlo. Ɛhye kile kɛ ɛnee ɔ nye la kɛ ɔnrɛhyɛ ɔbanyia nwolɛ ndetelɛ wɔ Europe na yealua zo yeava yeayɛ ye gyima titile. Noko, kɛ ɔkɛyɛ na yɛali folɛdulɛ ne mɔɔ se ‘kakye wɔ Bɔvolɛ ne’ la azo ɛ? Ɛzukoalɛdeɛ boni a wɔ edwɛkɛ ɛhye anu maa wɔ anzɛɛ ɛ gɔnwo kpavolɛ ɛ?

Eric nee Gyihova Alasevolɛ bɔle Baebolo ne ɛzukoalɛ bo wɔ mekɛ mɔɔ ɔkɔ sukulu la. Ɔzukoale kɛ ye Bɔvolɛ ne baye alesama ngyegyelɛ avi ɛkɛ bɔkɔɔ. Eric nwunle kɛzi ɔhyia kɛ ɔfa ye mekɛ nee ye anwosesebɛ ɔyɛ Nyamenle ɛhulolɛdeɛ la. Ɔlua nɔhalɛ edwɛkɛ ɛhye mɔɔ Eric ranwunle ye la ati, ɔzile kpɔkɛ kɛ ɔnrɛva bɔlo ɛbɔlɛ ɔnrɛyɛ ye gyima. Emomu, ɔmanle bɛzɔnenle ye na ɔvale sunsum nu bodane ɔziele ɔ nye zo. Yeangyɛ bɛkpale ye asafo nu sonvolɛ na nzinlii ɔhɔle Mediema Mrenya Mɔɔ Bɛtɛgyale Baebolo Sukulu ne bie.

Saa Eric vale bɔlo ɛbɔlɛ yɛle ye gyima a, anrɛɛ yelie duma na yenyia ezukoa. Noko ɔnwunle nɔhalɛ mɔɔ wɔ Baebolo nu ngyinlazo ɛhye anu la: “Sukoavolɛ anwonyia le ye suakpole ɛsesebɛ; ɔle kɛ bane tendenle ɔbɔ ɔ nwo bane.” (Mrɛ. 18:11) Noko banebɔlɛ mɔɔ awie suzu kɛ ɔbanyia ye wɔ anwonyia nu la le mɛlɛbɛla. Bieko, menli mɔɔ fa anwonyia ɛkpondɛlɛ sie bɛ nye zo la, “nyane ala a bɛdi a.”—1 Tem. 6:9, 10.

Ɔyɛ anyelielɛ kɛ mgbavolɛ nee mbɛlɛra dɔɔnwo ɛlua dahuu ɛzonlenlɛ gyima ne mɔɔ bɛva bɛ nwo bɛwula nu la azo ɛnyia anyelielɛ nee banebɔlɛ kpalɛ. Eric ka kɛ: “Meraboka menli ‘ekpunli’ kpole ne mɔɔ bɛlɛsonle Gyihova wɔ dahuu ɛzonlenlɛ gyima ne anu la anwo. Ekpunli kpalɛ bieko ɛnle ɛkɛ, meyɛ Gyihova mo kɛ yehile me adenle kokye ne mɔɔ medua zo a mebanyia nɔhalɛ anyelielɛ na me ɛbɛla awie me boɛ la.”

Na ɛdawɔ noko ɛ? Kɛ anrɛɛ ɛbava ewiade ne anu bodane wɔazie ɛ nye zo la, duzu ati a ɛmmaa wɔ “ndenle” ɛnzi pi wɔ Gyihova anye zo ɔlua adekpakyelɛ gyima ne mɔɔ ɛbayɛ la azo ɛ?—Nea ɛlɛka,  “Menyia Nvasoɛ Mɔɔ Anrɛɛ Menrɛnyia Ye Wɔ Yunivɛsiti La.”

Mekɛ bie mɔɔ agyalɛma bie hɔle United States Bɛtɛle la, bɛnwunle kɛ Bɛtɛlema ne fa anyelielɛ sonle Gyihova wɔ ɛkɛ. Nzinlii, adiema raalɛ ne hɛlɛle kɛ: “Yɛ nwo tɔ yɛ somaa.” Yemɔti, agyalɛma ne zile kpɔkɛ kɛ bɛbava bɛ mekɛ nee bɛ anwosesebɛ ne bie bɛayɛ dɔɔnwo wɔ ɛzonlenlɛ gyima ne anu.

Ɔdwule mekɛ bie la ɛnee ɔnla aze kɛ agyalɛma ne bayɛ nzenzaleɛ bie mɔ. Noko kenle ko bie, bɛdwenledwenlenle alehyenlɛ ne anu tɛkese ne anwo. Ɛnee ɔwɔ Dwɔn 8:31, wɔ ɛkɛ ne Gyisɛse hanle kɛ: “Saa bɛkɔ zolɛ bɛdi me ngilehilelɛ zo a, ɛnee bɛle me ɛdoavolɛma amgba.” Mɔɔ edwɛkɛ ɛhye wɔ bɛ adwenle nu la, bɛhanle kɛ: “Saa yɛkpo ninyɛne mgbole ɛkpondɛlɛ wɔ ɛbɛlabɔlɛ nu a ɔle afɔlebɔlɛ mɔɔ fɛta.” Bɛdɔnenle bɛ sua kpole ne, bɛyele adesoa biala bɛvile bɛ kɔme zo, na bɛdule bɛhɔle asafo mɔɔ hyia moalɛ la anu. Kɛkala bɛle adekpakyelɛma, noko eza bɛboa bɛmaa bɛsisi Belemgbunlililɛ Asalo, na bɛboa maangyeba nyianu bo gyimayɛlɛ. Kɛzi bɛte nganeɛ ɛ? “Anyelielɛ mɔɔ ninyɛne mgbole ɛkpondɛlɛ mɔɔ yɛanva yɛanzie yɛ nye zo ɛmaa yɛnyia la si yɛ nwo, ɔluakɛ yɛlɛyɛ mɔɔ Gyihova ahyehyɛdeɛ ne se yɛyɛ la.”

Sɔlɔmɔn hɛlɛle kɛ: “Nea ɛ nyunlu fɔɔnwo, yɛɛ ɛnea debie a nea ye boɛ.” (Mrɛ. 4:25) Kɛmɔ delava ɛlɛka kale a ɔmmaa debie biala ɛndwehwe ye adwenle la, zɔhane ala a yɛdayɛ noko ɔnle kɛ yɛmaa debie ye yɛ adwenle fi sunsum nu bodane mɔɔ yɛbava yɛazie yɛ nye zo na yɛadwu nwo la azo a.

Sunsum nu bodane boni a ɛbaholawɔapele wɔadwu nwo a? Dahuu ɛzonlenlɛ gyima ne mɔɔ ɛbava ɛ nwo wɔawula nu la le nuhua ko. Bieko a le kɛ ɛbaboa asafo mɔɔ bikye wɔ na bɛhyia nolobɔlɛma amaa bɛahola bɛawie bɛ azɛlɛsinli ne anu gyima yɛ  la. Anzɛɛ bie a asafo bie lɛ nolobɔlɛma dɔɔnwo, noko bɛhyia mgbanyima nee azonvolɛ. Ɛbahola wɔaboa wɔ adenle ɛhye mɔ ko azo ɔ? Duzu ati a ɛ nee wɔ maanzinli zo neavolɛ ne ɛnzuzu nwo saa ɛbahola wɔayɛ zɔ a? Saa ɛlɛ ɛhulolɛ kɛ ɛbayɛ dɔɔnwo a, ɛbahola wɔabiza adenle wɔahɔboa asafo mɔɔ wɔ moa na bɛhyia moalɛ la. *

Maa yɛzia yɛhɔ ndonwo ne mɔɔ wɔ Ayezaya 62:10 la azo. Dwuuma ne bie mɔ yɛle gyima ɛsesebɛ zieziele adenle ne kɛnlɛma amaa Nyamenle menli ne ahola azia ara sua nu. Saa ɛlɛbɔ mɔdenle kɛ ɛbadwu wɔ bodane nwo wɔ Gyihova ɛzonlenlɛ nu a, mmamaa ɛ sa nu to. Nyamenle baboa ɛdawɔ noko yeamaa wɔadwu wɔ bodane ne mɔ anwo. Kɔ zo sɛlɛ Gyihova ɛkɛ nrɛlɛbɛ wɔ mekɛ mɔɔ ɛlɛbɔ mɔdenle kɛ ɛsiezie wɔ adenle nu la. Wɔ mekɛ kpalɛ nu, ɛbanwu kɛzi ɔkola ɔboa wɔ ɔmaa “ɛtudu ɛ gyakɛ la.”—Mrɛ. 4:26.