1, 2. (a) Gyihova dasevolɛ mɔɔ tɛla biala la a le nwane? (b) Duma Gyisɛse ne abo kile duzu, na kɛzi Nyamenle Ara ne bɔle ye duma ne anwo ɛbɛla ɛ?

“NA ƐHYE ala ati yɛɛ bɛwole me bɛmanle membale ewiade ye anu a, kɛ membanli nɔhalɛ ne anwo daselɛ.” (Bɛgenga Dwɔn 18:33-37.) Edwɛkɛ ɛhye a Gyisɛse Kelaese hanle hilele Wulomuma amɛnlado ne mɔɔ ɛnee nea Dwudiya azo wɔ mekɛ mɔɔ bɛdi ye edwɛkɛ la a. Ɛnee ɔtɛkyɛle biala yɛɛ Gyisɛse lale ɔ nwo ali kɛ belemgbunli a. Ɛvolɛ dɔɔnwo anzi, ɛzoanvolɛ Pɔɔlo hanle akɛnrasesebɛ nwo neazo ɛhye mɔɔ Gyisɛse yɛle la anwo edwɛkɛ kɛ, ‘ɔgyinlanle Pɔnteɛse Paelɛte anyunlu ɔlile ye diedi nwo daselɛ.’ (1 Tem. 6:13) Nɔhalɛ nu, ɔdwu mekɛ ne bie a ɔhyia akɛnrasesebɛ kpalɛ na awie ahola ayɛ “nɔhalɛ dasevolɛ” wɔ Seetan ewiade ɛhye mɔɔ ɛkpɔlɛ dɔɔnwo wɔ nu la anu!—Yek. 3:14.

² Kɛmɔ ɛnee Gyisɛse le Dwuunli la ati, bɛwole ye kɛ Gyihova dasevolɛ. (Aye. 43:10) Ɔrayɛle Nyamenle dasevolɛ mɔɔ tɛla biala. Gyisɛse manle mɔɔ ye duma ne kile la anwo hyianle ye kpalɛ. Mɔɔ anwumabɔvolɛ ne zele Gyisɛse papa Dwosefi mɔɔ ɔtetele ye la kɛ ɔlua sunsum nwuanzanwuanza ne azo Mɛle banrenzɛ la, ɔdoale zo kɛ: “Ɔbawo ralɛ nrenya na wɔado ye duma Gyisɛse, ɔboalekɛ ɔbalie ye menli ne yeavi bɛ ɛtane nu.” (Mat. 1:20, 21) Wɔ Hibulu nu, duma Gyisɛse abo kile “Gyihova Le Ngoanedievolɛ.” Ɛnee Gyihova balua Gyisɛse anwo zo alie alesama  avi ɛtane nee ewule nu. Gyisɛse zele Dwuuma kɛ bɛnlu bɛ nwo wɔ bɛ ɛtane ne mɔ anwo amaa bɛanyia Gyihova anyunlu ɛlolɛ. (Mat. 10:6; 15:24; Luku 19:10) Ɔbɔle Nyamenle Belemgbunlililɛ ne nolo. Edwɛkpa kɛlɛvolɛ Maake hɛlɛle kɛ: “Gyisɛse hɔle Galeli hɔbɔle Edwɛkpa ne nolo kɛ, ‘Mekɛ ne ɛdwu, Nyamenle Belemgbunlililɛ ne ɛbikye. Bɛnlu bɛ nwo na bɛlie Edwɛkpa ne bɛli.’” (Maake 1:14, 15) Eza Gyisɛse vale akɛnrasesebɛ kpale Dwuuma ɛzonlenlɛ ne anu mgbanyima anwo ɛdanlɛ, ɛhye boka nwo bie a bɛhunle ye a.—Maake 11:17, 18; 15:1-15.

3. Gyisɛse wule la ye kenle nsa ne azo, duzu a zile a?

³ Noko, nwanwane debie bie zile! Gyisɛse wule la ye kenle nsa ne azo, Gyihova dwazole ye vile ewule nu, kɛ sunsum nu sonla mɔɔ ɛnnwu ɛlɛ. (1 Pita 3:18) Gyisɛse yele ɔ nwo hilele ye ɛdoavolɛma ne ɔvale ɔlile bɛ daselɛ. Kenle mɔɔ bɛdwazole ye ala la, ɔyele ɔ nwo ɔhilele fane nnu.—Mat. 28:8-10; Luku 24:13-16, 30-36; Dwɔn 20:11-18.

4. Ayia boni a Gyisɛse yɛle wɔ mekɛ mɔɔ bɛdwazole ye la ɛ, na duzu gyima a ɔvale ɔmanle ye ɛdoavolɛma a?

⁴ Mekɛ mɔɔ tɔ zo nnu mɔɔ Gyisɛse yele ɔ nwo hilele la, ɛnee ye ɛzoanvolɛma ne nee menli gyɛne ɛyia. Kenle titile zɔhane, ɔ nee bɛ zukoale Nyamenle Edwɛkɛ ne. “Ɔbukele bɛ adwenle ɔmanle bɛdele Nyamenle Edwɛkɛ ne abo.” Ɛhye manle bɛdele ɔ bo kɛ ɛnee bɛha bɛdo ɛkɛ dɛba wɔ Ngɛlɛlera ne anu kɛ Nyamenle agbɔvolɛma a bahu ye a noko bɛbalua nwanwane adenle zo bɛadwazo ye. Wɔ ayia zɔhane abo, Gyisɛse manle ye tievolɛma ne nwunle mɔɔ ɔwɔ kɛ bɛyɛ la. Ɔzele bɛ kɛ: “Bɛbɔ ɔ bo wɔ Gyɛlusalɛma ɛke bɛva me duma bɛbɔ anlubɛnwo nolo bɛhile maanle maanle kɔsɔɔti.” Ɔdoale zo kɛ: ‘Bɛli ninyɛne ɛhye mɔ anwo daselɛ.’—Luku 24:44-48.

5, 6. (a) Duzu ati a Gyisɛse hanle kɛ: ‘Bɛbali ɔ nwo daselɛ ɛ’? (b) Duzu a ɛnee ɔwɔ kɛ Gyisɛse ɛdoavolɛma di nwolɛ daselɛ a?

⁵ Yemɔti, mekɛ mɔɔ li amozii mɔɔ Gyisɛse yele ɔ nwo ali wɔ ye kenle 40 ne anzi la, ɛnee ye ɛdoavolɛma ne bade ye mɛla sikalɛ ne mɔɔ tumi wɔ nu mɔɔ ɔvale ɔmanle bɛ la abo: ‘Na bɛbali me nwo daselɛ wɔ Gyɛlusalɛm, nee Dwudiya amuala nee Samɛlea bɛahɔdwu aleɛabo ɛleka biala.’ (Gyi. 1:8) Duzu ati a Gyisɛse hanle kɛ bɛbali ‘ɔ nwo’ daselɛ, na tɛ Gyihova ɛ? Ɔhanle ye zɔ ɔluakɛ ɛnee ye tievolɛma ne le Yizilayɛma, yemɔti bɛle Gyihova alasevolɛ dɛba.

⁶ Kɛkala, akee ɔwɔ kɛ Gyisɛse ɛdoavolɛma ne nwu kɛ Gyihova balua Gyisɛse anwo zo alie alesama ngoane. Adenle ɛhye mɔɔ bɛbalua zo bɛalie bɛ ngoane la di munli tɛla adenle mɔɔ Gyihova luale zo liele Yizilayɛma vile Yigyibiti nee Babelɔn akɛlɛzonlenlɛ nu wɔ tete ne la. Gyisɛse Kelaese ewule ne nee ye ewudwazo ne bahola alie menli avi akɛlɛyɛlɛ mɔɔ tɛla biala, ɛtane nee ewule tumi bo. Mɔɔ bɛvale sunsum nwuanzanwuanza ne bɛkpokpale Gyisɛse ɛdoavolɛma ne wɔ Pɛntekɔso 33 Y.M. la, bɛbɔle “ninyɛne mgbole mɔɔ Nyamenle ɛyɛ la” nolo, na menli dɔɔnwo liele lile. Gyihova ɛmaa Gyisɛse mɔɔ yedwazo ye yevi ewule nu la tumi kpole wɔ anwuma, na ɔlɛdua ɔ nwo zo yealie menli dɔɔnwo mɔɔ ɛnyia diedi wɔ Gyisɛse ɛkpɔnelɛ afɔle ne anu la ngoane.—Gyi. 2:5, 11, 37-41.

7. Duzu a ninyɛne mɔɔ sisile wɔ Pɛntekɔso 33 Y.M. la di nwolɛ daselɛ a?

⁷ Ninyɛne mɔɔ sisile wɔ ɛvolɛ 33 Y.M. Pɛntekɔso kenle ne anu la, di daselɛ kɛ Gyihova liele Gyisɛse afɔle ne mɔɔ  ɔvale ye sonlabaka ne mɔɔ di munli bɔle la dole nu kɛ mgbɔdalɛdeɛ, anzɛɛ debie mɔɔ keda ɛtane zo. (Hib. 9:11, 12, 24) Kɛmɔ Gyisɛse hilehilele nu la, yeamba kɛ, ‘bɛzonle ye; ɔrale kɛ ɔbazonle, na yeava ye ngoane yeayɛ ɛkpɔnedeɛ yeamaa menli dɔɔnwo.’ (Mat. 20:28) “Menli dɔɔnwo” ne mɔɔ bɛbanyia Gyisɛse ɛkpɔnedeɛ ne azo nvasoɛ la, ɛnvi Dwuuma mɔɔ bɛnlunle bɛ nwo la angome anu. Emomu, Nyamenle kpondɛ kɛ ‘menli kɔsɔɔti nyia ngoane,’ ɔluakɛ ɛkpɔnedeɛ ne baye “ewiade amra ɛtane yeahɔ.”—1 Tem. 2:4-6; Dwɔn 1:29.

8. Nienwu a Gyisɛse ɛdoavolɛma ne lile daselɛ hɔdwule a, na kɛzi bɛholale bɛyɛle zɔ ɛ?

⁸ Asoo Gyisɛse ɛdoavolɛma mɔɔ bɛlumua la nyianle akɛnrasesebɛ lile ɔ nwo daselɛ dahuu? Nɔhalɛ nu, bɛyɛle ye zɔ, noko tɛ bɛdabɛ mumua ne bɛ anwosesebɛ ɔ. Gyihova tumi kpole ne mɔɔ yemɔ a le ye sunsum nwuanzanwuanza ne la a manle bɛnyianle anwosesebɛ bɛlile daselɛ a. (Bɛgenga Gyima ne 5:30-32.) Yemɔti, wɔ ɛvolɛ 33 Y.M. Pɛntekɔso kenle ne anzi ɛvolɛ 27, ɛnee bɛbahola bɛaha kɛ, bɛbɔ “Edwɛkpa ɛhye” nolo bɛhile Dwuuma nee menli mɔɔ ɛnle Dwuuma la nee “abɔdeɛ muala mɔɔ wɔ aleɛabo la.”—Kɔl. 1:5, 23.

9. Kɛmɔ ɛnee bɛha bɛdo ɛkɛ la, duzu a rale Keleseɛne asafo ne azo a?

⁹ Ɔyɛ alɔbɔlɛ kɛ mekɛ guale nu la, menli mɔɔ ɛnee wɔ Keleseɛne asafo ne anu la hilehilele ninyɛne mɔɔ ɛnle nɔhalɛ la, na bɛlɛ ye ngyikyingyikyi toonwo bɛzɛkyele mediema ne mɔ diedi la. (Gyi. 20:29, 30; 2 Pita 2:2, 3; Dwuudu 3, 4) Gyisɛse hanle kɛ kpɔkyevolɛma bawoa ɛkɛ toonwo “ewiade awieleɛ.” (Mat. 13:37-43) Ɛhye ati, wɔ October 1914, Gyihova kpale Gyisɛse kɛ alesama amuala Belemgbunli. Zɔhane mekɛ ne a “awieleɛ mekɛ ne” anzɛɛ Seetan ɛtane ewiade ne awieleɛ mekɛ ne bɔle ɔ bo a.—2 Tem. 3:1.

10. (a) Ɛvolɛ titile boni a Keleseɛnema mɔɔ bɛkpokpa bɛ mɔɔ bɛwɔ ɛkɛ ɛnɛ la bɔle nwolɛ nolo a? (b) Duzu a zile wɔ October 1914 a, kɛzi yɛkola yɛnwu ye zɔ ɛ?

¹⁰ Ɛvolɛ 30 kolaa na October 1914 adwu la, yɛɛ Keleseɛnema mɔɔ bɛkpokpa bɛ la bɔle ɔ bo bɔle ye nolo kɛ Nyamenle Belemgbunlililɛ ne bali tumi wɔ zɔhane ɛvolɛ ne a. Bɛnwunle ɛhye wɔ edwɛkɛ mɔɔ wɔ Daneɛle ngapezo ne mɔɔ fane baka kpole bie mɔɔ bɛbapɛ ye bɛado aze  na yeafifi wɔ “ɛvolɛ [anzɛɛ, mekɛ] nsuu” anzi la anu. (Dan. 4:16) Gyisɛse vɛlɛle mekɛ ɛhye “menli mɔɔ ɛnze Nyamenle la . . . mekɛ” wɔ ye kenlebie ɛralɛ ne nee ye ‘ewiade awieleɛ ne’ anwo ngapezo ne anu. Ɔvi ɛvolɛ 1914, “debie mɔɔ bazi ahile kɛ [Kelaese] ɛralɛ ne ɛdwu” la ɛla ali wienyi ɛmaa menli kɔsɔɔti ɛnwu ye. Kɛkala ɔle azɛlɛ ye Belemgbunli fofolɛ. (Mat. 24:3, 7, 14; Luku 21:24) Yemɔti, ɔvi zɔhane mekɛ ne, “ninyɛne mgbole mɔɔ Nyamenle ɛyɛ” mɔɔ yɛbɔ ye nolo la bie a le Gyisɛse mɔɔ Gyihova ɛva ye ɛzie Belemgbunli ɔvi 1914 la.

11, 12. (a) Duzu a zile wɔ 1919 ne anu a? (b) Duzu a lale ali wienyi wɔ ɛvolɛ 1935 ne anu a? (Nea mɔlebɛbo nvoninli ne.)

¹¹ Ɔvi ɛvolɛ 1914 mɔɔ bɛziele Gyisɛse Kelaese Belemgbunli la, yɛɛ ɔbɔle ɔ bo kɛ ɔye ye ɛdoavolɛma mɔɔ bɛkpokpa bɛ la yeavi ‘Babelɔn Kpole ne,’ mɔɔ ɔgyi ɛkɛ ɔmaa adalɛ ɛzonlenlɛ la anu a. (Yek. 18:2, 4) Wɔ 1919, mɔɔ ɛnee Ewiade Konle I rale ye awieleɛ ɛtɛkyɛle la, menli mɔɔ bɛva sunsum nwuanzanwuanza ne bɛkpokpa bɛ la nyianle adenle bɔle edwɛkpa ne nolo wɔ ewiade amuala. Bɛlile ɛkpɔnedeɛ ne mɔɔ kola die ngoane nee edwɛkpa mɔɔ fane Nyamenle Belemgbunlililɛ ne anwo la daselɛ. Ɔlua ɛhye azo, menli dɔɔnwo zukoale nɔhalɛ ne na bɛkpokpale bɛ kɛ bɛ nee Kelaese bɛayɛ arelemgbunli wɔ anwuma.

¹² Wɔ 1935, ɔralale ali wienyi kɛ Kelaese ɛbɔ ɔ bo ɔlɛboɔboa ye ‘mboane gyɛne’ ne anloa. Ɛnɛ, mboane gyɛne ne anu amra ɛyɛ mgbe dɔɔnwo wɔ ewiade amuala. Bɛ nee menli mɔɔ bɛkpokpa bɛ la di Kelaese neazo ne anzi bɛfa akɛnrasesebɛ bɛdi daselɛ. Mboane gyɛne ne noko die di kɛ ɔlua Gyisɛse afɔlebɔlɛ ne ala azo a bɛbanyia ngoane a. Bɛze kɛ saa bɛkɔ zo bɛyɛ daselɛlilɛ gyima ne na bɛfa bɛ ngoane mekɛ bɛyɛ mɔɔ sɔ Gyihova anye a, bɛbanyia bɛ ti wɔ “amaneɛnwunlɛ kpole ne” anu, na bahɔ Nyamenle ewiade fofolɛ ne anu.—Dwɔn 10:16; Yek. 7:9, 10, 14.

13. Kɛ Gyihova Alasevolɛ la, duzu a yɛsika yɛ bo kɛ yɛbayɛ a, na kɛ ɔkɛyɛ na yɛahola ye yɛ kpalɛ ɛ?

¹³ Ɔle nwolɛ adenle kpole mɔɔ yɛnyia kɛ yɛbahɔ zo yɛaha “ninyɛne mgbole mɔɔ Nyamenle ɛyɛ” nee kenlebie ɛwɔkɛ ngakyile mɔɔ yebɔ la anwo edwɛkɛ yɛahile menli a. Nɔhalɛ nu, tɛ mekɛ ne amuala a gyima ɛhye ɛyɛlɛ la aze a. Ɔdwu mekɛ ne bie a menli ɛndie yɛ anzɛɛ bɛdwazo bɛtia yɛ. Ɔba ye zɔ a ɔwɔ kɛ yɛsukoa ɛzoanvolɛ Pɔɔlo nee ɔ gɔnwo mɔ neazo ne. Ɔhanle kɛ: “Yɛ Nyamenle ne manle yɛ akɛnrasesebɛ manle yɛhanle Edwɛkpa ne mɔɔ vi ye ɛkɛ ne la yɛhilele bɛ wɔ mekɛ bɔbɔ mɔɔ ɛnee menli dɔɔnwo tia yɛ la.” (1 Tɛs. 2:2) Ɔwɔ kɛ yɛmaa ɛwɔkɛ mɔɔ yɛbɔle Gyihova wɔ mekɛ mɔɔ yɛyilale yɛ nwo zo  la tɛnla yɛ adwenle nu dahuu. Yɛkulo kɛ yɛyɛ Gyihova Alasevolɛ kɔkpula kɛ Seetan ɛtane ewiade ɛhye kɛhɔ ye awieleɛ bɔkɔɔ. (Aye. 6:11) Yɛnrɛhola yɛnrɛva yɛ anwosesebɛ yɛnrɛyɛ zɔ. Kɛmɔ ɛvoya mɔɔ lumua la anu Keleseɛnema ne yɛle la, ɔwɔ kɛ yɛsɛlɛ Gyihova yɛmaa ɔmaa yɛ ye sunsum nwuanzanwuanza ne amaa yɛanyia “tumi bedevinli ne.”—Bɛgenga 2 Kɔlentema 4:1, 7; Luku 11:13.

14, 15. (a) Duzu a bɛyɛle ɛvoya ne mɔɔ lumua la anu Keleseɛnema a, na kɛzi Pita manle bɛ anwosesebɛ ɛ? (b) Saa bɛkpɔ yɛ ɔluakɛ yɛle Gyihova Alasevolɛ la ati a, duzu a ɔwɔ kɛ yɛkakye a?

¹⁴ Ɛnɛ, menli dɔɔnwo ka kɛ bɛle Keleseɛnema anzɛɛ “bɛze Nyamenle, noko bɛ nyɛleɛ ɛngile zɔhane. Ɛkpɔlɛ nee anzosesebɛ ɛyi bɛ tɛkɛɛ, yɛɛ bɛnze debie kpalɛ biala yɛ.” (Tae. 1:16) Wɔ ɛvoya ne mɔɔ lumua la anu, menli dɔɔnwo anzonle Nyamenle wɔ adenle mɔɔ ɔdie ɔto nu la azo, bɛkpɔle nɔhalɛ Keleseɛnema mɔɔ ɛnee wɔ ɛkɛ la bɔbɔ. Ɛhye ati, ɛzoanvolɛ Pita hɛlɛle bɛ kɛ: “Saa Kelaese duma nu ti bɛkile bɛ nyane a, nyilalɛ ɛha bɛ, ɔluakɛ . . . sunsum ne mɔɔ le Nyamenle Sunsum ne wɔ bɛ nwo zo.”—1 Pita 4:14.

¹⁵ Asoo edwɛkɛ zɔhane mɔɔ sunsum ne manle bɛhɛlɛle la fane Gyihova Alasevolɛ mɔɔ bɛwɔ ɛkɛ ɛnɛ la anwo ɔ? Ɛhɛe, ɔluakɛ yɛdi Gyihova anwo daselɛ yɛɛ eza yɛbɔ ye nolo kɛ Gyisɛse a le Nyamenle Belemgbunlililɛ ne azo Belemgbunli a. Bɛkpɔle Gyisɛse ɔluakɛ ɛnee ɔle Gyihova dasevolɛ. Noko, ɔzele menli mɔɔ dwazole tiale ye la kɛ: “Egya tumi nu yɛɛ melua mɔɔ membale a, na bɛmɛ, bɛanlie me.” (Dwɔn 5:43) Zɔhane ati, saa menli fa ɛkpɔlɛ ba ɛ nwo zo ɔlua daselɛlilɛ gyima ne mɔɔ ɛlɛyɛ la ati a, ɛnee kakye kɛ Nyamenle die wɔ to nu na ‘ye sunsum ne wɔ ɛ nwo zo.’

16, 17. (a) Kɛzi Gyihova menli mɔɔ bɛwɔ ewiade amuala la te nganeɛ wɔ daselɛlilɛ gyima ne anwo ɛ? (b) Duzu a wɔsika ɛ bo kɛ ɛbayɛ a?

¹⁶ Eza ɔwɔ kɛ yɛkakye kɛ yɛ daselɛlilɛ gyima ne ɛlɛnyia anyuhɔlɛ kpalɛ wɔ ewiade ɛleka muala. Wɔ ɛleka bɔbɔ mɔɔ yɛta yɛkɔ daselɛlilɛ wɔ ɛkɛ la, yɛnyia menli mɔɔ lɛ ɛhulolɛ kɛ bɛbadie yɛ ngoane edwɛkɛ ne la dahuu. Yemɔti bɛmaa yɛbɔ mɔdenle yɛzia yɛhɔ menli mɔɔ tie yɛ la ɛkɛ, yɛ nee bɛ ɛzukoa Baebolo ne, yɛboa bɛ yɛmaa bɛyila bɛ nwo zo na bɛzɔne. Kɛzi ɛbade nganeɛ wɔ mekɛ mɔɔ wɔhola wɔyɛ zɔ la ɛ? Sarie mɔɔ ɛva ɛvolɛ mɔɔ bo 60 ɛyɛ daselɛlilɛ gyima ne anyebolo zo wɔ South Africa la ka kɛ: “Ɔyɛ me anyelielɛ kpole kɛ ɔlua Gyisɛse ɛkpɔnelɛ afɔle ne ati, me nee Gyihova, anwuma nee aze Belemgbunli ne ɛnyia agɔnwolɛvalɛ kpalɛ, na meboa menli memaa bɛnwu ye duma ne la.” Ɔ nee ɔ hu Martinus bɛboa bɛ mra nsa nee awie mɔ gyɛne bɛmaa bɛlɛsonle Gyihova. Sarie toa zo kɛ: “Gyima biala ɛnle ɛkɛ mɔɔ ɔmaa ahunlundwolɛ kpole zɛhae a, na ɔlua ye sunsum nwuanzanwuanza ne azo, Gyihova maa yɛ muala anwosesebɛ mɔɔ yɛhyia la ɔmaa yɛtoa ngoane gyima ɛhye azo.”

¹⁷ Saa yɛle Keleseɛnema mɔɔ bɛzɔne yɛ anzɛɛ bɛtɛsɔnenle yɛ bɔbɔ a, ɔwɔ kɛ yɛ kɔsɔɔti yɛ nye die nwolɛ adenle kɛnlɛma ne mɔɔ yɛnyia kɛ yɛboka Gyihova Alasevolɛ mɔɔ bɛwɔ ewiade amuala anwo la anwo. Yemɔti, kɔ zo bɔ edwɛkpa ne nolo na twe ɛ nwo fi Seetan ewiade ne anwo. Saa ɛyɛ zɔ a, ɛbamaa enililɛ kpole aha yɛ anwuma Selɛ Gyihova mɔɔ ɔlɛ ɛlɔlɛ na ye duma la yɛ nwo zo la dahuu.