YƐDE mekɛ mɔɔ anu yɛ se tɛla biala wɔ alesama tetedwɛkɛ nu la anu. (2 Tem. 3:1-5) Alehyenlɛ biala yɛyia ɛlɔlɛ mɔɔ yɛlɛ yɛmaa Gyihova nee ye tenlene ngyinlazo ne mɔ la anwo sɔnea. Gyisɛse nwunle ngyegyelɛ mekɛ ɛhye ziele, yemɔti ɔzile ye ɛdoavolɛma ne adua kɛ ɔbamaa bɛ anwosesebɛ amaa bɛagyinla bɛahɔdwu awieleɛ. (Mat. 24:3, 13; 28:20) Amaa bɛahola gyinla la, Gyisɛse kpale sonvolɛ nɔhavo ne kɛ ɔmaa bɛ sunsum nu “aleɛ wɔ mekɛ nloa.”—Mat. 24:45, 46.

Ɔvi 1919 mɔɔ bɛkpale sonvolɛ nɔhavo ne la, “sonvolɛma” mgbe dɔɔnwo mɔɔ bɛvi aneɛ kɔsɔɔti anu la ɛra Nyamenle ahyehyɛdeɛ ne anu, na bɛlɛnyia sunsum nu aleɛ. (Mat. 24:14; Yek. 22:17) Noko, tɛ aneɛ ne amuala anu a bɛhile yɛ mbuluku ne mɔ abo bɛhɔ a, yɛɛ tɛ awie biala a kola kenga yɛ mbuluku ne mɔ wɔ ɛlɛtɔlɔnek ninyɛne zo a. Kɛ neazo la, menli dɔɔnwo ɛnlɛ yɛ video ne mɔ nee yɛ Intanɛte zo ninyɛne ne mɔ bie. Asoo ɛhye kile kɛ bie mɔ asa ɛnga aleɛ mɔɔ bamaa bɛ nwo ayɛ se sunsum nu la ɔ? Bɛmaa yɛzuzu kpuyia titile nna anwo yɛva yɛbua.

Mekɛ mɔɔ Seetan zɔle Gyisɛse nleanle kɛ ɔhakyi awolɛ kpanwo la, Gyisɛse buale kɛ: “Tɛ aleɛ ngome a sonla di a ɔnyia ngoane a, na [Gyihova] anloa edwɛkɛ biala maa ngoane.” (Mat. 4:3, 4) Gyihova edwɛkɛ a wɔ Baebolo ne anu a. (2 Pita 1:20, 21) Yemɔti, Baebolo ne a le titile wɔ yɛ sunsum nu aleɛ ne anu a.—2 Tem. 3:16, 17.

Gyihova ahyehyɛdeɛ ne ɛyɛ New World Translation of the Holy Scriptures ne amuala anzɛɛ ye foa bie wɔ aneɛ mɔɔ bo 120 la anu, na ɛvolɛ biala bɛyɛ dɔɔnwo bɛboka nwo. Saa ɛye zɔhane ngilebɛbo ne ɛsie ahane a, bɛyɛ Baebolo ngilebɛbo gyɛne mgbe dɔɔnwo anzɛɛ ye foa bie wɔ aneɛ ngakyile nu. Anyuhɔlɛ ɛhye mɔɔ yɛ azibɛnwo la nee Gyihova ɛhulolɛdeɛ ɛhye yia: ‘Ɔwɔ kɛ menli kɔsɔɔti nwu nɔhalɛ ne na bɛnyia ngoane.’ (1 Tem. 2:3, 4) Na ɔluakɛ “wɔ [Gyihova] anyunlu, debie biala ɛnvea” la ati, yɛbahola yɛalie yɛali kɛ ɔbahwe bɛdabɛ mɔɔ “bɛze bɛ sunsum nu ngyianlɛ la” yeara ye ahyehyɛdeɛ ne anu na yeamaa bɛ sunsum nu aleɛ.—Hib. 4:13; Mat. 5:3, 6, NW; Dwɔn 6:44; 10:14.

Saa awie diedi bayɛ kpole a, ɔhyia kɛ ɔyɛ dɔɔnwo ɔtɛla Baebolo ne mɔɔ ɔbagenga la. Ɔwɔ kɛ ɔte mɔɔ ɔkenga la abo na ɔfa ɔdi gyima. (Gye. 1:22-25) Ɛvoya ne mɔɔ lumua la anu Yiteyopea abɔlɔba bie nwunle nɔhalɛ edwɛkɛ ɛhye. Mekɛ mɔɔ ɔlɛkenga Nyamenle edwɛkɛ ne la, edwɛkpakavolɛ Felepe bizale ye kɛ: “Asoo ɛte mɔɔ ɛlɛkenga la abo?” Abɔlɔba ne buale ye kɛ: “Na kɛ mesi meyɛ mete ɔ bo ɛ? Kyesɛ awie kilehile nu kile me.” (Gyi. 8:26-31) Felepe boale abɔlɔba ne ɔmanle ɔdele Nyamenle edwɛkɛ ne abo. Abɔlɔba ne anye liele mɔɔ ɔzukoale la anwo na ɔmanle bɛzɔnenle ye. (Gyi. 8:32-38) Yɛ Baebolo nwo mbuluku ne mɔ noko ɛmaa yɛnyia nɔhalɛ ne anwo ndelebɛbo mɔɔ di munli. Bɛmaa yɛ anwosesebɛ bɛmaa yɛfa mɔɔ yɛsukoa la yɛdi gyima.—Kɔl. 1:9, 10.

Ɔlua yɛ mbuluku ne mɔ azo, Gyihova azonvolɛ nyia sunsum nu aleɛ dɔɔnwo bɛdi nee sunsum nu ninyɛne dɔɔnwo bɛno. (Aye. 65:13) Kɛ neazo la, Ɛzinzalɛ Arane ne mɔɔ bɛyɛ ye wɔ aneɛ mɔɔ bo 210 anu la kilehile Baebolo ngapezo nu, ɔmaa yɛte Baebolo ne abo kpalɛ, yɛɛ ɔmaa yɛfa Baebolo ngyinlazo yɛbɔ yɛ ɛbɛla. Awake! magazine ne mɔɔ bɛyɛ ye wɔ aneɛ kɛyɛ 100 anu la maa yɛnyia Gyihova abɔdeɛ nwo ndelebɛbo dɔɔnwo yɛɛ ɔkile yɛ kɛzi yɛbava Baebolo ne anu folɛdulɛ yɛabɔ yɛ ɛbɛla la. (Mrɛ. 3:21-23; Wulo. 1:20) Sonvolɛ nɔhavo ne ɛyɛ Baebolo nwo mbuluku wɔ aneɛ mɔɔ bo 680 la anu! Asoo ɛye mekɛ ɛsie ɛkɛ ɛfa ɛkenga Baebolo ne kenle ko biala? Asoo ɛkenga magazine fofolɛ biala mɔɔ kɛra la nee buluku fofolɛ mɔɔ bɛkɛyɛ ye wɔ wɔ aneɛ nu ɛvolɛ biala la ɔ?

Gyihova ahyehyɛdeɛ ne eza yɛ Baebolo nu ɛdendɛlɛ ngɛlata mɔɔ bɛnea zo bɛmaa ɛdendɛlɛ wɔ debiezukoalɛ, maanzinli nee maangyeba nyianu bo la. Ɛ nye die ɛdendɛlɛ, drama, yɛkile, nee edwɛkɛbizebizalɛ mɔɔ kɔ zo wɔ ayia ɛhye mɔ abo la anwo ɔ? Nɔhalɛ nu, Gyihova to yɛ sunsum nu ɛkponle!—Aye. 25:6.

Kyɛkyɛ. Ɔnle kɛ ɔsi yɛ nwo kɛ ɔdwu mekɛ ne bie a Gyihova azonvolɛ bie mɔ nyia sunsum nu aleɛ tɛla bie mɔ la. Kɛmɔti ɛ? Suzu ɛzoanvolɛ ne mɔ anwo nea. Bɛ sa hanle adehilelɛ dɔɔnwo bɛdɛlale ɛdoavolɛma ne wɔ ɛvoya ne mɔɔ lumua la anu. (Maake 4:10; 9:35-37) Noko, sunsum nu ɛhɔne angu ɛdoavolɛma ne; bɛ sa hanle mɔɔ ɛnee bɛhyia nwolɛ la.—Ɛfɛ. 4:20-24; 1 Pita 1:8.

Eza ɔwɔ kɛ yɛnwu kɛ tɛ mɔɔ Gyisɛse hanle nee mɔɔ ɔyɛle ye wɔ azɛlɛ ye azo la amuala a bɛhɛlɛ ye wɔ Edwɛkpa ne anu a. Ɛzoanvolɛ Dwɔn hɛlɛle kɛ: “Ninyɛne dɔɔnwo wɔ ɛkɛ ne mɔɔ Gyisɛse yɛle a. Saa bɛhɛlɛle bɛ muala ngoko ngoko a anrɛɛ menea a nwolɛ mbuluku ɛnrɛzo ewiade ye amuala anu.” (Dwɔn 21:25) Gyisɛse ɛvoya ne mɔɔ lumua la anu ɛdoavolɛ ne mɔ ze Gyisɛse anwo edwɛkɛ dɔɔnwo tɛla yɛ ɛdeɛ, noko yɛngyia ɛhwee. Gyihova ɛmaa yɛde Gyisɛse anwo edwɛkɛ dɔɔnwo mɔɔ bamaa yɛayɛ ye ɛdoavolɛma a.—1 Pita 2:21.

Dwenle ngɛlata mɔɔ ɛzoanvolɛma ne hɛlɛle ɛvoya ne mɔɔ lumua la anu asafo ne mɔ noko la anwo nea. Yeanyɛ boɛ fee la, ngɛlata mɔɔ Pɔɔlo hɛlɛle la anu ko ɛnle Baebolo ne anu. (Kɔl. 4:16) Kɛmɔ yɛnlɛ zɔhane kɛlata ne bie la ati, yɛ sunsum nu aleɛ ne ɛnza yɛ ɔ? Kyɛkyɛ. Gyihova ze mɔɔ yɛhyia nwo la yemɔti yemaa yɛ sunsum nu aleɛ dɔɔnwo mɔɔ bamaa yɛ nwo ayɛ la.—Mat. 6:8.

Ɛnɛ, Gyihova azonvolɛ ekpunli bie mɔ asa ka sunsum nu aleɛ dɔɔnwo tɛla bie mɔ. Yɛ mbuluku ne mɔ ekyi bie ala a wɔ wɔ aneɛ nu ɔ? Saa ɔle zɔ a, nwu ye kɛ Gyihova dwenle ɛ nwo. Sukoa mbuluku mɔɔ ɛlɛ la, na saa ɔbayɛ boɛ a, kɔ debiezukoalɛ mɔɔ bɛyɛ ye wɔ aneɛ mɔɔ ɛte anu la bie. Nyia anwodozo kɛ Gyihova bamaa ɛ nwo ayɛ se wɔ sunsum nu.—Edw. 1:2; Hib. 10:24, 25.

Yɛ magazine ne mɔ nee mbuluku gyɛne mɔɔ yɛfa yɛyɛ debiezukoalɛ la bie mɔ wɔ yɛ Intanɛte gyimalilɛleka ne. Ɛbanwu edwɛkɛ mɔɔ boa agyalɛma, ngakula mɔɔ bɛlɛnyi nee ngakula ngyikyi la wɔ yɛ Intanɛte gyimalilɛ ɛleka ne. Saa mbusua suzu edwɛkɛ ɛhye mɔ bie anwo wɔ Abusua Ɛzonlenlɛ bo a, bɛnyia zolɛ nvasoɛ. Bieko, yɛ Intanɛte gyimalilɛleka ne bɔ gyimalilɛ titile mɔɔ bie a le bɛdabɛ mɔɔ bɛwie Geleade sukulu, ɛvolɛ ayia, nee esiane mɔɔ to yɛ mediema mɔɔ bɛwɔ ewiade amuala nee kɔɔto edwɛkɛ mɔɔ fane Gyihova menli nwo la anwo amaneɛ. (1 Pita 5:8, 9) Eza Intanɛte gyimalilɛleka ne le adenle titile mɔɔ yɛdua zo yɛbɔ edwɛkpa ne nolo a, bɔbɔ wɔ maanle mɔɔ bɛva bɛ sa bɛdo yɛ gyima ne azo anzɛɛ bɛdua ye wɔ ɛkɛ ne la anu.

Noko akee, yɛ nwo bahola ayɛ se wɔ sunsum nu dahuu ɔnva nwo kɛ yɛkola yɛkɔ Intanɛte ne azo anzɛɛ yɛngola yɛngɔ zo la. Akɛlɛ eku ne ɛyɛ gyima ɛsesebɛ yemaa yɛnyia mbuluku dɔɔnwo amaa sonvolɛ ko biala ako ayi wɔ sunsum nu. Yemɔti, ɔnle kɛ ɛte nganeɛ kɛ ɔwɔ kɛ ɛtɔ milahyinli amaa wɔahola wɔahɔ Intanɛte gyimalilɛleka ne. Bie mɔ bahola ayɛ bɛ ngyehyɛleɛ apelente mbuluku avi yɛ Intanɛte gyimalilɛleka ne amaa bɛ gɔnwo mɔ mɔɔ bɛnlɛ Intanɛte la ɛdeɛ, noko tɛ asafo ne a ɔwɔ kɛ yɛ ɛhye a.

Yɛ nye die kɛ Gyisɛse ɛlɛdi ye ɛwɔkɛ zo yeali yɛ sunsum nu ngyianlɛ nwo gyima la. Mekɛ mɔɔ awieleɛ mekɛ ɛhye mɔɔ anu yɛ se la awieleɛ ɛlɛbikye la, yɛbahola yɛanyia anwodozo kɛ Gyihova bahɔ zo amaa yɛ sunsum nu “aleɛ wɔ mekɛ nloa.”