1, 2. Gyima boni a Gyihova vale manle Mosisi a, na ɛwɔkɛ boni a Ɔbɔle ye a?

FA YE kɛ ɔwɔ kɛ ɛgyinla Nyamenle agyakɛ anu ɛtendɛ ɛkile tumivolɛ mɔɔ tɛla biala wɔ azɛlɛ ye azo la. Anrɛɛ kɛzi ɛbade nganeɛ ɛ? Bie a adwenleadwenle badɔ ɛ nwo, ɛbade nganeɛ kɛ ɛnfɛta anzɛɛ ɛzulolɛ baha wɔ. Kɛzi ɛbaziezie edwɛkɛ mɔɔ ɛbaha la ɛ? Boni a ɛbayɛ amaa tumi ara wɔ edwɛkɛ ne anu kɛ awie mɔɔ gyi tumivolɛ Nyamenle ne agyakɛ anu ɛ?

² Tɛnlabelɛ ɛhye bie a ɛnee Mosisi wɔ nu a. Gyihova zele nrenya ɛhye mɔɔ “ɔle bɛlɛvolɛ ɔtɛla dasanli biala mɔɔ wɔ aleɛabo la” kɛ ɔsoa ye Falo ɛkɛ yeamaa yeahɔye ye menli ne mɔɔ bɛlɛsisi bɛ wɔ Yigyibiti la yeavi akɛlɛzonlenlɛ nu. (Ɛdi. 12:3) Ɛnee Falo le sonla mɔɔ ɔmbu debie yɛɛ ɔmemaa ɔ nwo zo. (Ade. 5:1, 2) Noko, ɛnee Gyihova kulo kɛ Mosisi ka kile Falo kɛ ɔmaa ye sonvolɛma mgbe dɔɔnwo ne ɛvi maanle ne anu! Ndelebɛbo wɔ nu kɛ Mosisi bizale Gyihova edwɛkɛ ɛhye la: “Nwane bɔbɔ a le medame, mɔɔ mekɔ [Falo] anyunlu, meahɔye Yizilayɛma meavi Yigyibiti a?” Ɔbayɛ kɛ Mosisi dele nganeɛ kɛ ɔnfɛta. Noko Nyamenle manle ɔnwunle kɛ ɔnrɛgyakyi ye ɛlɛ. Gyihova hanle kɛ: “Me nee wɔ balua.”—Ade. 3:9-12.

3, 4. (a) Duzu a ɛnee Mosisi sulo a? (b) Adenle boni azo a yɛbahola yɛade nganeɛ mɔɔ Mosisi dele la bie a?

³ Duzu ati a ɛnee Mosisi sulo ɛ? Ɔbayɛ kɛ ɛnee ɔsulo kɛ Falo  ɛnrɛdie awie mɔɔ Gyihova Nyamenle ɛzoa ye la. Eza ɛnee Mosisi sulo kɛ Yizilayɛma ɛnrɛlie ɛnrɛli kɛ Gyihova ɛkpa ye kɛ ɔli bɛ ti bɛvi Yigyibiti. Yemɔti, Mosisi zele Gyihova kɛ: “Bɛnrɛlie me bɛnrɛli anzɛɛ bɛnrɛdie me, bɛbaha kɛ, ‘[Gyihova] anye ɔ nwo angile wɔ.’”—Ade. 3:15-18; 4:1.

⁴ Yɛbahola yɛazukoa debie mɔɔ anwo hyia la yɛavi mualɛ mɔɔ Gyihova vale manle Mosisi nee mɔɔ zile nzinlii la anu. Bie a ɔnrɛra ye ɛlɛ kɛ ɛbahɔgyinla tumivolɛ bie anyunlu wɔadendɛ. Noko, asoo ɔdwu mekɛ ne bie a ɔyɛ se ɔmaa wɔ kɛ ɛbaha Nyamenle nee ye Belemgbunlililɛ ne anwo edwɛkɛ wɔahile menli mɔɔ wɔ wɔ azɛlɛsinli ne anu la ɔ? Saa ɔle zɔ a, ɛnee maa yɛzuzu mɔɔ yɛbahola yɛazukoa yɛavi Mosisi edwɛkɛ ne anu la anwo.

5. Duzu a Gyihova vale wulale Mosisi asa nu a, na kɛzi ɔyele Mosisi ɛzulolɛ ne ɔvile ɛkɛ ɛ? (Nea mɔlebɛbo nvoninli ne.)

⁵ Mekɛ mɔɔ Mosisi manle Nyamenle nwunle kɛ saa ɔka ye edwɛkɛ ne a bɛnrɛva la, Nyamenle zieziele ye manle zɔhane gyima ne. Kɛlɛtokɛ ne mɔɔ wɔ Adendulɛ la ka kɛ: ‘Gyihova bizale Mosisi kɛ, “Duzu a ɛlɛ ye ɛ sa nu la?” Ɔbuale kɛ, “Kpɔma ɔ.” Gyihova zele ye kɛ, “Fuandi to azɛlɛ ne anwo.” Mosisi vuandinle dole azɛlɛ ne anwo, na ɔhakyile ɛwɔlɛ. Mosisi bɔle nguku hɔle ɔ nzi. Na Gyihova zele Mosisi kɛ, Tenrɛ ɛ sa sɔ ɔ dua ne anu Ɔzɔle nuhua, na ɔhakyile kpɔma wɔ ɔ sa nu. Na Gyihova zele ye kɛ, “Ɛhye bamaa bɛalie bɛali kɛ Gyihova, ɛye ɔ nwo ɛhile wɔ.”’ (Ade. 4:2-5) Ɛhɛe, Nyamenle vale debie mɔɔ Mosisi bagyinla zo ahile kɛ Gyihova a zoanle ye la wulale ɔ sa nu. Ɔlua Nyamenle tumi ne ati, ngoane rale kpɔma ne mɔɔ bie mɔ bule ye kɛ baka mgbane la anu! Nea kɛzi nwanwane deɛ zɔhane bamaa tumi ara Mosisi edwɛkɛ ne anu na bɛanwu kɛ Gyihova nee Mosisi lua amgba a! Yemɔti, Gyihova zele ye kɛ: “Fa kpɔma ɛhye kɔ na wɔava wɔayɛ nwanwane sɛkɛlɛneɛ.” (Ade. 4:17) Kpɔma ne mɔɔ ɛnee Mosisi lɛ la ati, ɔbanyia anwodozo yeaha edwɛkɛ ne yeahile Falo nee Nyamenle menli ne.—Ade. 4:29-31; 7:8-13.

6. (a) Duzu a ɔwɔ kɛ yɛdɛ ye yɛ sa nu wɔ mekɛ mɔɔ yɛlɛdi daselɛ la ɛ, na duzu ati ɔ? (b) Kilehile kɛzi “ngoane wɔ Nyamenle edwɛkɛ ne anu, na tumi wɔ nu” la anu.

⁶ Saa yɛlɛka Baebolo ne anu edwɛkɛ ne yɛahile a, bɛbahola bɛabiza yɛ edwɛkɛ ko ne ala bie kɛ: “Duzu a ɛlɛ ye ɛ sa nu la?” Yɛlɛ Baebolo ne, na yɛkulo kɛ yɛfa yɛdi gyima. Bie mɔ bu Baebolo ne kɛ buluku kpalɛ ala, noko edwɛkɛ mɔɔ Nyamenle kpondɛ kɛ ɔka ɔkile yɛ la a wɔ nu a. (2 Pita 1:21) Nyamenle ɛwɔkɛ ne mɔ nee mɔɔ ye Belemgbunlililɛ ne bayɛ la a wɔ nu a. Ɛhye ati, ɛzoanvolɛ Pɔɔlo hɛlɛle kɛ: “Ngoane wɔ Nyamenle edwɛkɛ ne anu, na tumi wɔ nu.” (Hib. 4:12, NW.) * Kɛzi ngoane wɔ Nyamenle edwɛkɛ ne anu ɛ? Gyihova ɛwɔkɛ kɔsɔɔti ba nu. (Aye. 46:10; 55:11) Saa awie te Gyihova Edwɛkɛ ne abo wɔ adenle ɛhye azo a, mɔɔ ɔbagenga ye wɔ Baebolo ne anu la banyia tumi kpole wɔ ye ɛbɛlabɔlɛ nu.

7. Kɛzi yɛsɔ ‘nɔhalɛ edwɛkɛ ne anu kpalɛ ɛ’?

⁷ Gyihova ɛva ye Edwɛkɛ Baebolo ne mɔɔ ngoane wɔ nu la ɛwula yɛ sa nu, yemɔti yɛbahola yɛamaa menli anwu kɛ edwɛkɛ ne mɔɔ yɛka la le nɔhalɛ na ɔvi Nyamenle. Ɔnyɛ azibɛnwo kɛ Pɔɔlo hɛlɛle Hibuluma ne wiele la, ɔdule ɔ gɔnwo gyimayɛvo Temɔte folɛ kɛ ‘ɔbɔ mɔdenle ɛsesebɛ ɔhilehile Nyamenle nɔhalɛ edwɛkɛ ne kpalɛ la.’ (2 Tem. 2:15) Kɛzi yɛbahola yɛali Pɔɔlo folɛdulɛ ne azo ɛ? Ɔwɔ kɛ yɛkenga ngɛlɛlera mɔɔ fɛta la yɛmaa ɔka yɛ tievolɛma  ahonle. Trate ne mɔ mɔɔ bɛyele ye wɔ 2013 ne anu la baboa yɛ yeamaa yɛayɛ zɔ.

8. Duzu a ɛzonlenlɛ gyima zo neavolɛ bie hanle ye wɔ trate ne mɔ anwo a?

⁸ Bɛluale adenle ko ne ala azo a bɛhyehyɛle trate ne mɔ anu edwɛkɛ ne a. Yemɔti saa yɛnwu kɛzi yɛbava ko yɛali gyima la a, yɛbanwu kɛzi yɛbava ɔ muala yɛali gyima la. Asoo yɛbahola yɛava yɛali gyima kpalɛ? Ɛzonlenlɛ gyima zo neavolɛ bie mɔɔ wɔ Hawaii, U.S.A. la, hɛlɛle kɛ: “Ɛnee yɛnze kɛ adwinli mbulalɛ fofolɛ ɛhye mɔ baboa yɛ kpalɛ wɔ azua nu nee bagua nu daselɛlilɛ nu.” Yenwu kɛ kɛzi bɛhɛlɛ trate ne mɔ la maa menli tie edwɛkɛ ne ndɛndɛ na adwelielilɛ toa zo. Ɔte nganeɛ kɛ kpuyia ne mɔ nee mualɛ ne mɔ mɔɔ wɔ nu la ati ɔ. Saa suamenle bie maa mualɛ mɔɔ ɛndenrɛ la a, ɔnzɛkye debie biala.

9, 10. (a) Kɛzi yɛ trate ne mɔ maa yɛfa Baebolo ne yɛdi gyima ɛ? (b) Yɛ trate ne boni a wɔva wɔli gyima kpalɛ a, na kɛmɔti ɛ?

⁹ Ngɛlɛlera mɔɔ fɛta kɛ yɛkenga la wɔ trate ne ko biala anu. Maa yɛva Asoo Amaneɛnwunlɛ Bara Awieleɛ? trate ne kɛ neazo. Saa suamenle ne bua kpuyia ne kɛ “ɛhɛe,” “kyɛkyɛ,” anzɛɛ “wɔannea a,” buke trate ne anu na ka kɛ, “Mɔɔ Baebolo ne ka la ɛne.” Na akee kenga Yekile 21:3, 4.

¹⁰ Saa ɛlɛfa Kɛzi Ɛbu Baebolo Ne Ɛ? trate ne noko a wɔali gyima a, suamenle ne bahola akpa mualɛ nsa ne anu biala. Wɔmɔ buke nuhua na ka kɛ, “Baebolo ne ka kɛ ‘bɛfa Nyamenle Sunsum a bɛkɛlɛ Nyamenle Edwɛkɛ ne a.’” Ɛbahola wɔava wɔazɔ zo kɛ, “Nɔhalɛ nu, ɔka edwɛkɛ dɔɔnwo.” Akee buke wɔ Baebolo ne na kenga 2 Temɔte 3:16, 17.

11, 12. (a) Kɛzi ɛbava trate wɔali gyima na ɛ nye alie wɔ daselɛlilɛ nu ɛ? (b) Adenle boni azo a trate baboa wɔ yeamaa wɔaziezie ɛ nwo wɔamaa siakɔkpɔla ɛ?

¹¹ Mɔɔ suamenle ne bayɛ la a bahile mekɛ tendenle mɔɔ ɔwɔ kɛ bɛfa bɛka trate ne anu edwɛkɛ na bɛsuzu nwo a. Noko ɔnva nwo mɔɔ menli ne bayɛ ye wɔ nwolɛ la, bɛde trate ne anu edwɛkɛ ne yɛɛ wɔgenga Nyamenle edwɛkɛ ne bie wɔhile bɛ. Saa ngɛlɛlera ko anzɛɛ nwiɔ a ɛgengale ɛhilele bɛ a, ɛbahola wɔazia wɔahɔ bɛ ɛkɛ ɛ nee bɛ ahɔdoa adawu ne azo.

¹² Ɛbanwu kpuyia bie wɔ edwɛkɛtile ekyi “Dwenle Ɛhye Anwo” abo wɔ trate ne biala anzi nee ngɛlɛlera mɔɔ bɛbazuzu nwo wɔ siakɔkpɔla nu la wɔ ɛkɛ. Kpuyia mɔɔ wɔ Kɛzi Ɛnwu Kenlebie Ɛ? trate ne  anu mɔɔ ɛbahola wɔava wɔayɛ siakɔkpɔla la a le “Kɛzi Nyamenle bahakyi yɛ ewiade ne yeamaa yeayɛ kpalɛ ɛ?” Mateyu 6:9, 10 nee Daneɛle 2:44 wɔ zo. Wɔ Mɔwuamra Badɛnla Aze Bieko Amgba Ɔ? trate ne anu, ɛbanwu kpuyia ɛhye wɔ ɛkɛ: “Duzu ati a yɛyɛ mgbanyinli na yɛwu a?” Mɔlebɛbo 3:17-19 nee Wulomuma 5:12 wɔ zo.

13. Kilehile kɛzi yɛbahola yɛava trate yɛabɔ Baebolo ɛzukoalɛ bo la anu.

¹³ Bɛyɛ trate ne mɔ kɛ yɛlua zo yɛbɔ Baebolo ɛzukoalɛ bo. Saa awie pɛ (QR code *) sɛkɛlɛneɛ ne mɔɔ la trate ne anzi la to ye moba fonu zo a ɔbava ye yeahɔ yɛ Intanɛte gyimalilɛleka ne. Eza trate ne mɔ twe adwenle kɔ ɛzukoalɛdeɛ mɔɔ wɔ Edwɛkpa Mɔɔ Vi Nyamenle Ɛkɛ! brohyua ne anu la bie mɔ azo. Kɛ neazo la, Nwane A Amgba Nea Ewiade Ne Azo A? trate ne twe adwenle kɔ ɛzukoalɛdeɛ 5 ne mɔɔ wɔ brohyua ne anu la azo. Duzu A Maa Abusua Asetɛnla Yɛ Anyelielɛ A? trate ne twe adwenle kɔ ɛzukoalɛdeɛ 9 ne azo. Saa yɛfa trate ne mɔ yɛdi gyima kɛmɔ bɛkulo kɛ yɛyɛ ye la a, ɔbamaa yɛava Baebolo ne yɛali gyima wɔ yɛ ɛkpɔlalɛ mɔɔ lumua nee siakɔkpɔla nu. Na ɛhye bamaa yɛabɔ Baebolo ɛzukoalɛ dɔɔnwo abo. Duzu bieko a ɛbahola wɔayɛ na wɔava Nyamenle Edwɛkɛ ne wɔali gyima wɔ adenle kpalɛ zo wɔ daselɛlilɛ nu a?

14, 15. Kɛzi ɛbahola wɔazukoa Pɔɔlo neazo ne wɔ daselɛlilɛ nu ɛ?

¹⁴ Ɛnee Pɔɔlo kulo kɛ ɔ nee “awie biala” kɛli adwelie wɔ daselɛlilɛ nu. (Bɛgenga 1 Kɔlentema 9:19-23.) Yɛ ye nzonlɛ kɛ ɛnee Pɔɔlo anye la kɛ ‘ɔ sa baha Dwuuma, bɛdabɛ mɔɔ bɛwɔ mɛla ne abo, bɛdabɛ mɔɔ bɛnle mɛla ne abo, nee bɛdabɛ mɔɔ bɛ diedi ɛnli munli la.’ Ɛhɛe, ɛnee ɔkulo kɛ ɔka edwɛkɛ ne ɔkile ‘menli muala, amaa adenle biala azo yealua yealie bie mɔ ngoane.’ (Gyi. 20:21) Saa yɛlɛsiezie yɛ nwo yɛahɔbɔ nɔhalɛ ne nolo yɛahile “menli kɔsɔɔti” mɔɔ bɛwɔ yɛ azɛlɛsinli ne anu la a, kɛzi yɛbahola yɛazukoa mɔɔ Pɔɔlo yɛle la ɛ?—1 Tem. 2:3, 4.

¹⁵ Bɛfa ɛhye anwo nzuzulɛ bɛmaa yɛ siane biala wɔ Yɛ Belemgbunlililɛ Gyima ne anu. Sɔ nea. Noko saa edwɛkɛ bie gyegye menli mɔɔ wɔ wɔ azɛlɛsinli ne anu la adwenle a, siezie ɛ nwo na ka edwɛkɛ mɔɔ bɛ nye balie nwo la kile bɛ. Suzu ɛleka mɔɔ ɛde, menli mɔɔ wɔ ɛkɛ, nee mɔɔ gyegye bɛ kpalɛ la anwo. Akee kpondɛ ngɛlɛlera mɔɔ ɛbava wɔali bɛ ngyianlɛ nwo gyima la. Maanzinli zo neavolɛ bie ka kɛzi ɔ nee ɔ ye bɛtwe menli adwenle bɛkɔ Baebolo ne azo anwo edwɛkɛ la, ɔhanle kɛ: “Saa yɛmaa yɛ edwɛkɛ ne yɛ sikalɛ na yɛkenga ngɛlɛlera ko ala a, suamenlema dɔɔnwo anye die nwo. Mekɛ mɔɔ yɛlɛ yɛ Baebolo ne yɛ sa nu na yɛbiza bɛ ahye yɛwie la, yɛbuke nu yɛkenga ngɛlɛlera ne.” Bɛmaa yɛzuzu edwɛkɛ, kpuyia, nee ngɛlɛlera ekyi mɔɔ bɛzɔ bɛnlea mɔɔ ɛdawɔ noko ɛbahola wɔava wɔali gyima wɔ wɔ azɛlɛsinli ne anu la anwo.

16. Kilehile kɛzi yɛbahola yɛava Ayezaya 14:7 yɛali gyima wɔ daselɛlilɛ nu la anu.

¹⁶ Saa ɛwɔ ɛleka mɔɔ basabasayɛlɛ dɔɔnwo wɔ la a, ɛbahola wɔabiza suamenle ne kɛ: “Asoo yɛbahola yɛanwu amaneɛbɔlɛ ɛhye wɔ adwelie kɛlata nu kenlebie: ‘Anzondwolɛ ɛra ewiade amuala, ngyegyelɛ ɛnle ɛkɛ bieko. Menli fa anyelielɛ tea nu’ ɔ? Zɔhane a Baebolo ne ka ye wɔ Ayezaya 14:7 a. Nɔhalɛ, ɛwɔkɛ mɔɔ Nyamenle ɛbɔ kɛ ɔbamaa anzondwolɛ ara kenlebie la anwo edwɛkɛ dɔɔnwo wɔ Baebolo ne anu.” Akee ɛ nee ye ɛgenga nuhua ko.

17. Kɛzi ɛbava Mateyu 5:3 wɔali gyima wɔ adwelielilɛ nu ɛ?

¹⁷ Ɔyɛ se ɔmaa mrenya dɔɔnwo kɛ bɛbanlea bɛ mbusua wɔ ɛleka mɔɔ ɛde la ɔ? Saa ɔle zɔ a, ɛbahola wɔabiza edwɛkɛ ɛhye wɔava wɔabɔ adwelielilɛ bo: “Ezukoa ɛzɛ a  ɔwɔ kɛ nrenya nyia ye na ye abusua ne anye alie a?” Saa ahenle bua a, toa zo kɛ: “Mrenya dɔɔnwo nyia mɔɔ tɛla zɔ noko bɛ mbusua akunlu ɛndwo bɛ nwo. Yemɔti, duzu a bɛhyia nwo kpalɛ a?” Akee kenga Mateyu 5:3 na ɛ nee ye ɛhyehyɛ Baebolo ɛzukoalɛ.

18. Kɛzi yɛbahola yɛava Gyɛlɛmaya 29:11 yɛakyekye awie mɔ arɛle ɛ?

¹⁸ Asoo esiane bie mɔɔ ɛzi kenlensa ye la ɛlɛmaa menli mɔɔ de wɔ kpalɛ ne azo la ali nyane ɔ? Ɛbahola wɔaha edwɛkɛ ɛhye wɔava wɔabɔ adwelielilɛ bo: “Mera ɛke kɛ mebakyekye ɛ rɛle. (Kenga Gyɛlɛmaya 29:11.) Asoo ɛyɛle ninyɛne nsa ne mɔɔ Nyamenle kpondɛ kɛ yɛ sa ka ye la nzonlɛ? ‘Ɛkpazilɛ’ anzɛɛ anzondwolɛ, ‘tɛnlabelɛ kpalɛ,’ nee ‘anyelazo.’ Asoo ɔnyɛ yɛ fɛ kɛ ɔkpondɛ kɛ yɛnyia asetɛnla kpalɛ ɔ? Noko kɛ ɔkɛyɛ na ɛhye ayɛ boɛ ɛ?” Akee fa ye kɔ ɛzukoalɛdeɛ mɔɔ fɛta la azo wɔ Edwɛkpa brohyua ne anu.

19. Kilehile kɛzi yɛbahola yɛava Yekile 14:6, 7 yɛali adwelie wɔ ɛleka mɔɔ menli dɔɔnwo kɔ asɔne la anu.

¹⁹ Ɛwɔ ɛleka mɔɔ menli dɔɔnwo kɔ asɔne ɔ? Ɛbahola wɔabiza edwɛkɛ ɛhye wɔava wɔabɔ adwelielilɛ bo: “Saa anwumabɔvolɛ tendɛ kile wɔ a, ɛbadie ɔ? (Kenga Yekile 14:6, 7.) Kɛmɔ anwumabɔvolɛ ɛhye se “bɛzulo Nyamenle” la ati, asoo ɔnrɛyɛ kpalɛ kɛ yɛbanwu Nyamenle holɛ ko mɔɔ ɛnee ɔlɛka ɔ nwo edwɛkɛ la ɔ? Anwumabɔvolɛ ne bukele edwɛkɛ ne anye ekyii hilele yɛ wɔ mekɛ mɔɔ ɔhanle kɛ ‘Ahenle mɔɔ bɔle anwuma, azɛlɛ, nyevile, nee azule muala la.’ Nwane ɔ?” Akee kenga Edwɛndolɛ 124:8 mɔɔ ka edwɛkɛ ɛhye la: “Yɛ moalɛ vi [Gyihova] mɔɔ bɔle anwuma nee aze la.” Ka kɛ ɛbaraha Gyihova Nyamenle anwo edwɛkɛ dɔɔnwo wɔahile ye.

20. (a) Kɛzi yɛbahola yɛalua Mrɛlɛbulɛ 30:4 ne azo yɛahile awie Nyamenle duma ɛ? (b) Asoo ngɛlɛlera bie wɔ ɛkɛ mɔɔ ɛfa ɛdi gyima a debie kpalɛ fi nu ba ɔ?

²⁰ Ɛbahola wɔalua adenle ɛhye azo ɛ nee kpavolɛ abɔ adwelielilɛ bo: “Mekulo kɛ mekenga ngɛlɛlera ko mɔɔ biza kpuyia mɔɔ anwo hyia la mekile wɔ. (Kenga Mrɛlɛbulɛ 30:4.) Dasanli biala ɛnrɛhola ɛnrɛyɛ ninyɛne ɛhye mɔ yemɔti, ɔfane yɛ Bɔvolɛ ne anwo. * Kɛ ɔkɛyɛ na yɛanwu ye duma ɛ? Me nye balie kɛ mebahile wɔ wɔ Baebolo ne anu.”

21, 22. (a) Kɛzi ngɛlɛlera mɔɔ fɛta mɔɔ yɛbava yɛali gyima la kola kakyi awie ɛbɛlabɔlɛ ɛ? (b) Duzu a wɔsika ɛ bo kɛ ɛbayɛ ye wɔ daselɛlilɛ nu a?

²¹ Yɛnze mɔɔ menli bayɛ ye wɔ ngɛlɛlera mɔɔ fɛta mɔɔ yɛbava yɛali gyima la anwo. Kɛ neazo la, Alasevolɛ nwiɔ hɔle raalɛ bie ɛkɛ wɔ Australia. Bɛ nuhua ko bizale ye kɛ, “Ɛze Nyamenle duma ɔ?” na ɔgengale ngɛlɛlera ko—Edwɛndolɛ 83:18, NW. Raalɛ ne hanle kɛ: “Edwɛkɛ ne zinle me nwo! Mɔɔ bɛhɔle la mendule kale mengɔle mayɛlɛ 35 (km 56) adenle wɔ ɛleka mɔɔ bɛtɔne mbuluku la mengɔneanle ye wɔ Baebolo ngilebɛbo gyɛne nu na memkpondɛle mɔɔ duma ne abo kile la wɔ edwɛbohilelɛ buluku nu. Mekɛ mɔɔ menliele menlile kɛ Nyamenle duma a le Gyihova la, membizale me nwo kɛ duzu bieko a menze a.” Yeangyɛ ɔ nee nrenya ne mɔɔ ɛnee ɔbagya ye kenlebie la bɔle ɔ bo zukoale Baebolo ne, na nzinlii bɛmanle bɛzɔnenle bɛ.

²² Nyamenle Edwɛkɛ ne kakyi bɛdabɛ mɔɔ bɛkenga na bɛnyia diedi wɔ Gyihova ɛwɔkɛ ne mɔ mɔɔ ngoane wɔ nu anu la ɛbɛlabɔlɛ. (Bɛgenga 1 Tɛsalonaekama 2:13.) Tumi wɔ Baebolo edwɛkɛ ne anu tɛla edwɛkɛ biala mɔɔ yɛkulo kɛ yɛka yɛmaa ɔka menli ahonle la. Ɛhye ati, saa yɛnyia nwolɛ adenle biala a, ɔwɔ kɛ yɛfa Nyamenle Edwɛkɛ ne yɛdi gyima. Ngoane wɔ nu!