1. Ngyianlɛ boni a alesama lɛ a, na nwane a bahola ali nwolɛ gyima amaa bɛ a?

ALESAMA lɛ ngyianlɛ kpole kɛ bɛbabikye bɛ nwo bɛ nwo. Bɛta bɛka menli nwiɔ mɔɔ lɛ ɛhulolɛ maa bɛ nwo la anwo edwɛkɛ kɛ “bɛbikye bɛ nwo kpalɛ.” Yɛ mbusuafoɔ nee yɛ gɔnwo mɔ mɔɔ yɛkulo bɛ, yɛ nye die bɛ nwo, na bɛte yɛ edwɛkɛ bo la maa agɔnwolɛvalɛ mɔɔ la yɛ avinli la anu mia. Noko, Awie mɔɔ ɔhyia kɛ yɛ nee ye nyia agɔnwolɛvalɛ kyengye la a le yɛ Bɔvolɛ Kpole ne.—Nolo. 12:1.

2. Duzu ɛwɔkɛ a Gyihova ɛbɔ yɛ a, noko kɛmɔti a menli dɔɔnwo ɛnlie ɛnli ɛ?

² Gyihova ɛlɛdua ye Edwɛkɛ ne azo yeaze alesama kɛ “bɛhwe bɛbikye” ye, na yebɔ ɛwɔkɛ kɛ ‘ɔdaye noko ɔkɛbikye yɛ.’ (Gye. 4:8) Anwosesebɛmanlɛ boni ɛne! Noko, menli dɔɔnwo ɛnlie ɛnli kɛ Nyamenle kulo kɛ ɔbikye bɛ; bɛte nganeɛ kɛ bɛnfɛta kɛ bɛbabikye ye anzɛɛ ɔ nee bɛ avinli twe somaa. Asoo yɛbahola yɛabikye Gyihova?

3. Nɔhalɛ edwɛkɛ boni a ɔwɔ kɛ yɛnwu ye wɔ Gyihova anwo a?

³ Nɔhalɛ nu, “Nyamenle nee yɛ nuhua biala avinli ande biala,” saa yɛkulo kɛ yɛnwu ye a, yɛbahola yɛanwu ye. (Bɛgenga Gyima ne 17:26, 27; Edwɛndolɛ 145:18.) Yɛ Nyamenle ne bodane a le kɛ ɔwɔ kɛ alesama mɔɔ ɛnli munli bɔbɔ la kola bikye ye,  na yeziezie ɔ nwo kɛ ɔbamaa bɛanyia ɔ nyunlu ɛlolɛ kɛ ɔ gɔnwo mɔ. (Aye. 41:8; 55:6) Kɛ neazo la, edwɛndolɛnli ne hɛlɛle vanenle Gyihova anwo kɛ: “Wɔmɔ mɔɔ ɛtie yɛ nzɛlɛlɛ la! Wɔ ɛkɛ ne yɛɛ menli kɔsɔɔti ba wɔ bɛ ɛtane ne mɔ ati a. Nyilalɛ ɛha sonla ne mɔɔ ɛkɛkpa nu ɛkɛye ye, ɛkɛva ye ɛkɛra la.” (Edw. 65:2, 4) Baebolo nu kɛlɛtokɛ mɔɔ fane Dwuda Belemgbunli Esa anwo la le awie mɔɔ twe bikye Nyamenle nee mɔɔ Gyihova yɛ ye wɔ nwo la anwo neazo. *

4. Neazo boni a Belemgbunli Esa yɛle manle menli mɔɔ ɛnee wɔ Dwuda la ɛ?

⁴ Belemgbunli Esa dule ɛzonlenlɛ sua nu tuutuulilɛ nee awozonle ɛzonlenlɛ mɔɔ ɛnee ɛlie ebia wɔ azɛlɛ ne azo la abo ɔvale ɔhilele kɛ ɔlɛ nɔhalɛ ɛzonlenlɛ nwo mɔdenlebɔlɛ mɔɔ yɛ azibɛnwo. (1 Arl. 15:9-13) Ɔhanle kɛ, “Dwudama kɔsɔɔti ɛzonle bɛ ze mɔ [Gyihova] Nyamenle ne, na bɛli ye mɛla nee ye ngyehyɛlɛ ne mɔ azo.” Gyihova manle Esa nyianle anzondwolɛ wɔ ɛvolɛ bulu ne mɔɔ lumua wɔ ye ebialilɛ ne anu la anu. Duzu a manle Esa nyianle zɔhane anzondwolɛ ne a? Ɔzele menli ne kɛ: “Azɛlɛ ye tɛde yɛ ɛdeɛ, ɔboalekɛ yɛyɛ mɔɔ [Gyihova] yɛ Nyamenle ne kpondɛ la. Yɛyɛ mɔɔ ɔkpondɛ la, yɛɛ ɔdaye noko yemaa yɛ anzonudwolɛ.” (2 Edk. 14:1-7) Maa yɛzuzu mɔɔ nzinlii zile la anwo.

5. Tɛnlabelɛ boni a zɔle Esa anwodozo mɔɔ ɔlɛ ye wɔ Nyamenle anu la nleanle a, na duzu a vi nu rale a?

⁵ Maa yɛva ye kɛ ɛdawɔ a ɛle Esa a. Zilaa, Yiteyopeanli bie ɛva ɛlɔnema 1,000,000 nee konle ehwili 300 ɛra Dwudama anwo zo. (2 Edk. 14:8-10) Saa ɛnwu kɛ ɛlɔne kpole zɛhae ɛlɛba arateta wɔ Belemgbunlililɛ ne a, duzu a ɛbayɛ a? Wɔ ɛlɔnema ne le 580,000 ala! Bɛbo wɔ ɛlɔnema ne anwo zo fane nwiɔ, asoo ɔbazi ɛ nwo kɛ Nyamenle ɛmaa yera ye zɔ ɔ? Asoo ɛ nwo bapele wɔ wɔava ɛdawɔ mumua ne wɔ nrɛlɛbɛ wɔali ninyɛne nwo gyima? Esa nyɛleɛ ne maa yɛnwu kɛzi ɔbikye Gyihova nee ɔ nwo mɔɔ ɔvale ɔdole bɛ agɔnwolɛvalɛ ne azo la. Ɔvile ahonle nu ɔzɛlɛle kɛ: “O [Gyihova], awie biala ɛnle ɛkɛ mɔɔ kola boa, kɛ ɛdawɔ ala yɛɛ ɛkɛgyinla tumima nee koahweabanema avinli a. Boa yɛ, O [Gyihova] yɛ Nyamenle, ɔluakɛ wɔmɔ yɛɛ yɛ rɛle wɔ wɔ nu a, yɛɛ wɔ duma nu a yɛra yɛbadoa menli pemgbenleamgbe ɛhye mɔ yɛ nee bɛ aho a. O [Gyihova], wɔmɔ a ɛle yɛ Nyamenle a. Mmamaa dasanli di ɛ nwo zo konim.” Duzu a Nyamenle yɛle ye wɔ mɔɔ Esa vi ye ahonle nu bizale la anwo a? ‘Gyihova lile Yiteyopeama ne anwo zo konim.’ Bɛ agbɔvolɛ ne mɔ anu ko bɔbɔ anga!—2 Edk. 14:11-13.

6. Duzu a ɔwɔ kɛ yɛsukoa ye wɔ Esa anwo a?

⁶ Duzu a manle Esa nyianle anwodozo bɔkɔɔ wɔ Nyamenle adehilelɛ nee ye anwobanebɔlɛ nu a? Baebolo ne ka kɛ: ‘Esa ɛbɛla zɔle Gyihova anye’ yɛɛ ‘ɔvale ye ahonle muala ɔzonlenle Gyihova.’ (1 Arl. 15:11, 14) Ɔwɔ kɛ yɛdayɛ noko yɛfa yɛ ahonle muala yɛsonle Nyamenle. Saa yɛ nee ye banyia agɔnwolɛvalɛ kyengye ɛnɛ nee kenlebie a, ɔwɔ kɛ yɛyɛ ye zɔ. Yɛyɛ Gyihova mo kɛ yelumua yehwe yɛ yebikye ɔ nwo na ɔboa yɛ ɔmaa yɛ nee ye nyia agɔnwolɛvalɛ kpalɛ la! Suzu ndenle nwiɔ mɔɔ Nyamenle dua zo twe yɛ bikye ye la anwo.

7. (a) Duzu a Gyihova ɛyɛ mɔɔ twe yɛ bikye ye a? (b) Adenle titile mɔɔ Nyamenle dua zo twe yɛ bikye ye la a le boni?

⁷ Gyihova hilele kɛ ɔkulo alesama ɔlua azɛlɛ kɛnlɛma ne mɔɔ ɔbɔle ɔmanle yɛ la azo. Ɔtɛda ye ɛhulolɛ ne ali ɔlua  nwanwane ninyɛne mɔɔ ɔfa ɔbɔ yɛ ngoane nwo bane la azo. (Gyi. 17:28; Yek. 4:11) Mɔɔ hyia kpalɛ la, Gyihova maa yɛ sa ka mɔɔ yɛhyia nwo la. (Luku 12:42) Eza yebɔ yɛ ɛwɔkɛ kɛ ɔtie yɛ nuhua ko biala nzɛlɛlɛ. (1 Dwɔn 5:14) Noko, adenle titile mɔɔ Nyamenle dua zo twe yɛ bikye ye na ɔmaa yɛdayɛ noko yɛbikye ye la a le ɛkpɔnedeɛ ne mɔɔ ɔdua zo ɔda ye ɛlɔlɛ ne ali la. (Bɛgenga 1 Dwɔn 4:9, 10, 19.) Gyihova zoanle ɔ “Ra kokye ne” wɔ azɛlɛ ye azo amaa yealie yɛ yeavi ɛtane nee ewule nu.—Dwɔn 3:16.

8, 9. Duzu gyima a Gyisɛse di ye wɔ Gyihova bodane nu a?

⁸ Gyihova bamaa menli mɔɔ dɛnlanle aze kolaa na Kelaese ara bɔbɔ la, anyia ɛkpɔnedeɛ ne azo nvasoɛ. Ɔvi mekɛ mɔɔ Gyihova hanle ngapezo ne mɔɔ fane alesama Ngoanedievolɛ ne mɔɔ ɔbara kenlebie anwo la, ɛnee ɔle kɛ asɛɛ bɛdua ɛkpɔnedeɛ ne la, ɔluakɛ ɛnee ɔze kɛ ye bodane ne bara nu. (Mɔl. 3:15) Mɔɔ ɛvoya dɔɔnwo pɛle nu la, ɛzoanvolɛ Pɔɔlo hilele mgbɔdalɛ ne mɔɔ Nyamenle manle ‘Gyisɛse Kelaese vale ɔ nwo lile la’ anwo anyezɔlɛ. Pɔɔlo doale zo kɛ: “Mɔmoane, ɔzile abotane na ɔbule ɔ nye ɔguale menli ɛtane zo.” (Wulo. 3:21-26) Nea kɛzi Gyisɛse ɛboa yɛ amaa yɛabikye Nyamenle a!

⁹ Ɔlua Gyisɛse angome anwo zo a menli mɔɔ bɛlɛ bɛ nwo aze la bɛahola abikye Gyihova a. Kɛzi Ngɛlɛlera ne si nɔhalɛ ɛhye azo ɛ? Pɔɔlo hɛlɛle kɛ: “Nyamenle ɛhile kɛ ɔsi ɔkulo yɛ la, na yemɔ a le kɛ, mɔɔ ɛnee yɛtɛda nwo yɛtɛde ɛtaneyɛlɛma la, Kelaese wule manle yɛ!” (Wulo. 5:6-8) Tɛ kɛ yɛfɛta la ati a Gyisɛse bɔle ɛkpɔnelɛ afɔle ne a, na emomu, ɛhulolɛ mɔɔ ɔlɛ ɔmaa yɛ la ati ɔ. Gyisɛse hanle kɛ: “Awie biala ɛnrɛhola ɛnrɛra me nwo, kyesɛ Selɛ ne mɔɔ zoanle me la twe ye bɛlɛ me.” Eza ɔhanle kɛ: “Awie biala ɛnrɛhola Selɛ ne ɛkɛ ne kɔ kyesɛ ɔdua me nwo zo.” (Dwɔn 6:44; 14:6) Gyihova dua Gyisɛse anwo zo ɔfa ye sunsum ne ɔtwe menli ɔba ye ɛkɛ na ɔboa bɛ ɔmaa bɛtɛnla Ye ɛhulolɛ ne anu na bɛnyia dahuu ngoane anyelazo. (Dwuudu 20, 21.) Maa yɛzuzu adenle bieko mɔɔ Gyihova twe yɛ ba ye ɛkɛ la anwo.

10. Duzu a Baebolo ne kilehile yɛ mɔɔ ɔboa yɛ ɔmaa yɛbikye Nyamenle a?

¹⁰ Badwu ɛke, yɛva Baebolo nu mbuluku 14 anu edwɛkɛ yɛha anzɛɛ yɛhwe adwenle yɛhɔ zo wɔ edwɛkɛ ɛhye anu. Saa Baebolo ɛnle ɛkɛ a, anrɛɛ kɛzi yɛbanwu kɛ yɛbahola yɛabikye yɛ Bɔvolɛ ne ɛ? Kɛzi anrɛɛ yɛbahola yɛazukoa ɛkpɔnedeɛ ne anwo debie na yɛalua Gyisɛse anwo zo yɛabikye Gyihova ɛ? Gyihova luale ye sunsum ne azo a ɔmanle bɛhɛlɛle Baebolo ne mɔɔ ye subane ngɛnlɛma ne mɔ nee ye bodane mgbole ne anwo edwɛkɛ wɔ nu la a. Kɛ neazo la, wɔ Adendulɛ 34:6, 7, Gyihova lale ɔ nwo ali hilele Mosisi kɛ “Mele anwunvɔnezelɛ nee atiakunlukɛnlɛma Nyamenle, menva ɛya mgbane mgbane, yɛɛ ɛhulolɛ kpundii nee nɔhalɛlilɛ ɛyi me tɛkɛɛ. Me ɛhulolɛ kpole ne keda apenle apenle nwo zo. Mefa amumuyɛ, mɛladonlɛ yɛɛ ɛtane mekyɛ.” Nwane a ɛnrɛhulo kɛ ɔbabikye awie zɛhae ɛ? Gyihova ze kɛ saa yɛsukoa ɔ nwo edwɛkɛ dɔɔnwo wɔ Baebolo ne anu a, yɛnwu ye kpalɛ na yɛtwe yɛbikye ye.

11. Duzu ati a ɔwɔ kɛ yɛbɔ mɔdenle yɛsukoa Nyamenle subane nee ye ndenle ne mɔ anwo debie ɛ? (Nea mɔlebɛbo nvoninli ne.)

¹¹ Draw Close to Jehovah buluku ne kilehile kɛzi yɛbahola yɛ nee Nyamenle anyia abusuabɔlɛ kpalɛ anu la, ɔhanle ye wɔ ye mukenye ne anu kɛ: “Wɔ agɔnwolɛvalɛ biala anu, debie mɔɔ maa ɔgyinla la a le ahenle ne mɔɔ yɛbanwu ye boɛ, na yɛanyia ye subane ngakyile ne mɔ anwo anyezɔlɛ la azo. Yemɔti, nwolɛ hyia kpalɛ kɛ yɛbazukoa Nyamenle subane nee ye  ndenle ne mɔ mɔɔ bɛha nwolɛ edwɛkɛ wɔ Baebolo ne anu la anwo ninyɛne dɔɔnwo.” Ɛhye ati, yɛyɛ Gyihova mo kɛ yemaa bɛhɛlɛ ye edwɛkɛ ne wɔ adenle mɔɔ yɛdayɛ alesama yɛkola yɛte ɔ bo la azo a!

12. Duzu ati a menli a Gyihova manle bɛhɛlɛle Baebolo ne ɛ?

¹² Anrɛɛ Gyihova bahola amaa anwumabɔvolɛma ahɛlɛ Baebolo ne. Yeanyɛ boɛ fee la bɛ nye die yɛ nwo nee yɛ gyimayɛlɛ noko anwo. (1 Pita 1:12) Nɔhalɛ, anrɛɛ anwumabɔvolɛma bahola ahɛlɛ Nyamenle edwɛkɛ ne amaa alesama. Noko, asoo anrɛɛ bɛbade yɛ edwɛkɛ bo? Asoo anrɛɛ bɛbahola bɛali yɛ ngyianlɛ, yɛ sinlidɔlɛ, nee yɛ anyelazo nwo gyima kpalɛ ɔ? Kyɛkyɛ, ɛnee Gyihova ze kɛ bɛnrɛhola. Gyihova manle menli a hɛlɛle Baebolo ne a, amaa edwɛkɛ ne aha yɛ ahonle. Yɛbahola yɛade menli mɔɔ hɛlɛle Baebolo ne nee bɛdabɛ mɔɔ bɛ nwo edwɛkɛ wɔ nu la nzuzulɛ nee bɛ nganeɛdelɛ bo. Yɛ kunlu bahola ayelɛyela yɛ amaa bɛ wɔ bɛ nyanelilɛ, bɛ adwenle nu keseeyɛlɛ, bɛ ɛzulolɛ, nee bɛ sinlidɔlɛ nwo na yɛ nye alie wɔ bɛ fɛlɛkolilɛ nee bɛ konimlilɛ nwo. Baebolo kɛlɛvoma kɔsɔɔti le kɛ ngapezonli Yilaegya la, bɛle menli “kɛ yɛdayɛ ala la.”—Gye. 5:17.

13. Kɛzi Dwona nzɛlɛlɛ ne ka wɔ ɛ?

¹³ Suzu neazo ɛhye anwo nea, asoo anrɛɛ anwumabɔvolɛ bahola ala nganeɛdelɛ ne mɔɔ ngapezonli Dwona lale ye ali wɔ mekɛ mɔɔ ɛnee ɔlɛnriandi yeavi gyima mɔɔ Nyamenle vale manle ye anwo la bie ali ɔ? Nea kɛzi ɔfɛta kɛ Gyihova manle Dwona mumua ne yɛle nwolɛ kɛlɛtokɛ mɔɔ nzɛlɛlɛ ne mɔɔ ɔvile ye ahonle nu ɔyɛle wɔ nyevile ne akunlu lɔ la boka nwo a! Dwona zele kɛ: ‘Mɔɔ ɛnee me nye zo ɛbulu la, mengakyele, Gyihova.’—Dwona 1:3, 10; 2:1-9.

14. Duzu ati a yɛbahola yɛade mɔɔ Ayezaya hɛlɛle vanenle ɔ nwo la abo a?

¹⁴ Suzu mɔɔ Gyihova manle Ayezaya  hɛlɛle ye wɔ ɔdaye mumua ne ɔ nwo la noko anwo nea. Mekɛ mɔɔ ngapezonli ne nwunle Nyamenle anyunlunyia ne la, ɔhanle kɛ ɔle ɛtanevolɛ: “Medame, mebɔ munzule! Meminli, ɔluakɛ mele sonla mɔɔ meka ɛtane, yɛɛ mede menli mɔɔ ka ɛtane la avinli. Noko akee menwu Belemgbunli ne, Tumivolɛ [Gyihova]!” (Aye. 6:5) Anwumabɔvolɛ boni a bahola aha edwɛkɛ zɛhae a? Noko, Ayezaya holale hanle, yemɔti ɔmaa yɛnwu kɛzi ɔdele nganeɛ la.

15, 16. (a) Duzu ati a yɛbahola yɛade kɛzi menli te nganeɛ la abo a? Maa neazo. (b) Duzu a baboa yɛ yeamaa yɛabikye Gyihova kpalɛ a?

¹⁵ Asoo anwumabɔvolɛ bie ɛha kɛ “me nwo ɛnfɛta” kɛmɔ Gyekɔbo hanle la, anzɛɛ “mele ɛtanevolɛ” kɛmɔ Pita dele nganeɛ la ɔ? (Mɔl. 32:10; Luku 5:8) Asoo bie “ahonle dule kpole” kɛ Gyisɛse ɛdoavolɛ ne mɔ la, anzɛɛ asoo ɛnee ɔhyia kɛ anwumabɔvolɛma mɔɔ bɛbɔ ɛbɛla kpalɛ la nyia “akɛnrasesebɛ” na bɛahola bɛagyinla ɛkpɔlɛ nloa bɛabɔ edwɛkpa ne nolo kɛ Pɔɔlo nee ɔ gɔnwo mɔ la? (Dwɔn 6:19; 1 Tɛs. 2:2) Kyɛkyɛ, anwumabɔvolɛ ne mɔ di munli wɔ debie biala anu yɛɛ bɛ tumi ne bo sonla ɛdeɛ zo. Noko, saa menli mɔɔ tɔ sinli la da nganeɛdelɛ ɛhye bie ali a, yɛte ɔ bo ndɛndɛ ɔboalekɛ yɛdayɛ noko yɛle menli kɛ bɛdabɛ la. Nɔhalɛ, saa yɛlɛkenga Baebolo ne a, ‘yɛ nee mɔɔ di fɛlɛko la di fɛlɛko yɛɛ yɛ nee mɔɔ su la noko su’—Wulo. 12:15.

¹⁶ Saa yɛsuzu mɔɔ Baebolo ne ka ye wɔ kɛzi Gyihova nee ye nɔhalɛ azonvolɛ luale wɔ tete ne la anwo kpalɛ a, yɛbazukoa yɛ Nyamenle ne mɔɔ lɛ abotane na ɔvile ɛlɔlɛ nu ɔhwenle ɔbikyele menli zɔhane mɔ mɔɔ ɛnli munli la anwo ninyɛne dɔɔnwo mɔɔ yɛ azibɛnwo. Ɔbamaa yɛanwu Gyihova kpalɛ na yɛahulo ye. Ɔlua ɛhye azo, yɛbahola yɛabikye ye kpalɛ.—Bɛgenga Edwɛndolɛ 25:14.

17. (a) Folɛ kpalɛ boni a Azalaya dule Esa a? (b) Kɛzi Esa bule ɔ nye guale Azalaya folɛdulɛ ne azo ɛ, na duzu a vi nu rale a?

¹⁷ Mekɛ mɔɔ Belemgbunli Esa lile Yiteyopea ɛlɔnema ne anwo zo konim la, Nyamenle ngapezonli Azalaya hanle nrɛlɛbɛ edwɛkɛ bie hilele ye nee ye menli ne. Azalaya hanle kɛ “[Gyihova] nee bɛ lua, kɛmɔ bɛ nee ye lua la. Saa bɛkpondɛ ɔ bo zo a, bɛkɛnwu ye, na saa bɛkpo ye a, ɔbakpo bɛ.” (2 Edk. 15:1, 2) Noko, nzinlii Esa andie folɛdulɛ kpalɛ ɛhye. Mekɛ mɔɔ Yizilayɛ sɔlɔ belemgbunli ne nwunlonwunla bɛ la, Esa hɔkpondɛle moalɛ vile Seleama ɛkɛ. Kɛ anrɛɛ ɔbakpondɛ moalɛ yeavi Gyihova ɛkɛ bieko la, ɔ nee awozonle ɛzonlenlɛma yɛle ngyekyeleɛ. Ɔlua zo, bɛzele Esa kɛ: “Wɔli kɔnwɔne edwɛkɛ wɔ ɛhye anu, yemɔti ɔvi ɛnɛ mɔɔ kɔ la konle ɛnrɛkpa ɛ nwo ɛlɛ.” Bɛvale konle bɛdoale Esa wɔ ye tumililɛ mekɛ mɔɔ hale la kɔsɔɔti anu. (2 Edk. 16:1-9) Duzu a yɛsukoa yɛfi nu a?

18, 19. (a) Saa yɛmaa adenle ɛrala yɛ nee Nyamenle avinli a, duzu a ɔwɔ kɛ yɛyɛ a? (b) Duzu a baboa yɛ na yɛahwe yɛabikye Gyihova a?

¹⁸ Ɔnle kɛ yɛtwe yɛ nwo yɛfi Gyihova anwo ɛlɛ. Saa yɛmaa adenle ɛrala yɛ nee ye avinli a, bɛmaa yɛyɛ mɔɔ Hozia12:6 ka la: “Bɛzia bɛrɛla na bɛzɔ ɛhulolɛ nee pɛlepɛlelilɛ nu kpundii na bɛhendɛ bɛ Nyamenle ne dahuu.” Zɔhane ati, bɛmaa yɛlua ɛkpɔnedeɛ ne mɔɔ yɛbava anyezɔlɛ yɛadwenledwenle nwo nee mɔdenlebɔlɛ mɔɔ yɛbava yɛazukoa Gyihova Edwɛkɛ, Baebolo ne la azo, yɛhwe yɛbikye ye kpalɛ.—Bɛgenga Mɛla ne 13:4.

¹⁹ Edwɛndolɛnli ne hɛlɛle kɛ: “Ɔle kpalɛ kɛ menwɔbikye Nyamenle.” (Edw. 73:28) Bɛmaa yɛ kɔsɔɔti yɛdoa zo yɛzukoa Gyihova anwo ninyɛne fofolɛ dɔɔnwo na ɔbamaa yɛanwu deɛmɔti ɔwɔ kɛ yɛkulo ye kpalɛ la. Saa yɛtwe yɛbikye Gyihova a ɔbahwe yeabikye yɛ ɛnɛ nee mekɛ mɔɔ ɛnlɛ awieleɛ!