MƆƆ Pita kpole Gyisɛse la, ɔzunle alɔbɔlɛ ɛzunlɛ. Ɛnee ɛzoanvolɛ ne ɛlɛpele kɛ ɔbanyia sunsum nu anwosesebɛ bieko noko ɛnee Gyisɛse kpondɛ kɛ ɔmaa ɔboa awie mɔ. Yemɔti, Gyisɛse zele ye kɛ: “Saa ɛsia ɛba . . . a, si ɛ mediema ne mɔ ahonle.” (Luku 22:32, 54-62) Pita rayɛle ɛvoya mɔɔ lumua Keleseɛne asafo ne anu sika ne mɔ anu ko. (Gal. 2:9) Zɔhane ala a awie mɔɔ ɛzonle kɛ kpanyinli ɛlɛ la bahola azonle bieko na yeava anyelielɛ yeaboa ɔ mediema a.

Nwolɛ adenle mɔɔ ɛnee bie mɔ lɛ kɛ neavolɛma la ɛvi bɛ sa, na bie a yemaa bɛde nganeɛ kɛ bɛyɛ mgbane. Julio * mɔɔ zonlenle kɛ kpanyinli ɛvolɛ mɔɔ bo 20 wɔ South America la hanle kɛ: “Ɛnee mefa mekɛ dɔɔnwo mesiezie ɛdendɛlɛ, mekɔkpɔla mediema, na meyɛ mboaneneavolɛ gyima ne wɔ asafo ne anu! Arɛlevilɛ nu ala nwolɛ adenle ɛhye mɔ amuala vile me sa, mendele nganeɛ kɛ me afoa nu ɛdeɛ ɛwie. Mekile kɛ, ɔyɛle me nyane.” Ɛnɛ, Julio ɛlɛsonle bieko kɛ kpanyinli.

Ɛdoavolɛ Gyemise hɛlɛle kɛ: “Me mediema, saa sɔnea ngakyile dɔɔnwo ba bɛ nwo zo a bɛli nwolɛ fɛlɛko.” (Gye. 1:2) Ɛnee Gyemise ɛlɛka sɔnea mɔɔ kpɔdekpɔdeyɛlɛ nee yɛ sinlidɔlɛ maa yɛkɔ nu la anwo edwɛkɛ. Ɔhanle atiakunluwɔzo ɛtane, nyeyenu, nee mɔɔ bokɛboka nwo la anwo edwɛkɛ. (Gye. 1:14; 2:1; 4:1, 2, 11) Saa Gyihova tea yɛ a, bie a yɛbali nyane. (Hib. 12:11) Noko ɔnle kɛ sɔnea ɛhye mɔ sɛkye yɛ anyelielɛ.

Saa bɛlie nwolɛ adenle bie mɔɔ yɛlɛ ye wɔ asafo ne anu la bɔbɔ a, yɛlɛ adenle yɛneɛnlea yɛ diedi ne anu na yɛmaa ɔda ali kɛ yɛkulo Gyihova. Eza yɛbahola yɛazuzu deɛmɔti yɛzonlenle la anwo. Asoo yɛdayɛ yɛ nvasoɛ ti, anzɛɛ ɔlua ɛhulolɛ mɔɔ yɛlɛ yɛmaa Nyamenle nee diedi mɔɔ yɛlɛ kɛ asafo ne le ye ɛdeɛ na ɔfɛta  kɛ bɛnea zolɛ boɛ la ati a yɛkpondɛle nwolɛ adenle ne ɔ? (Gyi. 20:28-30) Mediema mɔɔ ɛnee le mgbanyima mɔɔ bɛlɛfa anyelielɛ bɛazonle la maa awie biala mɔɔ Seetan boka nwolɛ la nwu kɛ bɛ ɛhulolɛ mɔɔ bɛlɛ bɛmaa Gyihova la le nɔhalɛ.

Mɔɔ bɛdeanle Belemgbunli Devidi wɔ ye ɛtane kpole ne mɔɔ ɔyɛle anwo la, ɔliele ɔdole nu na ɔnyianle ɛtanefakyɛ. Devidi dole edwɛne kɛ: “Nyilalɛ ɛha sonla ne mɔɔ bɛva ye mɛladonlɛ bɛhyɛ ye, na bɛva ye ɛtane bɛhyɛ ye la. Nyilalɛ ɛha sonla ne mɔɔ [Gyihova] ɛmbu ye ɛtane nwo mgbonda la na ɔmbɛlɛbɛla awie mɔ.” (Edw. 32:1, 2) Ndeanlɛ zieziele Devidi manle ɔyɛle mboaneneavolɛ kpalɛ ɔmanle Nyamenle menli ne.

Fane dɔɔnwo ne ala, mediema mgbanyima mɔɔ sia basonle bieko la ta yɛ mboaneneavolɛma kpalɛ tɛla alumua ne. Mgbanyima ɛhye mɔ ko hanle kɛ: “Kɛkala mede kɛzi bɛnea bɛdabɛ mɔɔ bɛvo la abo kpalɛ.” Kpanyinli fofolɛ hanle kɛ: “Kɛkala mebu nwolɛ adenle mɔɔ melɛ mesonle me mediema la kɛ ɔsonle bolɛ kpalɛ.”

Edwɛndolɛnli ne hɛlɛle vanenle Gyihova anwo kɛ, “ɔndwi sonla nyunlu dahuu.” (Edw. 103:9) Yemɔti, ɔnle kɛ yɛnyia adwenle kɛ Nyamenle ɛnrɛlie awie mɔɔ yɛle nvonleɛ kpole bie la ɛnrɛli bieko ɛlɛ. Ricardo mɔɔ zonlenle kɛ kpanyinli ɛvolɛ dɔɔnwo na nwolɛ adenle ne vile ɔ sa la ka kɛ, “Me sa nu dole kpole wɔ medame mumua ne me nvonleɛ mɔɔ menyɛle la anwo. Mekɛ dɔɔnwo pɛle nu la, nganeɛ mɔɔ mendele kɛ menfɛta la zile me adenle kɛ meazonle me mediema bieko kɛ neavolɛ. Ɛnee menlɛ anwodozo mɔɔ maa mekola meda ye ali kɛ bɛkola bɛfa bɛ nwo bɛto me nwo zo bieko a. Noko kɛmɔ me nye die nwo kɛ mebaboa awie mɔ la ati, ɛnee meyɛ Baebolo ɛzukoalɛ, memaa mediema anwosesebɛ wɔ Belemgbunlililɛ Asalo, na me nee bɛ kɔ daselɛlilɛ. Ɛhye manle menyianle anwodozo, na kɛkala melɛsonle bieko kɛ kpanyinli.”

Ɛya mɔɔ bɛfa bɛsie bɛ nu la kola si kpanyinli mɔɔ awie bayɛ la adenle. Nea kɛzi ɔle kpalɛ kɛ yɛbayɛ kɛ Gyihova sonvolɛ Devidi, mɔɔ ɛnee ɔwɔ kɛ ɔnriandi Belemgbunli Sɔɔlo mɔɔ twe nungule la ɛ! Devidi  kpole kɛ ɔbali Sɔɔlo nzenralɛ, wɔ mekɛ bɔbɔ mɔɔ ɔnyianle adenle kɛ ɔwɔ kɛ ɔyɛ zɔ la. (1 Sam. 24:4-7; 26:8-12) Mekɛ mɔɔ Sɔɔlo wule wɔ konle nu la, Devidi zunle ye, na ɔhanle kɛ Sɔɔlo nee ɔ ra Dwɔnatan “bɛ ɛhulolɛ yɛ nwanwane.” (2 Sam. 1:21-23) Devidi anva edwɛkɛ anzie ye nu.

Saa ɛte nganeɛ kɛ bɛnde wɔ edwɛkɛ bo anzɛɛ bɛsisi wɔ a, mmamaa ɛya fo ɛ nwo zo. Kɛ neazo la, mekɛ mɔɔ nwolɛ adenle mɔɔ William mɔɔ ɛnee ɛzonle kɛ kpanyinli ɛvolɛ 30 wɔ Britain vile ɔ sa la, ɔvale mgbanyima ne mɔ bie anwo ɛya. Duzu a boale William manle ɔgyinlanle ɔ gyakɛ azo bieko a? Ɔka kɛ, “Dwobu buluku ne mɔɔ mengengale la manle me anwosesebɛ. Saa Gyihova boale Dwobu manle anzondwolɛ dɛnlanle ɔ nee ɔ gɔnwo mɔ nsa ne avinli a, ɛnee fane nyɛ yɛɛ Ɔnrɛboa me ɔnrɛmaa anzondwolɛ ɛnrɛra me nee asafo nu mgbanyima ne mɔ avinli a!”—Dwobu 42:7-9.

Saa ɛzile kpɔkɛ kɛ ɛgyakyi Nyamenle mboane ne ɛnleanlɛ a, ɔbayɛ kpalɛ kɛ ɛbazuzu deɛmɔti ɛyɛle zɔ la anwo. Asoo ninyɛne bie a hyelele ɛ nwo zo a? Ɛbule ninyɛne bie mɔ kɛ bɛ nwo hyia dɔɔnwo wɔ wɔ ɛbɛlabɔlɛ nu ɔ? Asoo mediema sinlidɔlɛ a manle ɛ sa nu dole a? Kɛ ɔde ye biala la, kakye kɛ mekɛ mɔɔ ɛnee ɛlɛsonle kɛ kpanyinli la ɛnee wɔziezie ɛ nwo kɛ ɛbaboa awie mɔ wɔ ndenle dɔɔnwo anu. Wɔ ɛdendɛlɛ boale bɛ, wɔ neazo ne manle bɛ anwosesebɛ, yɛɛ wɔ mboaneneavolɛ ɛkpɔlalɛ ne boale bɛ manle bɛgyinlanle bɛ sɔnea ngakyile nloa. Gyima mɔɔ ɛyɛle kɛ kpanyinli mɔɔ di nɔhalɛ la manle Gyihova anye liele, kɛmɔ ɛdawɔ noko ɛ nye liele la.—Mrɛ. 27:11.

Gyihova ɛboa bie mɔ yemaa bɛnyia anyelielɛ nee ɛhulolɛ kɛ bɛbali asafo ne anyunlu bieko. Saa ɛdawɔ mumua ne a ɛgyakyile kɛ ɛbazonle kɛ kpanyinli anzɛɛ bɛliele a, ɛbahola wɔamaa ‘ɛ nye abolo kɛ ɛyɛ asafo nu kpanyinli bieko.’ (1 Tem. 3:1) Pɔɔlo ‘zɛlɛle dahuu’ kɛ Keleseɛnema mɔɔ wɔ Kɔlɔsae la bahola anyia Nyamenle ɛhulolɛdeɛ ne anwo ndelebɛbo mɔɔ di munli na “bɛabɔ bɛ ɛbɛla ne bɛamaa yeafɛta Awulae.” (Kɔl. 1:9, 10) Saa wɔnyia nwolɛ adenle ɛlɛsonle kɛ kpanyinli bieko a, sɛlɛ Gyihova kɛ ɔmaa wɔ anwosesebɛ, abotane nee anyelielɛ. Wɔ awieleɛ mekɛ ɛhye anu, Nyamenle menli hyia mboaneneavolɛma mɔɔ lɛ ɛlɔlɛ la moalɛ. Ɛlɛ ɛhulolɛ kɛ ɛbaboa ɛ mediema ɔ?