Devidi hɛlɛle kɛ ɔtɛnwunle ‘kɛ bɛkpo tenlenenli na ɔ mra ɛlɛsɛlɛzɛlɛ aleɛ ali.’ Yemɔti ɔgyinlanle anwubielɛ mɔɔ ɔnyianle la azo a ɔhanle edwɛkɛ ɛhye a. Ɛnee ɔze kɛ Nyamenle dwenle ɔ nwo dahuu. (Edw. 37:25) Noko, Devidi edwɛkɛ ne ɛngile kɛ Gyihova sonvolɛ biala ɛtɛkyiale debie anzɛɛ ɛnrɛhyia debie ɛlɛ.

Mekɛ bie, Devidi hɔle ngyegyelɛ mgbole nu. Nuhua ko a le mekɛ mɔɔ ɛnee ɔlɛnriandi Sɔɔlo la. Aleɛ mɔɔ ɛnee Devidi lɛ la hale ekyi bie, yemɔti ɔbizale kpanwo mɔɔ ɔ nee bɛdabɛ mɔɔ bɛ nee ye lua bɛali la. (1 Sam. 21:1-6) Wɔ ɛke, ɛnee Devidi ‘ɛlɛsɛlɛ aleɛ.’ Noko akee, wɔ tɛnlabelɛ ɛsesebɛ zɔhane anu, ɛnee ɔze kɛ Gyihova ɛtɛkpole ye. Nɔhalɛ nu, ɔnle ngɛlɛlera ne ɛleka biala kɛ ɛnee ɔwɔ kɛ Devidi sɛlɛ na yeanyia aleɛ yeali.

Gyisɛse ɛwɔkɛ mɔɔ ɔbɔle kɛ Nyamenle bali ye azonvolɛ mɔɔ bɛdumua bɛkpondɛ Belemgbunlililɛ ne ngyianlɛ nwo gyima la wɔ Mateyu 6:33. Gyisɛse hanle kɛ: ‘Bɛlumua bɛkpondɛ Nyamenle Belemgbunlililɛ ne nee mɔɔ Nyamenle kpondɛ kɛ bɛyɛ la na ɔkɛva mɔɔ bɛhyia nwolɛ mɔɔ bie a le aleɛ, nzule, nee adɛladeɛ la ɔkɛmaa bɛ.’ Noko Gyisɛse eza hanle kɛ ɔluakɛ bɛbakpɔ ɔ “mediema” ne mɔ la ati, ɛhɔne bahola ahu bɛ. (Mat. 25:35, 37, 40) Ɛhye bie dole ɛzoanvolɛ Pɔɔlo. Ɔdwu mekɛ ne bie a ɛhɔne nee nzuhɔne ku ye.—2 Kɔl. 11:27.

Gyihova hanle kɛ bɛbakpɔ yɛ wɔ ndenle ngakyile zo. Ɔbamaa adenle yeamaa bɛalie yɛ ninyɛne wɔ mekɛ mɔɔ yɛlɛbua Abɔnsam ɛzonledolɛ ne la. (Dwobu 2:3-5) Kɛ neazo la, yɛ mediema Keleseɛnema mɔɔ bie mɔ a le bɛdabɛ mɔɔ bɛvale bɛ bɛguale Nazi mbulalɛ efiade la, nwunle amaneɛ ɔlua ɛkpɔlɛ ti. Ɛhɔne mɔɔ bɛhyele Alasevolɛ ne mɔ la le atisesebɛ adenle ko mɔɔ bɛluale zo kɛ bɛmaa bɛagyakyi bɛ munlililɛ nu a. Alasevolɛ mɔɔ bɛdi nɔhalɛ la diele Gyihova; na yeamkpo bɛ. Ɔmanle adenle bɛhɔle sɔnea nu kɛmɔ Keleseɛnema kɔsɔɔti kɔ sɔnea nu la. Noko, Gyihova boa bɛdabɛ mɔɔ bɛnwu amaneɛ wɔ ye duma nu la amuala. (1 Kɔl. 10:13) Yɛbahola yɛamaa edwɛkɛ mɔɔ wɔ Felepaema 1:29 la adɛnla yɛ adwenle nu dahuu: “Ɛmaa adenle kɛ bɛlie Kelaese bɛli na bɛnwu amaneɛ wɔ ɔ ti.”

Gyihova ɛbɔ ɛwɔkɛ kɛ ɔbaboa ye azonvolɛ. Kɛ neazo la, Ayezaya 54:17 ka kɛ: “Akodeɛ biala mɔɔ bɛyɛ bɛatia wɔ la ɛnrɛyɛ kpalɛ.” Ɛwɔkɛ mɔɔ le kɛ ɛhye mɔ la maa yɛnwu kɛ Nyamenle bɔ ye menli ekpunli ne anwo bane. Noko, Keleseɛnenli kola kɔ sɔnea mɔɔ kola kɔwie ewule nu bɔbɔ la anu.