1. Kɛzi Gyihova te nganeɛ wɔ gyima nwo ɛ, na duzu a ɔyɛ ye wɔ nwo a?

GYIHOVA anye die ye gyima nwo. (Edwɛndolɛ 135:6; Dwɔn 5:17) Ɔkpondɛ kɛ anwumabɔvolɛma nee alesama noko anye die bɛ gyima nwo, yemɔti yemaa bɛ gyima mɔɔ yɛ anyelielɛ nee ahunlundwolɛ la. Gyihova maanle ye belamunli Ralɛ ne boale Ye wɔ ninyɛne ɛbɔlɛ nu. (Bɛgenga Kɔlɔsaema 1:15, 16.) Baebolo ne ka kɛ, kolaa na Gyisɛse ara azɛlɛ ye azo la, ɛnee ɔ nee Nyamenle wɔ anwuma kɛ ‘dwinvolɛ mɔɔ yebe.’—Mrɛlɛbulɛ 8:30.

2. Duzu a maa yɛnwu kɛ anwumabɔvolɛma dahuu yɛ gyima mɔɔ hyia na ɔmaa ahunlundwolɛ la ɛ?

² Ɔvi Mɔlebɛbo kɔdwu Yekile, Baebolo ne ka kɛ Gyihova maa ye anwumabɔvolɛma gyima dahuu. Mɔɔ Adam nee Yive yɛle ɛtane na ɔwɔ kɛ bɛfi Paladaese ne anu la, Nyamenle manle anwumabɔvolɛma gyima bie. Yɛkenga ye wɔ Mɔlebɛbo buluku ne anu kɛ: Nyamenle vale “tease abɔdeɛma nee dadeɛ mɔɔ ɛlɛsɔ na ɔpɛnepɛne ɔ nwo ɛleka biala la ɔrazinzale Yidɛn tola ne aduduleɛ adenle ne mɔɔ kɔ ngoane baka ne anwo la.” (Mɔlebɛbo 3:24) Yɛnwu ye wɔ Yekile buluku ne anu kɛ Gyihova zoanle ye “soanvolɛma ne mɔ anu ko kɛ ɔraye mɔɔ ɛnrɛhyɛ biala na yeazi,” anzɛɛ mɔɔ bazi kenlebie  la ɔhile ye azonvolɛ.—Yekile 22:6.

3. Kɛzi Gyisɛse zukoale ɔ Ze wɔ mekɛ mɔɔ ɛnee ɔwɔ azɛlɛ ye azo la ɛ?

³ Mɔɔ Gyisɛse wɔ azɛlɛ ye azo la, ɔvale anyelielɛ ɔyɛle gyima mɔɔ Gyihova vale manle ye la. Gyisɛse vale gyima mɔɔ nwolɛ hyia la manle ye ɛdoavolɛma ɔvale ɔzukoale ɔ ze. Ɔmanle bɛ nye liele gyima mɔɔ ɔvale ɔmanle bɛ la anwo na ɔzele bɛ kɛ: “Meka nɔhalɛ ne meahile bɛ: Awie mɔɔ kɛlie me kɛli la kɛyɛ gyima mɔɔ meyɛ la bie, yɛɛ ɔbayɛ mɔɔ tɛla ɛhye mɔ la bɔbɔ, ɔluakɛ melɛkɔ Selɛ ne anwo lɔ.” (Dwɔn 14:12) Gyisɛse luale edwɛkɛ ɛhye azo ɔmanle ye ɛdoavolɛma ne nwunle kɛ bɛ gyima ne ɛyɛlɛ hyia ndɛndɛ: “Ɔwɔ kɛ yɛkɔ zolɛ yɛyɛ mɔɔ zoanle me la gyima ne; aledwolɛ ɛlɛba mɔɔ awie ɛngola ɛnyɛ gyima a.”—Dwɔn 9:4.

4-6. (a) Duzu ati a yɛ nye sɔ kɛ Nowa nee Mosisi yɛle gyima mɔɔ Gyihova vale manle bɛ la ɛ? (b) Ninyɛne nwiɔ boni mɔ a fi gyima mɔɔ Nyamenle fa maa alesama la anu ba ɛ?

⁴ Mekɛ tendenle kolaa na Gyisɛse ara azɛlɛ ye azo la, Gyihova manle menli gyima mɔɔ maa ahunlundwolɛ la. Ɔwɔ nuhua kɛ Adam nee Yive anwie bɛ gyima ne ɛdeɛ, noko alesama dɔɔnwo wiele gyima mɔɔ Nyamenle vale manle bɛ la. (Mɔlebɛbo 1:28) Gyihova manle Nowa adehilelɛ wɔ kɛzi ɔbabobɔ ɛlɛka ne la anwo amaa ɔ nee ye abusua ne anyia bɛ ti wɔ Azuyilɛ ne anu. Nowa yɛle mɔɔ Gyihova zele ye la pɛpɛɛpɛ. Yɛde ngoane nu ɛnɛ, ɔluakɛ Nowa lile Gyihova adehilelɛ zo pɛpɛɛpɛ.—Mɔlebɛbo 6:14-16, 22; 2 Pita 2:5.

⁵ Gyihova manle Mosisi adehilelɛ wɔ kɛzi ɔwɔ kɛ bɛsi ndanlɛ sua ne na bɛyɛ ɛsɔfolilɛ ne anwo ngyehyɛleɛ la. Mosisi yɛle mɔɔ Gyihova hanle la pɛpɛɛpɛ. (Adendulɛ 39:32; 40:12-16) Duzu a yɛsukoa ye wɔ Mosisi gyima ɛsesebɛ ne nee ye tieyɛ ne anu a? Kɛmɔ ɛzoanvolɛ Pɔɔlo hilehilele nu la, ɛnee ɛdanlɛ sua ne nee ɛsɔfolilɛ ne le “ninyɛne kpalɛ mɔɔ bara la sɔhovolɛ.”—Hibuluma. 9:1-5, 9; 10:1.

⁶ Saa Nyamenle bodane ɛlɛba nu a, ye azonvolɛ asa ka gyimalilɛ ngakyile. Noko, ɔnva nwo kɛ bɛ sa ka gyimalilɛ ngakyile la, ye kɔsɔɔti wula Gyihova anyunlunyia na ɔboa alesama. Yɛnwu ɛhye wɔ gyima mɔɔ Gyisɛse yɛle kolaa na yeara azɛlɛ ye azo nee mɔɔ ɔyɛle ye wɔ azɛlɛ ye azo la anu. (Dwɔn 4:34; 17:4) Ɛnɛ, saa yɛyɛ gyima mɔɔ Gyihova ɛva ɛmaa yɛ la a, ɔwula ye anyunlunyia. (Mateyu 5:16; bɛgenga 1 Kɔlentema 15:58.) Duzu ati a yɛkola yɛka ye zɔ ɛ?

7, 8. (a) Ka gyima mɔɔ ɛnɛ Keleseɛnema ɛnyia adenle ɛlɛyɛ la. (b) Duzu a ɔwɔ kɛ yɛyɛ ye wɔ Gyihova adehilelɛ nwo a?

⁷ Ɔle enililɛ kɛ Gyihova to ɔ sa fɛlɛ alesama mɔɔ bɛnli munli la kɛ bɛrayɛ ye gyimayɛvoma la. (1 Kɔlentema 3:9) Yɛ mediema ne mɔ bie ɛnyia adenle ɛlɛsi azua kɛmɔ Nowa nee Mosisi yɛle la. Bie mɔ boa Nyianu Asalo, Belemgbunlililɛ Asalo, nee Bɛtɛle azua  ɛsisilɛ. Saa ɛlɛboa Belemgbunlililɛ Asalo bie boɛ ɛyɛlɛ, anzɛɛ ɛboka menli mɔɔ ɛlɛsi ewiade amuala gyima ti sua ne wɔ Warwick, New York la a, maa ɛ nye ɛlie! (Nea mɔlebɛbo nvoninli ne.) Ɔle ɛzonlenlɛ nwuanzanwuanza. Yɛ nuhua ekyi bie ala a boa suazilɛ gyima ne a, noko kɛ Keleseɛnema la, yɛ muala yɛlɛyɛ sunsum nu suazilɛ gyima bie. Yemɔ a le daselɛlilɛ gyima ne mɔɔ ɔwula Gyihova anyunlunyia na ɔboa alesama la. (Gyima ne 13:47-49) Nyamenle ahyehyɛdeɛ ne a nea daselɛlilɛ gyima ne azo a. Ɛhye kile kɛ ɔdwu mekɛ ne bie a yɛbanyia gyimalilɛ fofolɛ.

⁸ Gyihova nɔhalɛ azonvolɛ anye la kɛ bɛbava ye adehilelɛ bayɛ gyima. (Bɛgenga Hibuluma 13:7, 17.) Bie a yɛnrɛde deɛmɔti bɛmaa yɛ gyimalilɛ anzɛɛ adehilelɛ fofolɛ la abo. Noko yɛ nee Gyihova yɛ adwenle ɔluakɛ yɛze kɛ nzenzaleɛ ne vi ye na debie kpalɛ bavi nu ara.

9. Neazo kpalɛ boni a mgbanyima yɛ maa asafo ne anu amra a?

⁹ Mgbanyima dua kɛzi bɛdi asafo ne anyunlu la azo bɛda ye ali kɛ bɛlɛ ɛhulolɛ kpole kɛ bɛbayɛ Gyihova ɛhulolɛdeɛ. (2 Kɔlentema 1:24; 1 Tɛsalonaekama 5:12, 13) Mgbanyima ne mɔ ɛziezie bɛ nwo kɛ bɛbabɔ mɔdenle bɛava adehilelɛ bɛali gyima na bɛyɛ ndɛ bɛsukoa ndenle fofolɛ mɔɔ bɛdua zo bɛdi daselɛ la. Saa bɛyɛ telefuu zo, meli agyinlaleɛ, anzɛɛ bagua nu daselɛlilɛ nwo ngyehyɛleɛ a, ɔso ma ɔnva nwo bɔbɔ kɛ ɛnee bie mɔ ɛngola ɛnnwu ye saa ndenle fofolɛ ɛhye mɔ le kpalɛ la. Kɛ neazo la, adekpakyelɛma nna bie mɔɔ bɛwɔ Germany la zile kpɔkɛ kɛ bɛka edwɛkɛ ne wɔ ɛleka mɔɔ gyima dɔɔnwo wɔ na bɛtɛkanle edwɛkɛ ne wɔ ɛkɛ mekɛ tendenle la. Bɛ nuhua ko, mɔɔ bɛfɛlɛ ye Michael la hanle kɛ ɛnee bɛsulo ɔboalekɛ bɛtɛyɛle gyima ɛhye bie ɛlɛ. Ɔvale ɔzɔle zo kɛ: “Ɔbayɛ kɛ ɛnee Gyihova ze ɛhye, yemɔti, ɔmanle yɛ nye liele daselɛlilɛ nu kpalɛ wɔ nwonlomɔ zɔhane. Nea kɛzi yɛ nye liele kɛ yɛvale adehilelɛ mɔɔ wɔ Yɛ Belemgbunlililɛ Gyima ne anu la yɛlile gyima na yɛvale yɛ nwo yɛdole Gyihova anwo zo a!” Asoo ɛlɛ ɛhulolɛ kɛ ɛbava nzuzulɛ fofolɛ wɔali gyima wɔ wɔ azɛlɛsinli ne anu ɔ?

10. Nzenzaleɛ boni a bɛyɛ ye wɔ ahyehyɛdeɛ ne anu kenlensa ye a?

¹⁰ Ɔyɛ a bɛyɛ nzenzaleɛ bie mɔ wɔ  Bɛtɛle. Kɛ neazo la, bɛdo ɔfese ngyikyi bie mɔ anu na bɛva bɛ gyima ne bɛboka ɔfese mgbole bie mɔ anwo kenlensa ye. Ɛhye ɛha mediema mɔɔ yɛ gyima wɔ Bɛtɛle ɛhye mɔ anu la. Ɛnee ɔwɔ kɛ bɛyɛ nzenzaleɛ, noko nzinlii bɛnwunle nvasoɛ mɔɔ wɔ zolɛ la. (Nolobɔvo ne 7:8) Mediema ɛhye mɔ fa anyelielɛ yɛ gyima ɔluakɛ bɛkulo kɛ bɛ nee Gyihova menli mɔɔ wɔ ɛkɛ ɛnɛ la bɔ nu yɛ gyima!

11-13. Nzenzaleɛ boni a ɛnee ɔwɔ kɛ bie mɔ yɛ ɔlua ahyehyɛdeɛ ne anu nzenzaleɛ mɔɔ bɛyɛle la ati la ɛ?

¹¹ Yɛbahola yɛanyia ɛzukoalɛdeɛ kpalɛ yɛavi mediema mɔɔ ɛnee yɛ gyima wɔ ɔfese mɔɔ bɛha bɛbɔ nu la ɛkɛ. Ɛnee bɛ nuhua dɔɔnwo ɛva ɛvolɛ dɔɔnwo ɛzonle wɔ ɛkɛ. Bɛzele agyalɛma bie mɔɔ ɛnee sonle Bɛtɛle ekyi bie anu la kɛ bɛdu bɛhɔ Mexico, ɛleka mɔɔ Bɛtɛlema mɔɔ wɔ ɛkɛ la dodo le kɛ bɛ ɛdeɛ ne fane 30 la. Ɔ hu Rogelio ka kɛ: “Ɛnee ɔnla aze kɛ yɛbagyakyi yɛ mbusuafoɔ nee yɛ gɔnwo mɔ yɛahɔ.” Adiema Juan mɔɔ bɛzele ɔdaye noko kɛ ɔdu ɔhɔ Mexico Bɛtɛle la, dele nganeɛ kɛ bɔ zo mɔɔ ɔkabɔ ɛbɛla bo a. Ɔka kɛ: “Ɔwɔ kɛ ɛyɛ debie biala fofolɛ. Ɔwɔ kɛ ɛkakyi wɔ nzuzulɛ nee wɔ amaamuo.”

¹² Mɔɔ bɛhanle ɔfese bie mɔ mɔɔ wɔ Europe bɛbɔle nu la, bɛmanle Bɛtɛlema ne dɔɔnwo hɔyɛle gyima wɔ Germany Bɛtɛle. Bɛdabɛ noko bɛyiale ngyegyelɛ ɔluakɛ ɔnla aze kɛ awie badu avi ye sua zo. Bɛ nuhua mɔɔ dule vile Switzerland la anwo lɔle awoka ngɛnlɛma ne mɔ, yɛɛ bɛ nuhua mɔɔ dule vile Austria la anwo lɔle bɛ Bɛtɛle abusua ekyi ne.

¹³ Mediema mɔɔ bɛfi bɛ maanle nu ɔfese bɛkɔsonle wɔ maanle gyɛne nu la yɛ nzenzaleɛ dɔɔnwo. Ɔwɔ kɛ bɛtɛnla azua fofolɛ nu, bɛ nee menli fofolɛ yɛ gyima, na bɛsukoa gyima fofolɛ. Eza bɛkɔ asafo fofolɛ nu, bɛnyia azɛlɛsinli fofolɛ, na bie a bɛsukoa aneɛ fofolɛ. Nzenzaleɛ ɛhye mɔ ɛyɛlɛ ɛnla aze, noko Bɛtɛlema dɔɔnwo ɛva anyelielɛ ɛyɛ. Duzu ati ɔ? Maa yɛdie bɛ nuhua bie mɔ.

14, 15. (a) Kɛzi mediema dɔɔnwo ɛhile kɛ bɛ nye die nwolɛ adenle mɔɔ bɛnyia bɛlɛsonle Gyihova la anwo ɛ? (b) Kɛzi bɛle neazo kpalɛ bɛmaa yɛ ɛ?

¹⁴ Grethel ka kɛ: “Menliele mendole nu ɔluakɛ menluale zo memanle Gyihova nwunle kɛ mekulo ye metɛla maanle, sua, anzɛɛ nwolɛ adenle bie.” Dayska ka kɛ: “Mɔɔ menwunle kɛ ɛsalɛdolɛ ne vi Gyihova la, menvale anyelielɛ menliele mendole nu.” André nee Gabriela noko ka kɛ: “Yɛnwunle kɛ ɔle nwolɛ adenle fofolɛ mɔɔ yɛnyia kɛ yɛbava ninyɛne mɔɔ yɛkulo yɛado ahane na yɛazonle Gyihova.” Bɛte nganeɛ kɛ ɔle kpalɛ kɛ bɛkɛlie nzenzaleɛ mɔɔ Gyihova ahyehyɛdeɛ ne kɛyɛ la bɛkɛdo nu tɛla kɛ bɛkɛkpo.

¹⁵ Saa bɛka ɔfese bie mɔ bɛbɔ nu a, bɛmaa Bɛtɛlema ne bie mɔ sonle kɛ adekpakyelɛma. Ɛhye bie dole Bɛtɛlema dɔɔnwo wɔ mekɛ mɔɔ bɛhanle Denmark, Norway, nee Sweden ɔfese ne mɔ bɛbɔle nu bɛyɛle ye Scandinavia ɔfese la. Agyalɛma bie mɔɔ bɛfɛlɛ bɛ  Florian nee Anja la ka kɛ: “Yɛnwu yɛ gyimalilɛ fofolɛ ne kɛ ɔle anwubielɛ mɔɔ yɛ anyelielɛ. Wɔ yɛ afoa nu, ɔle nwolɛ adenle kɛnlɛma kɛ Gyihova bava yɛ ali gyima ɔnva nwo ɛleka mɔɔ yɛlɛsonle la. Yɛkola yɛka kɛ yɛnyia nyilalɛ dɔɔnwo!” Ɔnva nwo kɛ yɛ nuhua dɔɔnwo ɛtɛkɔle tɛnlabelɛ ɛhye bie anu ɛlɛ la, yɛkola yɛsukoa bɛ yɛfi yɛ ɛhulolɛ nu yɛfa Belemgbunlililɛ ne yɛdumua. (Ayezaya 6:8) Yɛze kɛ, ɔnva nwo ɛleka mɔɔ bɛlɛsonle la, Gyihova bayila menli mɔɔ anye die nwo kɛ bɛ nee ye bayɛ gyima la dahuu.

16. (a) Duzu a Galeehyeama 6:4 se yɛyɛ a? (b) Adenle mɔɔ tɛla biala mɔɔ yɛ muala yɛlɛ la a le boni?

¹⁶ Kɛmɔ yɛnli munli la ati, ɔyɛ a yɛfa yɛ nwo yɛtoto awie mɔ anwo. Noko Nyamenle Edwɛkɛ ne tu yɛ folɛ kɛ yɛdwenle mɔɔ yɛdayɛ mumua ne yɛkola ye yɛ la anwo. (Bɛgenga Galeehyeama 6:4.) Tɛ awie biala a bahola ayɛ asafo nu kpanyinli, adekpakyelɛnli, edwɛkpatɛlɛvolɛ, anzɛɛ Bɛtɛlenli a. Ɛhye mɔ le ndenle ngɛnlɛma ɛdeɛ, noko yɛ muala yɛlɛ adenle mɔɔ tɛla biala la. Yemɔ a le kɛ yɛbabɔ edwɛkpa ne nolo, yɛayɛ Gyihova egyinli nu gyimayɛvoma. Bɛmaa yɛ nye ɛlie gyima ɛhye anwo!

17. Kɛzi ewiade ɛhye anu tɛnlabelɛ ne de ɛ? Noko duzu ati a ɔnle kɛ yɛ sa nu to ɛ?

¹⁷ Wɔ ewiade ɛhye anu, bie a yɛnrɛhola yɛnrɛzonle Gyihova kɛmɔ yɛkulo la. Bie a yɛwɔ tɛnlabelɛ mɔɔ yɛngola yɛnyɛ nwolɛ ɛhwee mɔɔ bie a le abusua ɛzonlelilɛ anzɛɛ kpɔkɛdelɛ nwo ngyegyelɛ la anu. Noko ɔnle kɛ ɛhye mɔ maa yɛ sa nu to. Ɔnva nwo ngyegyelɛ  biala mɔ yɛwɔ nu la, yɛbahola yɛabɔ Gyihova nee ye Belemgbunlililɛ ne nolo dahuu. Mɔɔ hyia kpalɛ la a le kɛ yɛbayɛ mɔɔ yɛbahola ye yɛ la amuala yɛamaa Gyihova, na yɛazɛlɛ yɛamaa bɛdabɛ mɔɔ bɛkola bɛyɛ dɔɔnwo bɛtɛla yɛ la. Bɛmaa yɛhakye kɛ, awie biala mɔɔ ye Gyihova duma ne ayɛlɛ la sonle bolɛ maa ye!

18. Duzu a yɛ nye la ye ade a, noko adenle kɛnlɛma boni a yɛnyia a?

¹⁸ Ɔnva nwo kɛ yɛnli munli la, Gyihova maa yɛ nee ye yɛ gyima. Nea adenle kɛnlɛma mɔɔ yɛnyia kɛ yɛ nee Nyamenle bayɛ gyima wɔ awieleɛ mekɛ ɛhye anu a! Yɛ nye la “nɔhalɛ ngoane ne” mɔɔ bamaa yɛahola yɛayɛ ninyɛne mɔɔ yɛngola ye yɛ ɛnɛ la ade. Ɔnrɛhyɛ, Gyihova bamaa yɛanyia dahuu ngoane, anyelielɛ, nee anzondwolɛ wɔ ye ewiade fofolɛ ne anu.—1 Temɔte 6:18, 19.

19. Kenlebie mɔɔ yɛ anyelielɛ la boni a Gyihova ɛva ɛbɔ yɛ ɛwɔkɛ a?

¹⁹ Ɔnrɛhyɛ, ewiade fofolɛ ne mɔɔ Nyamenle vale bɔlɛ ɛwɔkɛ la bara. Yɛkakye edwɛkɛ mɔɔ Mosisi hanle hilele Yizilayɛma kolaa na bɛadwu Ɛwɔkɛ Azɛlɛ ne azo la: “[Gyihova] bɛ Nyamenle ne bamaa bɛakpazi wɔ gyima biala anu.” (Mɛla ne 30:9) Wɔ Amagɛdɔn ne anzi, Gyihova bava azɛlɛ ne amaa menli mɔɔ bɛ nee ye yɛle gyima la, kɛmɔ yebɔ ɛwɔkɛ la. Akee, gyima fofolɛ mɔɔ yɛbanyia la a le kɛ yɛbaziezie azɛlɛ ye yɛamaa yeayɛ paladaese!