1. Kɛzi menli dɔɔnwo te nganeɛ wɔ mɔɔ bɛlɛ la anwo ɛ?

ASOO wɔde kɛ menli ka kɛ, “Saa debie fi ɛ sa a, yɛɛ ɛnwu kɛzi ɔsonle bolɛ a”? Bie a ɛdawɔ noko wɔnwu ye zɔ. Kɛ neazo la, ɔbahola yeara ye kɛ kakula mɔɔ ye awovolɛ lɛ ezukoa la anye ɛnrɛzɔ mɔɔ ɔlɛ la. Anzɛɛ kɛmɔ ɔnlɛ anwubielɛ la ati, bie a ɔnze ninyɛne mɔɔ anwo hyia kpalɛ wɔ ɛbɛlabɔlɛ nu la.

2, 3. (a) Adwenle boni a ɔhyia kɛ Keleseɛne ngakula koati a? (b) Duzu a baboa yɛ na yɛ nye azɔ mɔɔ yɛlɛ la ɛ?

² Saa ɛle kakula a, duzu a nwolɛ hyia wɔ a? Ɛnɛ, nwonane afoa nu ninyɛne nwo hyia ngakula kpalɛ tɛla agɔnwolɛvalɛ. Bie a bɛkulo kɛ bɛnyia gyima kpalɛ, awuke kɛnlɛma, ninyɛne le kɛ moba anzɛɛ kɔmputa mɔɔ ɛdwu zo la bie. Saa ɛhye mɔ a nwolɛ hyia bɛ kpalɛ wɔ ɛbɛlabɔlɛ nu a, ɛnee bɛlɛminli debie mɔɔ anwo hyia kpole kpalɛ la, abusuabɔlɛ mɔɔ bɛ nee Nyamenle bɛanyia la. Saa wɔ awovolɛ le Keleseɛnema a, ɛnee wɔnyia ahyɛlɛdeɛ kpole kpalɛ. (Mateyu 5:3) Ɛ nye anzɔ wɔ sunsum nu agyadeɛ ne a, wɔ ɛbɛlabɔlɛ bahola azɛkye.

 ³ Noko, ɔnle kɛ ɔba ye zɔ. Yemɔti, yɛbazuzu Baebolo nu neazo bie mɔ mɔɔ ɔbamaa wɔahile wɔ sunsum nu agyadeɛ ne anwo anyezɔlɛ la anwo. Tɛ ngakula angome a neazo ɛhye mɔ baboa bɛ a, emomu ɔbaboa yɛ kɔsɔɔti yeamaa yɛahile anyezɔlɛ wɔ mɔɔ Gyihova ɛva ɛmaa yɛ la anwo.

4. Samoɛle amra ne mɔ anwo edwɛkɛ boni a wɔ 1 Samoɛle 8:1-5 ne ɛ?

⁴ Menli bie mɔɔ bɛ nwo edwɛkɛ wɔ Baebolo ne anu la nyianle sunsum nu agyadeɛ mɔɔ sonle bolɛ kpalɛ la, noko bɛangile nwolɛ anyezɔlɛ. Ngapezonli Samoɛle bɔle ɔ bo zonlenle Gyihova wɔ ye ngakula nu na ɔlile nɔhalɛ ɔhɔle awieleɛ. (1 Samoɛle 12:1-5) Samoɛle yɛle neazo kɛnlɛma, noko ɔ mra Dwowɛle nee Abaegya, anva ɔ gyakɛ. Emomu, bɛ ɛbɛla zɛkyele na bɛyɛle ninyɛndane.—Bɛgenga 1 Samoɛle 8:1-5.

5, 6. Duzu a dole Dwosaya amra ne mɔ nee ye alɔnra ne a?

⁵ Kɛ ɛnee Belemgbunli  Dwosaya amra mrenya ne mɔ de la ɛne. Ɛnee Dwosaya le belemgbunli mɔɔ di nɔhalɛ, ɔkulo Gyihova yɛɛ ɔzonlenle ye. Mekɛ mɔɔ bɛnwunle buluku ne mɔɔ Nyamenle Mɛla ne wɔ nu na bɛgengale bɛhilele Dwosaya la, ɔlile Gyihova adehilelɛ zo. Ɔyele awozonle ɛzonlenlɛ nee sunsum ɛtane nyɛleɛ ɔvile maanle ne anu na ɔdule menli ne folɛ kɛ bɛdie Gyihova. (2 Arelemgbunli 22:8; 23:2, 3, 12-15, 24, 25) Ɔ mra nyianle sunsum nu agyadeɛ mɔɔ sonle bolɛ! Ɔ mra mrenya nsa nee ye alɔnra ko rayɛle arelemgbunli nzinlii, noko bɛ nuhua biala anye anzɔ mɔɔ ɔnyianle ye la.

⁶ Mekɛ mɔɔ Dwosaya ara Gyɛhɔwahaze rayɛle belemgbunli la, “ɔyɛle ɛtane ɔtiale [Gyihova].” Mɔɔ ɔlile belemgbunli siane nsa pɛ la, Yigyibiti Falo bie vale ye dole efiade. Nzinlii, bɛvale ye bɛhɔle nlɔnu na ɔwule awie mɔ maanle zo. (2 Arelemgbunli 23:31-34) Ɔ diema Gyɛhɔyakem noko lile belemgbunli ɛvolɛ 11. Ɔdaye noko yeangile mɔɔ ɔnyianle ye wɔ ɔ ze ɛkɛ la anwo anyezɔlɛ. Ye nyɛleɛ ɛtane ne bole zo yemɔti Gyɛlɛmaya hanle kɛ: ‘Bɛbazie ye kɛmɔ bɛsie asoaso ala la.’ (Gyɛlɛmaya 22:17-19) Dwosaya ara Zɛdikaya nee ye alɔnra Gyɛhɔyakem noko yɛle ɛtane, bɛanva Dwosaya mɔɔ lile nɔhalɛ la agyakɛ.—2 Arelemgbunli 24:8, 9, 18, 19.

7, 8. (a) Kɛzi Sɔlɔmɔn zɛkyele ye sunsum nu agyadeɛ ne ɛ? (b) Duzu a yɛbahola yɛazukoa yɛavi Baebolo nu neazo mɔɔ fane menli mɔɔ zɛkyele bɛ sunsum nu agyadeɛ nwo la anu a?

 ⁷ Belemgbunli Sɔlɔmɔn zukoale kɛzi bɛsonle Gyihova la vile ɔ ze Devidi ɛkɛ, noko nzinlii yeangile ye sunsum nu agyadeɛ ne anwo anyezɔlɛ. “Sɔlɔmɔn yɛle kpanyinli bɔkɔɔ la ye mraalɛ ne mɔ hakyile ye adwenle manle ɔzonlenle maanle zo awozonle. Yeanli nɔhalɛ yeammaa [Gyihova] ye Nyamenle ne, kɛmɔ ɔ ze Devidi yɛle la.” (1 Arelemgbunli 11:4) Ɛhye ati, Gyihova anye anlie Sɔlɔmɔn anwo bieko.

⁸ Menli ɛhye mɔ amuala nyianle nwolɛ adenle mɔɔ bamaa bɛanwu Gyihova na bɛayɛ mɔɔ le kpalɛ la. Noko, bɛzɛkyele nwolɛ adenle ne. Noko akee, tɛ ngakula ne mɔ amuala a zɛkyele bɛ sunsum nu agyadeɛ ne a. Akee yɛbazuzu ngakula mɔɔ yɛle neazo kpalɛ mɔɔ yɛbahola yɛava bɛ gyakɛ la neazo ne anwo.

9. Kɛzi Nowa amra ne mɔ yɛle neazo kɛnlɛma ɛ? (Nea mɔlebɛbo nvoninli ne.)

⁹ Nowa amra ne mɔ yɛle neazo kɛnlɛma. Bɛnyianle nwolɛ adenle bɛboale Nowa na bɛbobɔle ɛlɛka bɛliele menli ngoane. Ɛnee bɛze kɛ ɔhyia kɛ bɛtie Gyihova yemɔti bɛhɔle ɛlɛka ne anu kolaa na Azuyilɛ ne abɔ ɔ bo. (Mɔlebɛbo 7:1, 7) Duzu a vi nu rale a? Mɔlebɛbo 7:3 ka kɛ bɛvale nane bɛhɔle ɛlɛka ne anu “amaa nzinlii bɛanyia bɛ ɛsaso wɔ azɛlɛ ye azo amuala.” Menli noko nyianle ngoane. Kɛmɔ Nowa amra ne mɔ anye zɔle bɛ sunsum nu agyadeɛ ne la ati, bɛboale bɛmanle bɛliele alesama abusua ne ngoane na bɛziale bɛvale nɔhalɛ ɛzonlenlɛ bɛziele azɛlɛ ye azo bieko.—Mɔlebɛbo 8:20; 9:18, 19.

10. Kɛzi Hibulu mgbavolɛ nna mɔɔ ɛnee wɔ Babelɔn la hilele kɛ bɛ nye sɔ bɛ sunsum nu agyadeɛ ne ɛ?

¹⁰ Ye ɛvolɛ dɔɔnwo anzi, Hibulu mgbavolɛ nna bie angulo kɛ bɛbayɛ mɔɔ Babelɔnma yɛ la bie. Wɔ 617 kolaa na bɛawo Kelaese la, ɛnee bɛva Hananaya, Maehyeeyɛle, Azalaya, yɛɛ Daneɛle bɛhɔ nlɔnu wɔ Babelɔn. Ɛnee bɛ nwo yɛ fɛ na bɛ adwenle nu ɛbuke yemɔti anrɛɛ bɛbahola bɛanyia bɛ nwo wɔ Babelɔn. Noko bɛ rɛle anvi ɛleka mɔɔ bɛvi nee mɔɔ bɛzukoale la ɛlɛ, yemɔti Gyihova yilale bɛ.—Bɛgenga Daneɛle 1:8, 11-15, 20.

11. Kɛzi awie mɔ nyianle Gyisɛse sunsum nu agyadeɛ ne azo nvasoɛ ɛ?

¹¹ Gyisɛse a hilele sunsum nu agyadeɛ nwo anyezɔlɛ kpole kpalɛ a. Gyisɛse anye liele mɔɔ ɔ Ze hilehilele ye la anwo kpalɛ. Ɛhye lale ali wɔ mekɛ mɔɔ ɔhanle edwɛkɛ ɛhye la: “Meka mɔɔ Selɛ ne kɛhilehile me la ala.” (Dwɔn 8:28) Ɔhanle mɔɔ ɔzukoale la ɔhilele awie mɔ noko amaa yeaboa bɛ. Ɔhanle kɛ: “Ɔwɔ kɛ mebɔ Edwɛkpa ne mɔɔ fane Nyamenle Belemgbunlililɛ ne anwo la nolo wɔ azua mɔɔ ɛha la azo noko, ɔluakɛ ɛhye ati yɛɛ Nyamenle zoanle me a.” (Luku 4:18, 43) Ewiade ne anye ɛnzɔ  nɔhalɛ ne mɔɔ vi Nyamenle ɛkɛ la, yemɔti Gyisɛse bɔle ye ɛdoavolɛma ne kɔkɔ kɛ “bɛnle ɛtane ewiade ɛdeɛ.”—Dwɔn 15:19.

12. (a) Kɛzi 2 Temɔte 3:14-17 fane ngakula mɔɔ bɛwɔ ɛkɛ ɛnɛ la anu dɔɔnwo anwo ɛ? (b) Kpuyia boni mɔ a ɔwɔ kɛ Keleseɛne ngakula biza bɛ nwo a?

¹² Saa wɔ awovolɛ kulo Gyihova a, ɛnee wɔnyia sunsum nu agyadeɛ. Mɔɔ Baebolo ne hanle ye wɔ Temɔte anwo la kola fane ɛdawɔ noko ɛ nwo. (Bɛgenga 2 Temɔte 3:14-17.) Wɔ awovolɛ ɛhilehile wɔ Gyihova nee mɔɔ ɔkulo la anwo debie. Bie a bɛbɔle ɔ bo wɔ wɔ adɔma nu bɛhilehilele wɔ. Ɛhye ɛmaa wɔyɛ sonla mɔɔ ze “nrɛlɛbɛ mɔɔ saa ɛdie Kelaese Gyisɛse ɛdi a, ɔkola ɔmaa wɔ ngoanelielɛ,” na ‘ɔsiezie wɔ kpalɛ’ ɔmaa Nyamenle ɛzonlenlɛ la. Noko, asoo ɛ nye sɔ mɔɔ ɛlɛ ye la amgba? Biza ɛ nwo kɛ: ‘Kɛzi mete nganeɛ wɔ nɔhalɛ alasevolɛ dɔɔnwo ne mɔɔ dɛnlanle aze kolaa na bɛawo me la anwo ɛ? Ɔyɛ me fɛ kɛ mele Gyihova Dasevolɛ ɔ? Kɛzi mete nganeɛ wɔ adenle mɔɔ menyia meboka menli ekyi ne mɔɔ Nyamenle ze bɛ la anwo ɛ? Asoo medie meto nu kɛ menyia nwolɛ adenle mɔɔ sonle bolɛ ɔ?’

13, 14. Duzu a bɛbahola bɛazɔ bɛdabɛ mɔɔ bɛtetele bɛ wɔ nɔhalɛ ne anu la bie mɔ bɛanlea kɛ bɛyɛ a, na kɛmɔti a ɔle ngoaseasɛm ɛ? Maa neazo.

¹³ Bie a ngakula mɔɔ bɛ awovolɛ le Alasevolɛ la ɛnrɛnwu kɛzi nɔhalɛ ne le kɛnlɛma na Seetan ewiade ne le ɛtane la. Bɛbɛlɛbɛla bie mɔ bɛmaa bɛva bɛ nwo bɛwula ɛbɛla  mɔɔ ewiade amra bɔ la anu bɔbɔ. Noko, asoo ɛbahɔva kale mɔɔ lua la anyunlu wɔanlea saa ɛbaboda anzɛɛ ɛbawu a? Ɛhye bayɛ ngoaseasɛm! Yemɔti, ɔngyia kɛ yɛbava yɛ nwo yɛawula ewiade ne anu ninyɛndane nu amaa yɛanwu kɛzi ɔbamaa yɛali nyane la.—1 Pita 4:4.

¹⁴ Bɛtetele kpavolɛ bie mɔɔ bɛfɛlɛ ye Gener mɔɔ ɔvi Asia la wɔ nɔhalɛ ne anu. Ɔlile ɛvolɛ 12 la yɛɛ bɛzɔnenle ye a. Noko mekɛ mɔɔ ɔ nye ɛlɛfi la, bɛbɛlɛbɛlale ye bɛmanle ɔvale ɔ nwo ɔwulale ewiade ɛbɛlabɔlɛ nu, na ɛnee ɔ nye la kɛ ɔbanyia fanwodi. Gener bɔle ɔ bo bɔle adalɛ na ɔyɛle ninyɛne bie mɔ ɔveale ye abusua ne. Ɔnyianle ɛvolɛ 15 la, ɔzukoale ɔ gɔnwo mɔ, ɔnlonle nza dɔɔnwo na ɛnee ye ɛdendɛlɛ ɛnyɛ fɛ. Ɛnee Gener kɔdi kɔmputa zo nwɔhoa nee nwɔhoa gyɛne mɔɔ basabasayɛlɛ wɔ nu la, yemɔti ɔmba sua nu ndɛ. Nzinlii, ɔnwunle kɛ ninyɛne mɔɔ ɔlɛyɛ la ɛmmaa ɔ nye ɛnlie, na ɔnnyia ɛhwee ɔnvi nu. Kɛkala, yezia yera nɔhalɛ ne anu. Ɔka kɛ, ɔvi mekɛ mɔɔ kɔ mekɛ la, ewiade ne sɔ ye nea, noko nyilalɛ mɔɔ Gyihova ɛmaa yenyia la hyia ye tɛla debie biala.

15. Duzu a ɔwɔ kɛ yɛ kɔsɔɔti, saa yɛ awovolɛ le Keleseɛnema anzɛɛ bɛnle Keleseɛnema a, yɛsuzu nwo a?

¹⁵ Saa wɔ awovolɛ ɛnle nɔhalɛ ne anu bɔbɔ a, wɔmɔ suzu nwolɛ adenle mɔɔ sonle bolɛ mɔɔ wɔnyia ye wɔnwu wɔ Bɔvolɛ ne na ɛlɛsonle ye la anwo nea! Menli mgbe mgbe dɔɔnwo a wɔ ewiade a, noko Gyihova ɛmaa wɔnwu ye. Nyilalɛ boni a tɛla ɛhye a! (Dwɔn 6:44, 45) Ɔnva nwo adenle mɔɔ yɛluale zo yɛnwunle nɔhalɛ ne la, yɛ nye bahola alie nwolɛ. (Bɛgenga 1 Kɔlentema 2:12.) Gener ka kɛ: “Medame zɛhae ala Gyihova, anwuma nee aze Bɔvolɛ ne ɛnwu me?” (Edwɛndolɛ 8:4) Adiema raalɛ ko ka kɛ: “Saa kilehilevolɛ ze sukulu ngakula a, bɛ ti anu yɛ bɛ fɛ. Yemɔti, nea nwolɛ adenle mɔɔ yɛnyia kɛ Gyihova, Kilehilevolɛ Kpole ne ze yɛ a!”

16. Kpɔkɛ mɔɔ nrɛlɛbɛ wɔ nu la boni a Keleseɛne ngakula bahola azi a?

¹⁶ Maa wɔ sunsum nu agyadeɛ ne mɔɔ sonle bolɛ la anwo ɛhyia wɔ na fa yɛ wɔ bodane kɛ ɛbazonle Gyihova. Sukoa tete amra mɔɔ bɛlile nɔhalɛ la neazo ne. Mmasukoa ewiade ngakula mɔɔ bɛlɛsɛkye bɛ nwo na bɛnlɛ anyelazo la.—2 Kɔlentema 4:3, 4.

17-19. Duzu ati a nrɛlɛbɛ wɔ nu kɛ ɛbayɛ ngakyile wɔ ewiade ne anwo ɛ?

¹⁷ Nɔhalɛ nu, ɔnla aze kɛ yɛbayɛ ngakyile wɔ ewiade ɛhye anu. Noko yemɔ a le kpalɛ a. Fa awie mɔɔ ɔlɛkɔ yeahɔzu ɛnriandilɛ bie la kɛ neazo. Saa ɔbafɛta a, ɔwɔ kɛ ɔyɛ ngakyile wɔ ɔ tipɛnema anwo. Ɔtwe ɔ nwo ɔfi ninyɛne dɔɔnwo mɔɔ balie ye mekɛ na yeahwehwe ye adwenle la anwo. Ɔlɛ ɛhulolɛ kɛ ɔbayɛ ngakyile amaa yeahola yeatete ɔ nwo na yeadwu ye bodane ne anwo.

¹⁸ Menli dɔɔnwo ɛndwenle mɔɔ bɛ nyɛleɛ ɛtane bava ara la anwo, noko Gyihova azonvolɛ dwenle nwo. Saa yɛyɛ ngakyile na yɛkoati ninyɛne le kɛ ɛbɛlatane ɛbɔlɛ mɔɔ bahola azɛkye agɔnwolɛvalɛ mɔɔ yɛ nee Gyihova lɛ la a, yɛ sa baha “ngoane ne mɔɔ le nɔhalɛ ngoane ne la.” (1 Temɔte 6:19) Adiema raalɛ ne mɔɔ yɛhanle ɔ nwo edwɛkɛ la ka kɛ: “Saa ɛda diedi ali a, ɛbanwu kɛ wɔyɛ deɛ kpalɛ. Ɔbahile kɛ wɔnyia anwosesebɛ wɔho wɔtia Seetan ewiade ne. Mɔɔ tɛla ɔ muala la, ɔbayɛ kɛ asɛɛ wɔnwu Gyihova Nyamenle na ɔlɛfa anyelielɛ yeaha kɛ ɔ nye die ɛ nwo la! Yemɔ maa ɛ nye die ɔluakɛ wɔanyɛ kɛ ɛ gɔnwo mɔ la!”

¹⁹ Mmadwenle mɔɔ ɛbanyia ye ɛnɛ la angome anwo ɛfa ɛsɛkye ɛ nwo. (Nolobɔvo ne 9:2, 10) Ɛze deɛmɔti ɛwɔ ewiade nee nwolɛ adenle mɔɔ ɛlɛ ye kɛ ɛbadɛnla aze dahuu la. Ɛhye baboa wɔ yeamaa wɔazi kpɔkɛ kpalɛ na wɔali edwɛkɛ ɛhye azo, ‘bɛmmabɔ bɛ ɛbɛla kɛ maanle maanle ne anu amra la.’ Ɛze mɔɔ ɔwɔ kɛ ɛyɛ a.—Ɛfɛsɛsema 4:17; Malakae 3:18.

20, 21. Saa yɛsi kpɔkɛ kpalɛ a, duzu a yɛbanyia ye kenlebie a? Noko duzu a Gyihova kpondɛ kɛ yɛyɛ a?

²⁰ Saa yɛsi kpɔkɛ kpalɛ a, yɛ nye bahola alie wɔ ewiade ɛhye anu na yɛanyia dahuu ngoane wɔ Nyamenle ewiade fofolɛ ne noko anu. Nyilalɛ mɔɔ yɛ nye ɛnla la yɛɛ Gyihova bava amaa yɛ a. (Mateyu 5:5; 19:29; 25:34) Noko akee, tɛ menli ne amuala a bɛanyia nyilalɛ ɛhye bie a. Ɔkpondɛ kɛ yɛdi ye edwɛkɛ zo. (Bɛgenga 1 Dwɔn 5:3, 4.) Noko, ɔfɛta kɛ yɛbɔ mɔdenle yɛsonle Gyihova wɔ nɔhalɛlilɛ nu!

²¹ Gyihova ɛmaa yɛ ninyɛne dɔɔnwo. Yɛlɛ ye Edwɛkɛ ne anu ndelebɛbo mɔɔ di munli yɛɛ yɛte nɔhalɛ ne nee ye bodane ne mɔ abo. Kɛmɔ yɛle Gyihova Alasevolɛ la ati, ye duma la yɛ nwo zo. Nyamenle ɛbɔ yɛ ɛwɔkɛ kɛ ɔwɔ yɛ afoa kɛ ɔboa yɛ. (Edwɛndolɛ 118:7) Ɔrɛla ye kɛ yɛ kɔsɔɔti, ngakula nee mgbanyinli, yɛbahile yɛ sunsum nu agyadeɛ ne anwo anyezɔlɛ amaa ‘anyunlunyia aha Gyihova dahuu!’—Wulomuma 11:33-36; Edwɛndolɛ 33:12.