GUY HOLLIS PIERCE, mɔɔ boka Gyihova Alasevolɛ Neazo Eku ne anwo la wiele ye azɛlɛ ye azo gyima ne wɔ Dwɛkɛ, March 18, 2014, ɔlile ɛvolɛ 79. Ɔboka Kelaese amediema ne mɔ anwo yemɔti bɛdwazo ye bɛmaa yenyia ye anwuma ahatualɛ ne.—Hibuluma 2:10-12; 1 Pita 3:18.

Bɛwole Guy Pierce wɔ Auburn, California, U.S.A., wɔ November 6, 1934, yɛɛ bɛzɔnenle ye wɔ ɛvolɛ 1955. Ɔgyale Penny wɔ 1977 na bɛwole ngakula. Ɛnee menli dɔɔnwo noko bu ye kɛ ɔle bɛ ze. Ɔ nee Penny bɔle adekpakyelɛ bo wɔ 1982. Ɔbɔle ɔ bo ɔzonlenle kɛ maangyebakyi zo neavolɛ wɔ 1986 wɔ United States, ɔyɛle ye ɛvolɛ 11.

Wɔ 1997, Guy nee Penny Pierce hɔzonlenle wɔ United States Bɛtɛle. Adiema Pierce yɛle gyima wɔ Ɛzonlenlɛ Nwo Gyimalilɛleka ne, bɛkpale ye kɛ Neazo Eku ne Gyimayɛvoma Kɔmatii ne boavolɛ wɔ 1998. Wɔ October 2, 1999 ɛvolɛ ayia ne abo, bɛvale bɛdole gua kɛ bɛkpa ye bɛboka Neazo Eku ne anwo. Ɔ nee Gyimayɛvoma, Mbulukuhɛlɛlɛ, Mbulukuyɛlɛ, nee Ngitanwodivoma kɔmatii ne mɔ ɛyɛ gyima.

Ɛnee adiema Pierce kulo ɛzelekɛ na ɔ nwo yɛ anyelielɛ. Menli mɔɔ vi maanle ngakyile nu mɔɔ asolo bɛ amaamuo bɔbɔ la kola wole ye. Noko ninyɛne mɔɔ ɛnee maa menli kulo ye edwɛkɛ kpalɛ la a le kɛ ɔlɛ ɛlɔlɛ, ɔbɛlɛ ɔ nwo aze, ɔkulo Nyamenle mɛla nee ye ngyinlazo, yɛɛ ɔlɛ diedi kpole wɔ Gyihova anu. Ɛnee Guy Pierce ta ka kɛ ɔbahola yeara ye kɛ debie bie ati sɛnzɛne ne ɛnrɛvinde noko Gyihova ɛwɔkɛ biala bara nu, na ɛhye yɛɛ ɛnee ɔkulo kɛ aleɛabo amra amuala nwu ye a.

Adiema Pierce yɛle gyima ɛsesebɛ manle Gyihova, ɔbɔ ɔ bo nwonlomɔ a ɔngyakyi toonwo aleɛ dwo. Ɔkpɔsale maanle ngakyile zo ɔmanle ɔ mediema Keleseɛnema anwosesebɛ, na ɔnyianle mekɛ ɔmanle awie biala mɔɔ hyianle ɔ nwo anzɛɛ ye moalɛ la. Ɛnɛ nee ɛnɛ ala, mediema kakye ye ɛyɛvolɛlielɛ, agɔnwolɛvalɛ, nee Ngɛlɛlera ne anu moalɛ mɔɔ ɔvale ɔmanle la.

Yɛ diema nee yɛ gɔnwo ne aye, ɔ mra nsia ne, ye nlɔnra, ye angabɛnzo nee ye sunsum nu mralɛ anwo balɔ ye. Mark Sanderson mɔɔ ɔdaye noko ɔboka Neazo Eku ne anwo la, manle Adiema Pierce ɛzɛne ɛdendɛlɛ ne wɔ Brooklyn Bɛtɛle ɛkɛ wɔ Folɛ, March 22, 2014. Ɔhanle Adiema Pierce anwuma anyelazo ne anwo edwɛkɛ na ɔgengale Gyisɛse edwɛkɛ ɛhye: “Egya awuke nu ɛkɛ ne azua ngome; . . . Saa mekɔ na mesiezie ɛleka memaa bɛ a, mebara bieko na mearava bɛ meahɔ me nwo lɔ, amaa bɛadɛnla ɛleka mɔɔ mewɔ la. Bɛdabɛ bɛze adenle ne.”—Dwɔn 14:2-4.

Yɛ nwo balɔ Adiema Pierce kpole kpalɛ. Noko ɔyɛ yɛ fɛ kɛ ɛnee ‘ɔze adenle ne’ mɔɔ kɔ ɛleka mɔɔ ɔbadɛnla ye dahuu la.