1, 2. Kɛzi Gyisɛse manle ye ɛdoavolɛ ne mɔ anwosesebɛ wɔ ye ewudwazo ne anzi ɛ?

ƐNEE Gyisɛse ɛdoavolɛma ne anu nwiɔ ɛlɛkɔ namule bie mɔɔ ɛvi Gyɛlusalɛm mɔɔ kɔ ɛkɛ la ɔbayɛ mayɛlɛ nsuu la azo. Ɛnee bɛlɛdi nyane ɔboalekɛ Gyisɛse ɛwu na bɛnze kɛ bɛdwazo ye. Arɛlevilɛ nu ala, Gyisɛse vindele bɛ nwo ɛkɛ na ɔ nee bɛ luale nwo hɔle. Akee “Gyisɛse bɔle ɔ bo vile Mosisi mbuluku ne mɔ nee mɔɔ Nyamenle kpɔmanvolɛma ɛha na bɛhɛlɛ wɔ Nyamenle Edwɛkɛ ne anu wɔ ɔ nwo la azo na ɔhilehilele nu ɔhilele bɛ.” (Luku 24:13-15, 27) Bɛ rɛle kyekyele na ɔyɛle kɛ asɛɛ bɛwuda senle wɔ bɛ ahonle nu la, ɔluakɛ ‘ɔhilehilele’ Ngɛlɛlera ne anu ɔhilele bɛ.—Luku 24:32.

² Ye nɔsolɛ nu, ɛdoavolɛ nwiɔ ɛhye ziale hɔle Gyɛlusalɛm. Mɔɔ bɛnwunle ɛzoanvolɛ ne mɔ la, bɛhanle mɔɔ ɛzi la bɛhilele bɛ. Mɔɔ bɛ nloa wɔ zo bɛlɛtendɛ la, Gyisɛse yele ɔ nwo hilele bɛ muala. Ɛzoanvolɛ ne mɔ ahonle dule na bɛzule kpolera kɛ tɛ Gyisɛse ɔ. Baebolo ne maa yɛnwu kɛzi ɔmanle bɛ anwosesebɛ la, ɔse: “Ɔbukele bɛ adwenle ɔmanle bɛdele Nyamenle Edwɛkɛ ne abo.”—Luku 24:45.

3. Duzu ati a yɛ sa nu bahola ado wɔ Gyihova ɛzonlenlɛ nu a, na kɛ ɔkɛyɛ na yɛ nye alie ɛ?

 ³ Ɔdwu mekɛ ne bie a yɛ rɛle bahola abɔ kɛ zɔhane ɛdoavolɛ ne mɔ la. Yɛlɛsonle Gyihova noko saa menli ɛndie edwɛkɛ ne a ɔbahola yeamaa yɛ sa nu ado. (1 Kɔlentema 15:58) Anzɛɛ bie a yɛbade nganeɛ kɛ yɛ Baebolo sukoavoma ɛnnyia anyuhɔlɛ. Bie mɔ bɔbɔ bahola akpo Gyihova. Kɛ ɔkɛyɛ na yɛ nye alie wɔ yɛ ɛzonlenlɛ gyima ne anu ɛ? Debie mɔɔ ɔbaboa yɛ la a le kɛ yɛbade Gyisɛse mrɛlɛ ne mɔ abo kpalɛ. Akee yɛbazuzu nuhua nsa nee mɔɔ yɛsukoa yɛfi nuhua la anwo.

4. Duzu a Gyisɛse ɛrɛlɛ ne mɔɔ fane nrenya ne mɔɔ guale ma ne na ɔhɔlale anwo la kile a?

⁴ Bɛgenga Maake 4:26-29. Duzu a Gyisɛse ɛrɛlɛ ne mɔɔ fane nrenya ne mɔɔ guale ma ne na ɔhɔlale anwo la kile a? Nrenya ne mɔɔ guale ma ne la gyi ɛkɛ maa Belemgbunlililɛ nolobɔlɛma yɛɛ ma ne gyi ɛkɛ maa edwɛkɛ ne mɔɔ yɛka yɛkile ahonlekpalɛma la. Nrenya ne mɔɔ guale ma ne la yɛle debie mɔɔ awie biala yɛ bie la, ‘aledwolɛ nu ɛnee yela, aleɛ kye a ɛnee yedwazo.’ Ɔdie mekɛ na ma anyi, ɔvi kenle mɔɔ bɛkɛlua la ɔkɔkpula ɛbuhenle ne. Wɔ mekɛ ɛhye anu ‘ma ne mɔɔ yegua la fifi na ɔnyi.’ Ɔnze ‘kɛzi bɛyɛ bɛnyi la,’ ɔkɔ zo ngyikyingyikyi. Zɔhane ala a ɔdie mekɛ na awie anyi sunsum nu anzɛɛ yeayɛ Gyihova agɔnwo a. Saa ɔnyia anyuhɔlɛ na ɔsi kpɔkɛ kɛ ɔsonle Nyamenle a ‘ɔso ma,’ ɔyila ɔ nwo zo ɔmaa Gyihova na ɔmaa bɛsɔne ye.

5. Duzu ati a Gyisɛse bule nrenya ne mɔɔ guale ma ne na ɔhɔlale la anwo ɛrɛlɛ ne ɛ?

⁵ Duzu ati a Gyisɛse bule ɛrɛlɛ ɛhye ɛ? Ɛnee Gyisɛse kulo kɛ yɛte ɔ bo kɛ Gyihova a maa nɔhalɛ ne nyi wɔ menli mɔɔ “ɔwɔ kɛ Nyamenle maa bɛ ngoane” la ahonle nu a. (Gyima ne 13:48; 1 Kɔlentema 3:7) Yɛdua ma ne na yɛgugua zolɛ nzule, noko yɛngola yɛmmaa ɔnnyi. Kɛmɔ yɛnwunle ye wɔ ɛrɛlɛ ne anu la, yɛnze kɛzi ɔnyi la. Saa Belemgbunlililɛ ma ne ɛlɛnyi wɔ awie ahonle nu a yɛnnwu ye. Noko, saa mekɛ gua nu a, ɔso ma, ɛdoavolɛ fofolɛ ne nee yɛ kɔ daselɛlilɛ.—Dwɔn 4:36-38.

6. Duzu a ɔwɔ kɛ yɛnwu ye wɔ Baebolo sukoavo bie anyuhɔlɛ nwo a?

 ⁶ Duzu a yɛsukoa ye wɔ ɛrɛlɛ ɛhye anu a? Mɔɔ lumua, ɔwɔ kɛ yɛdie yɛto nu kɛ yɛnrɛhola yɛnrɛyɛ kɛzi ɔwɔ kɛ Baebolo sukoavo bie nyia anyuhɔlɛ la anwo ɛhwee. Yɛbahola yeabɔ mɔdenle yɛaboa ye, noko yɛnrɛhola yɛnrɛtinlitinli ɔ nwo zo kɛ ɔzɔne. Emomu, yɛdie yɛto nu kɛ ɔdaye a ɔkola ɔsi kpɔkɛ kɛ ɔbayila ɔ nwo zo yeamaa Nyamenle a. Saa yɛkulo Gyihova amgba na yɛyila yɛ nwo zo yɛmaa ye a, yɛɛ ɔdie ɔto nu a.—Edwɛndolɛ 51:12; 54:6; 110:3.

7, 8. (a) Ɛzukoalɛdeɛ boni bieko a wɔ Gyisɛse ɛrɛlɛ ne mɔɔ fane nrenya ne mɔɔ guale ma ne na ɔhɔlale anwo la anu a? Maa neazo. (b) Duzu a ɛhye maa yɛnwu ye wɔ Gyihova nee Gyisɛse anwo a?

⁷ Mɔɔ tɔ zo nwiɔ, saa yɛte ɛrɛlɛ ɛhye abo na yɛ edwɛkɛhanlɛ ne anzo ma ɛkɛ ne ala a, yɛ sa nu ɛnrɛdo. Ɔhyia kɛ yɛnyia abotane. (Gyemise 5:7, 8) Saa yɛyɛ yɛ afoa nu ɛdeɛ yɛboa sukoavo ne na nɔhalɛ ne annyi wɔ ye ahonle nu a, ɔngile kɛ yɛnle kilehilevolɛma kpalɛ. Awie mɔɔ bɛlɛ ɔ nwo aze na ɔlɛ ɛhulolɛ kɛ ɔbayɛ nzenzaleɛ la, yɛɛ Gyihova maa nɔhalɛ ne nyi wɔ ye ahonle nu a. (Mateyu 13:23) Yemɔti, tɛ menli dodo mɔɔ yɛbaboa bɛ yɛamaa bɛazɔne la a kile kɛ yɛbɔ mɔdenle wɔ daselɛlilɛ nu a. Gyihova ɛngyinla menli dodo mɔɔ tie yɛ la azo na yeabu yɛ kɛ yɛbɔ mɔdenle wɔ daselɛlilɛ nu. Emomu, ɔ nye die yɛ mɔdenlebɔlɛ nwo.—Bɛgenga Luku 10:17-20; 1 Kɔlentema 3:8.

⁸ Mɔɔ tɔ zo nsa, yɛnrɛhola yɛnrɛnwu nzenzaleɛ mɔɔ ɛlɛkɔ zo wɔ awie ahonle nu la. Kɛ neazo la, ɛnee agyalɛma bie mɔɔ bɛ nee edwɛkpatɛlɛvolɛ bie sukoa la kulo kɛ bɛkɔ daselɛlilɛ. Ɔmanle bɛnwunle kɛ ɔwɔ kɛ bɛgyakyi sigalɛte ɛnlonlɛ. Ɔyɛle ye azibɛnwo kɛ bɛhanle kɛ bɛgyakyi ye dɛbadɛba la. Bɛnwunle kɛ saa bɔbɔ bɛno bɛfea a, Gyihova banwu ye yɛɛ ɔkyi nabalaba. Yemɔti, bɛzile kpɔkɛ kɛ bɛbanlo sigalɛte ne wɔ edwɛkpatɛlɛvolɛ ne anyunlu anzɛɛ bɛnrɛnlo ye fee. Ɛnee edwɛkpatɛlɛvolɛ ne ɛnze nzenzaleɛ ne mɔɔ agyalɛma ne ɛyɛ la anwo ɛhwee, noko Gyihova anwo ɛlɔlɛ manle bɛzile kpɔkɛ kpalɛ.

9. Duzu a Gyisɛse avonle ne anwo ɛrɛlɛ ne kile a?

⁹ Bɛgenga Mateyu 13:47-50. Duzu a Gyisɛse ɛrɛlɛ ne mɔɔ fane avonle ne anwo la kile a? Gyisɛse hanle kɛ Belemgbunlililɛ ne anwo edwɛkɛ ne le kɛ avonle bie mɔɔ bɛdo ye nyevile nu la. Kɛmɔ bɛto avonle a ɔkye “fɛlɛ ngakyile dɔɔnwo” la, zɔhane ala a menli dɔɔnwo anye die yɛ edwɛkɛhanlɛ gyima ne anwo a. (Ayezaya 60:5) Menli dɔɔnwo mɔɔ bɛba yɛ nyianu ne mɔ nee  yɛ Ngakyelɛlilɛ ne abo la di ɛhye anwo daselɛ. Bɛ nuhua bie mɔ le kɛ fɛlɛ “kpalɛ ne,” yemɔti bɛbaboka Keleseɛne asafo ne anwo. Bie mɔ noko le kɛ fɛlɛ mɔɔ “anwo ɛngyia” la, yemɔti Gyihova ɛnlie bɛ ɛndo nu.

10. Duzu ati a Gyisɛse bule avonle ne anwo ɛrɛlɛ ne ɛ?

¹⁰ Duzu ati a Gyisɛse bule ɛrɛlɛ ɛhye ɛ? Fɛlɛ ne mɔɔ bɛkpale nu wɔ ɛrɛlɛ ne anu la ɛngile ndɛnebualɛ mɔɔ li awieleɛ wɔ anwongyelelɛ kpole ne anu la. Emomu, ɔkile debie mɔɔ ɛlɛkɔ zo wɔ awieleɛ mekɛ ye anu la. Gyisɛse manle ɔlale ali kɛ tɛ awie biala mɔɔ ɔ nye die Belemgbunlililɛ edwɛkɛ ne anwo la a bahulo kɛ ɔbazonle Gyihova a. Menli mɔɔ yɛ nee bɛ sukoa Baebolo ne anzɛɛ bɛba debiezukoalɛ la anu dɔɔnwo ɛnrɛhulo kɛ bɛbayila bɛ nwo zo bɛamaa Gyihova. (1 Arelemgbunli 18:21) Bie mɔ bɔbɔ ɛgyakyi debiezukoalɛ ɛralɛ. Ngakula bie mɔ wɔ ɛkɛ mɔɔ awovolɛ mɔɔ bɛle Keleseɛnema la a tetele bɛ a noko bɛngulo kɛ bɛsonle Gyihova. Gyisɛse hanle ye fane dɔɔnwo kɛ ɛhye le bɛtianwo kpɔkɛzilɛ. Saa yɛsi kpɔkɛ kpalɛ a, Gyihova babu yɛ kɛ yɛle “anwonyia.”—Hagae 2:7.

11, 12. (a) Kɛ ɔkɛyɛ na yɛanyia avonle ne anwo ɛrɛlɛ ne azo nvasoɛ ɛ? (b) Duzu a ɛhye maa yɛnwu ye wɔ Gyihova nee Gyisɛse anwo a?

¹¹ Kɛ ɔkɛyɛ na yɛanyia avonle ne anwo ɛrɛlɛ ne azo nvasoɛ ɛ? Saa yɛte ɛrɛlɛ ɛhye abo kpalɛ a yɛ sa nu ɛnrɛdo wɔ mekɛ mɔɔ yɛ ra anzɛɛ yɛ Baebolo sukoavo bie ɛngulo kɛ ɔkɛzonle Gyihova la. Bie a ɛnee yɛbɔ mɔdenle kpalɛ yɛtete ye. Saa awie kponle Baebolo ɛzukoalɛ zo anzɛɛ bɛtete ye wɔ nɔhalɛ ne anu a, ɛnee ɔngile kɛ adenle biala azo ɔbayɛ adiema. Saa yeanlie Gyihova tumi ne yeando nu a, ɔnrɛhola ɔnrɛboka Nyamenle azonvolɛ ne mɔ anwo.

¹² Asoo ɛhye kile kɛ bɛdabɛ mɔɔ bɛvi nɔhalɛ ne anu la ɛnrɛhola ɛnrɛra asafo ne anu bieko ɔ? Anzɛɛ anyelazo biala ɛnle ɛkɛ ɛmmaa awie mɔɔ ɔtɛyilale ɔ nwo zo ɔtɛmanle Gyihova la ɔ? Kyɛkyɛ, menli kɔsɔɔti lɛ adenle kɛ bɛ nee Gyihova banyia agɔnwolɛvalɛ kolaa na anwongyelelɛ kpole ne abɔ ɔ bo. Gyihova se:  “Bɛzia bɛrɛla me ɛkɛ ne, na medame noko menwɔra bɛ nwo ɛkɛ.” (Malakae 3:7) Bɛzi ɛhye azo wɔ kakula ɛkobɔfo ne anwo ɛrɛlɛ ne mɔɔ Gyisɛse bule la anu.—Bɛgenga Luke 15:11-32.

13. Duzu a kakula ɛkobɔfo ne anwo ɛrɛlɛ ne kile a?

¹³ Duzu a Gyisɛse ɛrɛlɛ ne mɔɔ fane kakula ɛkobɔfo ne anwo la kile a? Selɛ ne mɔɔ se anwunvɔne mɔɔ wɔ ɛrɛlɛ ne anu la gyi ɛkɛ maa Gyihova, yɛ anwuma Selɛ ne. Kakula ne mɔɔ bɔle ɛbɛlatane ne na ɔzɛkyele ye agyadeɛ ne la gyi ɛkɛ maa menli mɔɔ fi Keleseɛne asafo ne anu la. Bɛkɔ Seetan ewiade ne mɔɔ le kɛ “maanle” bie mɔɔ ɛde ɔ nwo ɛvi Gyihova anwo la anu. (Ɛfɛsɛsema 4:18; Kɔlɔsaema 1:21) Mekɛ gua nu a, bɛ nuhua bie mɔ nwu kɛ bɛvo kpole na bɛsia bɛba Gyihova ɛkɛ. Ɛhye ɛyɛlɛ ɛnla aze, noko kɛmɔ bɛbɛlɛ bɛ nwo aze na bɛnlu bɛ nwo nɔhalɛ nu la ati, Gyihova fa kyɛ bɛ na ɔdie bɛ kɛnlɛma.—Ayezaya 44:22; 1 Pita 2:25.

14. Duzu ati a Gyisɛse bule kakula ɛkobɔfo ne anwo ɛrɛlɛ ne ɛ?

¹⁴ Duzu ati a Gyisɛse bule ɛrɛlɛ ɛhye ɛ? Gyisɛse hilele kɛ Gyihova kulo kɛ menli mɔɔ ɛvi Ɔ nwo la sia ba. Ɛnee selɛ ne mɔɔ wɔ ɛrɛlɛ ne anu la lɛ anyelazo kɛ ɔ ra ne bazia ara. Mɔɔ ɔnwunle ɔ ra ne wɔ “moa moa lɔ” kɛ ɔlɛba la, ɔnriandile ɔhɔyiale ye. Ɛnee selɛ ne kulo kɛ ɔ ra ne nwu ye kɛ ɔyɛ ye fɛ kɛ yezia yera la. Ɔwɔ kɛ ɛrɛlɛ ɛhye maa menli mɔɔ bɛvi nɔhalɛ ne anu la anwosesebɛ na bɛsia bɛba Gyihova ɛkɛ ndɛndɛ. Bie a bɛ nee ye avinli ɛzɛkye, nyiane ɛdɔ bɛ nye zo, yɛɛ ɔyɛ se kɛ bɛbara, noko kyesɛ bɛbɔ nwolɛ mɔdenle! Saa bɛsia bɛba a, Gyihova, Gyisɛse, yɛɛ anwumabɔvolɛ ne mɔ bali fɛlɛko.—Luku 15:7.

15, 16. (a) Ɛzukoalɛdeɛ boni a wɔ Gyisɛse ɛrɛlɛ ne mɔɔ fane kakula ɛkobɔfo ne anwo la anu a? Maa neazo. (b) Duzu a ɛhye maa yɛnwu ye wɔ Gyihova nee Gyisɛse anwo a?

 ¹⁵ Kɛ ɔkɛyɛ na yɛanyia kakula ɛkobɔfo ne anwo ɛrɛlɛ ne azo nvasoɛ ɛ? Ɔwɔ kɛ yɛsukoa Gyihova na yɛda ɛlɔlɛ ali. Saa awie sia ba asafo ne anu a, ɔnle kɛ yɛyɛ yɛ nwo tenlenema “somasoma” mɔɔ yɛnlie ye kɛnlɛma a. Ɛhye kola sɛkye agɔnwolɛvalɛ mɔɔ yɛ nee Gyihova lɛ la. (Nolobɔvo ne 7:16) Ɛzukoalɛdeɛ bieko a le kɛ ɔwɔ kɛ yɛbu awie mɔɔ ɛvi asafo ne anu la kɛ ‘boane mɔɔ ɛminli’ mɔɔ ɔkola ɔsia ɔba sua nu la. (Edwɛndolɛ 119:176) Saa yɛnwu awie mɔɔ ɛvi asafo ne anu la a, duzu a yɛbahola yɛayɛ yɛaboa ye na yeara a? Asoo yɛbabɔ mgbanyima ne mɔ amaneɛ ndɛndɛ amaa bɛaboa ye ɔ? Saa yɛte Gyisɛse ɛrɛlɛ ne abo na yɛfa yɛyɛ gyima a yɛbayɛ ye zɔ.

¹⁶ Menli mɔɔ sia ba la anye die Gyihova anwunvɔnezelɛ, ye ɛlɔlɛ, nee moalɛ mɔɔ asafo ne fa maa bɛ la anwo kpalɛ. Adiema bie mɔɔ bɛdule ye ɛvolɛ 25 la ka kɛ: “Kɛmɔ Gyihova ɛva me ‘ɛtane ne mɔ amuala’ ɛhyɛ me la ati, ɔvi mekɛ mɔɔ bɛliele me la dahuu me nye die kpole. (Gyima ne 3:19) Mediema boa me na bɛda ɛlɔlɛ ali bɛkile me! Kɛkala menyia sunsum nu abusua kɛnlɛma.” Adiema bɛlɛra ko mɔɔ bɛdule ye la ye ɛvolɛ nnu anzi yɛɛ bɛliele ye la ka kɛ: “Ɛlɔlɛ mɔɔ Gyisɛse hanle nwolɛ edwɛkɛ mɔɔ mediema lale ye ali hilele me la yɛ azibɛnwo, menrɛhola menrɛha kɛzi mete nganeɛ wɔ nwo la anwo edwɛkɛ. Gyihova ahyehyɛdeɛ ne mɔɔ mewɔ nu la sonle bolɛ tɛla debie biala!”

17, 18. (a) Ɛzukoalɛdeɛ boni a wɔ mrɛlɛ nsa ɛhye mɔ anu a? (b) Duzu a yɛbɔ kpɔkɛ kɛ yɛbayɛ a?

¹⁷ Duzu a yɛzukoa ye wɔ mrɛlɛ nsa ɛhye mɔ anu a? Mɔɔ lumua, ɔwɔ kɛ yɛte ɔ bo kɛ yɛnlɛ tumi wɔ kɛzi ɔwɔ kɛ Baebolo sukoavo bie nyia anyuhɔlɛ wɔ nɔhalɛ ne anu la anwo. Gyihova a lɛ zolɛ tumi a. Mɔɔ tɔ zo nwiɔ, ɔnle kɛ yɛ nye da kɛ menli mɔɔ ba debiezukoalɛ nee bɛdabɛ mɔɔ yɛ nee bɛ sukoa la amuala bazonle Gyihova. Mɔɔ li awieleɛ, bie mɔ bavi asafo ne anu ɛdeɛ, noko ɔwɔ kɛ yɛnyia diedi kɛ bɛbazia bɛara. Saa bɛsia bɛba a, bɛmaa yɛzukoa Gyihova ɛlɔlɛ ne na yɛlie bɛ kɛnlɛma.

¹⁸ Bɛmaa yɛhɔ zo yɛkpondɛ adwenlenubukelɛ, ndelebɛbo, nee nrɛlɛbɛ. Saa ɛlɛkenga Gyisɛse mrɛlɛ ne mɔ a, biza ɛ nwo kɛ: ‘Duzu a ɛrɛlɛ ɛhye kile a? Kɛmɔti a bɛhɛlɛle ye wɔ Baebolo ne anu ɛ? Kɛ ɔkɛyɛ na meava ɛzukoalɛdeɛ mɔɔ wɔ nu la meali gyima ɛ? Duzu a ɔmaa menwu ye wɔ Gyihova nee Gyisɛse anwo a?’ Saa yɛyɛ ye zɔ a, yɛbade Gyisɛse edwɛkɛ ne abo.