1, 2. (a) Kɛ ɔkɛyɛ na yɛanyia dahuu ngoane ɛ? (b) Duzu a baboa yɛ na yɛanlea yɛ nyunlu fɔɔnwo wɔ yɛ adendulɛ ne anu a?

YƐ KELESEƐNE ɛbɛlabɔlɛ ne le kɛ adendulɛ la. Saa yɛdi nɔhalɛ yɛmaa Nyamenle a, yɛbawie yɛ adendulɛ ne na yɛanyia dahuu ngoane. Gyisɛse hanle kɛ: “Sonla mɔɔ kɛgyinla kpundii kɛhɔ awieleɛ la banyia ngoane mɔɔ ɛnlɛ awieleɛ.” (Mateyu 24:13) Nɔhalɛ nu, saa yɛbahola yɛawie yɛ adendulɛ ne a, ɔwɔ kɛ yɛdi nɔhalɛ yɛmaa Nyamenle yɛkɔ “awieleɛ,” yɛ ngoane mekɛ awieleɛ anzɛɛ ewiade ɛhye awieleɛ. Noko akee, ɔwɔ kɛ yɛnea boɛ amaa ewiade ne andwehwe yɛ adwenle. (1 Dwɔn 2:15-17) Kɛ ɔkɛyɛ na yɛanlea yɛ nyunlu fɔɔnwo wɔ yɛ adendulɛ ɛhye anu ɛ?

² Gyisɛse yɛle neazo kɛnlɛma manle yɛ. Saa yɛsukoa mɔɔ Baebolo ne ka ye wɔ Gyisɛse adendulɛ ne, anzɛɛ ye ɛbɛlabɔlɛ nwo la a, yɛbahola yɛanwu kɛzi ɔde la. Na yɛbahulo ye na yɛanyia diedi wɔ ye nu. (Kenga 1 Pita 1:8, 9.) Ɛzoanvolɛ Pita hanle kɛ Gyisɛse yɛle neazo manle yɛ kɛ  yɛva ɔ gyakɛ. (1 Pita 2:21) Na saa yɛsukoa Gyisɛse neazo ne kpalɛ a, yɛbahola yɛagyinla yɛahɔ awieleɛ. * Wɔ edwɛkɛ ne mɔɔ lumua la anu, yɛnwunle kɛzi yɛbahola yɛazukoa Gyisɛse mɛlɛbɛnwoaze nee ahunlunyele ne la. Wɔ edwɛkɛ ɛhye anu, yɛbanwu kɛzi yɛbazukoa ye akɛnrasesebɛ nee ye nwunu ne la.

3. Akɛnrasesebɛ a le duzu, na kɛzi yɛnyia ye ɛ?

³ Akɛnrasesebɛ a le anwosesebɛ mɔɔ yɛnyia yɛgyinla kpundii wɔ ngyegyelɛ nu la. Akɛnrasesebɛ boa yɛ maa yɛgyinla mɔɔ le kpalɛ la anzi. Ɔkola ɔboa yɛ ɔmaa yɛsi abotane na yɛdi nɔhalɛ yɛmaa Nyamenle wɔ sɔnea nu. Akɛnrasesebɛ nee ɛzulolɛ, anyelazo yɛɛ ɛlɔlɛ a lua a. Adenle boni azo? Saa yɛsulo kɛ yɛbayɛ debie mɔɔ ɛnzɔ Nyamenle anye a, sonla nwo ɛzulolɛ ɛnrɛgyegye yɛ. (1 Samoɛle 11:7; Mrɛlɛbulɛ 29:25) Gyihova anu anyelazo maa yɛfa yɛ adwenle yɛsie yɛ kenlebie azo yɛtɛla yɛ sɔnea ne mɔ. (Edwɛndolɛ 27:14) Ɛlɔlɛ kpalɛ ka yɛ maa yɛnyia akɛnrasesebɛ wɔ mekɛ mɔɔ bɛlɛkpɔ yɛ la. (Dwɔn 15:13) Saa yɛnyia Nyamenle anu anwodozo na yɛsukoa ɔ Ra ne a yɛnyia akɛnrasesebɛ.—Edwɛndolɛ 28:7.

4. Kɛzi Gyisɛse lale akɛnrasesebɛ ali wɔ ɛzonlenlɛ sua ne anu ɛ? (Nea mɔlebɛbo nvoninli ne.)

⁴ Mɔɔ Gyisɛse lile ɛvolɛ 12 la, ɔlale akɛnrasesebɛ ali wɔ mekɛ mɔɔ “bɛnwunle ye wɔ Ɛzonlenlɛ Sua ne anu kɛ ɔde Dwuu kilehilevolɛma avinli” la. (Kenga Luku 2:41-47.) Ɛnee zɔhane kilehilevolɛma ne ze Mosisi Mɛla ne kpalɛ yɛɛ eza bɛze Dwuuma amaamuo ne. Amaamuo ɛhye mɔ manle ɔyɛle se kɛ bɛbali Mɛla ne azo. Noko Gyisɛse andoa bɛ nrɛlɛbɛ ne anyɛ koonwu. Ye ahonle andu. ‘Ɔbizebizale bɛ kpuyia.’ Nɔhalɛ nu, ɛnee tɛ kpuyia mɔɔ ngakula ta biza la a ɛnee Gyisɛse ɛlɛbiza a. Emomu, ɛnee ɔlɛbiza bɛ kpuyia mɔɔ ɔ bo ɛdelɛ yɛ se la yemɔti kilehilevolɛma ne diele ye na bɛdwenlenle nwolɛ. Na saa kilehilevolɛma ne bɔle mɔdenle kɛ bɛfa edwɛkɛ bie bɛazɔ ye bɛanlea na bɛ nee ye azu kpolera a, bɛangola ye fee. “Nrɛlɛbɛ mɔɔ wɔ ye nyelebɛnloa nee ye ndelebɛbo nu la zinle bɛdabɛ mɔɔ ɛnee bɛlɛtie ye” mɔɔ kilehilevolɛma ne boka nwo la kɔsɔɔti anwo. Ɛhɛe, Gyisɛse vale akɛnrasesebɛ gyinlanle nɔhalɛ ne mɔɔ wɔ Nyamenle Edwɛkɛ ne anu la anzi!

5. Ndenle boni azo a Gyisɛse lale akɛnrasesebɛ ali wɔ ye ɛzonlenlɛ gyima ne anu a?

⁵ Wɔ Gyisɛse ɛzonlenlɛ gyima ne anu, ɔlale akɛnrasesebɛ ali wɔ ndenle ngakyile zo. Kɛ neazo la, ɔmanle menli nwunle kɛ bɛ asɔne mgbanyima ne mɔ ɛlɛfa adalɛ ngilehilelɛ abɛlɛbɛla bɛ. (Mateyu 23:13-36) Bieko, Gyisɛse ammaa ewiade ne anzɛkye ye subane. (Dwɔn 16:33) Ɔgyinlanle dwazotia nu ɔhanle edwɛkɛ ne. (Dwɔn 5:15-18; 7:14) Yɛɛ ɔdele asɔne sua ne anwo fane nwiɔ, na ɔvale akɛnrasesebɛ ɔvoanle menli mɔɔ bɛlɛsɛkye nɔhalɛ ɛzonlenlɛ wɔ ɛkɛ la.—Mateyu 21:12, 13; Dwɔn 2:14-17.

6. Kɛzi Gyisɛse lale akɛnrasesebɛ ali wɔ ye kenle mɔɔ li awieleɛ wɔ azɛlɛ ye azo la anu ɛ?

⁶ Bɛmaa yɛzuzu akɛnrasesebɛ mɔɔ Gyisɛse lale ye ali wɔ ye kenle mɔɔ li  awieleɛ wɔ azɛlɛ ye azo anu la anwo. Ɛnee Gyisɛse ze mɔɔ Dwudase ye ye maa a ɔbado ye la. Noko wɔ Akpabɛnwo aleɛlilɛ ne abo, Gyisɛse hanle hilele Dwudase kɛ: “Ka ɛ nwo yɛ mɔɔ ɛyɛ la.” (Dwɔn 13:21-27) Akee wɔ Gɛtesɛmani tola ne anu, Gyisɛse vale akɛnrasesebɛ lale ɔ nwo ali hilele sogyama mɔɔ rale kɛ bɛbahye ye la. Ɛnee ye ngoane la esiane nu ɛdeɛ, noko ɔbɔle ye ɛdoavolɛma ne anwo bane na ɔhanle ɔhilele sogyama ne kɛ: “Bɛmaa ɛhye mɔ ɛhɔ.” (Dwɔn 18:1-8) Nzinlii mɔɔ Dwuuma kɔɔto kpole ne bizale ye edwɛkɛ la, Gyisɛse vale akɛnrasesebɛ hanle hilele bɛ kɛ ɔdaye a ɔle Kelaese ne nee Nyamenle Ara ne a. Ɛnee ɛsɔfo kpanyinli ne kpondɛ debie agyinla zo ahu ye, noko ye ahonle andu. (Maake 14:60-65) Gyisɛse gyinlanle ye munlililɛ nu manle Nyamenle na ɔwule wɔ amaneɛnwunlɛ baka ne azo. Mekɛ mɔɔ ɔliele ye ɛnwomenle mɔɔ li awieleɛ la, ɔdeanle nu kɛ: “Yewie!”—Dwɔn 19:28-30.

7. Ngakula, kɛzi Gyihova Alasevolɛ mɔɔ bɛle la maa bɛte nganeɛ ɛ, na kɛ ɔkɛyɛ na bɛahile kɛ bɛlɛ akɛnrasesebɛ ɛ?

⁷ Kɛ ɔkɛyɛ na yɛazukoa Gyisɛse akɛnrasesebɛ ne ɛ? Wɔ sukulu. Ngakula, saa bɛka bɛkile bɛ gɔnwo mɔ sukuluma nee awie mɔ kɛ bɛle Gyihova Alasevolɛ a, ɛnee bɛlɛ akɛnrasesebɛ. Saa bɛyɛ ɛhye a, bɛmaa ɔda ali kɛ bɛ nye die nwo kɛ Gyihova duma la bɛ nwo zo, saa bɔbɔ ɔbamaa bɛazele bɛ a. (Kenga Edwɛndolɛ 86:12.) Bie mɔ kulo kɛ bɛdie ngakyihakyililɛ bɛdi. Noko bɛbahola bɛanyia anwodozo kɛ mɔɔ Baebolo ne ka ye wɔ abɔdeɛ nwo la le nɔhalɛ. Bɛbahola bɛava brohyua The Origin of Life—Five Questions Worth Asking ne bɛabua menli mɔɔ kulo kɛ bɛnwu bɛ “anyelazo ne mɔɔ bɛlɛ ye la.” (1 Pita 3:15) Akee bɛ nye balie kɛ bɛva akɛnrasesebɛ bɛgyinla Baebolo nu nɔhalɛ ne anzi la!

8. Ninyɛne boni mɔ ati a yɛfa akɛnrasesebɛ yɛka edwɛkɛ ne a?

⁸ Wɔ daselɛlilɛ nu. Kɛmɔ yɛle nɔhalɛ Keleseɛnema la ati, ɔwɔ kɛ yɛka “Awulae anwo edwɛkɛ ne akɛnrasesebɛ zo.” (Gyima ne 14:3) Duzu ati a ɔwɔ kɛ yɛfa akɛnrasesebɛ yɛka edwɛkɛ ne a? Mɔɔ lumua, yɛze kɛ edwɛkɛ ne mɔɔ yɛka la vi Baebolo ne anu. Yemɔ a le nɔhalɛ ne. (Dwɔn 17:17) Mɔɔ tɔ zo nwiɔ, “yɛle Nyamenle egyinli nu gyimayɛvoma,” yɛɛ yeva ye sunsum nwuanzanwuanza ne yemaa kɛ ɔboa yɛ. (1 Kɔlentema 3:9; Gyima ne 4:31) Mɔɔ tɔ zo nsa, yɛkulo Gyihova nee menli yemɔti ɛhye ka yɛ maa yɛbɔ mɔdenle biala yɛbɔ edwɛkpa ne nolo. (Mateyu 22:37-39) Kɛmɔ yɛlɛ akɛnrasesebɛ la ati, yɛnrɛgyakyi edwɛkɛhanlɛ ne. Yɛbɔ kpɔkɛ kɛ yɛbahilehile menli mɔɔ asɔne mgbanyima “ɛzi bɛ adwenle ne anye” anzɛɛ ɛbɛlɛbɛla bɛ la nɔhalɛ ne. (2 Kɔlentema 4:4) Yɛɛ saa menli andie edwɛkɛ ne anzɛɛ bɛkpɔ yɛ bɔbɔ a, yɛbahɔ zo yɛabɔ edwɛkpa ne nolo.—1 Tɛsalonaekama 2:1, 2.

9. Kɛ ɔkɛyɛ na yɛala akɛnrasesebɛ ali wɔ sɔnea nu ɛ?

⁹ Sɔnea mekɛ nu. Saa yɛlɛ Nyamenle anu anwodozo a, ɔbamaa yɛanyia diedi nee akɛnrasesebɛ mɔɔ yɛhyia na yɛagyinla ngyegyelɛ nloa la. Saa yɛ kulovolɛ bie wu a yɛdi nyane noko yɛ anyelazo ɛnwie. Yɛlɛ anwodozo kɛ  ‘arɛlekyekyelɛ kɔsɔɔti Nyamenle ne’ bamaa yɛagyinla. (2 Kɔlentema 1:3, 4; 1 Tɛsalonaekama 4:13) Saa yɛ nwo to yɛ anzɛɛ yɛboda a ɔbayɛ yɛ nyane, noko yɛmmaa bɛnva debie biala mɔɔ Nyamenle kyi la bɛnyɛ yɛ ayile. (Gyima ne 15:28, 29) Saa yɛlɛdi nyane a, ‘yɛ adwenle kola bua yɛ fɔlɛ,’ noko yɛmmaa yɛ sa nu ɛndo. Yɛfa yɛ nwo yɛto Gyihova, mɔɔ “bikye mɔɔ nyane ɛha ye la” anwo zo. *—1 Dwɔn 3:19, 20; Edwɛndolɛ 34:18.

10. Nwunu a le duzu, na kɛzi Keleseɛnenli mɔɔ lɛ nwunu la tendɛ na ɔyɛ ye nyɛleɛ ɛ?

¹⁰ Nwunu a le mɔdenle mɔɔ yɛbɔ yɛnwu ngakyile mɔɔ wɔ kpalɛ nee ɛtane nu na yɛyɛ mɔɔ le kpalɛ la. (Hibuluma 5:14) Keleseɛnenli mɔɔ lɛ nwunu la si kpɔkɛ mɔɔ ɔbamaa ɔ nee Nyamenle agɔnwolɛvalɛ ne anu amia la. Ɔnea boɛ kɛ ye ɛdendɛlɛ ɛnrɛgyegye awie mɔ. Emomu, ɔyɛ mɔɔ sɔ Gyihova anye la ɔluakɛ ɔka edwɛkɛ mɔɔ boa awie mɔ. (Mrɛlɛbulɛ 11:12, 13) Ɔkyɛ na “yeava ɛya.” (Mrɛlɛbulɛ 14:29) Ɔkɔ ɔ nyunlu “fɔɔnwo,” ɛhye kile kɛ, ɔsi kpɔkɛ kpalɛ wɔ ye ɛbɛlabɔlɛ kɔsɔɔti anu. (Mrɛlɛbulɛ 15:21) Kɛ ɔkɛyɛ na yɛanyia nwunu ɛ? Ɔwɔ kɛ yɛsukoa Nyamenle Edwɛkɛ ne na yɛfa mɔɔ yɛkɛzukoa la yɛbɔ yɛ ɛbɛla. (Mrɛlɛbulɛ 2:1-5, 10, 11) Yɛbahola noko yɛazukoa nwunu nwo neazo kɛnlɛma mɔɔ Gyisɛse yɛle la.

11. Kɛzi Gyisɛse lale nwunu ali wɔ ye ɛdendɛlɛ nu ɛ?

¹¹ Gyisɛse lale nwunu ali wɔ mɔɔ ɔhanle nee mɔɔ ɔyɛle la amuala anu. Ye ɛdendɛlɛ nu. Mekɛ mɔɔ ɛnee Gyisɛse ɛlɛbɔ edwɛkpa ne nolo la, ɔhanle edwɛkɛ mɔɔ zinle ye tievolɛma ne anwo la. (Mateyu 7:28; Luku 4:22) Ɛnee ɔta ɔkenga anzɛɛ ɔtwe adwenle ɔkɔ Nyamenle Edwɛkɛ ne azo. Ɛnee ɔze ngɛlɛlera fɔɔnwo mɔɔ ɔwɔ kɛ ɔfa ɔdi gyima wɔ tɛnlabelɛ biala anu la. (Mateyu 4:4, 7, 10; 12:1-5; Luku 4:16-21) Bieko, Gyisɛse hilehilele Ngɛlɛlera ne anu manle ɔhanle menli mɔɔ diele ye la ahonle kpalɛ. Gyisɛse ewudwazo ne anzi, ɔ nee ɛdoavolɛma nwiɔ mɔɔ ɛnee bɛlɛkɔ Ɛmeeyɛse la dendɛle. Ɔhilehilele ngɛlɛlera mɔɔ fane ɔ nwo la anu ɔhilele bɛ. Nzinlii, ɛdoavolɛ ne mɔ hanle kɛ: “Mekɛ mɔɔ ɔlɛtendɛ wɔ adenle ne anu na ɔlɛkilehile yɛ Nyamenle Edwɛkɛ ne anu la ɛnee ɔle kɛ asɛɛ bɛwuda senle yɛ ahonle nu la.”—Luku 24:27, 32.

12, 13. Neazo boni mɔ a kile kɛ ɛnee Gyisɛse kyɛ na yeava ɛya yɛɛ ɔte edwɛkɛ bo a?

¹² Wɔ ye nganeɛdelɛ nee ye nyɛleɛ nu. Ɛnee Gyisɛse lɛ nwunu yemɔti, ‘yeanva ɛya mgbane mgbane.’ (Mrɛlɛbulɛ 16:32) Ɛnee ɔkomo ɔ nwo zo, na ɔle “bɛtɛɛ.” (Mateyu 11:29) Ɛnee Gyisɛse si ye ɛdoavolɛ ne mɔ anwo abotane ɔnva nwo kɛ bɛtɔ sinli la. (Maake 14: 34-38; Luku 22:24-27) Mekɛ mɔɔ bɛbɔle ye aholoba bɔbɔ la, yeandɛ ɔ nloa anu.—1 Pita 2:23.

¹³ Nwunu boale Gyisɛse manle ɔdele edwɛkɛ bo. Ɔdele deɛmɔti bɛvale Mosisi Mɛla ne bɛmanle nee kɛzi bɛluale zo bɛ nee menli lile la abo. Bɛmaa yɛva raalɛ ne mɔɔ ‘dudule mogya ne’ la kɛ neazo. (Kenga Maake 5:25-34.) Raalɛ ne wolole menli dɔɔnwo ne anu zɔle Gyisɛse tɛladeɛ ne anu na ɔdele kpɔkɛ. Ɛnee Mɛla ne kile kɛ ɔ nwo ɛnde yemɔti ɔnle kɛ ɔfa ɔ sa ɔka awie. (Sɛlɛvolɛma 15:25-27) Noko Gyisɛse andendɛ antia ye. Kɛmɔti ɛ? Ɔnwunle kɛ subane mɔɔ le kɛ “anwunvɔnezelɛ yɛɛ nɔhalɛlilɛ” la hyia kpalɛ tɛla Mɛla ne mɔɔ bɛyɛ ye kyengye kɛ bɛli zolɛ la. (Mateyu 23:23) Gyisɛse zele ye anwunvɔne na ɔhanle kɛ: “Me ra raalɛ, wɔ diedi ɛlie wɔ ngoane. Fa [anzondwolɛ] kɔ na wɔ ewule ne ɛhɔ bɔkɔɔ.” Nea kɛzi nwunu nwo neazo kɛnlɛma manle Gyisɛse zele anwunvɔne a!

14. Gyima boni a Gyisɛse yɛle a, na kɛzi ɔvale ye adwenle ɔziele zo ɛ?

¹⁴ Ye ɛbɛlabɔlɛ nu. Gyisɛse lale nwunu ali wɔ kɛzi ɔbɔle ye ɛbɛla la anu. Ɔvale ɔziele ɔ nye zo kɛ ɔbayɛ ɛzonlenlɛ gyima ne. (Luku 4:43) Bieko, Gyisɛse zile kpɔkɛ mɔɔ boale ye manle ɔvale ye adwenle ɔziele gyima ɛhye azo na ɔyɛle ɔhɔle awieleɛ la. Kɛ neazo la, yeamkpondɛ ninyɛne dɔɔnwo wɔ ye ɛbɛlabɔlɛ nu amaa yeahola yeava ye mekɛ nee ye anwosesebɛ yeayɛ gyima ne. (Luku 9:58) Ɛnee ɔze kɛ ɔhyia kɛ ɔtete awie mɔ amaa ɔwu a bɛadoa edwɛkɛhanlɛ gyima ne azo. (Luku 10:1-12; Dwɔn 14:12) Ɔbɔle ye ɛdoavolɛma ne ɛwɔkɛ kɛ ɔbaboa bɛ wɔ bɛ gyima ne anu “kɔkpula ewiade awieleɛ.”—Mateyu 28:19, 20.

15. Kɛ ɔkɛyɛ na yɛala nwunu ali wɔ yɛ ɛdendɛlɛ nu ɛ?

¹⁵ Kɛ ɔkɛyɛ na yɛazukoa Gyisɛse nwunu ne ɛ? Yɛ ɛdendɛlɛ nu. Saa yɛ nee mediema mrenya nee mraalɛ ɛlɛtendɛ a, yɛka edwɛkɛ mɔɔ bamaa bɛ anwosesebɛ la na tɛ mɔɔ ɔbamaa bɛ sa nu ado la. (Ɛfɛsɛsema 4:29) Saa yɛlɛka Nyamenle Belemgbunlililɛ ne anwo  edwɛkɛ yɛahile awie mɔ a, ɔwɔ kɛ ‘yɛmaa yɛ nloa edwɛkɛ yɛ fɛ,’ kile kɛ, ɔwɔ kɛ yɛdua nrɛlɛbɛ adenle zo yɛtendɛ. (Kɔlɔsaema 4:6) Yɛbɔ mɔdenle yɛte mɔɔ menli hyia nee mɔɔ bɛ nye die nwo la abo na yɛka nwolɛ edwɛkɛ kɛnlɛma. Saa yɛtendɛ kɛnlɛma a, menli badie yɛ na yɛ edwɛkɛ ne aha bɛ ahonle. Bieko, mekɛ biala mɔɔ yɛlɛkilehile yɛ diedi ne anu la, saa ɔkɛyɛ boɛ a yɛkenga Baebolo ne ɔluakɛ tumi wɔ Nyamenle Edwɛkɛ ne anu. Yɛze kɛ tumi wɔ Baebolo edwɛkɛ nu tɛla edwɛkɛ biala mɔɔ yɛbaha la.—Hibuluma 4:12.

16, 17. (a) Kɛzi yɛda ye ali kɛ yɛnva ɛya ndɛndɛ yɛɛ yɛte edwɛkɛ bo ɛ? (b) Kɛ ɔkɛyɛ na yɛ adwenle ahɔ yɛ ɛzonlenlɛ gyima ne azo dahuu ɛ?

¹⁶ Yɛ nganeɛdelɛ nee yɛ nyɛleɛ nu. Nwunu boa yɛ maa yɛkomo yɛ nwo zo wɔ mekɛ mɔɔ bɛlɛgyegye yɛ la na ɔmmaa yɛnva ‘ɛya ndɛndɛ.’ (Gyemise 1:19) Saa menli ka yɛ ɛya a, yɛbɔ mɔdenle kɛ yɛbade deɛmɔti bɛtendɛ anzɛɛ bɛyɛ zɔ la abo. Ɛhye ɛmmaa ɔnyɛ se kɛ yɛbava yɛahyɛ bɛ yɛɛ ɔmmaa yɛnva bɛ nwo ɛya. (Mrɛlɛbulɛ 19:11) Nwunu eza boa yɛ maa yɛte edwɛkɛ bo. Yɛmbu mediema mrenya nee mraalɛ kɛ bɛdi munli. Emomu, yɛkakye kɛ bɛlɛ bɛ ngyegyelɛ mɔɔ yɛnze a. Yɛkulo kɛ yɛtie mɔɔ bɛkɛha la. Na saa ɔkɛyɛ boɛ a, yɛapɛ zolɛ, kile kɛ yɛnga ye kyengye kɛ bɛva yɛ ɛdeɛ ne.—Felepaema 4:5.

¹⁷ Yɛ ɛbɛlabɔlɛ nu. Yɛze kɛ edwɛkpa ne nolobɔlɛ le enililɛ kpole tɛla biala. Yemɔti yɛkulo kɛ yɛsi kpɔkɛ mɔɔ bamaa yɛ adwenle ahɔ yɛ ɛzonlenlɛ gyima ne azo la. Yɛfa Gyihova yɛdumua yɛ ɛbɛlabɔlɛ nu. Yɛmaa yɛ ɛbɛlabɔlɛ yɛ sikalɛ amaa yɛava yɛ mekɛ nee yɛ anwosesebɛ yɛabɔ edwɛkpa ne nolo kolaa na awieleɛ ne ara.—Mateyu 6:33; 24:14.

18. Kɛ ɔkɛyɛ na yɛadoa yɛ dahuu ngoane nwo adendulɛ ne azo ɛ, na duzu a wɔbɔ kpɔkɛ kɛ ɛbayɛ a?

¹⁸ Yɛ nye ɛlie kɛ yɛzukoa Gyisɛse subane ngɛnlɛma ne bie mɔ anwo debie la! Nea kɛzi yɛsukoa mɔɔ ɛha la na yɛyɛ kɛ ɔdaye la a, ɔbaboa yɛ a. Yemɔti bɛmaa yɛbɔ kpɔkɛ kɛ yɛbazukoa Gyisɛse. Saa yɛyɛ zɔ a, yɛbadoa yɛ dahuu ngoane nwo adendulɛ ne azo na yɛabikye Gyihova kpalɛ.