1, 2. Duzu ati a Gyisɛse bule nzunza ne anwo ɛrɛlɛ ne a?

GYISƐSE bule nzunza ne anwo ɛrɛlɛ ne amaa ye ɛdoavolɛma mɔɔ bɛkpokpa bɛ la anwu bɛ gyimalilɛ ne wienyi. Noko zɔhane ɛrɛlɛ ne fane Gyisɛse ɛdoavolɛma kɔsɔɔti anwo. Yemɔti saa yɛ nye la kɛ yɛbahɔ anwuma anzɛɛ yɛbadɛnla azɛlɛ ye azo a, ɔwɔ kɛ yɛte ɛrɛlɛ ɛhye abo.

² Mekɛ boni a Gyisɛse bule ɛrɛlɛ ne a? Mekɛ mɔɔ ɛnee ɔlɛmaa bɛ sɛkɛlɛneɛ mɔɔ bɛnwu ye a ɔbahile kɛ ɔlɛdi Belemgbunli na ewiade awieleɛ ne ɛbɔ ɔ bo la ɔ. (Mateyu 24:3) Yemɔti nzunza ne anwo ɛrɛlɛ ne boka zɔhane sɛkɛlɛneɛ ne anwo na ɔlɛba nu ɛnɛ.

3. Duzu a yɛsukoa yɛfi mrɛlɛ mɔɔ wɔ Mateyu tile 24 nee 25 la anu a?

³ Mɔɔ Gyisɛse bule nzunza ne anwo ɛrɛlɛ ne la, ɔbule mrɛlɛ nsa bieko mɔɔ fane awieleɛ mekɛ ne anwo la. Mrɛlɛ ɛhye mɔ amuala da subane bie mɔ mɔɔ ɔwɔ kɛ ye ɛdoavolɛma nyia la ali. Yɛbahola yɛagenga mrɛlɛ ɛhye mɔ wɔ Mateyu 24:45 kɔdwu 25:46. Ɛrɛlɛ ne mɔɔ lumua la fane akɛlɛ nɔhavo ne, menli mɔɔ bɛkpokpa bɛ ekpunli ekyi ne mɔɔ ɔle bɛ gyima kɛ bɛbahilehile Gyihova menli la anwo. Ɔwɔ kɛ bɛdi  nɔhalɛ na bɛnwu nrɛlɛbɛ. * Ɛrɛlɛ mɔɔ doa ye la fane mbɛlɛra bulu ne anwo. Wɔ ɛrɛlɛ ne anu, Gyisɛse bɔle menli mɔɔ bɛkpokpa bɛ la kɔsɔɔti kɔkɔ kɛ bɛziezie bɛ nwo na bɛzinza ɔluakɛ bɛnrɛnwu kenle ne nee dɔnehwele ne mɔɔ ɔbara la. * Bieko, Gyisɛse bule nzunza ne anwo ɛrɛlɛ ne ɔvale ɔhilehilele menli mɔɔ bɛkpokpa bɛ la kɔsɔɔti kɛ ɔwɔ kɛ bɛyɛ gyima ɛsesebɛ wɔ bɛ Keleseɛne gyima ne ɛyɛlɛ nu. Akee Gyisɛse bule mboane nee mbɔnkye ne anwo ɛrɛlɛ ne mɔɔ fane menli mɔɔ bɛlɛ anyelazo kɛ bɛbadɛnla azɛlɛ ye azo anwo la. Ɔzile zo kɛ ɔwɔ kɛ bɛdi nɔhalɛ na bɛyɛ mɔɔ bɛbahola biala la bɛfa bɛboa ɔ mediema mɔɔ bɛkpokpa bɛ la. * Edwɛkɛ ɛhye bahilehile nzunza ne anwo ɛrɛlɛ ne anu.

4, 5. Nrenya ne mɔɔ wɔ ɛrɛlɛ ne anu la gyi ɛkɛ maa nwane, na nzunza a le duzu?

⁴ Kenga Mateyu 25:14-30. Wɔ nzunza ne anwo ɛrɛlɛ ne anu, Gyisɛse hanle nrenya bie mɔɔ dule adenle la anwo edwɛkɛ. Wɔ ɛrɛlɛ bie mɔɔ ɔle kɛ ɛhye la anu, Gyisɛse hanle nrenya bie mɔɔ dule adenle amaa bɛazie ye belemgbunli la anwo edwɛkɛ. * (Luku 19:12) Yɛ mbuluku ne bie mɔ ɛha ye wɔ ɛvolɛ dɔɔnwo anu kɛ wɔ mrɛlɛ nwiɔ ne anu, nrenya ne gyi ɛkɛ maa Gyisɛse mɔɔ hɔle anwuma wɔ ɛvolɛ 33 ne anu la. Noko mekɛ mɔɔ Gyisɛse hɔle anwuma la tɛ ɛkɛ ne ala a ɔyɛle Belemgbunli a. Ɔhendɛle ɔhɔdwule 1914, mekɛ mɔɔ bɛvale ye kpɔvolɛma bɛwulale “ɔ gyakɛ abo la.”—Hibuluma 10:12, 13.

⁵ Gyisɛse hanle kɛ ɛnee nrenya ne mɔɔ wɔ ɛrɛlɛ ne anu la lɛ nzunza apenle mɔtwɛ. Ɛhye le ezukoa dɔɔnwo. * Nrenya ne vale ezukoa ɛhye manle ye sonvolɛma ne kolaa na yeahɔ. Ɔzele bɛ kɛ bɛva bɛkpondɛ ezukoa dɔɔnwo bɛmaa ye. Kɛmɔ ɛnee ezukoa ne sonle bolɛ maa nrenya ne la, debie wɔ ɛkɛ mɔɔ ɔdaye noko ɔsonle bolɛ ɔmaa Gyisɛse a. Duzu debie ɔ? Gyima mɔɔ ɔyɛle ye wɔ azɛlɛ ye azo la ɔ.

6, 7. Nzunza ne gyi ɛkɛ maa duzu?

⁶ Ɛnee edwɛkɛhanlɛ gyima ne anwo hyia Gyisɛse. Menli dɔɔnwo luale ye edwɛkɛhanlɛ gyima ne azo rayɛle ye ɛdoavolɛma. (Kenga Luku 4:43.) Noko ɛnee ɔze kɛ gyima dɔɔnwo wɔ ɛkɛ mɔɔ bɛbayɛ a yɛɛ menli dɔɔnwo badie. Nɔhalɛ nu, ɔzele ye ɛdoavolɛ ne mɔ kɛ: “Bɛdo bɛ nye bɛnlea ɛya nu lɔ boɛ; nzoleɛ ɛbolo, na yedwu mɔɔ ɔwɔ kɛ bɛbu a.” (Dwɔn 4:35-38) Ɛyazonlɛnli kpalɛ ɛnrɛbu ɔ nye ɛnrɛgua nzoleɛ mɔɔ ɔwɔ kɛ bɛte la azo. Ɛnee Gyisɛse lɛ subane zɔhane bie. Mekɛ mɔɔ Gyisɛse bazia  ahɔ anwuma la, ɔhanle ɔhilele ye ɛdoavolɛma ne kɛ: “Bɛmaa menli ɛrayɛ me ɛdoavolɛma.” (Mateyu 28:18-20) Wɔ adenle ɛhye azo, Gyisɛse manle bɛ debie mɔɔ sonle bolɛ, edwɛkɛhanlɛ gyima ne mɔɔ anwo hyia la.—2 Kɔlentema 4:7.

⁷ Kɛmɔ nrenya ne vale ezukoa manle ye sonvolɛma ne la, Gyisɛse noko vale ɛdoavolɛyɛlɛ gyima ne manle ye ɛdoavolɛma mɔɔ bɛkpokpa bɛ la. (Mateyu 25:14) Yemɔti nzunza ne gyi ɛkɛ maa edwɛkɛhanlɛ nee ɛdoavolɛyɛlɛ gyima ne.

8. Ɔnva nwo kɛ asolo akɛlɛ biala ezukoa mɔɔ ɔnyianle la, duzu a ɛnee bɛ menle ne kpondɛ avi bɛ ɛkɛ a?

⁸ Gyisɛse hanle kɛ bɛ menle ne manle akɛlɛ ne mɔɔ lumua la nzunza apenle nnu, mɔɔ tɔ zo nwiɔ la, ɔmanle ye apenle nwiɔ, yɛɛ mɔɔ tɔ zo nsa la, ɔmanle ye apenle ko. (Mateyu 25:15) Asolo ezukoa dodo mɔɔ bɛ menle ne vale manle akɛlɛ ko biala a, noko ɛnee ɔkpondɛ kɛ bɛ nuhua biala bɔ mɔdenle fa ye ɛdeɛ ne yɛ gyima ɔnyia ezukoa dɔɔnwo. Zɔhane ala a Gyisɛse kpondɛ kɛ ye ɛdoavolɛma mɔɔ bɛkpokpa bɛ la bɔ mɔdenle kpalɛ wɔ edwɛkɛhanlɛ gyima ne anu a. (Mateyu 22:37; Kɔlɔsaema 3:23) Gyisɛse ɛdoavolɛ ne mɔ bɔle ɔ bo kɛ bɛmaa menli mɔɔ bɛwɔ maanle kɔsɔɔti anu la arayɛ ɛdoavolɛma wɔ ɛvolɛ 33 Pɛntekɔso ne anu. Saa yɛkenga Ɛzoanvolɛma Gyima buluku ne mɔɔ wɔ Baebolo ne anu la a, yɛnwu gyima ɛsesebɛ mɔɔ  bɛyɛle la wienyi. *—Gyima ne 6:7; 12:24; 19:20.

9. (a) Duzu a sonvolɛma nwiɔ ne mɔɔ di nɔhalɛ la vale bɛ ezukoa ne yɛle a, na duzu a yɛsukoa yɛfi nu a? (b) Duzu a ɔwɔ kɛ menli mɔɔ anye la kɛ bɛbadɛnla azɛlɛ ye azo la yɛ a?

⁹ Sonvolɛma nwiɔ ne mɔɔ lumua mɔɔ bɛvale bɛ menle ne ezukoa ne bɛyɛle gyima kpalɛ la gyi ɛkɛ maa menli mɔɔ bɛkpokpa bɛ mɔɔ bɛlile nɔhalɛ wɔ awieleɛ mekɛ ne anu la. Ɔvi 1919 titile, bɛlɛyele bɛ nwo bɛayɛ edwɛkɛhanlɛ gyima ne. Wɔ ɛrɛlɛ ne anu, asolo ezukoa dodo mɔɔ sonvolɛma nwiɔ ne ko biala nyianle la noko ɛhye ɛngile kɛ nɔhavoma mɔɔ bɛkpokpa bɛ la ekpunli nwiɔ a wɔ ɛkɛ a. Sonvolɛma nwiɔ ne yɛle gyima ɛsesebɛ nyianle bɛ ezukoa ne mɔnwo. Noko asoo ɔwɔ kɛ menli mɔɔ bɛkpokpa bɛ la ala a yɛ gyima ɛsesebɛ wɔ daselɛlilɛ nee ngilehilelɛ gyima ne anu ɔ? Kyɛkyɛ. Gyisɛse mboane nee mbɔnkye ne anwo ɛrɛlɛ ne kile yɛ kɛ ɔwɔ kɛ bɛdabɛ mɔɔ bɛlɛ anyelazo kɛ bɛbadɛnla azɛlɛ ye azo la boa ɔ mediema ne mɔ mɔɔ bɛkpokpa bɛ la wɔ edwɛkɛhanlɛ gyima ne anu na bɛdi nɔhalɛ bɛmaa bɛ. Bɛte nganeɛ kɛ ɔle enililɛ kɛ bɛbaboa bɛ. Ɛhɛe, Gyihova menli le “mboane ekpunli ko,” na bɛ muala bɛyɛ gyima ɛsesebɛ bɛka edwɛkɛ ne na bɛmaa menli bɛayɛ ɛdoavolɛma.—Dwɔn 10:16.

10. Sɛkɛlɛneɛ ne foa ko boni a kile kɛ yɛwɔ awieleɛ mekɛ ne anu a?

¹⁰ Gyisɛse kpondɛ kɛ ye ɛdoavolɛma kɔsɔɔti yɛ gyima ɛsesebɛ bɛmaa menli bɛayɛ ɛdoavolɛma. Zɔhane a ye ɛdoavolɛma ne yɛle ye wɔ ɛvoya ne mɔɔ lumua la anu a. Wɔ awieleɛ mekɛ ɛhye anu, mɔɔ Gyisɛse nzunza ne anwo ɛrɛlɛ ne ɛlɛba nu la, asoo ye ɛdoavolɛma ɛlɛyɛ gyima ɛhye? Ɛhɛe, menli dɔɔnwo ɛde edwɛkpa ne na bɛrayɛ ɛdoavolɛma bɛdɛla mekɛ biala! Ɔlua gyima ɛsesebɛ ne  mɔɔ Gyisɛse ɛdoavolɛma kɔsɔɔti yɛ la ati, bɛsɔne menli apenle dɔɔnwo ɛvolɛ biala. Na bɛdabɛ noko bɛyɛ edwɛkɛhanlɛ gyima ne bie. Gyima ɛhye mɔ kɔsɔɔti nee ninyɛne kpalɛ mɔɔ vi nu ba la maa ɔda ali wienyi kɛ edwɛkɛhanlɛ gyima ne le awieleɛ mekɛ ne anwo sɛkɛlɛneɛ ne mɔɔ Gyisɛse vale manle la foa mɔɔ hyia kpalɛ. Nɔhalɛ nu, Gyisɛse anye die ye gyimayɛvoma ne anwo!

11. Duzu a maa yɛnwu kɛ anwongyelelɛ kpole ne anu a Gyisɛse bara a?

¹¹ Gyisɛse hanle kɛ: “Ɔhyɛle kpalɛ na bɛ menle ne ara; na ɔ nee bɛ rayɛle mgbonda.” (Mateyu 25:19) Saa anwongyelelɛ kpole ne ɛlɛkɔ ye awieleɛ a yɛɛ Gyisɛse, bɛ Menle ne, bayɛ ɛhye a. Duzu a maa yɛnwu ɛhye a? Gyisɛse hanle ye ɛralɛ ne anwo edwɛkɛ dɔɔnwo wɔ ye ngapezo ne mɔɔ wɔ Mateyu ati 24 nee 25 la anu. Kɛ neazo la, ɔhanle kɛ ‘bɛbanwu medame Sonla Ra kɛ melua amungu nu melɛba.’ Ɛhye fane mekɛ mɔɔ Gyisɛse babua menli ndɛne wɔ anwongyelelɛ kpole ne anu la anwo. Eza ɔbɔle ye ɛdoavolɛma mɔɔ bɛbadɛnla aze wɔ awieleɛ mekɛ ne anu la kɔkɔ kɛ bɛzinza. Ɔhanle kɛ: “Bɛnze kenle mɔɔ bɛ Awulae ne kɛra,” yɛɛ “Medame Sonla Ra, mebara mekɛ mɔɔ bɛ nye ɛnla la.” (Mateyu 24:30, 42, 44) Yemɔti wɔ nzunza ne anwo ɛrɛlɛ ne anu, ɛnee eza Gyisɛse ɛlɛka mekɛ mɔɔ ɔbarabua ndɛne na yeazɛkye Seetan ewiade ne la anwo edwɛkɛ. *

12, 13. (a) Duzu a bɛ menle ne baha ahile sonvolɛma nwiɔ ne a, na duzu ati ɔ? (b) Mekɛ boni a menli mɔɔ bɛkpokpa bɛ la banyia bɛ nzonlɛyɛlɛ ne mɔɔ li awieleɛ la ɛ? (Eza nea ɛlɛka “Bɛwu A Bɛbu Bɛ Kɛ Bɛfɛta.”) (d) Ahatualɛ boni a wɔ ɛkɛ maa bɛdabɛ mɔɔ bɛboale menli mɔɔ bɛkpokpa bɛ la ɛ?

¹² Mekɛ mɔɔ bɛ menle ne rale la, ɔnwunle kɛ akɛlɛ ne mɔɔ ɔvale nzunza apenle nnu ne ɔmanle ye la ɛnyia apenle nnu bieko yɛɛ akɛlɛ ne mɔɔ ɔvale nzunza apenle nwiɔ ne ɔmanle ye la ɛnyia apenle nwiɔ bieko. Bɛ menle ne zele ko biala kɛ: “Mo, wɔbɔ mɔdenle bɔkɔɔ; ɛle sonvolɛ kpalɛ mɔɔ di nɔhalɛ a! Wɔbɔ mɔdenle wɔnlea ezukoa ekyi ye azo boɛ, yemɔti mebava wɔ meazie ninyɛne mgbole nloa.” (Mateyu 25:21, 23) Saa bɛ Menle Gyisɛse ba kenlebie a, duzu a ɔbayɛ a?

 ¹³ Ɔka ekyii anwongyelelɛ kpole ne bɔ ɔ bo a, Nyamenle bahile kɛ ɔdie menli mɔɔ bɛkpokpa bɛ mɔɔ bɛlɛyɛ gyima ɛsesebɛ wɔ azɛlɛ ye azo la ɔto nu. Ɛhye a le bɛ nzonlɛyɛlɛ mɔɔ li awieleɛ a. (Yekile 7:1-3) Akee kolaa na Amagɛdɔn ne abɔ ɔ bo la, Gyisɛse bamaa bɛ ahatualɛ, ɔbadwazo bɛ yeahɔ anwuma. Na menli mɔɔ bɛlɛ anyelazo kɛ bɛbadɛnla azɛlɛ ye azo mɔɔ bɛboale menli mɔɔ bɛkpokpa bɛ wɔ edwɛkɛhanlɛ gyima ne anu la ɛ? Ɛnee bɛbua bɛ ndɛne kɛ bɛle mboane. Bɛbamaa bɛ ngoane wɔ azɛlɛ ye azo wɔ Nyamenle Belemgbunlililɛ ne tumililɛ bo bɛava bɛadua bɛ kakɛ.—Mateyu 25:34.

14, 15. Asoo ɛnee Gyisɛse ɛlɛka kɛ menli mɔɔ bɛkpokpa bɛ la anu dɔɔnwo bɛayɛ mgbovonle nee amumuyɛ ɔ? Kilehile nu.

¹⁴ Ɛrɛlɛ ne hanle akɛlɛ ko mɔɔ bɛmanle ye nzunza apenle ko la noko anwo edwɛkɛ. Yeanva yeanyɛ gyima yeakpondɛ ezukoa dɔɔnwo yeammaa ɔ menle anzɛɛ yeanva yɛangɔndo bange amaa nvasoɛ ara zo. Emomu, ɔvunle ezukoa ne ɔwulale. Bɛ menle ne hanle kɛ akɛlɛ ne le mgbovonle nee amumuyɛ. Ɔliele nzunza ne ɔvile akɛlɛ amumuyɛ ne asa nu na ɔvale ɔmanle akɛlɛ ne mɔɔ lumua la. Akee ɔvuandinle akɛlɛ amumuyɛ ne ɔdole “awozinli kpole ne anu,” na akɛlɛ ne zunle kpalɛ wɔ ɛkɛ.—Mateyu 25:24-30; Luku 19:22, 23.

¹⁵ Mekɛ mɔɔ Gyisɛse hanle kɛ sonvolɛma nsa ne anu ko le mgbovonle nee amumuyɛ la, ɛnee ɔngile kɛ saa ɛkyɛ bɛdabɛ mɔɔ bɛkpokpa bɛ la anu nsa a, ko bayɛ kɛ zɔhane sonvolɛ ne la. Saa yɛfa ɛrɛlɛ ɛhye yɛto nwiɔ bie  anwo a, yɛɛ ɔmaa yɛnwu ye zɔ a. Wɔ akɛlɛ nɔhavo nee nrɛlɛbɛvolɛ ɛrɛlɛ ne anu, Gyisɛse hanle sonvolɛ adalɛ bie mɔɔ bole ɔ gɔnwo sonvolɛma la anwo edwɛkɛ. Ɛnee Gyisɛse ɛngile kɛ menli mɔɔ boka akɛlɛ nɔhavo nee nrɛlɛbɛvolɛ ne anwo la bie mɔ bayɛ sonvolɛ adalɛ. Emomu, ɛnee ɔlɛbɔ menli zɔhane mɔ mɔɔ bɛkpokpa bɛ la kɔkɔ kɛ bɛmmayɛ kɛ sonvolɛ adalɛ ne la. Akee wɔ mbɛlɛra bulu ne ɛrɛlɛ ne anu, Gyisɛse hanle mbɛlɛra ahɔnwɔne nnu anwo edwɛkɛ. Yeanga kɛ menli mɔɔ bɛkpokpa bɛ la anu foa ko bayɛ ahɔnwɔne. Emomu, ɛnee Gyisɛse ɛlɛbɔ bɛ kɔkɔ wɔ mɔɔ saa bɛanziezie bɛ nwo na bɛanzinza a ɔbazi la anwo. * Zɔhane ala a, wɔ nzunza ne anwo ɛrɛlɛ ne anu, ɛnee Gyisɛse ɛngile kɛ menli mɔɔ bɛkpokpa bɛ la anu dɔɔnwo bayɛ mgbovonle nee amumuyɛ a. Kyɛkyɛ, ɛnee ɔlɛbɔ bɛdabɛ mɔɔ bɛkpokpa bɛ la kɔkɔ kɛ bɛmmayɛ kɛ sonvolɛ adalɛ ne, na emomu, bɛhɔ zo bɛyɛ gyima ɛsesebɛ wɔ edwɛkɛhanlɛ gyima ne anu la.—Mateyu 25:16.

16. (a) Ninyɛne nwiɔ boni a yɛsukoa yɛfi nzunza ne anwo ɛrɛlɛ ne anu a? (b) Kɛzi edwɛkɛ ɛhye ɛmaa yɛde nzunza ne anwo ɛrɛlɛ ne abo ɛ? (Nea ɛlɛka “ Kɛzi Ɔwɔ Kɛ Yɛte Nzunza Ne Anwo Ɛrɛlɛ Ne Abo Ɛ?”)

¹⁶ Ninyɛne nwiɔ boni a yɛsukoa yɛfi nzunza ne anwo ɛrɛlɛ ne anu a? Mɔɔ lumua, Gyisɛse manle ye ɛdoavolɛma mɔɔ bɛkpokpa bɛ la debie mɔɔ sonle bolɛ, ɔmanle bɛ gyima mɔɔ hyia la kɛ bɛha edwɛkɛ ne na bɛmaa menli ɛrayɛ ɛdoavolɛma. Mɔɔ tɔ zo nwiɔ, Gyisɛse kpondɛ kɛ yɛ muala yɛbɔ mɔdenle wɔ edwɛkɛhanlɛ gyima ne anu. Saa yɛfa nɔhalɛlilɛ yɛyɛ gyima ɛhye, yɛkɔ zo yɛyɛ tieyɛ na yɛdi nɔhalɛ yɛmaa Gyisɛse a, yɛbahola yɛanyia anwondozo kɛ ɔbamaa yɛ ahatualɛ.—Mateyu 25:21, 23, 34.