JULIAN kakye kɛzi ɔdele nganeɛ wɔ mekɛ mɔɔ bɛbɔle ye nolo kɛ ɔ ra nrenyia ne ɛnle Gyihova Dasevolɛ bieko la. Ɔse: “Ɛnee ɔzɔho kɛ me awieleɛ ne ala ɛne, ɔle me ra kpanyinli, yɛkulo yɛ nwo kpalɛ yemɔti ɛnee yɛyɛ ninyɛne dɔɔnwo yɛbɔ nuhua.” Julian hanle kɛ ɛnee ɔ ra nrenyia ne di ɔ nwo eni dahuu, noko ɔhakyile na akee ɔbɔle ɔ bo kɛ ɔyɛ ninyɛndane. Dahuu Julian aye ne su na ɛnee Julian ɛnnwu mɔɔ ɔyɛ na yeakyekye ɔ rɛle a. Julian se, “Ɛnee yɛta yɛbiza yɛ nwo saa yɛantete ye boɛ a.”

Baebolo ne anu edwɛkɛ boni a bɛgyinla zo bɛtu awie a? Yɛɛ kɛmɔ ɛdulɛ maa bɛdi nyane kpole la ati, nzɔne ati a yɛbahola yɛaha kɛ ɔle debie mɔɔ ɛlɔlɛ wɔ nu ɛ?

Saa Gyihova Dasevolɛ mɔɔ bɛzɔne ye la yɛ ɛtane kpole na yeannu ɔ nwo a, bɛbadu ye.

Gyihova anye ɛnla kɛ yɛbayɛ debie biala pɛpɛɛpɛ, noko ɔkpondɛ kɛ ye azonvolɛ di ye mɛla zo na bɛmaa bɛ nwo te. Kɛ neazo la, Gyihova se ye azonvolɛ ɛhwe bɛ nwo ɛvi ɛtane mgbole mɔɔ bie a le nla nu ɛbɛlatane, awozonle ɛzonlenlɛ, awule, amile, sonla ɛhunlɛ nee sunsum nu nyɛleɛ la anwo.—1 Kɔlentema 6:9, 10; Yekile 21:8.

Nrɛlɛbɛ wɔ mɔɔ Gyihova kpondɛ kɛ yɛyɛ la anu yɛɛ eza ɔbɔ yɛ nwo bane. Kɛ neazo la, yɛ muala yɛkpondɛ kɛ yɛ nee menli mɔɔ bɛkulo anzodwolɛ, bɛdi bɛ nwo eni na bɛka nɔhalɛ la tɛnla, na ɛhye a yɛnwu ye wɔ yɛ sunsum nu mediema avinli a. Nzɔne ati a bɛbɔ bɛ ɛbɛla zɛhae a? Ɔluakɛ bɛdu bɛ nwo bɛmaa Gyihova na bɛbɔ ɛwɔkɛ kɛ bɛbava mɔɔ yeha wɔ Baebolo ne anu la bɛayɛ gyima.

Na saa sinlidɔlɛ maa Keleseɛnenli mɔɔ bɛzɔne ye la yɛ ɛtane kpole bie ɛ? Ɛhye bie dole Gyihova tete azonvolɛ bie mɔ, noko  Gyihova amkpo bɛ bɔkɔɔ. Kɛ neazo la, ɔnva nwo kɛ Belemgbunli Devidi zɛkyele agyalɛ na ɔhunle awie la, ngapezonli Neetan zele ye kɛ Gyihova ɛva ye ɛtane ɛhyɛ ye.—2 Samoɛle 12:13.

Nzɔne ati a Gyihova vale Devidi ɛtane hyɛle ye a? Ɔluakɛ ɔnwunle kɛ Devidi ɛnlu ɔ nwo nɔhalɛ nu. (Edwɛndolɛ 32:1-5) Ɛnɛ noko saa awie yɛ ɛtane, ɔnu ɔ nwo bɔkɔɔ na ɔgyakyi ɛtaneyɛlɛ a bɛbava bɛahyɛ ye. (Gyima ne 3:19; 26:20) Saa mgbanyima mɔɔ wɔ edwɛkɛlilɛ kɔmatii ne anu la ɛnnwu debie biala mɔɔ kile kɛ amgba ahenle ɛnlu ɔ nwo a, yemɔ bɛbadu ye.

Saa bɛtu wɔ busuanli bie anzɛɛ ɛ gɔnwo kpalɛ bie a, bie a ɔbayɛ se kɛ ɛbalie kpɔkɛzilɛ ne wɔado nu anzɛɛ ɛbade nganeɛ kɛ ɔ nloa yɛ se somaa. Noko, Gyihova Edwɛkɛ ne ka ye wienyi kɛ awie mɔɔ bɛtu ye la le nziezielɛ mɔɔ ɛlɔlɛ wɔ nu.

Gyisɛse hanle kɛ: “Nyamenle nrɛlɛbɛ ne amra ne mɔ nyɛleɛ maa bɛnwu kɛ ɔle nɔhalɛ.” (Mateyu 11:19) Bɛmaa yɛzuzu ninyɛne nsa mɔɔ ɔti saa awie annu ɔ nwo a ɔwɔ kɛ bɛtu ye la anwo.

Ɔmaa bɛdi Gyihova duma ne eni. Kɛmɔ Gyihova duma ne la yɛ nwo zo la ati, mɔɔ yɛyɛ la bahola amaa bɛali duma ne eni anzɛɛ bɛaha nwolɛ edwɛkɛ ɛtane. (Ayezaya 43:10) Kɛmɔ kakula bie nyɛleɛ bahola amaa bɛaha ye awovolɛ anwo edwɛkɛ kpalɛ anzɛɛ ɛtane la, zɔhane ala a Gyihova azonvolɛ nyɛleɛ bahola amaa bɛali Gyihova eni anzɛɛ bɛaha ɔ nwo edwɛkɛ ɛtane a. Wɔ Yizikeɛle mekɛ zo, maanle maanle ne anu amra vale Gyihova duma vɛlɛle Dwuuma. (Yizikeɛle 36:19-23) Ɛnɛ noko, Gyihova duma ne a bɛfa bɛfɛlɛ ye Alasevolɛ ne mɔ a. Yemɔti saa yɛdi Gyihova mɛla zo a, ɔmaa bɛdi ye duma ne eni.

Ɛzoanvolɛ Pita dule Keleseɛnema folɛ kɛ: “Bɛyɛ tieyɛ bɛmaa Nyamenle na bɛmmamaa bɛ atiakunluwɔzo sie bɛ kɛ dɛba ne mɔɔ ɛnee bɛnze nwolɛ bie la. Nyamenle ne mɔɔ ɛvɛlɛ bɛ la anwo te, yemɔti bɛmaa bɛ nwo ɛde wɔ nyɛleɛ biala anu. Nyamenle Edwɛkɛ ne se, “Ɔwɔ kɛ bɛmaa bɛ nwo te, ɔboalekɛ mele nwuanzanwuanza.”” (1 Pita 1:14-16) Kɛ neazo la, saa yɛfa yɛ nwo yɛwula nla nu ɛbɛlatane nu a, yɛbagua Nyamenle duma ne anwo evinli. Noko saa yɛbɔ ɛbɛla kpalɛ a, yɛdi Gyihova eni.

Saa Gyihova Dasevolɛ bie bɔ ɛbɛla ɛtane a, bie a menli mɔɔ bɛze ye la banwu mɔɔ ɔlɛyɛ la. Yemɔti saa nzinlii bɛte kɛ ɔnle Gyihova Dasevolɛ bieko a, ɔbamaa bɛanwu ye kɛ Gyihova menli fa mɔɔ Baebolo ne ka la yɛ gyima na bɛmaa asafo ne anwo te. Kɛ neazo la, nrenyia bie hɔle debiezukoalɛ wɔ Switzerland na ɔhanle kɛ ɔkpondɛ kɛ ɔyɛ Dasevolɛ. Ɔluakɛ ɔ diema raalɛ vale ɔ nwo wulale ɛbɛlatane nu na bɛdule ye la ati, ɛnee ɔkpondɛ kɛ ɔfa ɔ nwo ɔwula ahyehyɛdeɛ mɔɔ “bɛnsosɔ ɛbɛlatane zo la” anu.

Ɔmaa Keleseɛne asafo ne anwo te. Ɛzoanvolɛ Pɔɔlo vale esiane mɔɔ wɔ ɛtanevolɛ mɔɔ ɔtɛnunle ɔ nwo mɔɔ bɛbamaa yeadɛnla asafo ne anu la anwo kɔkɔbɔlɛ ɔmaanle Kɔlentema. Ɔvale kɛzi ɛtanevolɛma ɛhye mɔ kola nyia awie mɔ anwo zo tumi la ɔtotole kɛzi fɛlɛ ko sɛkye a ɔka mɔɔ ɛha la anwo. Pɔɔlo hanle kɛ: “Fɛlɛ ko dɔ sonlɛ na ɔla fɛlɛ dɔɔnwo avinli a ɔsɛkye bɛ muala.” Yemɔti ɔdule bɛ folɛ kɛ “Bɛye amumuyɛ sonla ɛhye bɛvi bɛ avinli.”—1 Kɔlentema 5:6, 11-13.

 Zɔhane “amumuyɛ sonla” ne vale ɔ nwo wulale nla nu ɛbɛlatane nu mɔɔ ɛnee ɔnze nyiane biala a. Ye asafo ne anu amra bie mɔ bɔle ɔ bo kɛ bɛbu bɛ nye bɛagua ye ɛbɛlatane ne azo. (1 Kɔlentema 5:1, 2) Ɛnee esiane wɔ ɛhye anu ɔluakɛ anrɛɛ Keleseɛnema mɔɔ ɛha la bahola ava bɛ nwo awula nla nu ɛbɛlatane mɔɔ ɛbu zo wɔ Kɔlente la anu. Ɛnɛ noko, saa asafo ne bu ɔ nye gua ɛtane kpole zo a, asafo ne anu amra bie mɔ babu Gyihova ngyinlazo ne mɔ kɛ nwolɛ ɛngyia. (Nolobɔvo ne 8:11) Kɛmɔ “awolɛ mɔɔ vea azule bo” la kola sɛkye meli la, zɔhane ala a ɛtanevolɛ mɔɔ ɔnnu ɔ nwo la kola sɛkye asafo ne anu amra diedi a.—Dwuudu 4, 12, NW.

Ɔmaa ɛtanevolɛ ne nwu ye kɛ yevo. Gyisɛse bule ɛrɛlɛ bie mɔɔ fane kpavolɛ bie mɔɔ ɔliele ye agyadeɛ ɛdeɛ ɔvile ɔ ze ɛkɛ na ɔhɔzɛkyele ye, eza ɔbɔle ɛbɛla mgbane mgbane la anwo. Nzinlii kpavolɛ ne ranwunle ye kɛ nrɛlɛbɛ biala ɛnle nu kɛ ɔvile ɔ ze awuke nu la. Yemɔti ɔnlunle ɔ nwo na ɔyɛle kɛ ɔsia yeahɔ sua nu. Ɔ ze nwunle kɛ ɔ ra ne ɛhakyi ye subane la ɔ nye liele kpole kpalɛ, na ɔliele ye kɛnlɛma ɔhɔle sua nu. (Luku 15:11-24) Saa awie nu ɔ nwo a, ɛrɛlɛ ɛhye boa yɛ ɔmaa yɛte kɛzi Gyihova te nganeɛ la abo. Gyihova se: “Menlɛ anyelielɛ biala wɔ amumuyɛnli ewule nu, kyesɛ amumuyɛnli ne kakyi fi ye ndenle ne mɔ anu na ɔnyia ngoane.”—Yizikeɛle 33:11.

Yɛ sunsum nu abusua a le Keleseɛne asafo ne. Saa bɛtu awie a ɔmboka abusua zɔhane anwo bieko. Saa ɔnwu mɔɔ ɛvi ye nyɛleɛ ɛtane ne anu ɛra la a, ɔbanwu ye nvonleɛ na yeahakye kɛzi ɛnee ɔ nye die wɔ mekɛ mɔɔ ɛnee ɔ nee Gyihova nee asafo ne lɛ agɔnwolɛvalɛ kpalɛ la. Ɛhye bamaa yeazia yeara ye sunsum nu abusua ne anu.

Saa yɛkulo kɛ ahenle mɔɔ bɛdu ye la sia ba asafo ne anu a, yɛnrɛlielie ye zo. Kɛ neazo la, fa ye kɛ menli nwiɔ ɛhɔ ɛbɔlɛ na bɛminli kpɔkɛ ne anu. Kɛmɔ bɛkpɔsa kpɔkɛ ne anu dede la ati, ɛvɛlɛ ka ko, ɔ sa nu to na nafelɛ ku ye. Noko saa ɔdafe kpɔkɛ ne anu a, bie a nane anwo ɛzulolɛ bahye ye ali. Yemɔti amaa yeanla la, ɔ gɔnwo ne bɔ ye. Ɔwɔ nuhua kɛ ɛhye yɛ nyane noko ɔbalie ɔ gɔnwo ne ngoane. Devidi hanle edwɛkɛ ko ne ala bie wɔ mekɛ mɔɔ ɔhanle kɛ: “Maa sonlakpalɛ ɛbo me, ɔle anwunvɔnezelɛ.” (Edwɛndolɛ 141:5) Devidi nwunle ye kɛ ɔnva nwo kɛ ndeanlɛ yɛ nyane la, ɔbaboa ye.

Fane dɔɔnwo ne ala ɛdulɛ ala a awie hyia nwo na yeazia yeara Gyihova ɛkɛ a, kɛmɔ zɔhane ɛbɔlɛ ne de ala la. Julian ara nrenyia ne mɔɔ bɛha ɔ nwo edwɛkɛ wɔ edwɛkɛ ɛhye mɔlebɛbo kɛ bɛdule ye la hakyile ye subane na ɔziale ɔrale asafo ne anu wɔ ɛvolɛ bulu anzi. Kɛkala ɔle asafo nu kpanyinli. Julian ara ne ka kɛ: “Ɛdulɛ mɔɔ bɛdule me la maanle menwunle mɔɔ ɛvi me nyɛleɛ nu ɛra la. Ɛnee mehyia ndeanlɛ zɔhane anwo.”—Hibuluma 12:7-11.

Saa bɛtu awie a ɔyɛ nyane. Noko ɔngile kɛ ɔnrɛhola ɔnrɛra Gyihova ɛkɛ bieko. Ɔwɔ kɛ yɛ muala yɛmaa ndeanlɛ ne yɛ gyima. Kɛzi yɛbahola yɛayɛ ɛhye ɛ?

Mgbanyima sukoa Gyihova ɛlɔlɛ ne, titili wɔ mekɛ mɔɔ ɔwɔ kɛ bɛka bɛkile awie kɛ kɛkala ɔnle Gyihova Dasevolɛ bieko la.  Bɛfi atiakunlu kɛnlɛma nu bɛmaa ɔnwu mɔɔ ɔwɔ kɛ ɔyɛ na yeazia yeara Gyihova ɛkɛ na yeaboka asafo ne anwo bieko la. Saa awie mɔɔ bɛdu ye la kpondɛ kɛ ɔsia ɔba asafo ne anu bieko a, ɔyɛ a mgbanyima ne mɔ bahola ahɔkpɔla ye na bɛahakye ye mɔɔ ɔwɔ kɛ ɔyɛ na yeazie yeara Gyihova ɛkɛ la. *

Saa abusua ne anu amra die mgbanyima ne mɔ kpɔkɛzilɛ to nu a, ɛnee bɛlɛkile kɛ bɛkulo asafo ne yɛɛ ahenle mɔɔ bɛdu ye la. Julian hilehilele nu kɛ, “Ɛnee ɔtɛde me ra, noko ye ɛbɛlabɔlɛ ne ɛmaa ɛweɛne ɛrala yɛ avinli.”

Saa asafo ne anu amra amuala die ndeanlɛ mɔɔ Gyihova ɛlua mgbanyima ne mɔ anwo zo ɛva ɛmaa ahenle mɔɔ bɛdu ye la to nu a, ɔkile kɛ bɛkulo ye amgba. Ɛhye kile kɛ ɔnle kɛ bɛ nee ye tu anzɛɛ bɛ nee ye tendɛ bɔbɔ. (1 Kɔlentema 5:11; 2 Dwɔn 10, 11) Eza ɔwɔ kɛ asafo ne da ɛlɔlɛ kpole ali kile ahenle mɔɔ bɛdu ye la abusua ne na bɛboa bɛ. Ɛhye le mekɛ mɔɔ anu yɛ se maa abusua ne. Ɔnle kɛ yɛmaa bɛdabɛ noko bɛte nganeɛ kɛ bɛdu bɛ bɛvi asafo ne anu.—Wulomuma 12:13, 15.

Julian dwulale edwɛkɛ ne kɛ: “Ɛdulɛ le ngyehyɛleɛ mɔɔ yɛhyia nwo amaa yɛava Gyihova ngyinlazo ne mɔ yɛabɔ yɛ ɛbɛla. Ɔnva nwo kɛ ɔyɛ nyane la, amozii debie kpalɛ fi nu ba. Saa mensosɔle me ra nrenyia ne nyɛleɛ ɛtane ne azo a, anrɛɛ ɔnrɛhakyi ɛlɛ.”