Yɛ mbuluku ne mɔ ɛhile nu wɔ ɛvolɛ dɔɔnwo anu kɛ bɛvuandinle Seetan bɛvile anwuma la anzi, duma mɔɔ bɛfa bɛfɛlɛ ye la a le Gɔɔgo mɔɔ vi Meegɔɔgo. Nzɔne ati ɔ? Ɔluakɛ Yekile buluku ne ka kɛ Seetan a li ɛtetalɛ mɔɔ bɛbava bɛara Nyamenle menli ne anwo zo la ati a. (Yekile 12:1-17) Yemɔti yɛdele ɔ bo kɛ bie a Seetan duma bieko a le Gɔɔgo.

Noko nvonleɛ bie wɔ ngilenu ɛhye anwo. Suzu ɛhye anwo nea: Mekɛ mɔɔ Gyihova ɛlɛka Gɔɔgo ɛzɛkyelɛ nwo edwɛkɛ la, ɔhanle kɛ ɔbava Gɔɔgo ‘anwo nane yeamaa nloma nee nanemgbole ali.’ (Yizikeɛle 39:4) Akee Gyihova doale zolɛ kɛ: “Kenle zɔhane mebamaa ɛleka wɔ Yizilayɛ na bɛazie Gɔɔgo zolɛ.” (Yizikeɛle 39:11) Noko kɛ ɔkɛyɛ na nloma nee nanemgbole ali Seetan mɔɔ le sunsum nu abɔdeɛ mɔɔ ɛnyelɛ ɛnnwu ye la anwo nane ɛ? Kɛ ɔkɛyɛ na bɛazie ye wɔ azɛlɛ ye azo ɛ? Baebolo ne maa ɔda ali wienyi kɛ bɛbavuandi Seetan bɛado azɛlɛ kuma ne mɔɔ ɛnlɛ ɔ bo la anu ɛvolɛ 1,000. Bɛnrɛli ɔ nwonane yɛɛ bɛnrɛzie ye.—Yekile 20:1, 2.

Baebolo ne se wɔ ɛvolɛ 1,000 ne awieleɛ, bɛbaye Seetan bɛavi azɛlɛ kuma ne mɔɔ ɛnlɛ ɔ bo la anu ‘na ɔbahɔ yeahɔbɛlɛbɛla maanle maanle mɔɔ wɔ aleɛabo la amuala, meka Gɔɔgo nee Meegɔɔgo, na ɔ nee bɛ ahɔ konle.’ (Yekile 20:8) Noko saa Seetan a le Gɔɔgo a, ɛnee ɔkile kɛ ɔdaye mumua ne ɔbabɛlɛbɛla ɔ nwo. Yemɔti, wɔ Yizikeɛle anzɛɛ Yekile buluku ne anu, tɛ “Gɔɔgo” a le Seetan.

Ɛnee nwane a le Gɔɔgo mɔɔ vi Meegɔɔgo la a? Amaa yɛabua kpuya ɛhye la, ɔwɔ kɛ yɛneɛnlea Baebolo ne anu na yɛnwu ahenle mɔɔ ɔbateta Nyamenle menli ne la. Baebolo ne ka ‘Gɔɔgo mɔɔ vi Meegɔɔgo’ ɛtetalɛ ne, “sɔlɔ belemgbunli ne” ɛtetalɛ ne yɛɛ “ewiade anu arelemgbunli kɔsɔɔti” ɛtetalɛ ne anwo edwɛkɛ. (Yizikeɛle 38:2, 10-13; Daneɛle 11:40, NW; Daneɛle 11:44, 45; Yekile 17:14; 19:19) Asoo ɛhye le ɛtetalɛ ngakyile? Kyɛkyɛ. Ɔzɔho kɛ Baebolo ne ɛlɛfa aluma ngakyile avɛlɛ ɛtetalɛ ko ne ala. Nzɔne ati a yɛkola yɛka ye zɔ a? Ɔluakɛ Baebolo ne ka kɛ, maanle maanle mɔɔ wɔ ewiade amuala la boka ɛtetalɛ ɛhye mɔɔ li awieleɛ mɔɔ babɔ Amagɛdɔn konle ne abo la anwo.—Yekile 16:14, 16.

 Saa yɛfa Baebolo ne anu edwɛkɛ ɛhye mɔ mɔɔ fane ɛtetalɛ mɔɔ li awieleɛ mɔɔ bɛbava bɛara Nyamenle menli nwo zo anwo la yɛtoto nwo a, ɔda ali wienyi kɛ tɛ Seetan a bɛfɛlɛ ye Gɔɔgo mɔɔ vi Meegɔɔgo la. Emomu duma ne fane maanle maanle ekpunli bie anwo. Asoo “sɔlɔ belemgbunli ne” a bali ekpunli ɛhye ati ɔ? Yɛngola yɛnga. Noko ɔzɔho kɛ edwɛkɛ ɛhye nee mɔɔ Gyihova ka wɔ Gɔɔgo anwo la yia: “Ɛbaheha ɛ nwo na ɛvi ɛleka mɔɔ ɛde, wɔ sɔlɔ nehane la, wɔava menli ɛwolaa ne mɔɔ li ɛ nzi, mɔɔ biala de ɛkpɔnwɔ zo, na bɛle ɛlɔnema dɔɔnwo anwo ɛzulolɛ la” wɔara.—Yizikeɛle 38:6, 15.

Zɔhane ala a ngapezonli Daneɛle mɔɔ dɛnlanle aze wɔ Yizikeɛle mekɛ zo la noko hanle wɔ sɔlɔ belemgbunli ne anwo kɛ: “Noko nrɛlaleɛ mɔɔ ɔbade yeavi aduduleɛ nee sɔlɔ la bamaa ye ahonle adu na yeava ɛya kpole yeahɔ bɛ nwo zo yeahɔzɛkye menli dɔɔnwo. Ɔbazi ye arelemgbunli ndanlɛ azua ne mɔ wɔ nyevile ne nee boka ne mɔɔ Ɛzonlenlɛ Sua ne gyi zolɛ la avinli, noko ɔbawu; ɔnrɛnyia awie ɛnrɛboa ye.” (Daneɛle 11:44, 45) Ɛhye nee mɔɔ Yizikeɛle buluku ne ka kɛ Gɔɔgo bayɛ la le ko.—Yizikeɛle 38:8-12, 16.

Nzɔne a bazi wɔ ɛtetalɛ mɔɔ li awieleɛ la anzi a? Daneɛle ka kile yɛ kɛ: “Mekɛ zɔhane Nyamenle soanvolɛ Maekeɛle [Gyisɛse Kelaese] mɔɔ nea wɔ menli ne mɔ anwo zo [ɔvi 1914] la badwazo [wɔ Amagɛdɔn]. Mekɛ zɔhane amaneɛnwunlɛ [anwongyelelɛ kpole ne] mɔɔ bie ɛtɛsile ɛlɛ la basisi, noko bɛbalie wɔ menli ne mɔ anu biala mɔɔ bɛkɛnwu kɛ bɛhɛlɛ ye duma wɔ Nyamenle buluku ne anu la ngoane.” (Daneɛle 12:1) Yɛnwu deɛ ko ne ala mɔɔ Gyisɛse bayɛ la bie wɔ Yekile 19:11-21.

Noko nwane a le ‘Gɔɔgo nee Meegɔɔgo’ mɔɔ bɛha ɔ nwo edwɛkɛ wɔ Yekile 20:8 la ɛ? Duma ɛhye fane menli mɔɔ bɛbadwazo bɛatia Gyihova na bɛateta ye menli ne wɔ ɛvolɛ 1,000 ne awieleɛ la anwo. Bɛ subane bayɛ kɛ Gɔɔgo mɔɔ vi Meegɔɔgo, maanle maanle ne mɔɔ bɛbateta Nyamenle menli ne wɔ anwongyelelɛ kpole ne awieleɛ la. Bɛbazɛkye Gɔɔgo nee Meegɔɔgo kɛmɔ bɛbazɛkye maanle maanle ne mɔ wɔ Amagɛdɔn la. (Yekile 19:20, 21; 20:9) Ɔfɛta bɔkɔɔ kɛ bɛbavɛlɛ menli mɔɔ bɛbayɛ anzosesebɛ wɔ ɛvolɛ 1,000 ne awieleɛ la ‘Gɔɔgo nee Meegɔɔgo’ la.

Kɛ menli mɔɔ yɛ nye die Baebolo ɛzukoalɛ nwo la, yɛlɛkpondɛ ahenle mɔɔ bayɛ “sɔlɔ belemgbunli ne” wɔ kenle bie la. Noko ɔnva nwo ahenle mɔɔ bamaa maanle maanle ne mɔ ateta Nyamenle menli ne la, yɛlɛ anwodozo kɛ: (1) Bɛbazɛkye Gɔɔgo mɔɔ vi Meegɔɔgo la nee ye ɛlɔnema. (2) Yɛ Belemgbunli ne, Gyisɛse Kelaese, balie Nyamenle menli ngoane na yeamaa bɛanyia ewiade fofolɛ mɔɔ anzodwolɛ nee banebɔlɛ wɔ nu la.—Yekile 7:14-17.