ANITA rayɛle Gyihova Dasevolɛ la, ɔ hu vale ɛya kpole. * (Nea ɔbo kɛ ne edwɛkɛ.)Ɔbɔle mɔdenle kɛ ɔnrɛmaa ɔnrɛhɔ debiezukoalɛ na ɔhanle kɛ ɔmmabɔ Nyamenle duma ɛlɛ. Ɔte kɛ yebɔ duma Gyihova a, ɔka ye ɛya kpole.

Eza ɛnee Anita ahu ne ɛmkpondɛ kɛ Anita bahile bɛ mra ne mɔ Gyihova anwo debie anzɛɛ ɔbava bɛ yeahɔ debiezukoalɛ. Ɛnee ɔyɛ se ɔmaa ye kpalɛ ɔluakɛ ɔwɔ kɛ ɔbɔ mɔdenle kɛ ɔbahilehile bɛ mra ne mɔ mɔɔ ɔ hu ɛnnwu ye a.

Kɛmɔ Anita anwubielɛ ne kile la, wɔ busuanli bie bahola abɔ mɔdenle kɛ ɔmaa wɔagyakyi Gyihova ɛzonlenlɛ. Anzɛɛ bie a ɛbayia tɛnlabelɛ gyɛne mɔɔ anu yɛ se a. Bie a ɛ nwo ɛdo wɔ ɛhyɛ. Bie noko a ɛ ra, ɛ hu anzɛɛ ɛ ye ɛwu. Anzɛɛ bie a wɔ busuanli mɔɔ ɛkulo ye la ɛgyakyi Gyihova ɛzonlenlɛ. Nzɔne a ɛbahola wɔayɛ amaa wɔali nɔhalɛ wɔamaa Gyihova wɔ tɛnlabelɛ ɛhye mɔ anu a?

Ɛzoanvolɛ Pɔɔlo hanle kɛ: “Ɔwɔ kɛ bɛnyia abotane” anzɛɛ bɛgyinla kpundii. (Hibuluma 10:36) Nzɔne a baboa wɔ yeamaa wɔagyinla kpundii a?

Saa ɛlɛyia ngyegyelɛ a, kakye kɛ ɛfa ɛ nwo ɛto Gyihova anwo zo a ɔbaboa wɔ yeamaa wɔagyinla kpundii. Sɛlɛ ye moalɛ. Ɛhye a Ana yɛle wɔ mekɛ mɔɔ ɔ hu wule arɛlevilɛ nu la. Ɛnee bɛgya ɛvolɛ 30. Ana ka kɛ: “Ɔhɔle gyima la yeamba sua nu bieko. Ɛnee yeli ɛvolɛ 52 pɛ.”

Ana gyima ne ati ɔnlɛ alagye, noko yeanye ye nyanelilɛ ne yeanvi ɛkɛ. Nzɔne a ɔyɛle a? Ɔse: “Menvile me ahonle nu menzɛlɛle Gyihova kɛ ɔboa me.” Ɔze kɛ Gyihova boale ye ɔluakɛ saa ɔyɛ asɔne ɔwie a, ɔmaa ye adwenle gyinla. Eza ɔka kɛ: “Melɛ anwodozo kɛ Gyihova badwazo me hu wɔ ewudwazo mekɛ ne anu.”—Felepaema 4:6, 7.

Gyihova ɛbɔ ye azonvolɛ ɛwɔkɛ kɛ ɔbadie bɛ nzɛlɛlɛ. (Edwɛndolɛ 65:2) Na ɔbava debie biala mɔɔ ɔbamaa bɛahɔ zo bɛazonle ye la yeamaa bɛ. Saa ɛkɔ tɛnlabelɛ mɔɔ anu yɛ se bɔbɔ la anu a, Gyihova baboa wɔ yeamaa wɔali nɔhalɛ wɔamaa ye.

Eza Gyihova dua adenle fofolɛ zo boa yɛ maa yɛgyinla kpundii. Yemɔ a le mediema mɔɔ yɛ nee bɛ wɔ asafo ne anu la. Yɛbahola yɛazukoa kɛzi Tɛsalonaeka mediema ne mɔ boale bɛ nwo wɔ mekɛ mɔɔ ɛnee bɛlɛyia ɛkpɔlɛ mɔɔ anu yɛ se la. Mekɛ zɔhane ɛnee ɔwɔ kɛ bɛkɔ zo bɛmaa bɛ nwo anwosesebɛ. (1 Tɛsalonaekama 2:14; 5:11) Debiezukoalɛ mɔɔ bɛhɔle na bɛvale bɛ nwo agɔnwolɛ la boale bɛ maanle bɛlile nɔhalɛ bɛmaanle Gyihova. Nzɔne a yɛbahola yɛayɛ na yɛali nɔhalɛ kɛ Tɛsalonaekama ne la ɛ?

Ɔwɔ kɛ yɛfa asafo ne anu amra agɔnwolɛ kpalɛ na yɛmaa yɛ nwo anwosesebɛ, titili wɔ ngyegyelɛ mekɛ nu. (Wulomuma 14:19) Ɛzoanvolɛ Pɔɔlo yiale ɛkpɔlɛ nee ngyegyelɛ gyɛne, noko Gyihova boale ye maanle ɔgyinlanle kpundii. Kɛ neazo la, Gyihova maanle mediema maanle Pɔɔlo anwosesebɛ. Ɛzoanvolɛ ne hanle ɔ gɔnwo mɔ anwo edwɛkɛ kɛ: “Bɛboa me kpole kpalɛ.” (Kɔlɔsaema 4:10, 11) Ɛnee mediema ɛhye mɔ kulo Pɔɔlo. Yemɔti mekɛ mɔɔ ɛnee ɔhyia moalɛ la, bɛkyekyele ɔ rɛle na bɛmaanle ye anwosesebɛ. Bie a ɛbahola wɔahakye mekɛ mɔɔ wɔ asafo ne anu amra bie hanle edwɛkɛ anzɛɛ yɛle debie mɔɔ maanle wɔ anwosesebɛ la.

Eza Gyihova ɛmaa wɔ asafo nu mgbanyima. Mrenyia ɛhye mɔ bahola amaa wɔ anwosesebɛ nee Baebolo nu folɛdulɛ kpalɛ. Bɛle kɛ “ɛvealeka, bodane bɔne mɔɔ bɛfea nu wɔ anwoma anzɛɛ ahumudulɛ kpole nu la. Bɛbayɛ kɛ azudenle wɔ ɛleka mɔɔ le resee, bodane kpole bie alubo wɔ azɛlɛ mɔɔ mbaka ɛnle zo la azo.” (Ayezaya 32:2) Mediema ɛhye mɔ ɛziezie bɛ nwo kɛ bɛbaboa yɛ yemɔti ɔkyekye yɛ rɛle. Ɔti saa tɛnlabelɛ ne anu yɛ se a, kɔnwu mgbanyima ne mɔ. Bɛbaboa wɔ bɛamaa wɔahɔ zo wɔazonle Gyihova.

Nɔhalɛ nu, mgbanyima ne mɔ ɛnrɛhola wɔ ngyegyelɛ ne mɔ amuala anwo gyima di. Eza bɛnli munli kɛ ɛdawɔ la. (Gyima ne 14:15) Noko saa ɛkɔ kpanyinli bie ɛkɛ na ɔka wɔ ngyegyelɛ ne ɔkile Gyihova wɔ asɔneyɛlɛ nu a, ɛ nwo bahola adɔ wɔ. (Gyemise 5:14, 15) Kɛ neazo la, mgbanyima ne mɔ maanle adiema nrenyia bie mɔɔ ɔwɔ Italy mɔɔ anwodolɛ kpole bie maanle ɔnwunle amaneɛ ɛvolɛ dɔɔnwo la anwosesebɛ. Ɔhanle kɛ: “Kɛzi mediema ne mɔ hulole me na bɛkpɔlale me wazowazo la boale me maanle mengyinlanle kpundii.” Saa ɛlɛyia ngyegyelɛ a, Gyihova kpondɛ kɛ ɛka ɛkile mgbanyima ne mɔ ɛmaa bɛboa wɔ.

Saa yɛfa yɛ adwenle yɛsie Gyihova ɛzonlenlɛ zo a, yɛbanwu kɛzi Gyihova boa yɛ la. Ɛhye a Dwɔn yɛle a. Ɔnyianle ɛvolɛ 39 la, ɔnwunle kɛ yɛnyia cancer (anahɛlɛ). Kɛmɔ ɛnee ɔle kpavolɛ na yenyia ewule ɛhye la ati, ɛnee ɔnde ɔ bo. Ɔdwenlenle ɔ ye nee bɛ ra nrenyia ne mɔɔ ɛnee yeli ɛvolɛ nsa pɛ la anwo. Ɔka kɛ: “Tɛ yɛ ra ekyi ne ala a ɛnee ɔwɔ kɛ me ye nea ye a, ɛnee ɔwɔ kɛ ɔnea medame noko na ɔ nee me kɔ asopiti.” Ayileyɛlɛ ne maa Dwɔn yɛ bɛtɛɛ yɛɛ eza ɔmaa ɔ ko gyegye ye. Eza Dwɔn dele kɛ ye papa ɛlɛwu na ɔhyia awie mɔɔ ɔbanlea ye la.

Nzɔne a boale Dwɔn nee ye abusua ne wɔ ngyegyelɛ mekɛ zɔhane anu a? Ɛnee Dwɔn ta yɛ bɛtɛɛ noko ɔbɔle mɔdenle kɛ ɔbamaa ye abusua ne ava bɛ adwenle azie Gyihova ɛzonlenlɛ zo. Ɔka kɛ: “Yɛhɔle debiezukoalɛ ne amuala, yɛhɔle daselɛlilɛ dapɛne biala na yɛyɛle abusua ɛzonlenlɛ dahuu wɔ mekɛ mɔɔ anu yɛ se bɔbɔ la anu.” Dwɔn nwunle kɛ ɔhyia kɛ ɔbamaa agɔnwolɛvalɛ mɔɔ ɔ nee Gyihova lɛ la anu amia. Alimoa ne ye ahonle dule na ɔyɛle basaa, noko nzinlii ye adwenle gyinlanle. Ɔnwunle kɛ Gyihova kulo ye na ɔmaanle ye anwosesebɛ biala mɔɔ ɔhyia la. Saa ɛyɛ basaa anzɛɛ wɔ ahonle tu a, zɔhane ala a Gyihova baboa wɔ a. Dwɔn ka kɛ: “Gyihova bamaa wɔ anwosesebɛ, kɛmɔ yemaa me anwosesebɛ la.”

Saa ɛlɛyia ngyegyelɛ a, kakye Pɔɔlo edwɛkɛ ne: ‘Ɔwɔ kɛ bɛgyinla kpundii.’ Sɛlɛ Gyihova na fa ɛ nwo to ɔ nwo zo. Bikye wɔ asafo ne anu amra, kpondɛ moalɛ fi mgbanyima ne mɔ ɛkɛ na fa wɔ adwenle sie Gyihova ɛzonlenlɛ zo. Gyihova baboa wɔ yeamaa wɔagyinla ngyegyelɛ biala mɔɔ ɛlɛyia ye ɛnɛ anzɛɛ mɔɔ bie a ɔbara kenle bie la anloa.