WƆ June 1970, ɛnee mela asopiti wɔ Pennsylvania, United States. Ɛnee mele sogyanli mɔɔ meli ɛvolɛ 20 na ewule ɛzulolɛ bie ɛha me a. Ɛnee mitini 30 biala nɛɛse nrenyia bie basuzu me mogya ne nea. Nɛɛse ne mɔɔ ɛnee ɔtɛla me ekyi la arɛle bɔle. Kɛmɔ ɛnee aze ala a me mogya ne kɔ la ati, membizale ye kɛ, “Wɔnwu awie mɔɔ ɔlɛwu la ɛlɛ ɔ?” Ɔ nyunlu hakyile na ɔhanle kɛ, “Kyɛkyɛ, metɛnwunle bie ɛlɛ.” Ɛnee ɔzɔho kɛ menrɛde kpɔkɛ, noko mendele kpɔkɛ. Maa menga me ɛbɛlabɔlɛ nu edwɛkɛ ne bie mengile wɔ.

Wɔ Vietnam konle ne anu, me nwo dole me wɔ mekɛ mɔɔ ɛnee melɛyɛ gyima wɔ ɛleka mɔɔ bɛyɛ apelehyɛne la. Ɛnee me nye die kɛ mebaboa menli mɔɔ bɛnde kpɔkɛ anzɛɛ bɛboda la na ɛnee me bodane a le kɛ mebayɛ dɔketa mɔɔ yɛ apelehyɛne. Mengɔle Vietnam wɔ July 1969. Kɛmɔ bɛmaa sogya fofolɛ biala dapɛne ko amaa mekɛ ne nee wuluwulu ne nee ɔ nwo ali la, zɔhane ala a bɛyɛle me a.

Bɛhanle kɛ menyɛ gyima wɔ sogyama asopiti mɔɔ wɔ Mekong Delta la anu. Alopile dɔɔnwo vale sogyama mɔɔ bɛboda la rale asopiti ɛkɛ ne. Ɛnee mekulo me maanle ne yɛɛ ɛnee mekulo gyimayɛlɛ, yemɔti ɛnee mekulo kɛ meboa me maanlema ndɛndɛ. Ɛnee yɛsiezie sogyama mɔɔ bɛbayɛ bɛ apelehyɛne la na yɛfa bɛ yɛkɔ mbulalɛ azua ngyikyi bie mɔɔ ɛnee bɛyɛ apelehyɛne wɔ nu mɔɔ air-condition wɔ nu la anu. Dɔketa mɔɔ yɛ apelehyɛne nee dɔketa gyɛne yɛɛ nɛɛsema nwiɔ noko bɔle mɔdenle kɛ bɛbalie menli ngoane. Menwunle wolɔba baage bile mgbole mɔɔ bɛanye bɛanvi alopile ne mɔ anu a. Bɛhanle bɛhilele me kɛ sogyama mɔɔ bɛtete wɔ konle ne anu la a wɔ wolɔba baage ne mɔ anu a. Konle nu anwubielɛ mɔɔ menlimoale menyianle la bie ɛne.

Mendele nɔhalɛ ne anwo edwɛkɛ menvile Gyihova Alasevolɛ ne mɔ ɛkɛ wɔ me ngakula nu. Me mame nee Alasevolɛ ne mɔ zukoale Baebolo ne, noko bɛanzɔne ye ɛlɛ. Noko me nye liele debiezukoalɛ zɔhane ne mɔ anwo. Kenle ko bie, me nee me mame ahu fofolɛ ne zenle Belemgbunlililɛ Asalo bie anwo, na membizale ye kɛ, “Nzɔne ɛne?” Ɔhanle kɛ: “Mmabikye menli zɔhane mɔ ɛlɛ!” Kɛmɔ  ɛnee mekulo ye na medie ye medi la ati, mendiele ye na meandoa Gyihova Alasevolɛ ne mɔ bieko.

Noko mɔɔ menvile Vietnam la, ɛnee meta mekakye ninyɛne mɔɔ maa medi nyane la. Ɔlua mɔɔ menwunle ye wɔ konle ne anu la ati, ɛnee mende nganeɛ biala. Ɛnee ɔzɔho kɛ awie biala ɛnde mɔɔ ɛlɛkɔ zo wɔ Vietnam la abo kpalɛ. Mekakye kɛ ɛnee dwazotiama ka kɛ U.S. sogyama ku ngakula mɔɔ bɛnze nwolɛ bie la. Ɛhye mɔ amuala maanle mendele nganeɛ kɛ ɔwɔ kɛ mesonle Nyamenle.

Nyamenle mɔɔ ɛnee melɛkpondɛ ye la ati, mengɔle asɔne ngakyile nu. Mekulo Nyamenle kpalɛ, noko ɛnee me nye ɛnlie mɔɔ kɔ zo wɔ asɔne zɔhane mɔ anu la anwo. Akee mengɔle Belemgbunlililɛ Asalo bie mɔɔ wɔ Delray Beach, Florida la anu. Menlimoale mengɔle debiezukoalɛ wɔ Molɛ, February 1971.

Mɔɔ mengɔle Belemgbunlililɛ Asalo ɛkɛ ne la, ɛnee ɔka ekyi bɛwie bagua nu ɛdendɛlɛ ne, noko mendɛnlanle aze mendiele Ɛzinzalɛ Arane Ɛzukoalɛ ne bie. Mengakye mɔɔ bɛzukoale la, noko menwunle kɛ ɛnee ngakula ne mɔ ɛlɛbuke bɛ Baebolo anlea tɛkese ne mɔ. Me nye liele kpole! Ɛnee melɛtie na meanlea mɔɔ ɛlɛkɔ zo la. Mɔɔ mefi ɛkɛ ne la, adiema nrenyia bie mɔɔ yeli ɛvolɛ kɛyɛ 80 la rale me nwo ɛkɛ. Ɛnee bɛfɛlɛ ye Jim Gardner. Ɔvale The Truth That Leads to Eternal Life buluku ne ɔmaanle me na ɔbizale kɛ, “Ɛ nye die nwo ɔ?” Menganle kɛ ɛhɛe, na yɛyɛle ngyehyɛleɛ kɛ yɛbabɔ me Baebolo ɛzukoalɛ ne abo wɔ Kule nwonlomɔ.

Yɛkpɔnenle debiezukoalɛ wɔ Molɛ ne la, ɛnee ɔwɔ kɛ mekɔ gyima. Ɛnee meyɛ gyima wɔ Boca Raton, Florida asopiti, na ɛnee mebabɔ gyima bo nɔɔzo 11 na meakpɔne nwonlomɔ dɔne 7. Zɔhane nɔe ne menli dɔɔnwo amba asopiti, yemɔti mengolale mengengale Truth buluku ne. Nɛɛsenli bie liele buluku ne vile me sa nu nleanle na ɛnee ɔkpondɛ kɛ ɔnwu ye saa mekpondɛ kɛ meyɛ Gyihova Dasevolɛ a. Menzale ye menliele na mengale mengilele ye kɛ ekyi bie ala a megenga a, na mekpondɛ kɛ meyɛ Dasevolɛ. Ɔgyakyile me ɔhɔle, na menwiele buluku ne kenga wɔ zɔhane nɔe ne.

Me nee Adiema Gardner bɔ me Baebolo ɛzukoalɛ ne abo la, membizale ye kɛ, “Nzɔne a yɛbazukoa a?” Ɔhanle kɛ: “Buluku ne mɔɔ menvale membale wɔ la.” Mengale kɛ: “Megenga mewie dɛbadɛba.” Adiema Gardner hanle kɛ: “Wɔmɔ maa yɛzuzu tile ne mɔɔ limoa la anwo.” Ɔzinle me nwo kɛ ninyɛne titili dɔɔnwo wɔ nu na meannwu ye la. Ɔmaanle mengengale ngɛlɛlera dɔɔnwo wɔ me King James Version Baebolo ne anu. Akee menwunle kɛ melɛsukoa nɔhalɛ Nyamenle Gyihova anwo debie. Jim maanle yɛzukoale Truth buluku ne adile nsa wɔ nwonlomɔ zɔhane. Yemɔ anzi, Kule nwonlomɔ biala yɛsukoa adile nsa. Me nye liele debiezukoalɛ zɔhane mɔ anwo kpalɛ. Ɔle nwolɛ adenle kɛ adiema zɔhane mɔɔ bɛkpokpa ye na ɛnee ɔ ze Charles T. Russell la hilehilele me a!

Menzukoale debie wɔ dapɛne bie mɔ anzi la, bɛmaanle me adenle kɛ membɔ edwɛkpa ne nolo. Ɛnee ɔyɛ se kɛ mebali daselɛ wɔ azua nu, noko Jim  boale me. (Gyima ne 20:20) Me nye liele daselɛlilɛ ɛhɔlɛ nwo ɔlua ye moalɛ ti. Menwu kɛ daselɛlilɛ ɛhɔlɛ le nwolɛ adenle kpole mɔɔ menyia a. Ɔyɛ me fɛ kpole kɛ mele Nyamenle egyinli nu gyimayɛvo la!—1 Kɔlentema 3:9.

Akee maa menga debie mɔɔ anwo hyia me kpalɛ la, Gyihova anwo ɛlɔlɛ mɔɔ menlimoale menyianle la. (Yekile 2:4) Ɛlɔlɛ zɔhane boa me ɔmaa megyinla konle ne nee ngyegyelɛ ngakyile mɔɔ mekakye a ɔmaa medi nyane la anloa.—Ayezaya 65:17.

Wɔ 1971, bɛhanle bɛhilele me kɛ menvi sua ne mɔɔ me awovolɛ ɛva ɛmaa me la anu. Duzu ati ɔ? Ɛnee me mame ahu fofolɛ ne ɛngulo kɛ Gyihova Dasevolɛ tɛnla ɛkɛ! Zɔhane mekɛ ne, ɛnee menlɛ ezukoa dɔɔnwo. Asopiti ne tua me kakɛ dapɛne nwiɔ biala, na ɛnee meva me ezukoa dɔɔnwo medɔ adɛladeɛ mɔɔ mebava meahɔ daselɛlilɛ la, ɔluakɛ ɛnee mekulo kɛ mekile kɛ Gyihova a ɛzoa me a. Ɛnee melɛ ezukoa wɔ bange, noko ɔwɔ me sua zo Michigan. Yemɔti ɛnee ɔwɔ kɛ meda me kale ne anu mekɛ bie. Ɛnee mekɔ ɛleka mɔɔ bɛbu patulo la na meaziezie me nwo wɔ bɛ ɛleka mɔɔ bɛyɛ bɛ nwo boɛ la.

Ɛnee metɛda me kale ne anu, na kenle ko bie mɔɔ memkpɔnenle gyima wɔ asopiti ɛkɛ la, mendwule Belemgbunlililɛ Asalo ɛkɛ ne ndɛ kolaa na bɛabɔ daselɛlilɛ ayia ne abo. Mekɛ mɔɔ ɛnee mede Belemgbunlililɛ Asalo ne anzi mɔɔ awie biala ɛnnwu me la, mengakyele mɔɔ menwunle ye wɔ Vietnam la. Ɛnee yeyɛ kɛ asɛɛ mete menli mɔɔ bɛyelale la nvoanle ne yɛɛ menwu mogya ɛwolaa ne, na ɔmaanle alɔbɔlɛ hunle me. Ɛnee ɔle kɛ asɛɛ  mekola mete na eza menwu mgbavolɛ ne mɔ, na bɛlɛbiza me kɛ: “Mebade kpɔkɛ ɔ? Mebade kpɔkɛ ɔ?” Ɛnee meze kɛ bɛbawu bɛ, noko membɔle mɔdenle kɛ mekyekye bɛ rɛle na meayɛ me ninyɛne kɛ ɛhwee ɛnrɛzi la. Mekɛ mɔɔ mede ɛkɛ ne la, akee me nwo vɔle.

Mɔɔ melɛsu la, ɛnee melɛsɛlɛ Gyihova. (Edwɛndolɛ 56:8) Akee membɔle ɔ bo kɛ medwenle ewudwazo ne anwo kpalɛ. Akee menwunle kɛzi anyelazo ɛhye yɛ anyelielɛ la! Gyihova badwazo mgbavolɛ zɔhane mɔ ara ngoane nu, na bɛanyia nwolɛ adenle bɛazukoa ɔ nwo nɔhalɛ ne. Ewudwazo ne baye nyane nee amaneɛnwunlɛ mɔɔ ɛdo yɛ la amuala avi ɛkɛ. (Gyima ne 24:15) Mɔɔ menwunle ye zɔhane la, ɔmaanle Gyihova anwo ɛlɔlɛ mɔɔ melɛ la yɛle kpole dɛlale dɛba ne. Mekɛ zɔhane tɛsonle bolɛ tɛmaa me. Ɔvi mekɛ zɔhane, mekɛ biala mɔɔ ngyegyelɛ bado me la, mebɔ mɔdenle kɛ mebahakye ɛlɔlɛ mɔɔ menlimoale menyianle memaanle Gyihova la.

Menli yɛ ninyɛndane wɔ konle nu, na zɔhane ala a menyɛle a. Noko ngɛlɛlera nwiɔ mɔɔ me nye die nwo na medwenledwenle nwo la ɛkyekye me rɛle. Mɔɔ limoa la a le Yekile 12:10, 11. Ɔse yɛdua Gyisɛse mogya ne azo nee yɛ daselɛlilɛ ne azo yɛdi Abɔnsam anwo zo konim. Mɔɔ tɔ zo nwiɔ la a le Galeehyeama 2:20 mɔɔ ɔkakye me kɛ Gyisɛse wule maanle me la. Ɔyɛ me fɛ kɛ ɔlua Gyisɛse afɔlebɔlɛ ne azo, Gyihova ɛva mɔɔ meyɛ la ɛhyɛ me la. Yemɔti kɛkala melɛ adwenle mɔɔ anu te la na mekulo kɛ meka Gyihova, yɛ anwunvɔnezelɛ Nyamenle ne anwo edwɛkɛ mekile awie mɔ!—Hibuluma 9:14.

Saa medwenle mɔɔ menwu ye wɔ ɛbɛlabɔlɛ nu la anwo a, ɔmaa menwu ye kɛ dahuu Gyihova nea me kpalɛ. Kɛ neazo la, Jim dele kɛ meda me kale ne anu la, ɔhɔhilele me adiema raalɛ bie mɔɔ fa sua haye awie mɔ la. Medie medi kɛ Gyihova luale Jim nee adiema raalɛ ne anwo zo maanle menyianle sua kpalɛ. Gyihova le kpalɛ kpole! Ɔnea ye nɔhalɛ azonvolɛ.

Ɛnee ɔwɔ kɛ mesia mekɔ Michigan wɔ May 1971. Yemɔti kolaa na meavi Florida la, menvale mbuluku dɔɔnwo menguale me kale ne anu, na akee mengɔle sɔlɔ. Kolaa na meavi suakpole Georgia azo la, ɛnee meva mbuluku ne amuala memaa. Membɔle mɔdenle membɔle Belemgbunlililɛ edwɛkpa ne nolo wɔ ɛleka biala mɔɔ mebahɔ la. Menganle edwɛkɛ ne wɔ efiade, eza memaanle awie mɔ trate wɔ ɛleka mɔɔ bɛsiezie bɛ nwo la. Mengola mennwu ye saa menli mɔɔ me nee bɛ dendɛle la bie mɔ zukoale nɔhalɛ ne a.—1 Kɔlentema 3:6, 7.

Nɔhalɛ nu, menlimoale menzukoale nɔhalɛ ne la, ɛnee tɛ mekɛ ne amuala a memaa me nye da ɛkɛ a, titili saa melɛdi me abusua ne daselɛ a. Ɔdwu mekɛ ne bie a meka edwɛkɛ ne penyi penyi. Ɛnee mekulo me mediema John nee Ron edwɛkɛ kpalɛ, yemɔti saa melɛdi bɛ daselɛ a, mebɔ mɔdenle kɛ memaa bɛalie me diedi fofolɛ ne bɛado nu. Nzinlii, ɛnee ɔwɔ kɛ mekpa bɛ kyɛlɛ. Noko menzɛlɛle dahuu kɛ bɛkɛlie nɔhalɛ ne bɛkɛdo nu. Ɔvi mekɛ zɔhane mɔɔ ba la, Gyihova ɛboa me, yemɔti saa melɛka edwɛkɛ anzɛɛ melɛkilehile a memaa me nye da ɛkɛ.—Kɔlɔsaema 4:6.

Agɔnwolɛvalɛ mɔɔ me nee Gyihova lɛ la balimoa me ɛbɛlabɔlɛ nu dahuu. Noko menli bie mɔ wɔ ɛkɛ mɔɔ mekulo bɛ kpalɛ a, titili me ye Susan. Ɛnee dahuu me nye la kɛ mebanyia raalɛ mɔɔ ɔbaboa me yeamaa meahɔ zo meazonle Gyihova la. Susan bɔ mɔdenle na ɔkulo Gyihova kpalɛ. Mɔɔ ɛnee yɛlɛtu kɛ yɛbagya la, mengɔle bɛ sua nu ɛkɛ kɛ mekakpɔla ye wɔ Rhode Island. Ɛnee ɔde bɛ abenlana ne  anu ɔlɛkenga Ɛzinzalɛ Arane ne yɛɛ ɔlɛ ye Baebolo ne. Mɔɔ me nye liele nwolɛ la a le kɛ tɛkese biala mɔɔ wɔ nu la ɔbabuke yeagenga ɔnva nwo kɛ ɛnee ɔnle edwɛkɛ mɔɔ bɛbazukoa la. Menwunle kɛ agɔnwolɛvalɛ mɔɔ ɔ nee Gyihova lɛ la hyia ye kpalɛ. Yɛgyale wɔ December 1971. Ɔyɛ me fɛ kɛ menyia raalɛ ɛhye mɔɔ ɔboa me la. Ɔkulo me ɛdeɛ, noko mɔɔ me nye die nwo kpole la a le kɛ ɔkulo Gyihova kpalɛ.

Gyihova ɛmaa yɛ mralɛ mrenyia ngɛnlɛma nwiɔ, Jesse nee Paul. Gyihova hilele bɛ adenle wɔ mekɛ mɔɔ ɛnee bɛlɛnyi la. (1 Samoɛle 3:19) Biala nee ye lɛ agɔnwolɛvalɛ kpalɛ, na ɛhye maa yɛ nye die kpole. Biala ɛva ɛvolɛ mɔɔ bo 20 la ɛyɛ dahuu ɛzonlenlɛ gyima ne bie. Bɛlɛkɔ zo bɛazonle ye ɔluakɛ bɛdabɛ noko bɛkakye alimoa ɛlɔlɛ mɔɔ bɛnyianle bɛmaanle ye la. Eza me nye die Stephanie nee Racquel, mraalɛ mɔɔ me mra ne mɔ gya bɛ mɔɔ mebu bɛ kɛ me mra mraalɛ la anwo kpole. Ɔyɛ me fɛ kɛ me mra ne mɔ ɛgya mraalɛ mɔɔ bɛkulo Gyihova na bɛlɛfi bɛ ahonle nu bɛazonle ye la.—Ɛfɛsɛsema 6:6.

Menzonlenle ɛvolɛ 16 wɔ Rhode Island, na menyianle agɔnwolɛma dɔɔnwo wɔ ɛkɛ. Metɛkakye mgbanyima ne mɔ mɔɔ me nee bɛ zonlenle la. Eza meyɛ neavolɛ adenduvoma ngakyile mɔɔ bɛboale me la mo. Ɔle nwolɛ adenle kɛ me nee mrenyia mɔɔ bɛkakye ɛlɔlɛ mɔɔ bɛlimoale bɛnyianle  bɛmaanle Gyihova la sonle la. Wɔ 1987, yɛhɔle North Carolina, ɛleka mɔɔ bɛhyia moalɛ dɔɔnwo la, eza yɛnyianle agɔnwolɛma kpalɛ dɔɔnwo. *—Nea ɔ bo ɛkɛ ne edwɛkɛ

Wɔ August 2002, bɛmaanle me nee Susan hɔbokale United States Bɛtɛle abusua ne mɔɔ wɔ Patterson la anwo. Menyɛle gyima wɔ Service Department yɛɛ Susan noko yɛle gyima wɔ ɛleka mɔɔ bɛkpo ninyɛne la, na ɛnee ɔ nye die nwo kpalɛ! Menyianle nwolɛ adenle membokale Neazo Eku ne anwo wɔ August 2005. Ɛnee mete nganeɛ kɛ menfɛta gyimalilɛ fofolɛ ɛhye. Gyima mɔɔ yɛbayɛ nee nwolɛ adendulɛ ne maanle Susan noko ahonle dule. Ɛnee ɔ nye ɛnlie alopile adendulɛ nwo, noko yɛvale alopile yɛdule adenle dɔɔnwo. Neazo Eku ne anu amra gyɛne aye mɔ folɛdulɛ kpalɛ ne boale ye kpole. Ɔmaa ɔnyia ɛhulolɛ kɛ ɔbaboa me, na yemɔ maa mekulo ye kpole!

Nvoninli ngɛnlɛma dɔɔnwo wɔ me ɔfese ɛkɛ ne mɔɔ maa mekakye ninyɛne mgbalɛ mɔɔ meyɛ la. Ɛlɔlɛ mɔɔ menlimoale menyianle memaanle Gyihova mɔɔ mekakye la ɛmaa menyia nyilalɛ dɔɔnwo!